Kárta omboúva Cuerpo Gobernante
Jesús oñemboʼehaguéicha, ñande avei jajerure Ñandejárape ñande pyʼaite guive: “Toñemomarangatu nde réra”. Jahechauka jaipotaha upéva umi mbaʼe jajapóvare. Jaikovaʼerã Jehová oipotaháicha oiko itestigokuéra. Upearã tekotevẽ jaikuaa heta mbaʼe, ndahaʼéi Ñandejára rérante. Ha ñañehaʼãmbaitevaʼerã ñamombaʼeguasu Héra. Ñande réra testigos de Jehová tuichave opa mbaʼégui (Mateo 6:9, BNP; Isaías 43:10).
Heʼiháicha Salmo 110:3, umi oservíva Jehovápe ojaepohína kyreʼỹme Haʼe heʼíva. Mbaʼérepa oñehaʼãmbaite opredika koʼã tapicha, tahaʼe ipláta térã imboriahúva, itujáva térã imitãva? Ojapo upéva ohayhuetereígui Ñandejárape. Deuteronomio 6:5, 6 heʼi jahayhuvaʼerãha Jehovápe ‘ñande pyʼaite guive, opa ñande rekove reheve ha opa ñane mbaretekue reheve’. Péicha jahayhúramo Jehovápe jaiporúta opa mbaʼe jarekóva Ñandejára Rréino rehehápe. Ha upévare ñañehaʼãmbaitéta japredika ijaháicha ñandéve.
Jehová ohayhúgui yvyporakuérape oikuaauka pe marandu porã ko Yvy tuichakue. Haʼe ndoipotái avave oñehundi, oipota guei umi iñañáva oheja heko vai ha oñemboja hese oikove hag̃ua (2 Pedro 3:9). Jehová heʼi: ‘Ndaipotái omano pe heko añáva, aipota katu omyatyrõ pe hekove ha oikove’ (Ezequiel 33:11). Japredika jave jahechauka ñande rapichakuérape Jehová ohayhuha chupekuéra. Upévare javyʼaite jajapóvo ko tembiapo iñimportánteva.
Jahayhu añetégui Jehovápe ñamombaʼe Iñeʼẽ. La Biblia añoite ñanepytyvõ jaikuaa hag̃ua Ñandejárape ha ñañemoag̃ui hag̃ua hese, Santiago 4:8-pe heʼiháicha. Avei jaikuaa hag̃ua maʼerãpa jaiko ko Yvy ape ári ha mbaʼépa oikóta tenonderã. Ha ñanemboʼe avei ñande ru ypykue Adán omoñepyrũhague ñane provlemakuéra (Romanos 5:12). Jaikuaa Ñandejára ñanderayhúgui omeʼẽhague Itaʼýra peteĩete ñandepeʼa hag̃ua pekádo poguýgui. Jehová oiporu heta mbaʼe oikuaauka hag̃ua ñandéve iñarandu. Ajépa ñamombaʼete la Biblia, pe rregálo Ñandejára omeʼẽva. Ñamombaʼégui ko rregálo porãite ‘jaiporukuaáta’ ñane tiémpo jalee, jastudia ha jajepyʼamongeta hag̃ua Ñandejára heʼívare (Efesios 5:15, 16; Salmo 1:1-3). Ndovaléi jaʼe ipohyiha jalee Ñandejára Ñeʼẽ káda día. Upéva rangue, jahayhúgui Ñandejárape jalee meméta Iñeʼẽ. Upéva ñanepytyvõta jaikuaa porãve hag̃ua Ñandejárape ha jahayhuvéta chupe.
La Biblia rupi jaikuaa Adán naiñeʼẽrendúivo Jehovápe oheja vai hague itaʼyrakuérape. Ha ñandéve avei ñanderupyty umi mbaʼe vai. Upéicharõ jepe Ñandejára ojapo oñekotevẽva omosãso hag̃ua yvyporakuérape ha oiko hag̃ua Haʼe oipotáva ko Yvýpe g̃uarã (Génesis 3:15).
Katuete ningo, enterove ñamombaʼeguasuse Ñandejára réra porãite. Jaikuaavévo Jehovápe jahayhuve chupe ha jajapose Haʼe heʼíva. Upévare ñaipytyvõse iñorganisasiónpe oikuaauka hag̃ua Héra ha umi mbaʼe ojapótava. Jahecha porã Jehová ñanepytyvõ ha ñanevendesiha, ha ñahaʼarõ jaikove opa ára g̃uarã pe múndo pyahúpe.
Ore roiméva Cuerpo Gobernántepe roipota peikuaa roguerohoryetereiha pejapóva. Romombaʼeterei peñehaʼãhaguére pepredika meme pe marandu porã oñepyrũ mboyve ‘pe jehasa asy guasu’ (Apocalipsis [Revelación] 7:14, BNP). Péicha pejapo pende rapicháre ojejapovaʼekue penderehe. Haʼekuéra avei ikatúta oikuaa Jehová ha Crístope, ha oikove opa ára g̃uarã (Juan 17:3).
Pene ermanokuéra
Cuerpo Gobernante de los testigos de Jehová