Imagination World/stock.adobe.com
¡Ñandejára Ñeʼẽ omeʼẽ esperánsa umi rrefuhiádope!
Káda áño millones de persóna osẽmante vaʼerã hógagui ipeligróso rupi pe lugár haʼekuéra oikoha. ¿Ndépa rehasa avei peichagua situasión? Oimérõ upéicha, roipota reikuaa nereimeiha neaño. Ñandejára omeʼẽ peteĩ esperánsa iporãitereíva ndéve g̃uarã, ha upéva ikatu retopa la Bíbliape.
Christos Stylianides, peteĩ expérto ombaʼapo vaʼekue pe Unión Européape,a heʼi kuri: “Umi rrefuhiádo ha umi persóna forsadoite osẽ vaʼekue hógaguib ndahaʼéi oikotevẽnteva tembiʼu, ao ha peteĩ lugár opytami hag̃ua, síno oikotevẽ avei esperánsa”. Peteĩ persóna orekóramo esperánsa, upéva oipytyvõ chupe ipositivove hag̃ua. Péro ndahaʼéi upévante la oikotevẽva umi rrefuhiádo. Haʼekuéra oikotevẽ avei konsuélo, ikatu hag̃uáicha oaguanta umi mbaʼe jetuʼuete ohasáva.
“Asẽrõ guare che paísgui ha aheja la che famíliape, añeñandu vaieterei kuri ha haʼetévaicha voi chéve ndaikatumoʼãiva aaguanta pe situasión. Akyhyjeterei vaʼekue, ndavyʼaieterei ha oĩ heta mbaʼe chepyʼapýva” (Emmanuel, Haití).
¿Ndépa sapyʼánte reñeñandu avei péicha? Oiméramo nde eheja raʼe avei nde róga, katuete eikotevẽta konsuélo ha esperánsa. ¿Mbaʼéichapa Ñandejára Ñeʼẽ ikatu nepytyvõ?
Ñandejára Ñeʼẽ nekonsola
La Biblia heʼi: ‘Jehovác ohayhu umi extranhérope’ (Deuteronomio 10:17, 18).
Upéva heʼise Ñandejára nderayhuha. Ñandejára Jehová oskrivika vaʼekue upéva la Bíbliape oipotágui reikuaa haʼe hakateʼỹha nderehe, ontende porãitereiha la rehasáva ha iñimportanteha chupe g̃uarã mbaʼéichapa nde reñeñandu.
La Biblia heʼi: “Jehová ndohejái umi hese ojeroviávape, umi persóna sinséramente oñemboʼévape chupe” (Salmo 145:18).
Upéva heʼise Jehová nerenduha reñemboʼe jave chupe. Haʼe ikatu nepytyvõ reime hag̃ua trankílo. Ha la Bíbliape haʼe omeʼẽ avei heta konsého ikatúva ndeajuda reaguanta hag̃ua umi mbaʼe rehasáva.
La Biblia heʼi: “Ni mbaʼevéicharõ Ñandejára ndojapomoʼãi ivaíva, [...] Ñandejára Todopoderóso ihústo hína” (Job 34:10, 12).
Upéva heʼise ndahaʼeiha Ñandejára káusare la resufri. Haʼe nandekastigái hína ni ndoikói omoĩ ndéve peteĩ pruéva ohecha hag̃ua ejeroviápa hese.
Ñandejára Ñeʼẽ omeʼẽ esperánsa
La Biblia omombeʼu mbaʼépa Ñandejára koʼẽrõite ojapóta ñanderehehápe. Ehechamína mbaʼéichapa upe esperánsa oipytyvõma heta persóna oheja vaʼekuépe hóga.
La Biblia heʼi: “Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva” (Apocalipsis 21:4).
Upéva heʼise koʼẽrõite opataha umi mbaʼe ñandereko asýva. Ñandejára opromete oipeʼapaitetaha entéro umi provléma ha sufrimiénto jarekóva koʼág̃a.
“Ñandejára ningo koʼẽrõite ojapóta hustísia ha oipeʼapaitéta umi mbaʼe ñandereko asyetéva koʼág̃arupi. Upéva upe esperánsa chepytyvõ ani hag̃ua apensaiterei umi mbaʼe ahasávare koʼág̃a, síno añeimahina hag̃ua og̃uahẽmaha pe día opahápe entéro koʼã mbaʼe vai” (Karla, El Salvador).
La Biblia heʼi: “Avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17).
Upéva heʼise nanembosufrimoʼãveimaha umi rrekuérdo vai erekóva. Ñandejára ojaseguráta anivéma hag̃ua hasy ndéve umi mbaʼe vai rehasa vaʼekue nemanduʼávo umívare.
“Ñasẽramo forsadoite ñande rógagui japerdepaite umi mbaʼe jarekóva, ha upéva hasyeterei ñandéve. Péro la Biblia opromete ndahasymoʼãveimaha ñandéve umi mbaʼe vai jahasáva koʼág̃a, ha opromete opataha voi katu entéro umi sufrimiénto oĩva. Upe esperánsa chéve chepytyvõ aaguanta hag̃ua umi mbaʼe ijetuʼuetéva rohasáva hína” (Natalia, Ucrania).
La Biblia heʼi: ‘Ñandejára omoĩta peteĩ rréino [...] omonguʼítava ha ohundítava enterove koʼã rréino’ (Daniel 2:44).
Upéva heʼise yvágape oĩtaha peteĩ goviérno perfékto ogovernátava ko yvy. Ñandejára oipeʼapaitéta entéro umi goviérno oĩva koʼág̃a, ha umíva rekovia omoĩta peteĩ goviérno oĩtava yvágape. Upe goviérno poguýpe ndaiporimoʼãvéima imboriahúva, jaikóta trankílo, ha oĩta hustísia ha segurida (Miqueas 4:3, 4).
“Koʼág̃arupi ningo umi hénte osufrieterei umi goviérno káusare, oĩ heta ndochaʼéiva hapicháre, ha avei oĩ deskonfiánsa ha rrasísmo. Péro tuicha chemokyreʼỹ aikuaávo ág̃a Ñandejára Rréino ou vove, opaitetaha koʼã mbaʼe ñandereko asyetéva” (Mustafa, Asia).
Pe esperánsa omeʼẽva la Biblia tuicha nekonsoláta
Ñandejára Ñeʼẽ ikatu nepytyvõ
La Biblia ningo ikatu nepytyvõ reaguanta hag̃ua umi mbaʼe jetuʼuete rehasáva ha rejadapta porãve hag̃ua la ne situasión pyahúre, oiméramo jepe eperdepa raʼe la nde kosakuéra. Ehechamína mbaʼéichapa koʼã versíkulo oĩva la Bíbliape oipytyvõma unos kuánto rrefuhiádope:
La Biblia heʼi: “Peguerekóramo jepe heta mbaʼe, pende rekove nodependéi umi mbaʼe peguerekóva rehe” (Lucas 12:15).
Mbaʼéichapa ko versíkulo ikatu nepytyvõ: Oiméramo nde esẽ raʼe forsadoite nde rógagui ha upéicha rupi epyta nde po ne akã ári, posívlemente nderevyʼaieterei ha ndereikuaái mbaʼépa ejapóta. Péro epensamína: nde rekove ningo ivaliosove entéro umi mbaʼe reperde vaʼekuégui. Nemanduʼáramo upévare, upéva nepytyvõta ani hag̃ua reñeñandu vaieterei.
“Ñande rekove ningo iñimportanteve oimeraẽ mbaʼe jarekóvagui, pórke ñapensa porãrõ, pe pláta ha umi mbaʼe jarekóva sapyʼánte ndaikatúi ñanepytyvõ” (Natalia, Ucrania).
La Biblia heʼi: “Ani eiko ere: ‘Yma ningo opa mbaʼe iporãve vaʼekue’” (Eclesiastés 7:10).
Mbaʼéichapa ko versíkulo ikatu nepytyvõ: La rehasáva koʼág̃a ikatu hína ijetuʼu legálmente, péro aníkena epensaiterei umi mbaʼe eheja vaʼekuére. Upéicha ndereikomoʼãi reñedesanimaiterei ni reñamarga.
“Che ningo aaseptáma la che situasión pyahu, ha upéva chepytyvõ chepositivove hag̃ua” (Eli, Ruanda).
La Biblia heʼi: “Jarekóma guive jaʼumi vaʼerã ha ñande aorã, javyʼáma vaʼerã koʼã mbaʼére” (1 Timoteo 6:8).
Mbaʼéichapa ko versíkulo ikatu nepytyvõ: Eñehaʼãkena eñekontenta umi mbaʼe erekóvare. Upéva nepytyvõta menove eñekevranta hag̃ua ha eiko trankilove hag̃ua.
“La Biblia tuicha chepytyvõ akambia hag̃ua apensa lája. Koʼág̃a ndaikovéima añekonsentra umi mbaʼe aperde vaʼekuére, síno avyʼa che rembireko ha che rojesalva haguére ha roime haguére peteĩ lugár isegúrovape” (Ivan, Ucrania).
La Biblia heʼi: “Entéro mbaʼe peẽ peipotáva pende rapichakuéra ojapo penderehehápe, peẽ pejapo vaʼerã avei hesehapekuéra” (Mateo 7:12).
Mbaʼéichapa ko versíkulo ikatu nepytyvõ: Umi persóna oikóva pe lugár nde reikohápe koʼág̃a, ikatu hína okyhyje ha opensa vai umi rrefuhiádore. Péro iporãta nde nderory ha ndekalidáramo hendivekuéra, péicha ifasilvéta chupekuéra ndeasepta hag̃ua ha ejogueraha porã hag̃ua hendivekuéra.
“La majoría umi héntengo omombaʼeterei ñande ñaneamávleramo hendivekuéra, ñanderrespetuóso ha jatrata porãramo chupekuéra. Ha upéicha jatratáramo ñane vesinokuéra pyahúpe, trankílo jajogueraháta hendivekuéra” (Angelo, Sri Lanka).
La Biblia heʼi: ‘Pejerure Ñandejárape penepytyvõ hag̃ua. [...] Ha Ñandejára pyʼaguapy oñangarekóta pene korasõre ha umi mbaʼe pepensávare’ (Filipenses 4:6, 7).
Mbaʼéichapa ko versíkulo ikatu nepytyvõ: Eñemboʼékena Ñandejárape ha emombeʼupaite chupe umi mbaʼe eñandúva, umi mbaʼe eikotevẽva, mbaʼépa nemongyhyje ha avei mbaʼe mbaʼépa nekevranta hína. Upévango tuichaiterei netrankilisáta ha haʼetéta ku eipeʼáva nde árigui peteĩ kárga ipohyietereíva.
“Cheprovléma jave che siémpre añemboʼe Ñandejárape ha haʼe okontesta chéve la che ñemboʼe. Umi mbaʼe aaprende vaʼekue la Bíbliagui tuichaiterei chepytyvõ ani hag̃ua ajedesespera” (Yol, Sudán del Sur).
“Umi konsého porã porã oĩva la Bíbliapengo tuichaiterei chepytyvõ aime hag̃ua trankíla ha aaguanta hag̃ua ko situasión ijetuʼuetéva” (Valentina, Ucrania).
“Tuichaitereíngo chemokyreʼỹ umi mbaʼe porãita Jehová oprometéva ojapotaha ñanderehehápe” (Emmanuel, Haití).
La Bíbliape jatopa heta promésa ñanekonsoláva ha omeʼẽva ñandéve esperánsa. ¿Ndépa eaprendeseve koʼã promésagui? ¿Mbaʼérepa ikatu eguerovia umíva oñekumplitaha katuete? Oiméramo eikuaaseve koʼã mbaʼe, ikatu eñeʼẽ umi testígo de Jehovándi. Haʼekuéra ovyʼaitereíta ikatúramo nepytyvõ ha nandekovramoʼãi mbaʼevete asy.
a Excomisario europeo de Ayuda Humanitaria y Gestión de Crisis.
b Pe Agencia de Refugiados orekóva la ONU heʼi umi rrefuhiádo haʼeha umi persóna forsadoite osẽ vaʼekue hógagui, ha oho oiko ótro siudápe térã ótro paíspe voi. Péro koʼãichagua persónare pe goviérno ndeʼíri katuete haʼeha rrefuhiádo.
c La Biblia heʼi Ñandejára heraha Jehová (Salmo 83:18). Ehecha pe artíkulo “¿Mávapa Jehová?”.