¿Oñehundítapa ko yvy?

Mbaʼépa heʼi la Biblia

No, ko ñande yvy núnka noñehundimoʼãi, ndojehapypamoʼãi, ni noñekambiamoʼãi ótro planétare. La Biblia heʼi porã Ñandejára ojapo hague ko yvy ojeiko hag̃ua pype pára siémpre.

• “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

• “Ñandejára, nde remopyenda porã ko yvy. Ndaipóri mbaʼeve omomýi vaʼerã hendágui, opytáta upépe opa ára g̃uarã” (Salmo 104:5).

• “Ko yvy opytáta pára siémpre” (Eclesiastés 1:4).

• “Haʼe okrea ha omopyenda porã ko yvy, haʼe hína Ijapohare. Haʼe ojapo ko yvy ojeiko hag̃ua pype, ndahaʼéi ojapo rei reínte vaʼekue” (Isaías 45:18).

¿Ohundipátapa la hénte ko ñane planéta?

Heta mbaʼe ojapóva la hénte ombyaipa ohóvo ko ñande yvy, por ehémplo pe kontaminasión, umi gérra, ha umícha. Péro Ñandejára ndohejamoʼãi oho rei hese hikuái ohundipa peve la ñane planéta. Upéva rangue, heʼi haʼe ‘ohunditaha umi ohundívape ko yvy’ (Apocalipsis 11:18). ¿Mbaʼéichapa ojapóta upéva?

Umi goviérno umáno ningo ndaikatúi okuida porã ko yvýre, upévare Ñandejára oipeʼapaitéta umíva, ha omoĩta Irréino opyta hag̃ua koʼã goviérno rekovia (Daniel 2:44; Mateo 6:9, 10). Ñandejára Rréinope ogovernáta hína Itaʼýra Jesucristo (Isaías 9:6, 7). Ha Jesús oĩrõ guare ko yvy ape ári, ojapo vaʼekue umi milágro ohechaukáva orekoha la podér okontrola hag̃ua pe naturalésa (Marcos 4:35-41). Ogueru vove Ñandejára Rréino ko yvy ape ári, haʼe orekóta ipoguýpe ko yvy kompletoite ha ikatúta okontrola opa mbaʼe oĩva pe naturalésape. Haʼe okrea jeýta térã ombopyahúta la tekotevẽva guive, ko yvy ojogua jey hag̃ua pe hardín de Edénpe (Mateo 19:28; Lucas 23:43).

¿Péro la Biblia piko ndeʼíri ko yvy okaipataha?

No, la Biblia nomboʼéi upéva. Oĩ hénte opensáva péicha pórke ontende vaínte la heʼíva 2 Pedro 3:7-pe, upépe heʼi: “Umi yvága ha pe yvy oĩva koʼág̃a oñeñongatu hína oñehundi hag̃ua tatápe”. Péro oĩ mokõi mbaʼe iñimportánteva jareko vaʼerã enkuénta ñantende porã hag̃ua la heʼiséva ko téxto.

1. Heta vése la Bíbliape ojepuru jepi umi palávra “yvága”, “yvy” ha “tata” orrepresenta hag̃ua ótra kósa. Por ehémplo, Salmo 96:13 heʼi Ñandejárare: “Haʼe ou hína ohusga hag̃ua ko yvy”. Japilla porãiterei ko kásope noñeñeʼẽiha hína ko planétare, síno la hénte oikóvare koʼápe.

2. Ñaanalisáramo mbaʼe rehepa oñeñeʼẽ 2 Pedro kapítulo 3-pe, japilláta mbaʼépa orrepresenta pe yvága, pe yvy ha pe tata oñemensionáva versíkulo 7-pe. Umi versíkulo 5 ha 6 heʼi la oikótava ojoguataha la oiko vaʼekuépe oúrõ guare pe dilúvio Noé tiémpope. Upérõ guare, Ñandejára nohundíri kuri ñane planéta, síno oipuru pe dilúvio ohundi hag̃ua umi hénte aña upe tiémpope guare. Ha la Biblia oipuru pe palávra “yvy” térã “múndo” orrepresenta hag̃ua koʼã héntepe (Génesis 6:11). Pe dilúvio avei ohundipaite umi “yvága”, orrepresentáva umi ogoverna vaʼekue koʼã héntepe. Upéicharõ, la oñehundi vaʼekue haʼe umi hénte aña, ndahaʼéi ko ñane planéta. Noé ha ifamiliakuéra noñehundíri kuri pe dilúviope, ha osegi oiko ko yvýpe upe rire (Génesis 8:15-18).

Pe dilúvio tiémpope, pe y ohundi vaʼekue umi hénte añáme. Upéicha avei, pe “tata” oñemensionáva 2 Pedro 3:7-pe ohechauka Ñandejára ohundi jeytaha umi hénte añáme, ndahaʼéi ko planéta. Ñandejára opromete omoĩtaha “umi yvága pyahu ha peteĩ yvy pyahu, ha umívape siémpre oĩta hustísia” (2 Pedro 3:13). Pe “yvy pyahu” orrepresenta umi oikótavape ko yvy ape ári, ha ogovernáta chupekuéra “umi yvága pyahu”, orrepresentáva Ñandejára Rréinope. Upe Rréino ogoverna vove ko múndo, ko yvýgui oiko jeýta peteĩ paraíso ikatuhápe jaiko trankílo porã (Apocalipsis 21:1-4).