Che ndachekatupyrýi apredika hag̃ua!
1. Mbaʼérepa nañapensaivaʼerã nañandekatupyryiha japredika hag̃ua?
1 Oimérõ reñeñandu jepi péicha, ani reheja upéva nemokangy. Japredika hag̃ua Ñandejára Ñeʼẽ ningo natekotevẽi ñande estúdio porã térã ñandevaleterei. Ñanemanduʼa yma umi Jesucristo remimboʼére ojeʼe hague haʼeha ‘kuimbaʼe iñaranduʼỹva’, upéicharõ jepe haʼekuéra opredika porãiterei vaʼekue pe marandu porã. Mbaʼéicha rupípa? Haʼekuéra kyreʼỹme osegi Jesús ehémplo (Hech. 4:13; 1 Ped. 2:21).
2. Emombeʼu mbaʼéicha rupípa Jesús oporomboʼe porãite vaʼekue.
2 Mbaʼéichapa oporomboʼevaʼekue Jesús. Haʼe omboʼéva ningo ndahasyiete oñentende hag̃ua ha hesakã porãiterei. Jesús oikekuaa umi héntepe ha oiporu umi porandu ha ehémplo iporãitereíva, upéicha rupi haʼekuéra ijurujaipa hese oporomboʼe jave (Mat. 6:26). Jesús ohechaukavaʼekue umi héntepe ojepyʼapyha hesekuéra (Mat. 14:14). Haʼe oikuaa Jehová ombou hague chupe opredika hag̃ua. Upévare oñeʼẽ kyhyjeʼỹre ojeroviágui Itúva oipytyvõtaha chupe (Luc. 4:18).
3. Mbaʼéichapa Jehová ñanepytyvõ japredika hag̃ua?
3 Jehová ñanepytyvõ. Ñane Mboʼehára Ijojahaʼỹva, oiporu Iñeʼẽ ha iñorganisasión ohechauka hag̃ua ñandéve mbaʼéichapa japredikavaʼerã hekoitépe pe marandu porã (Isa. 54:13). Jehová ohaika iñeʼẽme mbaʼéichapa Jesús oporomboʼevaʼekue ha ñande ikatu ñahesaʼỹijo upéva ha ñahaʼanga chupe. Haʼe omeʼẽ ñandéve ijespíritu sánto ha ñanerekomboʼe rreunionhápe (Juan 14:26). Ha avei umi ermáno ikatupyrýva rupive Ñandejára ñanepytyvõ ñaporomboʼe porãve hag̃ua.
4. Mbaʼérepa jajeroviavaʼerã ikatuha japredika hekoitépe pe marandu porã?
4 Upéicharõ, aníkena ñaimoʼã nañandekatupyryiha japredika hag̃ua. Ñanemanduʼavaʼerã la Biblia heʼívare: ‘Opa mbaʼe jajapo Ñandejára ñanepytyvõguinte’ (2 Cor. 3:5, BNP). Jajeroviárõ Jehováre ha jaiporu opa mbaʼe omeʼẽva ñanerekomboʼe hag̃ua, ikatúta ‘ñandekatupyry ha jajapo opaichagua tembiapo iporãva’ (2 Tim. 3:17, ÑÑB).