Jasegíkena japredika

¹ Ikatu ningo pyʼỹieterei japredikapa ñande território ha ndoikói mbaʼeve. Upéicharõ jepe, jasegivaʼerã japredika (Mat. 28:19, 20).

² Ñaporomomarandu. Jesús heʼivaʼekue ojepredika rupi ojekuaataha ojeikoha ‘ára pahápe’. Ha upévare ‘opa tetãnguéra ohenduvaʼerã’ pe marandu porã (Mat. 24:3, 14). Upeichaite ningo, japredika jave ñamomaranduñaína ñande rapichakuérape. Oĩ avei umi nañanerenduséiva, péro ñasẽ rire hogakuéragui ikatu opyta oñeʼẽ hikuái ñane rembiapóre. Jaikuaáramo mbaʼérepa japredika ñanepytyvõta ani hag̃ua ñanekaneʼõ. Jehová ningo ñandeguerohoryhína ñakumpli jave umi profesía heʼíva japredikavaʼerãha. Upéicha avei ñamomarandu ñande rapichakuérape Jehová oporohusgataha (2 Tes. 1:6-9).

³ Nañanekaneʼõiramo jahupytýta heta mbaʼe porã. Ñande rapichakuéra ningo heta mbaʼe oreko ojapovaʼerã ha upéva rupi naitiémpoi hikuái. Upéicharõ nañanekaneʼõivaʼerã ñaipytyvõ hag̃ua umi ñande rapicha oikuaasevévape Ñandejárape. Peteĩ kuñakarai rendápe káda semána ñane ermanokuéra oho jepi opredika hag̃ua. Ha un áño haguépe ombohasa chupekuéra hógape oñemongeta hag̃ua hikuái la Bíbliare. Omombaʼeterei ojeʼéva chupe ha ostudiaséma voi. Oho rreunionhápe ha upe riremínte ojevautisaséma.

⁴ Heta mbaʼe ningo okambia ko múndope. Upéicha avei ñande rapichakuéra okambia. Umi nañanerenduseivaʼekue yma, ikatu koʼág̃a ohenduséma pe marandu porã. Ha peteĩ tapicha jepe omombaʼéramo pe marandu porã, jahecháta nañañehaʼãreíri hague.

⁵ Oparupiete ningo heta hetave oĩ ‘umi oñembyasýva ha ojepyʼapýva mbaʼe vaieta oikóvare’ (Eze. 9:4). Ñane predikasión rupive ojehupytýmava, ohechauka umi ipyʼaporãva omombaʼeha pe marandu porã (Isa. 2:2, 3). Upévare, akóintekena ñañeʼẽ pe marandu porãre (Isa. 52:7; Hech. 5:42).