¿Mbaʼépa heʼise jaiko peteĩ kristiánoicha? ¿Mbaʼépa heʼi la Biblia?

Ko múndo tuichakuére oĩ heʼíva haʼeha kristiáno, péro umi mbaʼe ojapóva rupive ohechauka operhudikaha hapichápe. Opensa ijehénte, naiñonrrádoi ha naiñamávlei. Ótro katu omoakãratĩ iména térã hembirekópe. Opa koʼã mbaʼére oĩ oñeporandúva: “¿Mbaʼe piko heʼise añete jaiko peteĩ kristiánoicha?”.

Mbaʼépa añetehápe heʼise jaiko peteĩ kristiánoicha

Ifásil ningo jaʼe ñande haʼeha kristiáno, péro ndahaʼéi jaʼénte vaʼerã upéva. La Biblia ohechauka peteĩ kristiáno haʼeha Jesucristo disípulo (Hechos 11:26). Jesús voi heʼi vaʼekue: “Peẽ pesegíramo pejapo che haʼéva, peẽ añetehápe che disípulo hína” (Juan 8:31). Jaikuaa ningo avave ndaikatumoʼãiha ojapo opa mbaʼe Jesús heʼi hagueichaite ha ndojavymoʼãiha ni michĩmi. Péro peteĩ kristiáno tee oñehaʼãmbaite osegi ojapo la Jesús heʼíva ha oiko haʼe oiko haguéicha. Jahechamína unos kuánto ehémplo.

Umi kristiáno ohayhu añete hapichakuérape

Mbaʼépa heʼi vaʼekue Jesús: “Ameʼẽ peẽme peteĩ mandamiénto pyahu: pejoayhu vaʼerã. Che pohayhu haguéicha, peẽ pejoayhu vaʼerã avei. Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35).

Mbaʼépa ojapo vaʼekue Jesús: Jesús ohechauka ohayhu añeteha la héntepe, ha ndorekói enkuénta ipláta hetápa térã imboriahu ni moõguipa ou pe persóna. Haʼe omonguera umi hasývape, omongaru umi iñembyahýivape ha hekove jepe omeʼẽ ótro rehehápe (Mateo 14:14-21; 20:28).

Mbaʼépa ojapo umi kristiáno: Umi kristiáno tee ohechauka ohayhu añeteha la héntepe imbaʼeporãvo, otratávo entérope peteĩchapa ha operdonávo hapichápe. Avei oipytyvõ umi oikotevẽvape ha oĩ ojesakrifika hag̃uáicha ótro rehehápe (1 Juan 3:16).

Umi kristiáno iñonrrádo

Mbaʼépa heʼi vaʼekue Jesús: “Che hína […] pe añetegua” (Juan 14:6).

Mbaʼépa ojapo vaʼekue Jesús: Jesús iñonrrádo vaʼekue opa mbaʼe heʼíva ha ojapóvape. Haʼe núnka ndoipurúi hapichápe okonsegi hag̃ua la oipotáva, ni ndoikói ijapuʼimi jepe osẽ hag̃ua ijidéape. Haʼe siémpre heʼi la verda, upéva oaprovlemáramo jepe chupe sapyʼánte (Mateo 22:16; 26:63-67).

Mbaʼépa ojapo umi kristiáno: Umi kristiáno tee ndaijapúi ha naimondái. Haʼekuéra opaga umi impuésto, iguápo ha okumpli porã itravahohápe (Romanos 13:5-7; Efesios 4:28). Haʼekuéra ndohodéi hapichápe, ndojapói kopiatín ni ndojapói trámpa orrendi jave, ha ndoikói ijapu okompletáta jave algún dokuménto térã okonsegi hag̃ua itravahorã (Hebreos 13:18).

Umi kristiáno iñamávle enterovéndi

Mbaʼépa heʼi vaʼekue Jesús: “Peju che rendápe enterove peẽ penekaneʼõva ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha cheumílde che pyʼaite guive, upévare katuete pombopiroʼýta. Che júgo napendeforsamoʼãi ha che kárga ivevýi” (Mateo 11:28-30).

Mbaʼépa ojapo vaʼekue Jesús: Jesús siémpre iñamávle vaʼekue ha umi hénte oñeñandu porã hendive. Haʼe ovyʼa umi mitãndi, omokyreʼỹ umi oñedesanimávape ha orrespeta vaʼekue enterovépe (Marcos 10:13-15; Lucas 9:11).

Mbaʼépa ojapo umi kristiáno: Umi kristiáno tee iñamávle ha otrata porã hapichakuérape, tahaʼe umi mbaʼe heʼíva térã ojapóva rupive (Efesios 4:29, 31, 32). Ojepyʼapy la héntere ha oheka voi oportunida oipytyvõ hag̃ua chupekuéra (Gálatas 6:10).

Umi kristiáno ifiél iména térã hembirekópe

Mbaʼépa heʼi vaʼekue Jesús: “Ani avave osepara ojuehegui Ñandejára ombojoaju vaʼekue” (Marcos 10:9).

Mbaʼépa ojapo vaʼekue Jesús: Jesús nomendáiramo jepe, oakonseha vaʼekue umi omendávape ifiél hag̃ua ojupe (Mateo 19:9). Avei heʼi porã mbaʼépa ikatu hína ombyai peteĩ matrimónio (Mateo 5:28).

Mbaʼépa ojapo umi kristiáno: Umi kristiáno tee ndojapói umi mbaʼe ohechaukátava ndorrespetaiha iména térã hembirekóva (Hebreos 13:4). Umi omendáva ohechauka ojoayhu ojorrespetaha (Efesios 5:28, 33).