Koʼág̃arupi oĩ heta ñembyahýi, ¿mbaʼépa heʼi la Biblia?
“Opaitéta la ñembyahýi”. Péva haʼe la ohupytyséva umi goviérno oĩva ko múndo tuichakuére.a Haʼekuéra oipota pe tembiʼu ohupyty enterove persónape, péicha osolusionase peteĩva umi provléma tuichave jaguerekóva. Péro, ¿ikatúnepa algún día opa pe ñembyahýi? ¿Mbaʼépa heʼi la Biblia upévare?
La Biblia heʼíma vaʼekue voi ñane tiémpope oĩtaha heta ñembyahýi
La Bíbliape ojeskrivíma vaʼekue og̃uahẽtaha peteĩ tiémpo ijakasotahápe la tembiʼu, péva pe tiémpope oñehenói ‘umi ára paha’ (2 Timoteo 3:1). Ndahaʼéiramo jepe Ñandejára káusare la oikóva koʼã mbaʼe haʼe omombeʼúma ñandéve oikotaha upéva (Santiago 1:13). Jahechamína koʼág̃a mokõi profesía.
“Oĩta ñembyahýi […] ápe ha pépe” (Mateo 24:7). Ko profesía oĩva la Bíbliape omombeʼúma voi kuri oĩtaha ñembyahýi heta lugárpe. Ramoiténte umi ostudiáva mbaʼéichapa ojejapo ha oñemog̃uahẽ umi héntepe umi tembiʼu heʼi kuri: “Ko múndope ojejapóramo jepe ikatúva guive opa hag̃ua pe ñembyahýi, amás día ijakasove umi tembiʼu, hetave pe ñembyahýi ha hetave umi tembiʼu ojapo vaíva ñanderehe”.b Heta paíspe umi hénte ndaikatúi ohupyty pe tembiʼu oikotevẽva, millones voi oĩ upeichagua. Ha ñambyasýramo jepe, oĩ voi heta omanóva upéva káusare.
“Ahecha peteĩ kavaju hũ, ha pe ohóva hiʼári oreko peteĩ valánsa ipópe” (Apocalipsis 6:5). Ko profesíape, pe kavaju ha ohóva hiʼári orrepresenta pe ñembyahýi oĩtava umi ára pahápe.c Pe valánsa oguerekóva ipópe oipuru opesa hag̃ua pe tembiʼu, ohupyty hag̃ua michĩmi jepe enterovépe. Upérõ avei oñehendu peteĩ ñeʼẽ heʼíva pe tembiʼu hepyetereivetaha ha ojejerure umi héntepe oipuru porã hag̃ua pe tembiʼu oguerekomíva (Apocalipsis 6:6). Ko profesía oñekumpli hína koʼág̃a ko múndo tuichakuére, upévare oĩ hetaiterei hénte ndaikatúiva ohupyty térã opaga umi tembiʼu ojapo porãtava isalúre.
Mbaʼéichapa opaitéta pe ñembyahýi
Oĩ expérto heʼíva pe tembiʼu oprodusíva ko yvy ikatuha ohupyty kompletoite umi persóna oikóvape ko yvy ape ári. Péro, ¿mbaʼérepa upéicharõ ijakasoite la tembiʼu? ¿Ha mbaʼépa heʼi la Biblia ñande Apohare Jehovád ojapotaha osolusiona hag̃ua koʼã provléma?
Provléma: Oĩ rupi inhustísia hetaiterei hénte oĩ omanóva ñembyahýigui ha imboriahúva, péro umi goviérno ndaikatúi ojapo mbaʼeve osolusiona hag̃ua upéva.
Solusión: Ñandejára Rréino, haʼéva peteĩ goviérno perfékto, opytáta umi goviérno umáno imperfékto rendaguépe (Daniel 2:44; Mateo 6:10). Koʼág̃arupi heta hénte imboriahúva oñehaʼãmbaitéramo jepe, ndohupytýi la hoʼumi vaʼerã, péro Ñandejára Rréino poguýpe upéva okambiaitéta. La Biblia omombeʼu mbaʼépa ojapóta Jesucristo, pe Rréi ogovernátava Ñandejára Rréino: “Umi imboriahúva ningo ojerure asy ajúda, ha haʼe katuete osalváta chupekuéra. Avei oipytyvõta umi iñumíldevape ha umi ndorekóivape avave odefende vaʼerã chupekuéra. […] Ko yvy oprodusi porãitereíta, umi montáña ruʼãme entéro, hembypáta la ojekosecha vaʼerã” (Salmo 72:12, 16).
Provléma: Umi gérra káusare heta mbaʼe oñehundi, ha upéva oafekta la ekonomía. Upéicha rupi heta héntepe ijetuʼu ohupyty hag̃ua la hoʼumi vaʼerã.
Solusión: “Ndaiporimoʼãvéima ni peteĩ gérra ko yvy ape ári, pórke Ñandejára omopẽ umi flécha ha umi lánsa, ha ohapy umi kárro ojepurúva gerrahápe” (Salmo 46:9). Ñandejára ohundietéta umi árma ojepurúva gerrahápe ha umi hénte omoñepyrũvape umi gérra. Upéva mediánte enterovéva ikatúta ohupyty trankílo porãnte umi tembiʼu, ndoperhudikamoʼãiva isalu. La Bíbliape oñepromete voi: “Pe rréi ogoverna vove, umi ihústovape oho porãta. […] Avei oĩta pyʼaguapy opa ára g̃uarã” (Salmo 72:7).
Provléma: Umi desástre naturál káusare, ha ou rupi roʼyeterei térã hakueterei umi plantasión oñehundipa ha umi animál omanomba.
Solusión: Ñandejára ipodér rupive okontroláta pe klíma ha ndoikomoʼãvéima umi desástre naturál, upéva oipytyvõta ko yvýpe oprodusi porã hag̃ua umi aliménto. La Biblia heʼi: “Ñandejára omanda pe yvytúpe oñekalma hag̃ua, ha umi oláda opytaite. […] Ñandejára ojapo pe desiértogui rrío osyry hatãva, pe yvy sékogui ojapo ykua. Umi iñembyahýivape ogueraha oiko hag̃ua upépe […]. Upépe haʼekuéra oñotỹ parrál ha avei heta semílla, ha umíva oprodusi porãiterei chupekuéra” (Salmo 107:29, 35-37).
Provléma: Umi persóna itaryrýiva ha ikorrúptova ojapo umi tembiʼu ikatúva ñanembyai, térã oñehaʼã voi ani hag̃ua oñemog̃uahẽ pe tembiʼu umi añetehápe oikotevẽvape.
Solusión: Ñandejára Rréino ohundietéta entéro persóna naiñonrrádoi ha ikorrúptovape (Salmo 37:10, 11; Isaías 61:8). La Biblia heʼi Ñandejára Jehováre: “Haʼe katuete ojapo hustísia umi persóna inosénte osufrívape, ha omeʼẽ tembiʼu umi iñembyahýivape” (Salmo 146:7).
Provléma: Káda áño ko múndo tuichakuére, mas del 30 por ciento umi tembiʼu oñehundi térã oñeadministra vai.
Solusión: Ñandejára Rréino poguýpe umi tembiʼu oñeadministra porãta. Jesús oĩrõ guare ko yvy ape ári, haʼe oñatende vaʼekue ani hag̃ua ojedesperdisia umi tembiʼu. Por ehémplo, peteĩ jeýpe peteĩ milágro rupive haʼe omongaru vaʼekue mas de 5.000 persónape. Upe rire heʼi idisipulokuérape: “Pembyaty la hembýva ani hag̃ua oñehundipa rei” (Juan 6:5-13).
Ñandejára Rréino ohundietéta umi mbaʼe vai oguerúva pe ñembyahýi, upévare enterovéva jadisfrutáta jaʼúvo umi tembiʼu hetereíva ha ojapo porãtava ñanderehe (Isaías 25:6). Reikuaaséramo arakaʼépa Ñandejára Rréino ojapóta koʼã mbaʼe, ehecha pe artíkulo hérava “¿Arakaʼépa Ñandejára Rréino oñepyrũta ogoverna ko yvy ape ári?”.
a Ahénda 2030, Desarrollo Sostenible. Entéro umi país oĩva Naciones Unídaspe oaprova upéva áño 2015-pe.
b Infórme ojapo vaʼekue: Organización de las Naciones Unidas para la Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas, ha Organización Mundial de la Salud.
c Reikuaave hag̃ua umi 4 kavaju arigua oñeñeʼẽvagui Apocalípsispe, eleemína pe artíkulo hérava “¿Mbaʼépa osignifika umi kavaju arigua?”.
d La Biblia ohechauka Ñandejára heraha Jehová (Salmo 83:18). Ehecha pe artíkulo hérava “¿Mávapa Jehová?”.