Jahejákena Jesúspe tañandegia

1. ¿Mbaʼépa hína Jehová rembipota koʼág̃arupi?

KOʼÁG̃ARUPI Ñandejára volunta haʼe hína ojepredika umi notísia porã oñeʼẽva Ñandejára Rréinore oparupiete ko yvy ape ári (Mar. 13:10; 1 Tim. 2:3, 4). Jehová odirihi hína pe predikasión ha haʼe onombra Itaʼýra ohayhuetévape ikatu hag̃uáicha odirihi upe tembiapo. Ñande ikatu ñañeñandu segúro Jesús poguýpe pórke haʼe ñandegia porãiterei, ha pe predikasión katuete oñekompletáta Jehová oipotaháicha og̃uahẽ mboyve pe fin (Mat. 24:14).

2. ¿Mbaʼépa jahecháta ko artíkulope?

² Ko artíkulope jahecháta mbaʼéichapa Jesús ojevale ‘pe esklávo de konfiánsa ha iñarandúvare’ omeʼẽ hag̃ua ñandéve umi informasión oúva la Bíbliagui, ha oorganisa hag̃ua isegidorkuérape ikatu hag̃uáicha ojapo pe predikasión tuichavéva ñane tiémpope (Mat. 24:45). Avei jahecháta mbaʼépa káda uno ikatu jasegi jajapo jaapoja hag̃ua Jesúspe ha avei pe esklávo de konfiánsape.

JESÚS ODIRIHI PE PREDIKASIÓN

3. ¿Mbaʼe autoridápa oñemeʼẽ vaʼekue Jesúspe?

³ Jesús odirihi hína pe predikasión. ¿Mbaʼérepa ikatu ñaime segúro upeichaha? Jesús ojupi mboyvemi yvágape ojotopa vaʼekue unos kuánto idisípulondi peteĩ montáña oĩvape Galiléape. Haʼe heʼi chupekuéra: “Ñandejára omoĩ che poguýpe entéro mbaʼe oĩva yvágape ha ko yvy ape ári”. Ha upéi heʼive: “Upévare, tapeho pemboʼe umi hénte entéro paisguápe” (Mat. 28:18, 19). Upéicharõ ikatu ñaime segúro Jesúspe oñemeʼẽ hague autorida odirihi hag̃ua avei pe predikasión.

4. ¿Mbaʼérepa ikatu ñaime segúro Jesús osegiha odirihi pe predikasión?

⁴ Jesús heʼi vaʼekue ojepredika ha ojejapo vaʼerãha disípulo entéro paíspe, ha avei heʼi oĩtaha isegidorkuérandi “káda día, og̃uahẽ meve pe fin” (Mat. 28:20). Koʼã mbaʼe ohechauka porãiterei ñandéve Jesús odirihiha hína pe predikasión koʼag̃aite peve.

5. ¿Mbaʼéichapa ñaipytyvõ hína oñekumpli hag̃ua Salmo 110:3 heʼíva?

⁵ Jesús ndojepyʼapýi vaʼekue saʼíta haguére umi opredikáva umi ára pahápe. Haʼe oikuaa porã oñekumplitaha ko profesía heʼíva: “Nde resẽ vove nde ehérsito reheve reñorairõ hag̃ua gerrahápe, nde puévlo kyreʼỹme oúta ojeofrese” (Sal. 110:3). Oiméramo nde repredika reikóvo, reapoja hína Jesúspe ha avei pe esklávo de konfiánsape ha eipytyvõ oñekumpli hag̃ua ko profesía. Koʼag̃aite peve ojesegi ojepredika, péro oĩ heta mbaʼe ijetuʼúva tekotevẽva ñambohovái.

6. ¿Mbaʼépa ombohovái vaʼerã umi opredikáva Ñandejára Rréino ñane tiémpope?

⁶ Peteĩva umi mbaʼe ombohovái vaʼerã umi opredikáva Ñandejára Rréino haʼe hína pe oposisión. Umi apóstata, líder rrelihióso ha polítiko omosarambi jepi umi japu oñeʼẽ vai hag̃ua pe predikasión jajapóvare. Oiméramo ñane hentekuéra, ñane konosído, térã ñane kompañéro de traváho térã de eskuéla oguerovia koʼã informasión ikatu hína ñandejopy anivéma hag̃ua jaservi Jehovápe ni japredika. Heta paíspe umi oñemoĩva ñane kóntrape ñandetrata vai, ñandeataka, ogueraha préso ñane ermanokuérape ha algúnope katu omoinge voi kárselpe. Péro ñandéve nañanesorprendéi koʼã mbaʼe, pórke Jesús heʼi vaʼekue voi: “Umi hénte opa tetãygua ndaijaʼemoʼãi penderehe peẽ haʼe haguére che disípulo” (Mat. 24:9). Ikatu ñaime segúro umi hénte ndaijaʼéi rupi ñanderehe ohechaukaha Jehová ñandeguerohoryha (Mat. 5:11, 12). Jaikuaaháicha, pe Diablo haʼe hína pe oñemoĩva ñane kóntrape. ¡Péro Jesús ipoderosoitereive chugui! Jesús osegi rupi ñanepytyvõ, ñande ikatúta japredika opárupi ko yvy tuichakuére. Jahechamína algúno ehémplo.

7. ¿Mbaʼérepa nde ere oñekumpliha Apocalipsis 14:6, 7 heʼíva?

⁷ Ñande japredikáva umi notísia porã oñeʼẽva Ñandejára Rréinore, ñambohovái avei ótra kósa ijetuʼúva: Japredika vaʼerã diferénte idiómape. Apóstol Juan ohecha vaʼekue peteĩ visión, upépe Jesús heʼi vaʼekue ñane tiémpope ojesupera vaʼerãha heta mbaʼe ijetuʼúva ojepredika hag̃ua umi notísia porã (elee Apocalipsis 14:6, 7). Por ehémplo, ñande ñameʼẽ hína heta persónape la oportunida odesidi hag̃ua oaseptátapa umi notísia porã. Ñane tiémpope ko yvy tuichakuére heta persóna ikatu olee hetaiterei informasión bíblica ñande sítio jw.org-pe, pórke pype oĩ mas de 1.000 idiómape umi informasión. Pe Kuérpo Governánte oaprova kuri ojetradusi hag̃ua mas de 700 idiómape pe lívro ¡Jaikóta vyʼápe pára siémpre! Upéva hína pe erramiénta jaipurúva koʼág̃a ñambostudia hag̃ua la héntepe ikatu hag̃uáicha oiko chuguikuéra Jesús disípulo. Avei jareko hetaiterei informasión bíblica osẽva tahaʼe vidéope umi nohendúivape g̃uarã térã avei umi puvlikasión en braille umi ndohecháivape g̃uarã. Añetehápe jahecha porãiterei mbaʼéichapa oñekumplipaite umi profesía oĩva la Bíbliape. Hetaiterei persóna “oñeʼẽva opaichagua idióma oĩva umi nasiónpe” oaprende hína ‘peteĩ idióma ipotĩva’ la Biblia rupive (Zac. 8:23; Sof. 3:9). Entéro koʼã mbaʼe ojehupyty Cristo Jesús odirihi rupi opa mbaʼe.

8. ¿Mbaʼe mbaʼépa ojehupytýma ojepredika rupi?

⁸ Ñane tiémpope mas de 8 millón de persóna oĩva 240 paíspe oĩ Jehová organisasiónpe. Avei káda áño ojevautisa miles de persóna. Péro pe kantida ndahaʼéi voi la iñimportantevéva, síno umi kualida espirituál térã “pe kondúkta pyahu” orekóva koʼã kristiáno pyahu (Col. 3:8-10). Hetaiterei oĩ ymave hekovai, iviolénto, oapoʼi vaʼekue hapichápe, ha ifanatikoiterei vaʼekue hetãre, péro upéi ou okambiaite. Pe profesía oĩva Isaías 2:4-pe oñekumpli hína, pórke pépe heʼi ‘noñemboʼemoʼãveimaha chupekuéra mbaʼéichapa oñorairõ vaʼerã’. Ñande ñañehaʼãmbaitéramo ñamonde pe kondúkta pyahu, ñaipytyvõta hína umi persónape oñemoag̃ui hag̃ua Jehová organisasiónre, ha avei jahechaukáta jasegiha Cristo Jesús ehémplo, haʼéva pe ñandegiáva (Juan 13:35; 1 Ped. 2:12). ¿Péro mbaʼéicha rupi piko oiko entéro koʼã mbaʼe? Sólamente Jesús omeʼẽ rupi ñandéve pe ajúda ñaikotevẽva.

JESÚS ONOMBRA PETEĨ ESKLÁVO

9. Ohechaukaháicha Mateo 24:45-47, ¿mbaʼépa heʼi vaʼekue Jesús oikotaha koʼã ára pahápe?

⁹ (Elee Mateo 24:45-47). Jesús oprofetisa vaʼekue koʼã ára pahápe onombrataha peteĩ “esklávo de konfiánsa ha iñarandúva” ikatu hag̃uáicha omeʼẽ ñandéve umi instruksión oúva Ñandejára Ñeʼẽgui. Upévare ikatu jaʼe ko esklávo ombaʼapo jejopytaha ko ñane tiémpope. Jesús ojevale vaʼekue peteĩ grúpo michĩvare de unhído omeʼẽ hag̃ua Ñandejára puévlope ha umi oaprendesévape chugui “aliménto hiʼoraitépe”. Péro koʼã kuimbaʼe nomandái ñande jeroviáre (2 Cor. 1:24). Upéva rangue, haʼekuéra orrekonose Jesús haʼeha ñande “líder ha governánte” (Is. 55:4).

10. ¿Mavaitéva umi puvlikasión ojekuaáva umi fótope nepytyvõ vaʼekue reñepyrũ hag̃ua reservi Jehovápe?

¹⁰ Áño 1919 guive pe esklávo de konfiánsa oguenohẽ heta puvlikasión ikatu hag̃uáicha umi hénte oreko pe primera oportunida oaprende hag̃ua umi enseñánsa oĩva la Bíbliape. Áño 1921-pe, pe esklávo oguenohẽ pe lívro El Arpa de Dios ikatu hag̃uáicha oñepytyvõ umi persónape oaprende hag̃ua umi enseñánsa iñimportantevéva oĩva la Bíbliape. Ohasávo pe tiémpo, oñeguenohẽ ohóvo hetave puvlikasión. Ha nde kásope, ¿mbaʼe puvlikasiónpa nepytyvõ vaʼekue reikuaa ha rehayhu hag̃ua Jehovápe? Ikatu oime raʼe haʼe peteĩva koʼã lívro: “Sea Dios Veras”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Mbaʼépa añetehápe omboʼe la Biblia?, ¿Mbaʼépa ñanemboʼe la Biblia? térã ¡Jaikóta vyʼápe pára siémpre!, haʼéva pe ñane puvlikasión ipyahuvéva. Entéro koʼã puvlikasión oñeguenohẽ ikatu hag̃uáicha ñaipytyvõ umi héntepe oiko hag̃ua chugui Jesús disípulo. Ha oñeguenohẽrõ guare, kavalete haʼe vaʼekue la oñekotevẽva upe moméntope.

11. ¿Mbaʼérepa tekotevẽte ñaaprendeve Jehovágui ha la Bíbliagui?

¹¹ Umi oñepyrũva ostudia la Biblia, tekotevẽ oikuaa porã Jehovápe ha avei umi enseñánsa bíblica. Péro ndahaʼéi haʼekuérante la tekotevẽva ojapo upéva, síno ñande avei. Apóstol Pablo oskrivi vaʼekue: “Umi okakuaapámava hoʼu tembiʼu iñaliméntova”. Pablo heʼi vaʼekue avei umi omoĩva en práktika umi mbaʼe omboʼéva la Biblia oaprendetaha “odiferensia hag̃ua mbaʼépa iporã ha mbaʼépa ivai” (Heb. 5:14). Ñane tiémpope heta hénte hekovai ha hekokyʼaiterei, upévare sapyʼánte ikatu ijetuʼu ñandéve ñaneñeʼẽrendu hag̃ua Jehovápe. Péro Jesús ojasegura ñande ñaaprende hag̃ua umi mbaʼe ñaikotevẽva ikatu hag̃uáicha jasegi ñande jerovia mbarete. Ha ñande jarresivi koʼã instruksión Ñandejára Ñeʼẽ la Biblia rupive. Ha Jesús ojevale pe esklávo de konfiánsare oprepara ha omog̃uahẽ hag̃ua opárupi koʼã instruksión.

12. ¿Mbaʼéichapa ñande jahechauka avei ñamombaʼeha Ñandejára réra Jesús ojapo haguéicha?

¹² Jesús ojapo haguéicha, ñande ñambotuicha Ñandejára réra haʼe omereseháicha (Juan 17:6, 26). Por ehémplo 1931-pe ñande ñaguenohẽ la Bíbliagui voi ñañembohéra hag̃ua testígo de Jehová, ha péicha jahechauka ñandéve g̃uarã iñimportantetereiha Ñandejára réra ha jaipotaha umi hénte ñandekuaa Itestígoramo (Is. 43:10-12). Octubre guive upe áñope, Ñandejára réra oñepyrũ oñeguenohẽ ko ñande rrevísta apére. Avei Ñandejára Ñeʼẽ La Biblia Traducción del Nuevo Múndope oñemoĩ jey Ñandejára réra umi lugár tekotevẽhápe oĩ. Ha upéva idiferentete umi rrelihión heʼíva ijehe kristianoha ojapóvagui, pórke haʼekuéra heta vése oipeʼa Jehová réra umi itraduksión de la Bíbliagui.

JESÚS OORGANISA ISEGIDORKUÉRAPE

13. ¿Mbaʼérepa nde reime segúro Jesús ojevaleha ‘pe esklávo de konfiánsa ha iñarandúvare’ koʼág̃arupi? (Juan 6:68).

¹³ Jesús ojevale ‘pe esklávo de konfiánsa ha iñarandúvare’ ikatu hag̃uáicha omoñepyrũ peteĩ organisasión ijojahaʼỹva ko yvy ape ári ojeadora hag̃ua Jehovápe haʼe oipotaháicha. ¿Mbaʼépa nde repensa ko organisasiónre? Ikatu oime eñeñandu Pedro oñeñandu haguéicha, haʼe heʼi vaʼekue Jesúspe: “¿Máva rendápe piko rohóta? Ne ñeʼẽ ningo omeʼẽ jeikove opaveʼỹva” (Juan 6:68). ¿Mbaʼépa oiko vaʼerãmoʼã ñandehegui ndajaikuaáirire Jehová organisasiónpe? Añetehápe péva rupive Jesús ojasegura omeʼẽ hag̃ua ñandéve entéro mbaʼe ñaikotevẽva jasegi hag̃ua ñaneñeʼẽrendu Ñandejárape. Ñanemboʼe ikatu hag̃uáicha ñandekatupyry ñaporomboʼekuaa hag̃ua. Avei ñanepytyvõ ñamonde hag̃ua “pe kondúkta pyahu” ikatu hag̃uáicha Jehová ñandeguerohory (Efes. 4:24).

14. ¿Mbaʼéichapa ndéve nepytyvõ reime rupi Jehová organisasiónpe pe pandémia de COVID-19 aja?

¹⁴ Jesús ñandedirihi porãiterei umi tiémpo ijetuʼúvape. Ha upéva ojekuaa porãiterei oñepyrũrõ guare pe pandémia de COVID-19. Upérõ heta hénte oĩva ko múndope ndoikuaái kuri mbaʼépa ojapóta, péro Jesús ojasegura ñande jarresivi hag̃ua pe gía ñaikotevẽva jajeprotehe hag̃ua. Por ehémplo, ñanemokyreʼỹ jaipuru hag̃ua pe tapavóka ha jarrespeta hag̃ua pe distansiamiénto físiko ñaime jave peteĩ lugár hetahápe hénte. Avei oñemomanduʼa umi ansiánope oñekomunika pyʼỹi hag̃ua umi ermánondi oĩva pe kongregasiónpe ha ohechakuaa hag̃ua umi ermánopa oĩ segúro, hesãipa ha oñemantenépa ag̃ui Jehováre (Is. 32:1, 2). Avei umi infórme ojapóva pe Kuérpo Governánte rupive jarresivi heta instruksión ha ñanemokyreʼỹ avei.

15. ¿Mbaʼéichapa ojeʼe ñandéve jajapo hag̃ua umi rreunión ha predikasión pe pandémia aja, ha mbaʼépa ojehupyty?

¹⁵ Pe pandémia aja jarresivi kuri heta instruksión hesakã porãitereíva ohechaukáva mbaʼéichapa jajapo vaʼerã umi rreunión ha predikasión. Sapyʼaitérõ g̃uarã ñañepyrũma kuri jajapo umi rreunión ha asambléa videokonferénsia rupive. Avei ñañepyrũ japredika prinsipálmente kárta ha teléfono rupive. Ha Jehová ovendesi umi esfuérso jajapóva. Heta sukursál omombeʼu pe pandémia aja oĩ hague hetave puvlikadór. Añetehápe heta ermáno ha ermána oreko umi experiénsia iporãitereíva ko tiémpope (ehecha pe rrekuádro “Jehová ovendesi ñane predikasión”).

16. ¿Mbaʼe rehepa ikatu ñaime segúro?

¹⁶ Ikatu oĩ algúno opensáva Jehová organisasión ojopyetereimaha ñanendive omeʼẽvo ñandéve heta instruksión pe pandémia aja. Péro heta vése jahechakuaa ojejaserta hague oñemeʼẽvo ñandéve umi instruksión jarresivi vaʼekue (Mat. 11:19). Jajepyʼamongetáramo mbaʼeichaitépa Jesús ñandegia mborayhúpe, ha ndajaikuaáiramo jepe mbaʼépa oikóta amo gotyove, ñande ikatu ñaime segúro Jehová ha Itaʼýra ohayhuetéva oĩtaha ñanendive (elee Hebreos 13:5, 6).

17. ¿Mbaʼéichapa nde reñeñandu Jesús ñandegia haguére?

¹⁷ ¡Ajépa javyʼaite Jesús ñandegia haguére! Ñande ñaime peteĩ organisasión ndojedividírivape ñaiméramo jepe de diferénte nasionalida, kultúra ha idióma. Ñande jarresivi hetaiterei instruksión Ñandejára Ñeʼẽ la Bíbliagui, ha avei ñaaprende entéro mbaʼe ñaikotevẽva japredika hag̃ua. Avei káda uno ñañehaʼã ñamonde pe kondúkta pyahu ha ñaaprende mbaʼéichapa jajoayhu vaʼerã. Añetehápe jaguereko hetaiterei rrasón ñañeñandu hag̃ua orgullóso Jesús ñandegia haguére.