¿Mbaʼéichapa Jesús ñandesalva?
Mbaʼépa heʼi la Biblia
Jesús omeʼẽ vaʼekue hekove perfékto ñanderehehápe ha péicha ñandesalva (Mateo 20:28). Upévare la Biblia heʼi haʼe ou hague “osalva hag̃ua ko múndope” (1 Juan 4:14). Ha avei heʼi “ndaiporiha ótro ikatúva ñandesalva” (Hechos 4:12).
Jesús omano vaʼekue entéro umi ohechaukávare ojeroviaha hese (Hebreos 2:9; Juan 3:16). Upe rire, “Ñandejára omopuʼã chupe umi omano vaʼekue apytégui”, oiko jey chugui peteĩ espíritu ha oho jey yvágape (Hechos 3:15). Upe guive, Jesús “ikatu osalva umi hénte oñemoag̃uívape Ñandejárare haʼe rupive, pórke haʼe siémpre oikove ojerure hag̃ua Ñandejárape oipytyvõ hag̃ua chupekuéra” (Hebreos 7:25).
¿Mbaʼérepa Jesús ojerure vaʼerã Ñandejárape ñanepytyvõ hag̃ua?
Enterove ñande ningo pekadór (Romanos 3:23). Ha pe pekádo ñanemomombyry Ñandejáragui, ha upévare avei ñamano (Romanos 6:23). Péro Jesús haʼe ñane “defensór”, ha ikatu hag̃uáicha haʼe ñanepytyvõ jajerovia vaʼerã pe isakrifísiore (1 Juan 2:1, nóta). Haʼe ojerure Ñandejárape ohendumi hag̃ua ñañemboʼe jave chupe, ha operdona hag̃ua ñande pekadokuéra isakrifísio rupive (Mateo 1:21; Romanos 8:34). Ha Jehová ojapo la Jesús ojeruréva chupe, pórke haʼe oipota voi entéro persóna ‘ojesalva Jesús rupive’ (Juan 3:17).
¿Sera ke jajesalvátama jajerovia haguérente Jesúsre?
Nahániri. Upéva iñimportánteramo jepe jajesalva hag̃ua, tekotevẽ avei jajapo hetave mbaʼe (Hechos 16:30, 31). La Biblia heʼi: “Ndajarrespiráiramo ñande rete omano, upéicha avei ñande jerovia omano ndajajapóiramo umi mbaʼe iporãva” (Santiago 2:26). Ikatu hag̃uáicha jajesalva tekotevẽ:
Jaikuaa porã Jesúspe ha Itúa Jehovápe (Juan 17:3).
Jajerovia hesekuéra (Juan 12:44; 14:1).
Jahechauka jajeroviaha ñaneñeʼẽrendúvo chupekuéra (Lucas 6:46; 1 Juan 2:17). Jesús heʼi vaʼekue voi ndojesalvamoʼãiha umi heʼínteva chupe: “Señór, Señór”, síno ojesalvataha sólamente umi ojapóva Itúa volunta (Mateo 7:21).
Jasegi vaʼerã jajerovia ijetuʼúramo jepe. Jesús ohechauka vaʼekue jajapo vaʼerãha upéva heʼívo: “Pe oaguantáva pe fin peve, upéva ojesalváta” (Mateo 24:13).