¿Máva mávapa ohóta yvágape?
Mbaʼépa heʼi la Biblia
Umi kristiáno ifiélva apytégui, Ñandejára oiporavo peteĩ kantida espesífiko oikove jeýtava yvágape omano rire (1 Pedro 1:3, 4). Ojeporavo rire koʼã kristiánope haʼekuéra osegi vaʼerã ifiél ha ojerovia ani hag̃ua operde pe oportunida orekóva oho hag̃ua yvágape (Efesios 5:5; Filipenses 3:12-14).
¿Mbaʼépa ohóta ojapo hikuái pe yvágape?
Haʼekuéra haʼéta rréi ha saserdóte Jesús ndive 1.000 áñore (Apocalipsis 5:9, 10; 20:6). La Bíbliape oñehenói voi chupekuéra “yvága pyahu”, ohechauka hag̃ua haʼekuéra ogovernataha yvága guive. Haʼekuéra ogovernáta pe “yvy pyahu” rehe, haʼéva hína umi oikótava ko yvy ápe ári. Koʼã governánte oĩtava yvágape, ombaʼapóta ikatu hag̃uáicha oñekumpli Ñandejára volunta ko yvýpe ha la héntepe g̃uarã (Isaías 65:17; 2 Pedro 3:13).
¿Mboy persónapa oikove jeýta yvágape?
La Biblia heʼi oĩtaha 144.000 persóna oikove jeýtava yvágape (Apocalipsis 7:4). Apóstol Juan ohecha vaʼekue voi peteĩ visiónpe “pe Ovecha Raʼy oñemboʼýva pe Sérro Siónpe, ha hendive 144.000” persóna (Apocalipsis 14:1-3). Ko visiónpe pe “Ovecha Raʼy” orrepresenta hína Jesúspe oikove jey rire ha oho riréma yvágape (Juan 1:29; 1 Pedro 1:19). Apóstol Juan heʼi Jesús ha umi 144.000 ogovernátava hendive oĩha pe “Sérro Siónpe”, ha upéva ohechauka haʼekuéra oĩha peteĩ posisión ijyvatévape, oséa iñimportantetereiha hikuái yvágape (Salmo 2:6; Hebreos 12:22).
Jesús katu heʼi vaʼekue ko grúpo “Ñandejára ohenói ha oelehi vaʼekue” haʼeha peteĩ ovecha aty “mbovymíva” (Apocalipsis 17:14; Lucas 12:32). Upéva ohechauka ndahetaiha la oĩva ko grúpope ñakomparáramo enterove umi ótro haʼévare avei Jesús ovechakuéra (Juan 10:16).
Mbaʼépa oñentende vai jepi umi ohótavare yvágape
Ojeʼéva jepi: Enterove umi ivuénova ohóta yvágape.
La verda: Ñandejára opromete la majoría umi ivuénova oikotaha pára siémpre ko yvy ape ári (Salmo 37:11, 29, 34).
Peteĩ vuéltape, Jesús heʼi vaʼekue: “Ni peteĩ persóna ndohói yvágape” (Juan 3:13). Upéicha haʼe ohechauka kuri umi hénte ivuénova oiko vaʼekue haʼe ou mboyve ko múndope ndohói hague yvágape, umíva apytépe Abrahán, Moisés, Job ha David (Hechos 2:29, 34). Upéva rangue, haʼekuéra oreko la esperánsa oñemoingove jeývo ko yvy ape ári (Job 14:13-15).
La Biblia heʼi avei umi orresusitáva yvágape haʼeha “umi primeroite oikove jeýva” (Apocalipsis 20:6). Upéva ohechauka porã upe rire oĩtaha ótra kláse de rresurreksión, ha upéva haʼe hína pe oikótava ko yvy ape ári.
La Bíbliape Ñandejára opromete Irréino poguýpe ‘ndaiporimoʼãveitamaha omanóva’ (Apocalipsis 21:3, 4). Ko promésa oñekumplímante vaʼerã ko yvy ape ári, pórke yvágape núnka voi ndaipóriva la omanóva.
Ojeʼéva jepi: Káda uno ikatu oelehi ohótapa yvágape térãpa oikóta ko yvýpe.
La verda: Ñandejára hína la odesidíva máva mávapa ohóta yvágape (Filipenses 3:14). Ndahaʼéi peteĩ persóna ohoseterei haguérente yvágape la oikótamava upéva (Mateo 20:20-23).
Ojeʼéva jepi: Umi nomereséiva oho yvágapente la opytátava oiko ko yvy ape ári.
La verda: Ñandejára ohenói umi oikótavape ko yvy ape ári “che puévlo”, “umi che aiporavo vaʼekue” ha “umi Jehová ovendesi vaʼekue” (Isaías 65:21-23). Haʼekuéra tuicha oñevendesíta ikatúta rupi okumpli la Ñandejára oipota vaʼekue iñepyrũ guive ñandéve g̃uarã, pórke oikóta hikuái pára siémpre peteĩ paraísope (Génesis 1:28; Salmo 115:16; Isaías 45:18).
Ojeʼéva jepi: Pe número 144.000 oñemensionáva la Bíbliape ndahaʼéi peteĩ número teete, orrepresentánte ótra kósa.
La verda: Apocalípsispe ojepuru legálmente heta número orrepresentánteva ótra kósa. Péro oĩ avei umi número ndahaʼéiva peteĩ rrepresentasión reínte, síno haʼéva número teete. Por ehémplo, upépe oñemensiona oĩha umi ita orekóva “umi 12 apóstol réra”, ha jaikuaaháicha 12 vaʼekue la Jesús apostolkuéra (Apocalipsis 21:14). Jahechamína upéicharõ mbaʼérepa ikatu ñaime segúro pe número 144.000 haʼeha avei peteĩ número teete, ha upe kantidánte la ohotaha yvágape.
Apocalipsis 7:4 heʼi: “Ahendu mboýpa umi ojesella vaʼekue: 144.000”. Pépe heʼívo ojesellaha chupekuéra heʼise hína oñekonfirmaha ohotaha yvágape. Ha upe riremínte upe kapítulope jey heʼi avei oĩha ótro grúpo, “peteĩ aty guasu avave ndaikatúiva okonta”, ha heʼi Ñandejára osalvaha avei ko aty guasúpe (Apocalipsis 7:9, 10). Pe número 144.000 orrepresentánterire peteĩ grúpo tuichavéva ndajaikuaaihápe mboy persónapa oĩ, naisentidomoʼãi la upepete jey ojeʼe oĩha ótro grúpo tuichave jeýva ha ndaikatúiva oñekonta.a
Iporã avei jareko enkuénta umi 144.000 rehe ojeʼeha haʼeha “pe kosécha primeroite oñemeʼẽva Ñandejárape” (Apocalipsis 14:4). Pe kosécha primeroite oñembyatýva peteĩ kokuépe ningo haʼe hína una pártente la oprodusi vaʼekue pe kokue, ndahaʼéi pe kokue kompletoite voi. Upéicha avei, koʼã Ñandejára siérvore ojeʼévo haʼeha umi primeroite oñemeʼẽva chupe, ohechauka porã ko grúpo haʼeha una pártente ojeporavóva enterove isiervokuéra apytégui. Ha según la Biblia, haʼekuéra ogovernáta hína Jesúsndi umi oikótavape ko yvy ápe ári (Apocalipsis 5:10).
a Peteĩ profesór hérava Robert Thomas oñeʼẽ pe número 144.000 oñemensionávare Apocalipsis 7:4-pe, ha heʼi: “Ko grúpope jaikuaa exáktamente mboy persónapa oĩ, ha upéicha rupi idiferentete pe ótro grúpo oñemensionávagui kapítulo 7:9-pe, pórke upévape ndajaikuaái mboýpa la oĩ. Jaʼéramo ko número orrepresentanteha ótra kósa, upéicharõ jaʼéta hína ndaikatuiha voi jajagarra ensério ni peteĩ número oñemensionáva Apocalípsispe” (Revelation 1-7: An Exegetical Commentary [Comentario exegético de Revelación 1-7], páhina 474).