Ñambotapykuepañaína?
Mbaʼérepa ñañeʼẽñaína? Ñamyenyhẽ hag̃ua ñande tarhéta Durable Power of Attorney (DPA). Upéva ningo opavave testigos de Jehová iporã oguereko. Ndajaikuaainingo ‘mbaʼépa ojehúta ñandéve koʼẽrõ’, upévare, ñaikotevẽtarõ g̃uarã, iporã jaikuaa mbaʼéichapa jaipota oñeñatende ñanderehe ha mbaʼépa nañandegustái. Koʼã mbaʼe ñamoĩkuaamañaína ñande tarhétape (Sant. 4:14; Hech. 15:28, 29). Ojejapovaʼekue peteĩ vidéo ñanepytyvõtava jadesidi porã hag̃ua koʼã mbaʼépe. Ko vidéo héra: Asistencia médica sin transfusiones. Necesidades y derechos del paciente. Jahechamíkena ha upéi ñañemboʼe Jehovápe ñambohovái hag̃ua umi porandu oñemoĩva koʼápe. (Tuvakuéra oñatendevaʼerã ifamília michĩvévare ohecha jave ko vidéo, pórke ohechaukaʼimihína ojejapo jave operasión)
1) Mbaʼérepa heta doktór ohecha jey hína añetehápepa iporã ñamoĩuka tuguy? 2) Emombeʼu mbohapy operasión ijetuʼúva ha ikatúva ojejapo oñemoĩukaʼỹre tuguy. 3) Mboy doktórpa oĩ heʼíva oñatendetaha umi hasývare omoĩʼỹre chupekuéra tuguy? Mbaʼérepa heʼi ojapotaha hikuái upéicha? 4) Ramoite heta ospitalháre ojestudia iporãtapa ojeporu tuguy, mbaʼépa ohechakuaa hikuái upévare? 5) Mbaʼépa ikatu oiko ñanderehe ñamoĩukáramo tuguy? 6) Mbaʼépa heʼi heta doktór ohecha rire iporãveha ojeporu ambue tratamiénto, oñemoĩukarangue tuguy? 7) Mbaʼérepa oĩ ñande rapicha huguy kangyetereíva? Mboy grámo peve oguejýramo ñande ruguýpa ikatu gueteri jagueropuʼaka? Mbaʼépa ikatu ojejapo upéicha jave? 8) Mbaʼépa ikatu ojejapo, pyaʼe oñembohetave hag̃ua pe eritrocitos (glóbulos rojos) oĩva ñande ruguýpe? 9) Mbaʼépa ikatu ojejapo pono huguyeterei peteĩ tapicha ojopera jave? 10) Ojoperáta jave peteĩ mitã térã peteĩ tapicha ndaikatuvéimava ohaʼarõ, ikatúnepa ojeporu avei umi tratamiénto ojejapóva ani hag̃ua oñemoĩ tuguy? 11) Mbaʼépa ojeʼe ojejapovaʼerãha oñeñatende porã hag̃ua peteĩ tapicháre? 12) Mbaʼérepa ñande kristiáno iporã voi reheve ñamombeʼu jaipotaha peteĩ tratamiénto ndojeporuihápe tuguy? Mbaʼéichapa ikatu jajapo upéva?
Ñandete jadesidivaʼerã jaipotátapa umi tratamiénto ojehechaukáva ko vidéope ha jadesidivaʼerã jahecha rire Ñandejára Ñeʼẽ heʼíva. Redesidímapa mbaʼeichagua tratamiéntopa reipotáta nde ha ne famíliape g̃uarã? Rejuhuvéta oñeʼẽva koʼã mbaʼére La Atalaya 15 de junio 2004-pe, “Preguntas de los lectores” heʼihápe ha avei 15 de octubre 2000-peguápe. Oĩ avei pe supleménto osẽvaʼekue Ñane Rembiapo Rréino Reheguápe, noviembre 2006, heʼihápe: “Mbaʼépa apensa umi párte michĩvévare oĩva tuguýpe ha umi tratamiénto ikatuhápe ojeporu che ruguy?”. Katuete ne rrepresentánte ha ne hentekuéra, ndahaʼéiramo jepe testigo de Jehová, oikuaavaʼerã mbaʼépa nde redesidi.