¿Mbaʼéichapa ikatu pemombaʼeguasu Jehovápe pemendaha díape?

1, 2. ¿Mbaʼépa Jehová oipota umi omendátavape g̃uarã?

¿NDÉPA remenda pota hína? Oimérõ upéicha, rovyʼaiterei nendive ha ne mborayhu járandi. Katuete la preparatívo ápe ha pépe hína. Penemanduʼákena Jehová oipotaha pedisfruta pemendaha díapea ha oipotaha peiko vyʼápe oñondive (Prov. 5:18; Cant. de Cant. 3:11).

² Iñimportánte pene kasamiénto díape pemombaʼe Jehovápe. ¿Mbaʼérepa? ¿Ha mbaʼéichapa ikatu pejapo upéva? Ko artíkulo ningo ojejapo espesiálmente umi omendátavape g̃uarã. Péro umi konsého ideprovéchota avei ñandéve ñamombaʼeguasu hag̃ua Jehovápe oimérõ jaháta peteĩ kasamientohápe, térã oimérõ umi omendátava ojerure ñandéve konsého ikasamiéntope g̃uarã.

¿MBAʼÉREPA PEMOMBAʼE VAʼERÃ JEHOVÁPE PEMENDAHA DÍAPE?

3. ¿Mbaʼépa oreko vaʼerã enkuénta umi oorganisáva ikasamiénto, ha mbaʼérepa?

³ Umi oorganisáva ikasamiénto osegi vaʼerã umi konsého Jehová omeʼẽva la Bíbliape. ¿Mbaʼérepa? Pórke haʼe voi la omoñepyrũ vaʼekue pe matrimónio. Jehová ningo la omomenda vaʼekue Adán ha Évape, ha upéva ningo pe primer matrimónio oĩ vaʼekue ko yvy ápe ári (Gén. 1:28; 2:24). Upévare la Jehová opensáva hína la iñimportanteve vaʼerã umi omendátavape g̃uarã.

4. ¿Mbaʼérepa avei pereko vaʼerã enkuénta la Jehová opensáva pemendaha díape?

⁴ ¿Mbaʼérepa pereko vaʼerã avei enkuénta la Jehová opensáva pene kasamiénto díape? Pórke haʼe ningo pende Ru yvagapegua ha pene amigoite (Heb. 12:9). Katuete ningo peẽ napembyaiséi pe amista perekóva hendive. Upévare ni mbaʼevéicharõ ndapejaposemoʼãi álgo ndogustáiva chupe pene kasamiénto díape ni oimeraẽ ótro díape (Sal. 25:14). Pepensamíntena, Jehová ojapóma hetaiterei mbaʼe penderehehápe, ha osegíta gueteri ojapo. Upévare, ¿nomereséi piko haʼe pemombaʼe chupe pemendaha díape? (Sal. 116:12).

¿MBAʼÉICHAPA IKATU PEMOMBAʼE JEHOVÁPE PEMENDAHA DÍAPE?

5. ¿Mbaʼéichapa la Biblia ikatu oipytyvõ umi omendátavape oorganisa jave ikasamiénto?

⁵ La Bíbliape ndaipóri umi léi heʼíva mbaʼeichaitépa ojejapo vaʼerã pe diskúrso de vóda, térãpa mbaʼépa ojejapo vaʼerã upe rire oimérõ ojefesteháta. Upévare umi oorganisáva ikasamiénto ikatu odesidi heta mbaʼe asegún la isituasionkuéra, la ogustáva chupekuéra ha odependéta avei umi kostúmbre oĩvare upe lugárpe. Avei umi kristiáno okumpli vaʼerã umi rrekisíto omoĩva pe goviérno umi omendátavape g̃uarã (Mat. 22:21). Tahaʼe haʼeháicha, umi omendátava osegíramo umi konsého bíblico omombaʼeguasúta ha ombovyʼáta Jehovápe pe omendaha díape hikuái. ¿Péro mbaʼe konsého bíblicopa oreko vaʼerã hikuái enkuénta?

6. ¿Mbaʼérepa iñimportánte pe nóvio ha pe nóvia okumpli umi autorida omandáva?

⁶ Pekumpli vaʼerã la omandáva umi autorida (Rom. 13:​1, 2). Heta paíspe oñemoĩ umi léi pe nóvio ha pe nóvia tekotevẽva okumpli omenda hag̃ua. Upévare peaverigua vaʼerã mbaʼe léipa oĩ pe lugár peikohápe, ha oiméramo peikuaaseve hína algúna kósa ikatu pejerure ajúda umi ansiánope.b

7. ¿Mbaʼéichapa ojejapo vaʼerã umi kasamiénto?

⁷ Pejasegurákena entéro mbaʼe ojejapo hag̃ua hekópe porã (1 Cor. 10:​31, 32). Peñehaʼã vaʼerã pene kasamiéntope ojehecha hag̃ua umi kualida porã oúva Ñandejára espíritugui, ha ani peheja pendegia umi hénte ko mundopegua opensa lája (Gál. 5:​19-26). Pe nóvio hína la omoakãtava hogapy, upévare haʼe hína la rresponsávle entéro mbaʼe ojejapo hag̃ua hekópe porã pe kasamientohápe, ha entéronte ovyʼa hag̃ua upépe. ¿Mbaʼe mbaʼépa ikatu oipytyvõ ojehupyty hag̃ua upéva? Por ehémplo pe ermáno ojapóva pe diskúrso bíblico oñeʼẽta mborayhúpe ha ohechaukáta opororrespetaha. Péicha umi ohendúva ohechakuaáta pe matrimónio haʼeha peteĩ rregálo oúva Jehovágui, ha pe kasamiénto ndahaʼeiha vyrorei, síno iñimportantetereiha. Upévare la majoría umi omendátava oipota ojejapo chupekuéra idiskúrso peteĩ Salón de Réinope, ikatúma guive. Peipuruséramo peteĩ Salón, ikatu peskrivi kon tiémpo peteĩ kárta pe kuérpo de ansiánope.

8. ¿Mbaʼépa penepytyvõta pe festého ojejapo hag̃ua hekópe porã? (Romanos 13:13).

⁸ (Elee Romanos 13:13). Pe nóvio ha pe nóvia odesidíramo ojapotaha peteĩ festého, ¿mbaʼépa oipytyvõta chupekuéra ani hag̃ua ojegia umi hénte ko mundopegua opensa lájare? Pe palávra griega ojetradusíva “jafarrea itarovávaicha”, ojepuru vaʼekue oñeñeʼẽ hag̃ua umi hénte oñembyatývare omokõ rasa hag̃ua, ha ohendu hag̃ua músika pyhare tárde peve (ehecha pe nóta de estúdio oĩva Romanos 13:​13-pe Traducción del Nuevo Mundo españólpe, heʼihápe “fiestas descontroladas”). Upévare pedesidíramo ojeservitaha vevída alkoólika, pehecha vaʼerã mbaʼépa ikatu pejapo ani hag̃ua avave hoʼu rasa.c Pemoĩtaramo músika, peñatende vaʼerã ani hag̃ua oñemoĩ hatãiterei ha upéi avave ndaikatuvéima oñeʼẽ trankílo porã. Avei pejasegura vaʼerã mbaʼe músikapa la pemoĩtava ha mbaʼépa heʼi umíva ani hag̃ua avave oñeofende.

9. ¿Mbaʼe mbaʼépa umi nóvio tekotevẽ oñatende pe kasamiénto díape g̃uarã?

⁹ Ikatu oime pene hénte térã pene amigokuéra oprepara álgo heʼi hag̃ua peẽme pene kasamientohápe. Avei sapyʼánte umi kasamiéntope ojehechauka vidéo, fóto térã ojejapo ótra kósa. Koʼã mbaʼe ningo opyta porãiterei jepi upe díape, péro pejasegura porã vaʼerã pe ojejapóva tomokyreʼỹ enterovetépe (Filip. 4:8). Upévare peñeporandumína: “¿La ojejapótava piko ndohejavaimoʼãi hína avavépe? ¿Ohechaukátapa hína pe matrimónio iñimportantetereiha?”. Avei tekotevẽvéntema peñeporandu: “¿Omombaʼétapa hína upéva Jehovápe?”. Ndaivaimoʼãi ningo ojeʼéramo álgo ojepuka hag̃ua, péro peñatende vaʼerã ani hag̃ua ojeʼe álgo hendapeʼỹ ni itieʼỹ léntova (Efes. 5:3). Pene amígo térã pene hénte oñeʼẽtaramo pene kasamiéntope, peje porã vaʼerã chupekuéra mbaʼépa ndapeipotái ojeʼe ikatu hag̃uáicha haʼekuéra orrespeta upéva.

10. ¿Mbaʼérepa iporãta umi omendáva ojapóramo peteĩ kasamiénto isensíllova? (1 Juan 2:​15-17).

¹⁰ Ani peiko pejechaukase (elee 1 Juan 2:​15-17). Jehová ovyʼaiterei isiervokuéra omombaʼe jave chupe, oiko rangue ojechaukaseterei. Upévare umi kristiáno omendátava ndoikomoʼãi ogasta hetaiterei pláta, ni ndojechaukasemoʼãi umi mbaʼe orekóvare. ¿Mbaʼéichapa ideprovéchota peẽme pene kasamiénto isensílloramo? Peikuaa hag̃ua upéva pehechamína la heʼi vaʼekue peteĩ ermáno oikóva Noruégape hérava Mike. Haʼe heʼi: “La ore kasamiénto ningo isensilloiterei vaʼekue, péro lomímonte iporã ha rovyʼa oremanduʼávo upe moméntore. Ore ndoroikéi vaʼekue déudape, upéicha rupi ikatu kuri rosegi roservi de prekursór”. Peteĩ ermána hérava Tabita oikóva Índiape heʼi avei: “Ore noroñekomplikái vaʼekue heta mbaʼére, upéicha rupi natekotevẽi vaʼekue rodesidi hetaiterei mbaʼe. Upévare ndoroikói rojodiskuti ha iporãveha katu saʼi rojestresa”.

11. ¿Mbaʼépa umi omendáva ohechauka vaʼerã pe oñemonde lájare ikasamiénto díape? (Ehecha pe taʼanga).

¹¹ ¿Pehechámapa la pende ao pemenda hag̃ua? Katuete ningo upe díape pendechukoséta. La Biblia ohechauka ymaite guive pe nóvio ha pe nóviape g̃uarã iñimportanteterei hague ipínta (Is. 61:10). Jaikuaa ningo pene kasamiénto díape napeñemondemoʼãiha jepiveguáichante. Péro lomímonte peñemonde lájare pehechauka vaʼerã ‘perrespetaha ótrope ha peneakãguapyha’ (1 Tim. 2:9). Pene pínta térã pende ao ndahaʼéi vaʼerã la iñimportantevéva pene kasamiénto díape (1 Ped. 3:​3, 4).

12. ¿Mbaʼérepa pe nóvio ha pe nóvia ojasegura porã vaʼerã mbaʼe kostúmbrepa ojesegíta ikasamientohápe?

¹² Pemboykékena umi kostúmbre ohóva la Biblia kóntrape (Apoc. 18:4). Ko múndope pyʼỹinte umi kasamientohápe oñemoinge umi kostúmbre oúva pe rrelihión japúgui, pe espiritísmogui térã umi aguería. Péro Jehová ñandeavisa porã ñañemomombyry vaʼerãha umichagua mbaʼe ikyʼávagui (2 Cor. 6:​14-17). Ikatu hína peikohápe oĩ umi kostúmbre ojesegíva umi kasamientohápe, ha peẽ ndapeikuaái upévapa ogusta hína Jehovápe. Oimérõ upéicha, ikatu peheka informasión peikuaa hag̃ua moõguipa ou umi kostúmbre, ha pehecha umi konsého bíblico ikatúva penepytyvõ pedesidi porã hag̃ua.

13. Umi omendátava osegíramo Jehová ehémplo, ¿mbaʼépa opensáta umi rregálore?

¹³ Heta lugárpe umi invitádo ojepokuaa jepi oraha rregálo umi omendávape. ¿Upéichapa avei peẽ peikohápe? Oimérõ upéicha, provávlemente umi invitádo omeʼẽta pe rregálo asegún isituasión ekonómika. Jaikuaaháicha la Biblia omokyreʼỹ enterovetévape ipojera hag̃ua, ha jajapóvo upéva javyʼaiterei voi (Prov. 11:25; Hech. 20:35). Péro napentendekái vaʼerã pene invitadokuérape oraha vaʼerãha katuete rregálo, térã pehaʼarõha umi rregálo hepyetereíva. Ñande ningo jasegi Jehová ehémplo ha javyʼa la oñemeʼẽvare ñandéve. Avei ñamombaʼeterei peteĩ persóna omeʼẽ jave ñandéve rregálo ñanderayhúgui ha ndahaʼéi ojeovligágui chupe (2 Cor. 9:7).

OÑEPRESENTÁRAMO UMI SITUASIÓN IJETUʼÚVA

14. ¿Mbaʼe ijetuʼúvapa ohasa jepi umi omendátava?

¹⁴ Ndahaʼéi ningo la ifasilpáva ñaorganisa peteĩ kasamiénto omombaʼeguasúva Jehovápe. Por ehémplo ijetuʼu hína jajapo hag̃ua peteĩ kasamiénto isensíllova. Charlie, oikóva islas Salomónpe heʼi: “Hendy vaʼekue orendive rodesidi hag̃ua mávapepa roinvitáta pe fiestarã. Ore ningo hetaiterei voi oreamígo, ha ko roikohápe entéronte voi ohaʼarõ oñeinvita chupe”. Tabita, pe ermána ajeʼi ñamensiona vaʼekue heʼi: “Che aikohápe umi kasamiénto a lo gránde voi ojefesteha jepi. Upévare heta roiko vaʼekue ore tuakuéra ontende hag̃ua roguerekotaha 100 invitádorupinte”. Sara, oikóva Índiape heʼi avei: “Heta hénte oipotaiterei oñemombaʼe chupe la orekóvare. Por ehémplo, che primokuéra omendárõ guare tuicha voi ojejapo la fiésta. Upévare che amendátarõ guare oĩ vaʼekue umi chejopýva ajapo hag̃ua tuichavéntema la fiésta”. Upéicharõ, ¿mbaʼépa ikatu penepytyvõ pembohovái hag̃ua koʼãichagua situasión ijetuʼúva?

15. ¿Mbaʼérepa peñemboʼe meme vaʼerã umi mbaʼe peorganisávare pene kasamientorã?

¹⁵ Peñemboʼe memékena Jehovápe umi mbaʼe peorganisávare. Ikatu pemombeʼu Jehovápe la peñandúva térã oimeraẽ mbaʼe tekotevẽva pedesidi (Filip. 4:​6, 7, ehecha pe nóta de estúdio oĩva Traducción del Nuevo Mundo españólpe, heʼihápe “en cualquier situasión”). Peẽ ikatu pejerure Jehovápe ajúda ikatu hag̃uáicha pedesidi porã, pendepyʼaguapy ha pendepyʼaguasu hag̃ua oimérõ tekotevẽ (1 Ped. 5:7). Pehechávo mbaʼéichapa Jehová ombohovái pene ñemboʼe pejeroviavéta hese. Tabita, pe ermána ñañeʼẽma vaʼekuére anteve heʼi: “Oréngo ndoroikovaiséi vaʼekue oñondive ni ore hentekuérandi. Upévare primeroite voi roñemboʼe roñeʼẽta jave umi mbaʼe rojapótavare ore kasamientohápe. Upéi rohecha porãiterei vaʼekue mbaʼeichaitépa Jehová orepytyvõ roime hag̃ua pyʼaguapýpe oñondivepa”.

16, 17. Oñeorganisa jave peteĩ kasamiénto, ¿mbaʼérepa iñimportánte enterovéva oñemongeta porã?

¹⁶ Peñemongeta porãkena ha pehechauka pejorrespetaha (Prov. 15:22). Oĩ ningo heta mbaʼe peẽ mokõi tekotevẽva pedesidi. Por ehémplo mbaʼe féchapepa pemendáta, mboýpa pegastáta, mávapepa peinvitáta ha hetave mbaʼe. Péro pedesidi mboyve peteĩ mbaʼe pehecha vaʼerã oñondive mbaʼe mbaʼépa ikatu ojejapo, mbaʼe konsého bíblicopa penepytyvõta ha peanalisa umi konsého omeʼẽva peẽme umi kristiáno orekómava experiénsia. Peñemongeta jave oñondive térã pene hentekuérandi, peneamávlekena, peñehaʼã peñontende ha ani peñemohãta peteĩ mbaʼépente. Pende tuakuéra ojeruréramo peẽme peteĩ mbaʼe, ha oimérõ ndahaʼemoʼãi la ijetuʼuetereíva peẽme pejapo hag̃ua, peñehaʼãkena pemeʼẽ chupekuéra gústo. Amo ipahápe upe día iñimportanteterei avei chupekuéra g̃uarã. Péro oimérõ ndaikatumoʼãi pejapo la haʼekuéra ojeruréva peẽme, mborayhúpekena peexplika chupekuéra mbaʼérepa ndaikatumoʼãi pejapo upe mbaʼe (Col. 4:6). Pejasegurákena pene hentekuéra ontende hag̃ua pene kasamiénto díape peẽ pemombaʼeguasuseha Jehovápe, ha upéva haʼeha la iñimportantevéva peẽme g̃uarã.

¹⁷ Oimérõ pende tuakuéra ndahaʼéi Testígo, ikatu ijetuʼuvéntema peẽme peexplika hag̃ua chupekuéra umi mbaʼe pedesidíva. Péro mborayhúpe peñeʼẽramo chupekuéra ikatu hína pesẽ porã. Peteĩ ermáno oikóva Índiape hérava Santhosh omombeʼu: “Ore tuakuéra oipota vaʼekue rosegi unas kuánta kostúmbre oĩva pe rrelihión indúpe. Upévare heta roiko vaʼekue ore hentekuéra oasepta hag̃ua la rodesidíva. Avei algúna kósape romeʼẽntema chupekuéra gústo, ndohóima guive la Jehová heʼíva kóntrape. Por ehémplo rodesidi rokambiatanteha la tembiʼu ojeservítava peteĩ ogustavévare chupekuéra. Avei ndaipóri vaʼekue opurahéiva ni ojerokýva, pórke haʼekuéra ndojepokuaái vaʼekue ojapo umícha mbaʼe”.

18. ¿Mbaʼépa ikatu pejapo entéro mbaʼe osẽ porã hag̃ua peorganisa haguéicha? (1 Corintios 14:40). (Ehecha pe taʼanga).

¹⁸ Peplanea porãkena entéro mbaʼe. Ikatu hína menove pejepyʼapy pemendaha díape, de antemáno peplanea porãramo entéro mbaʼe (elee 1 Corintios 14:40). Peteĩ ermáno hérava Wayne oikóva Taiwánpe heʼi: “Unos kuánto día romenda mboyve, roñembyaty umi ojeofrese vaʼekuéndi orepytyvõ hag̃ua ore kasamientohápe. Roñeʼẽ jey hendivekuéra umi mbaʼe oñeorganisávare upe díape g̃uarã ha ropraktika la ojejapótava Salónpe, ikatu hag̃uáicha entéro mbaʼe osẽ porã”. Iñimportánte avei pejapo entéro mbaʼe oraitépe pene kasamiéntope, pehechauka hag̃ua perrespetaha pene invitadokuérape.

19. ¿Mbaʼépa penepytyvõta entéro mbaʼe ojejapo hag̃ua hendápe porã pene kasamiéntope?

¹⁹ Pekalkuláramo mbaʼeichagua provlémapa ikatu oñepresenta, ikatúta pejehekýi umívagui (Prov. 22:3). Por ehémplo, ikatu oime peikohápe la hénte ojepokuaa oho umi kasamiéntope oñeinvitaʼỹre chupekuéra. Oimérõ upéicha, ikatúma hína pepensa mbaʼépa pejapóta ani hag̃ua oiko upéva. Ikatu pemombeʼu porã umi pene hentekuéra ndoservírivape Jehovápe mbaʼéichapa ojejapo jepi umi kasamiénto Testigokuéra apytépe, ha avei mbaʼépa pepensa algúno umi kostúmbre la hénte orekóvare. Ikatu pehechauka chupekuéra pe artíkulo hérava “¿Mbaʼéichapa umi testígo de Jehová ojapo ikasamientokuéra?”, oĩva jw.org-pe. Avei pejerurekuaa peteĩ ermáno de konfiánsape oĩ hag̃ua de ‘enkargádo pe kasamiéntore’ okontrola hag̃ua la ojejapóva (Juan 2:8). Pemombeʼu porãkena pe ermánope umi mbaʼe peorganisáva, péicha haʼe penepytyvõta ojejapo hag̃ua entéro mbaʼe hendápe porã ha oñeplanea haguéicha.

20. ¿Mbaʼe rehepa imanduʼa vaʼerã umi omendátava?

²⁰ Ikatu oime pejepyʼapy pepensávo entéro umi mbaʼe tekotevẽvare peorganisa. Péro penemanduʼákena pe kasamiénto un dianteha. Upe día guive peimétama oñondive peservi hag̃ua Jehovápe, ha ndaipóri ótra kósa iporãvéva upévagui. Peñehaʼãmbaitékena pene kasamiénto isensíllo hag̃ua ha tomombaʼeguasu Jehovápe ha peheja haʼe pendegia. Péicha amo gotyove penemanduʼávo la pene kasamiéntore pendepyʼarorýta ha napembyasymoʼãi umi mbaʼe pedesidi vaʼekue pejapo (Sal. 37:​3, 4).