¿Mbaʼéicha rupípa pe polítika odividipa la héntepe? ¿Mbaʼépa heʼi la Biblia?

Ko múndo tuichakuére, pe polítika odividi umi hénte oikóvape peteĩ paíspe. Ojejapo rire peteĩ enkuésta 19 paíspe, ojepilla “alamita rasa umi hénte heʼiha ipaíspe oĩha joavy, pórke umi orekóva diferénte partído polítiko ndaikatúi oñemoĩ de akuérdo” (Centro de Investigación Pew).

¿Ndépa rehechakuaa avei pe polítika odividiha la héntepe pe nde reikohápe? ¿Mbaʼéicha rupípa upéva? ¿Oĩpa peteĩ solusión? Emañamína mbaʼépa heʼi la Biblia koʼã mbaʼére.

¿Mbaʼépa la oporodividíva?

Asegún la Biblia omombeʼu lája, koʼã ára pahápe ijetuʼútante voi ojeiko hag̃ua peteĩ ñeʼẽme.

• “Umi ára pahápe pe situasión ijetuʼúta ha ipeligrósota. Pórke umi hénte ojepyʼapýta ijehénte” ha “ndoikoporãsemoʼãi avavéndi” (2 Timoteo 3:1-3).

Umi goviérnope ijetuʼu ombaʼapo porã hag̃ua, oĩramo jepe oñehaʼãmbaitéva upearã. Umi persóna opensa diferénteva ojuehegui ndaikatúi ombaʼapo porã oñondive, sapyʼánte katu ndaikatuiete voi ombaʼapo la péicha. Ha upévare amo ipahápe, ndaikatúi osolusiona umi provléma oĩva ipaíspe. Koʼã mbaʼe oikóva, ohechauka siertoha la Biblia heʼíva ymaiterei guivéma.

• “Yvypóra omanda hapicháre operhudika hag̃uánte chupe” (Eclesiastés 8:9).

La Bíbliape oñemombeʼu avei mbaʼéichapa oñesolusionáta ko situasión. Heʼi koʼẽrõite oĩtaha peteĩ ogovernáva ko múndo tuichakuére ha ikatútava osolusiona entéro provléma oĩva.

Peteĩ governánte oñeinteresáva la héntere

La Biblia omombeʼu oĩha peteĩ governánte ikatupyryetereíva ogoverna hag̃ua. ¿Mávapa upéva? Jesucristo. Haʼe oreko pe podér ha autorida omoĩ hag̃ua pyʼaguapy ko múndo tuichakuére. Ha haʼe ojaposeterei voi upéva.

• “Pe rréi ogoverna vove, umi ihústovape oho porãta” ha “oĩta pyʼaguapy opa ára g̃uarã” (Salmo 72:7).

• “Entéro umi tetã oservíta chupe” (Salmo 72:11).

Jesús ningo ñanegoverna porãitereíta pórke haʼe oñeinteresa ñanderehe ha ñanepytyvõse, koʼýte oipytyvõse umi ojetratávape inhústamente.

• “Umi imboriahúva ningo ojerure asy ajúda, ha haʼe katuete osalváta chupekuéra. Avei oipytyvõta umi iñumíldevape ha umi ndorekóivape avave odefende vaʼerã chupekuéra. Haʼe oiporiahuverekóta umi hénte umíldepe ha umi imboriahúvape, ha katuete osalváta chupekuéra. Heta hénte osufri umi governánte iñañáva poguýpe, péro pe rréi osalváta chupekuéra” (Salmo 72:12-14).

Ñandejára Rréino haʼe hína peteĩ goviérno oĩva yvágape. ¿Reikuaasevépa upe goviérnogui? ¿Mbaʼépa rejapo vaʼerã ndéve avei nderupyty hag̃ua umi mbaʼe porã ojapótava koʼẽrõite? ¿Mbaʼéichapa ikatu reapoja ko goviérno?

• Ehechamína pe vidéo ¿Mbaʼépa hína Ñandejára Rréino?

• Elee pe artíkulo hérava “Ñandejára Rréino: peteĩ goviérno ndaikorrúptoiva”.