Oĩramo oñeʼẽva ambue idiómape
1. Mbaʼérepa umi kongregasión tekotevẽ oñehaʼã ombaʼapo porã oñondive?
1 Opárupi, pyʼỹinte japredika jave jajuhu ñande rapicha oñeʼẽva ótro idiómape, ha ohenduse avei pe marandu porã. Upévare, ikatu hag̃uáicha oñepytyvõ koʼã tapichápe, heta sukursál heʼi ojejapo hag̃ua grúpo ha kongregasión oñeʼẽva ótro idiómape. Peteĩ lugárpe ikatu voi oĩ heta tapicha oñeʼẽva ótro idióma. Ha ikatu oĩ heta kongregasión opredikavaʼerã upépe. Mbaʼépa ojapokuaa koʼã kongregasión opredika hag̃ua hekópe porã? (1 Cor. 14:33.)
2. Japredika jave ogaha rupi, mbaʼéichapa ikatu ñambaʼapo porã umi grúpo térã kongregasión ñande territóriope oĩva ndive?
2 Jajapovaʼerã hekópe porã. Japredika jave tapére térã oimeraẽ hendápe, ikatu japredika tahaʼe haʼévape, oñeʼẽramo jepe ótro idióma. Ikatu ñaikuaveʼẽ chupe umi lívro térã folléto jarekóva iñeʼẽme. Péro japredika jave ogaha rupi ha oĩramo ótro grúpo opredikáva ambue idiómape, ñande japredikantevaʼerã umi ñane idiómape oñeʼẽvape. Heta kongregasión opredikáramo peteĩ territóriope, iporãta umi superintendénte de servísio oñemongeta pyʼỹi. Upéicharõmante omohenda porãta hikuái mbaʼeichaitépa ojepredikáta. Ha upéicha ojapóta hikuái hekoitépe opa mbaʼe (Pro. 11:14). Peteĩ puvlikadór opredika jave ogaha rupi ikatu ojuhu peteĩ tapicha oñeʼẽva ótro idiómape. Ha ndaipóriramo ag̃ui peteĩ kongregasión, oñehaʼãmbaitevaʼerã oipytyvõ pe tapicha oikuaasevévape Ñandejárape.
3. Mbaʼépa jajapovaʼerã jajotopáramo territóriope ambue kongregasiongua ndive?
3 Peteĩ tembiapónte jajapo. Mbaʼépa jajapóta peteĩ kongregasión ohóramo opredika hag̃ua ñande japredikatahápe avei? Ñande kristianokuéra ningo jajoayhu ha ñaipytyvõse umi ñande territóriope oikóvape (Juan 13:34, 35). Upéicharõ umi omoakãva ko tembiapo imbaʼerechakuaavaʼerã. Ikatu peteĩ grúpo ohónte ótro hendápe opredika (Sant. 3:17, 18).
4. Mbaʼe heʼíva Ñandejára Ñeʼẽpa oñekumplihína koʼág̃a?
4 Ñandejára Ñeʼẽ heʼimavaʼekue voi opa tetãme oĩvaʼerãha ohendúva iñeʼẽtépe pe marandu porã (Rev. 14:6, 7). Opavave ñañopytyvõramo, nañambaʼaporeimoʼãi ha hetavépe ñamog̃uahẽta pe marandu porã, tahaʼe haʼéva idiómape (Efe. 4:16).