Mbaʼérepa osegi umi gérra
La Biblia ohechauka mbaʼépa omoñepyrũ umi gérra ha mbaʼérepa osegi oiko umíva.
PE PEKÁDO
Ñandejára ojapo ijoguaháramo ñande tuakuéra ypykue Adán ha Évape (Génesis 1:27). Upéva heʼise Ñandejára ojapo hague chupekuéra ikatu hag̃uáicha oporohayhu ha oikose hag̃uáicha pyʼaguapýpe, haʼe voi ojapoháicha (1 Corintios 14:33; 1 Juan 4:8). Ñambyasýramo jepe, Adán ha Eva naiñeʼẽrendúi kuri Ñandejárape ha opeka, upéva káusare ñande avei japeka ha ñamano (Romanos 5:12). Ñande haʼe rupi pekadór sapyʼánte ñapensa umi mbaʼe naiporãivare ha oĩ voi oúmava ojapo umi mbaʼe vai térã iviolénto (Génesis 6:5; Marcos 7:21, 22).
UMI GOVIÉRNO
Ñandejára nañandekreái vaʼekue ñande voi ñañegoverna hag̃ua. La Biblia heʼi voi “yvypóra ndorekoiha derécho ni odirihívo hekove ijehegui rei” (Jeremías 10:23). Upéicha rupi umi goviérno ndaikatumoʼãi oipeʼaite umi gérra ha pe violénsia.
SATANÁS HA UMI DEMÓNIO
La Biblia heʼi: “Ko múndo kompletoite oĩ pe aña poguýpe” (1 Juan 5:19). “Pe aña” haʼe hína Satanás el Diablo, haʼe oporojukaseterei voi (Juan 8:44). Haʼe ha umi demónio omboliga umi héntepe omoñepyrũ hag̃ua umi gérra ha iviolénto hag̃ua (Apocalipsis 12:9, 12).
Ñande ningo ndaikatúi jaipeʼaite umi mbaʼe omoñepyrũva umi gérra ha pe violénsia, péro Ñandejára si ikatu.