¿Mbaʼépa oikopáta umi rrelihióngui? ¿Mbaʼépa heʼi la Biblia?

¿Ndévepa nembopochy térã nemorrenega la ojejapóva umi rrelihiónpe? Umi rrelihión ningo ojapo añete heta mbaʼe porã umi hénte rehehápe, péro upéicha avei hetáma oporoperhudika. Peteĩ ensiklopédia heʼi voi: “Umi rrelihión káusare ningo oñepyrũ jepéma unas kuánta gérra ivaietereíva” (Encyclopedia of Religion and War). Pyʼỹinte umi omoakãva umi rrelihión ndoadorái Ñandejárape, síno oipurúnte umi rrelihión okonvense hag̃ua la héntepe oapoja hag̃ua peteĩ partído polítiko. Osino katu oĩ jave oporomondáva térã umi káso de avúso, oñehaʼãnte oñomi hikuái upéva.

Ha oiméramo ndéve nemorrenega la ojapóva umi rrelihión, ¿mbaʼépa oiméne Ñandejára opensa hesekuéra? La Biblia ohechauka Ñandejárape ndogustaieteha la ojapóva la majoría umi rrelihión, ha upépe jatopa avei unas kuánta profesía ohechaukáva mbaʼépa oikóta hesekuéra. La Biblia avei omombeʼu Ñandejára koʼẽrõitéma ojapotaha álgo umi rrelihión kóntrape, álgo núnka ndojejapóitiva koʼág̃a peve.

¿Mbaʼépa heʼi la Biblia oikotaha umi rrelihióngui?

Profesía: Lívro de Apocalipsis omombeʼu oĩha peteĩ prostitúta hérava Babilonia Guasu. Ko prostitúta oguapy hína peteĩ animál salváhe pytãitéva ári. Péro upéi ko animál salváhe oñemoĩta hese ha ojukáta chupe (Apocalipsis 17:3, 5, 16).

Mbaʼépa heʼise: Pe prostitúta hérava Babilonia Guasu orrepresenta entéro umi rrelihión japu ndogustaietéva Ñandejárape.a Pe animál salváhe pytãitéva katu orrepresenta pe ONU-pe, térã pe Organización de las Naciones Unidas.b Pe profesía ohechauka pe prostitúta oguapyha pe animál salváhe pytãitéva ári, ha upéva ohechauka umi rrelihión japu oñehaʼãha ipuʼaka umi polítikore ha ojapoka chupekuéra la haʼekuéra oipotáva. Ha heʼívo pe animál salváhe ojukataha pe prostitútape, upéva ohechauka pe ONU ha umi país oapojáva chupe oñemoĩtaha entéro umi rrelihión japu oĩvare ko múndope ha ohundietetaha umívape. Ni hendague ndopytamoʼãi.

¿Mbaʼéichapa oñehundíta umi rrelihión japu?

Profesía: “Pe animál salváhe 10 hatĩva nde rehecha vaʼekue ndochaʼemoʼãi pe kuña rekovaíre, oipeʼapaitéta chugui ikosakuéra [...] ha ohapýta chupe kompletoite tatápe. Upéva oikóta pórke Ñandejára omoĩta iñakãmekuéra [térã umi governantekuéra akãme] peteĩ plan ojapo hag̃ua haʼe oipotáva, upéva heʼise opensataha hikuái la mísma kósa ha omeʼẽta ijautorida pe animál salváhepe [...]. Upévare un díapente oupaitéta hiʼári umi kastígo: ñemano, jaheʼo ha ñembyahýi, ha ojehapýta chupe kompletoite tatápe. Upéicha oikóta hese pórke ipoderóso hína Ñandejára Jehová,c haʼe hína pe ohusgáva chupe” (Apocalipsis 17:16, 17; 18:8).

Mbaʼépa heʼise: Ñandejára voi omoĩta entéro umi governánte akãmekuéra “peteĩ plan ojapo hag̃ua haʼe oipotáva”. Haʼe omomýita umi governantekuérape omeʼẽ hag̃ua hikuái “ijautorida” pe ONU-pe, ha pe ONU orekóma rupi tuicha autorida ohundíta umi rrelihión japu oĩvape ko múndo tuichakuére. Koʼã mbaʼe oikóta “un díapente”, upéva heʼise oikotaha peteĩ tesapirĩme ha avave ohaʼarõʼỹre. Upéicha rupi hetaiterei hénte oñesorprendéta ha oñemondýita voi (Apocalipsis 18:21).

¿Mbaʼérepa oñehundíta umi rrelihión japu?

Profesía: “Ipekadokuéra hetaiterei ha ohupytýma voi yvága, ha Ñandejára ohusgáta chupe umi mbaʼe vai ojapo vaʼekuére” (Apocalipsis 18:5).

Mbaʼépa heʼise: Umi rrelihión japu ningo ymaite guive ojapóva hetaiterei mbaʼe vai ndogustáiva Ñandejárape. ¿Mbaʼe mbaʼépa por ehémplo la ojapóva hikuái ajeve Ñandejára ohundise chupekuéra? Jahechamína unos kuánto la “ipekadokuéra”:

Oñentremete polítikare. Jesucristo omboʼe vaʼekue isegidorkuérape ani hag̃ua oñentremete polítikare, upéva rangue heʼi chupekuéra ojerovia vaʼerãha Ñandejára Rréinore, upéva hína peteĩ goviérno oĩva yvágape opytátava entéro umi goviérno umáno rekovia (Daniel 2:44; Mateo 6:9, 10; Juan 6:15; 18:36).d Péro umi rrelihión japu alrrevete osẽ ojapo. Haʼekuéra oñentremete pe polítikare ndaikatuvéi peve voi, ha upéicha rupi haʼete ku omoakãratĩva Ñandejárape. Upévare pe profesía oĩva Apocalípsispe heʼi voi Babilonia Guasu hekovaiha ha haʼeha peteĩ prostitúta (Santiago 4:4; Apocalipsis 17:1, 2).



Oapoja pe violénsia. La Biblia omombeʼu umi rrelihión japu káusare oĩha hetaiterei ‘ojejukáva ko yvy ape ári’ (Apocalipsis 18:24). Heta rrelihión ningo nomboʼéi umi héntepe ojogueraha porã hag̃ua hapichakuérandi. Upévare rangue oapoja umi gérra ha omokyreʼỹ la héntepe oñorairõ hag̃ua ha opuʼã hag̃ua pe goviérnore.



Iplatapota. Umi rrelihión japu ningo “oreko hetaiterei rrikésa, ha notĩri peichaite peve ombyaty haguére” (Apocalipsis 17:4; 18:7). Heta rrelihión ningo oipuru ijautorida ojaprovecha hag̃ua la héntere ha oipuru avei umi kontákto orekóva ombyaty hag̃ua hetaiterei rrikésa. Péro koʼã mbaʼe ndogustaiete voi Ñandejárape (Tito 1:7).



Ijapu. Umi rrelihión japu ningo omboʼe la héntepe oguerovia ha ojapo hag̃ua heta mbaʼe la Biblia heʼíva oĩ vaiha.e Heta mbaʼe omboʼéva hikuái ningo oheja vai Ñandejárape ha ombotavy la héntepe, upéicha rupi la Biblia heʼi voi hese haʼeha “entéro mbaʼe yvy arigua ñanembojeguarúva sy” (Apocalipsis 17:5; 18:23).

¿Oñehundítapa entéro rrelihión voi?

No. La Biblia omombeʼu pe ‘jehasa asy guasúpe’ oñehunditaha umi rrelihión japu ha entéro umi Ñandejára enemígo. Péro omombeʼu avei oĩtaha “peteĩ aty guasu” ojesalvátava. Ko aty guasúpe oĩ umi persóna de diferénte país ha haʼekuéra omonde “ao puku morotĩ asýva”, upéva heʼise haʼekuéra ifielha Ñandejárape ha oadoraha chupe haʼe oipotaháicha (Apocalipsis 7:9, 13, 14; 19:11, 19-21). Koʼã persóna oĩ hína pe rrelihión verdadérape, ha ko rrelihión noñehundimoʼãi, síno oexistíta pára siémpre.f

¿Mbaʼérepa ndéve neinteresa vaʼerã oñehunditaha umi rrelihión japu?

Segúro tuicha netrankilisa eikuaávo Ñandejárape ndogustaieteha umi mbaʼe vai ojapóva umi rrelihión japu. Avei katuete tuicha nekonsola eikuaávo koʼẽrõitéma opataha entéro umi rrelihión oheja vaíva Ñandejárape ha hetaitéma ombosufríva la héntepe.

¿Péro serápa oĩ peteĩ rrelihión oadoráva Ñandejárape haʼe oipotaháicha? Si oĩ, ha ikatu reime segúro upeichaha. La Biblia heʼi voi “umi Ñandejára siérvo teete oadorataha chupe haʼe oipotaháicha. Haʼekuéra ohejáta pe espíritu sánto ogia chupekuéra ha osegíta umi enseñánsa verdadéra. Añetehápe Ñandejára voi oheka umichagua persónape oadora hag̃ua chupe” (Juan 4:23). Ha Ñandejára heʼi voi chupekuéra: “Peẽ che puévlo, pesẽke chugui [térã Babilonia Guasúgui] ani hag̃ua pemoirũ chupe ipekadokuérape ha ndapeipotáiramo penderupyty umi kastígo oútava chupe” (Apocalipsis 18:4, 5). Ñandejára ningo ñaneinvita hína enterovévape jaadora hag̃ua chupe haʼe oipotaháicha, jasegívo umi enseñánsa verdadéra oĩva la Bíbliape (1 Timoteo 2:3, 4). Ha haʼe opromete ñandéve jajapóramo upéva ikatutaha jaiko pára siémpre (1 Juan 2:17).