Jaikuaaukákena umi mbaʼe iporãitereíva
1 Opavavénte ningo jaikuaa oĩha hetaiterei mbaʼe porã Ñandejára Ñeʼẽme (Sal. 12:6; 119:11, 14). Peteĩ jave, Jesús omombeʼu rire heta ehémplo ohechaukáva mbaʼépa Ñandejára Rréino, oporandu idisipulokuérape: “Peikuaápa mbaʼépa heʼise koʼã mbaʼe?”. Haʼekuéra heʼi oikuaaha, upémarõ Jesús heʼi chupekuéra: ‘Umi Ñandejára léi omboʼéva ha oikuaáva pe rréino yvagapegua, ojogua ku óga jára oguenohẽvape imbaʼyrúgui mbaʼe ipyahúva ha itujáva’ (Mat. 13:1-52, BNP).
2 Mbaʼépa hína umi mbaʼe itujáva? Umíva hína umi mbaʼe jaikuaa ñepyrũ vaʼekue Jehovágui. Ha umi mbaʼe ipyahúva? Umíva katu jaikuaa jahávo ñahesaʼỹijo rupi umi mbaʼe hypyʼũvéva oĩva Ñandejára Ñeʼẽme (1 Cor. 2:7). Ha jaikuaa avei umi mbaʼe pyahu pe ‘tembiguái jeroviaha ha iñarandúva’ omyesakãvo ñandéve umi mbaʼe ymave noñentendeporãivaʼekue (Mat. 24:45).
3 Tekotevẽ ñamombaʼe jaikuaáva Jehovágui ipyahu térã itujáramo jepe. Upévare akóinte ñañehaʼãvaʼerã ñandekatupyryve ñamboʼe hag̃ua Ñandejára Ñeʼẽ opavavépe.
4 Jesús ehémplo. Jesús omombaʼetereivaʼekue umi mbaʼe ijojahaʼỹva oikuaáva Jehovágui. Upévare heta ojesakrifikavaʼekue oikuaauka hag̃ua umi héntepe pe marandu porã. Sapyʼánte ningo ikaneʼõiterei péro upéva ndojokói chupe (Juan 4:6-14).
5 Haʼe ombyasy umi hénte ndoikuaái haguére Ñandejárape. Ohayhu ha oipotágui ojesalva opredika chupekuéra (Sal. 72:13). Oiporiahuverekógui avei “omboʼe ichupekuéra heta mbaʼe” (Mar. 6:34, BNP).
6 Jajapókena Jesús ojapo haguéicha. Jesús ningo ohechaukavaʼekue omombaʼetereiha umi mbaʼe oikuaáva Ñandejáragui. Ñande avei ñamombaʼéramo, kyreʼỹme jaiporúta la Biblia jahechauka hag̃ua umi mbaʼe ijojahaʼỹva oĩva ipype (Pro. 2:1-5). Avei ñañehaʼãta ñamombeʼu ñande rapichakuérape ñanekaneʼõramo jepe (Mar. 6:34). Jajapókena opa ikatúva ñamombeʼuve hag̃ua umi mbaʼe ijojahaʼỹva oĩva Ñandejára Ñeʼẽme. Upéicha jahechaukáta ñamombaʼeha ko tembiapo.