Ñañembosakoʼíkena ñaikuaveʼẽ hag̃ua noviémbrepe peteĩ ¡Despertad! iporãitereíva!
1 Heta ñande rapicha oikuaase jepi mbaʼérepa la Biblia iñimportantete. Oñeporandu jepi hikuái: “Oiméramo yvypóra rembiapokuénte, mbaʼérepa ojeʼe hese Ñandejára Ñeʼẽha? Mbaʼérepa ajapovaʼerã heʼíva ipype? Iporãtapa amboyke che tiémpo alee ha astudia hag̃ua? Mbaʼeichagua Bíbliapa aleevaʼerã?”. Koʼãichagua porandu ombohovaitahína ko ¡Despertad! noviembrepegua. Ijape rehe heʼíta “¿Se puede confiar en la Biblia?”.
2 Ñande ningo ñamog̃uahẽse opavavépe ñande territóriope ko rrevísta. Upévare, ikatúma guive ñasẽvaʼerã japredika ñane kongregasión ndive káda sábado ág̃a noviémbrepe. Ñaikuaveʼẽkena ko rrevísta ñane hentekuérape, ñane vesíno, ñane kompañéro de traváho, ñane mboʼehára, ñane kompañerokuéra eskuelapeguápe ha umi ñande rrevisítape. Aníkena ñanderesarái jagueraha hag̃ua ko ¡Despertad! porãite jaha jave ñambaʼejogua térã javiaha jave. Ansianokuéra ojerurevémakuri ikatu hag̃uáicha jareko ñaikotevẽtava.
3 Ñañehaʼãkena ñamoñepyrũ peteĩ estúdio: Oĩramo ohejáva ñande rrevísta, jaʼevaʼerã chupe jaha jeyseha, ha upéicha ñamoñepyrũ hag̃ua peteĩ estúdio. Ikatu jaʼe chupe: “Ág̃a aju jeývape ahechaukasemi ndéve la Biblia omombeʼuha maʼerãpa Ñandejára ojaporakaʼe ko Yvy?”. Jaha jeývape jaguerahavaʼerã pe lívro Mbaʼépa omboʼe la Biblia? ha jahechauka chupe umi páhina 4 ha 5, térã jahechaukántema chupe kapítulo 3-pe, párrafo 1 guive 3 peve. Ikatu avei jaʼe: “Ág̃a ótro ajúvape, amombeʼusemi ndéve mbaʼéichapa oñekumplihína peteĩ profesía oĩva la Bíbliape”. Jaha jey vove ikatu jahechauka chupe pe kapítulo 9 ha ñahesaʼỹijo hendive párrafo 1 guive 3 peve. Térã jaʼekuaa chupe: “Hetápe ningo hasy ontende hag̃ua la Biblia. Ótro ajúvape, ahechaukase ndéve mbaʼéichapa ikatu rentende porãve nde Biblia relee jave”. Jaha jey vove hendápe, ñaikuaveʼẽ chupe pe lívro Mbaʼépa omboʼe la Biblia? ha jahechauka chupe mbaʼéichapa ikatu jastudia hendive.
4 La Bíbliape añoite oĩ “Ñandejára Ñeʼẽ” ñanemoarandútava jajesalva hag̃ua (2 Tim. 3:15). Katuete ningo enterove kyreʼỹme ñamog̃uahẽséta opárupi ko ¡Despertad!, upéicha ñaipytyvõtañaína hetápe ojerovia hag̃ua la Bíbliare.