Mbaʼéicha piko ohendúta?
1. Mbaʼérepa ijetuʼu jepi japredika, péro mbaʼépa ñapensavaʼerã?
1 Jehová ára ningo hiʼag̃uimbaitéma, upévare tekotevẽterei ñaipytyvõ ñande rapichakuérape oikuaa hag̃ua chupe ha umi mbaʼe haʼe ojapótava (Juan 17:3; 2 Ped. 3:9, 10). Jaikuaaháicha upéva ijetuʼu jepi oĩgui nopenáiva ñanderehe térã oñembohorýva ñane predikasión rehe (2 Ped. 3:3, 4). Upéicharamo jepe ñapensavaʼerã oĩha gueteri tapicha ipyʼaporãva ha ohendútava pe marandu porã. Péro, mbaʼéicha piko ohendúta ndaipóriramo peteĩ omombeʼúva chupekuéra? (Rom. 10:14, 15.)
2. Mbaʼéichapa ñanemokyreʼỹ apóstol Pablo ehémplo?
2 Oĩramo oñemoĩva ñanderehe. Pe marandu porã ningo ikatu oipytyvõ umi ipyʼaporãvape, upévare aníkena jakyhyjétei ñamombeʼu hag̃ua opavavépe. Ñanemanduʼamína mbaʼépa oikovaʼekue apóstol Pablo opredikárõ guare táva Filípospe. Upérõ oĩ oñeʼẽ vaíva Pablo ha Silas rehe, upéicha rupi peteĩ hénte aty oinupã chupekuéra yvyrápe ha oguerahauka chupekuéra kárselpe (Hech. 16:16-24). Opytáparaʼe Pablo okyhyje upévare? Nahániri, upe riremi oho Tesalónicape ha upépe oipytyvõ oñepyrũ hag̃ua peteĩ kongregasión. Añetehápe ningo Ñandejára espíritu ombopyʼaguasu Páblope (1 Tes. 2:2). Péicha jahecha ndajakyhyjeivaʼerãha. Aje piko iporãite iñehémplo! (Gál. 6:9.)
3. Mbaʼéicha rupípa heta tapicha ikatu okambia?
3 Heta tapicha nohenduseivaʼekue ñane predikasión ikatu okambia. Mbaʼéicha rupípa? Ikatu isogue, hasy, ihentemano térã ohendu peteĩ notísia opokóva hese ha upéicha rupi okambia (1 Cor. 7:31). Oĩ avei ndaikatuivaʼekue ohendu pe marandu porã imitãrõ guare ituvakuéra ndoipotáigui. Péro koʼág̃a okakuaa rire ikatúma ñanerendu. Koʼág̃a ningo oĩ gueteri tiémpo koʼã tapicha omombaʼeguasu hag̃ua Jehovápe, upévare japredika memékena (Rom. 10:13).
4. Mbaʼépa ñanepytyvõta japredika hag̃ua kaneʼõʼỹre?
4 Japredikákena kaneʼõʼỹre. Jahayhúramo Ñandejárape ha ñande rapichakuérape ikatúta japredika ha ñaporomboʼe kaneʼõʼỹre, ojapohaguéicha umi apóstol (Hech. 5:42). Koʼág̃a ningo heta oĩ ‘oñembyasýva ha ojepyʼapýva umi mbaʼe vaieta’ oikóvare (Eze. 9:4). Ñapensamíntena mbaʼeichaitépa ipyʼaguapýta umi hénte ohendúvo pe marandu porã! Jaikuaaháicha hetave oĩta nañanerenduséiva, upéicharamo jepe Bíbliape heʼi Jehová omombaʼetereiha upe jajapóva (Heb. 13:15, 16).