Umi mbaʼe jaikuaaséva

◼ Mbaʼérepa ipeligrósota ñañemongetáramo ndajaikuaáiva ndive Internét rupive?

Internétpe oñemoĩ heta lugár ikatuhápe ñañemongeta ñande rapicha ndive ha jaikuaa chupekuéra. Umichahápe ikatu ñamoĩ ñande fóto, ñande réra, mbaʼeichaguápa ñande ha hetave mbaʼe, ikatu hag̃uáicha umi oiporúva Internét oñemongeta avei ñanendive. Koʼã lugár oiporuve mitãrusu ha mitãkuñanguéra. Kongregasiónpe oĩ avei ojapóva upéva oñemongeta hag̃ua umi heʼíva ndive ijehe testigo de Jehováha.

Ndahasyiete umi jaikuaáva Internét rupive oñomi hag̃ua mávapa hína añetehápe, mbaʼépepa og̃uahẽse térã mbaʼéichapa oĩ Ñandejára renondépe (Sal. 26:4). Peteĩ oñemosẽmavaʼekue kongregasióngui, peteĩ ndojeroviáiva Jehováre térã oñemoĩva hese, ikatu heʼi ijehe testigo de Jehováha (Gál. 2:4). Oñemombeʼu avei, umi hekovaíva oiporuha Internét oity hag̃ua iñuhãme umi mitãme.

Jagueroviáramo jepe oĩ porãha kongregasiónpe umi ñañemongetaha Internét rupive, peteĩ tesapirĩme ikatu ñañemongetañaína heta mbaʼe naiporãivare. Upéva upéicha, ndajahechái rupi chupekuéra ha nañatĩri ñañemongeta hag̃ua. Ikatu ñapensa ansianokuéra térã ñande ru ha ñande sy nañanerendúi térã nañanderechái rupi ndoikuaamoʼãiha mbaʼérepa ñañemongetañaína. Ñambyasýramo jepe, heta mitãkuña ha mitãrusu testigo de Jehová, hoʼa ko ñuhãme ha oñepyrũ iñeʼẽ tieʼỹ (Efe. 5:3, 4; Col. 3:8). Oĩ umi oiporúvo koʼã lugár Internétpe omoĩva ifóto oñemotieʼỹhápe, omoĩ héra guaʼu térã oñembohéra tieʼỹ, omoĩ avei umi vidéo músika reheve ohechauka porãva mbaʼe tieʼỹ.

Opa koʼã mbaʼére, tuvakuéra oikuaavaʼerã mbaʼépa ojapohína itaʼyrakuéra komputadórape (Pro. 29:15). Ipeligrósota ñamog̃uahẽramo ñande rógape peteĩ ndajaikuaáivape térã jaheja hendivénte ñande famíliape. Upeichaite avei ipeligrósota tahaʼe ñande térã umi imitãva, jahekáramo ñane amigorã Internétpe, heʼíramo jepe hikuái testigo de Jehováha (Pro. 22:3).