Mbaʼérepa jaha jey jey
1. Mbaʼépa ikatu ñañeporandu ñane predikasión rehe?
1 Heta henda rupi pyʼỹietereíma japredika. Jaha jey jey umi óga jára rendápe, heʼíramo jepe ñandéve hikuái ndoikuaaseiha mbaʼeve. Mbaʼérepa jaha jey jey umi óga jára nañanerenduséiva rendápe?
2. Mbaʼérepa jasegi japredika?
2 Jahayhúgui Jehovápe ha ñande rapichakuérape. Ñande niko jasegi japredika jahayhu añetégui Jehovápe. Ñane korasõ ñanemomýi ñañeʼẽ hag̃ua ñande rapichakuérape Ñandejára ijojahaʼỹvare (Luc. 6:45). Jahayhúgui Jehovápe jajapo heʼíva ha ñaipytyvõ ñande rapichakuérape iñeʼẽrendu hag̃ua avei (Pro. 27:11; 1 Juan 5:3). Jasegi japredika ndahaʼéi katuete ñanerendu porãtagui umi óga jára. Umi kristiáno ypykuépe ojepersegírõ guare, haʼekuéra osegintevaʼekue opredika (Hech. 5:42). Ñanekangyrangue oĩgui nañanerenduséiva, ñande jasegi japredika kyreʼỹme. Upéicha jahechauka mbaʼeichaitépa jahayhu ha ñamombaʼe Jehovápe.
3. Mbaʼéichapa pe mborayhu ñanemomýi jasegi hag̃ua japredika?
3 Jasegi avei japredika jahayhúgui ñande rapichakuérape (Luc. 10:27). Jehová ndoipotái avave oñehundi (2 Ped. 3:9). Umi território pyʼỹi japredikahápe jepe jajuhu umi tapicha oserviséva Jehovápe. Pór ehémplo, oĩ peteĩ ísla hérava Guadalupe. Upépe 56 apytégui peteĩ haʼe testígo de Jehová, ha pe áño ohasavaʼekuépe ojevautisákuri 214 disípulo pyahu. Ha Conmemoraciónpe katu haimete veinte mil ojehókuri, upéva heʼise 22 apytégui ohohague 1 tapicha oikóva upépe.
4. Mbaʼéichapa okambia ñande território?
4 Ñande território ikatu okambia. Pyʼỹinteko okambia ñande território. Jaha jeývo peteĩ ógape, avave nañanerenduihaguépe, ikatu oñatende porã ñanderehe peteĩ neʼĩrava gueteri ohendu pe marandu porã. Térã ikatu oĩ ovaramóva ñande territóriope ha ohenduséva pe marandu. Sapyʼánte avei umi tuvakuérante nohenduséi ñane marandu porã. Péro umi itaʼyrakuéra okakuaapa ha osẽ vove hógagui, ikatu ñanerenduse.
5. Mbaʼe ohasa rirépa heta oĩ ohenduséva ñane marandu?
5 Ñande rapicha voi ikatu okambia. Apóstol Pablo niko yma ‘oñeʼẽ vai, oporopersegi ha oporojaʼovaʼekue’ (1 Tim. 1:13, BNP). Upéicha avei, heta koʼag̃agua ñane ermáno ndoikuaaseivaʼekue mbaʼeve Jehovágui ha oñemoĩ katu pe marandu porãre. Heta mbaʼe ivaive ohóvo ko múndope. Upévare heta tapicha nohenduseivaʼekue ñane marandu térã ndoikuaaseivaʼekue mbaʼeve, ikatu peichahágui ñanerenduse avei. Ikatu avei oĩ umi ñanerenduséva ohasa rire peteĩ mbaʼe ijetuʼúva, ñamoĩ chupe omanohague peteĩ hogaygua, oñemosẽ itravahohágui, isogue térã hasykatuhague.
6. Mbaʼérepa jasegivaʼerã japredika kyreʼỹme?
6 Umi mbaʼe vai oikóva ko múndope og̃uahẽmbotaitéma huʼãme, péro pe marandu porã jaraháva ha ñamboʼéva katu iñasãive rei opárupi (Isa. 60:22). Upévare, jasegíkena japredika kyreʼỹme ha ani ñanekangy. Ikatu hína ñanerendu porã pe tapicha ñañeʼẽtaha. Ha ndahaʼéiramo jepe upéicha, jasegivaʼerã japredika. ‘Jajapóramo upéicha, ñandejupe voi jajesalváta ha umi ñanerendúvape avei.’ (1 Tim. 4:16, BNP.)