Oñepytyvõ ermanokuérape oikóramo jepe “gérra heta hendárupi”

Koʼã ára pahápe ñahendu “oikoha gérra heta hendárupi” (Mateo 24:6). Hetaiterei ñane ermáno osufri koʼã gérra káusare, péro siémpre oñepytyvõ chupekuéra oikotevẽhaichaite hikuái. Ñandepyʼaguapy japytávo ñahendu rire pe Infórme 3 omeʼẽva pe Kuérpo Governánte 2022-pe, upépe oñemombeʼu kuri Europa del Éstepe ojejapoha umi lavór de sokórro oñepytyvõ hag̃ua umi ermáno ojeafekta vaʼekuépe pe gérra de Ucrania káusare. ¿Mbaʼépa ojejapo hína oñepytyvõ hag̃ua koʼã ermánope pe gérra paʼũme? ¿Mbaʼéichapa umi lavór de sokórro oipytyvõ umi ermáno oikóvape Ucrániape?

¿Mbaʼépa la oikotevẽva? ¿Mbaʼéichapa oñemog̃uahẽ chupekuéra umi ajúda?

Oñepyrũha díape pe gérra Ucrániape, 24 de febrero de 2022, pe Komite de Koordinadór oaprova peteĩ kantida de pláta oñepytyvõ hag̃ua ermanokuérape. Sapyʼaitépe pe sukursál Ucraniapegua oñepyrũ ojogua provísta ha unos kuánto prodúkto, ha umi 27 Komite de Sokórro oĩva pe paíspe oñepyrũ orreparti umíva.

Avei umi ermáno sentrál mundialpegua pyaʼe voi oñepyrũ opensa mbaʼéichapa ikatu oñepytyvõ pe sukursál Ucraniapeguápe. Pe Komite de Koordinadór ha de Puvlikasión Kuérpo Governantepegua, onkarga pe Departaménto Mundiál de Kómprape oñomoirũ hag̃ua pe sukursál de Ucrania ha Poloniapeguándi, ohecha hag̃ua mbaʼépa ikatu ojapo hikuái oipytyvõ porãve hag̃ua umi ermanokuérape. Káda día umi ermáno ombaʼapóva Departaménto de Kómpra, Envío ha Legáles umi sukursalpegua, oñembyaty peteĩ ermáno pe Komite de sukursál Ucraniapeguándi ha avei umi ombaʼapóvandi pe Departaménto Mundiál de Kómpra ndive, ikatu hag̃uáicha oorganisa porã la traváho.

Jay Swinney ombaʼapóva Departaménto Mundiál de Kómprape omombeʼu: “Primero roikuaa vaʼerã kuri mbaʼépa la oikotevẽva umi ermanokuéra. Romeʼẽse chupekuéra tembiʼu ha artíkulo de primera nesesida haʼekuéra ojepokuaávare voi. Péro la provléma ndahaʼéi vaʼekue roikuaánte vaʼerã mbaʼépa la oikotevẽva hikuái, síno roikuaa vaʼerã avei mbaʼéichapa ikatu romoinge umíva Ucrániape, ipyaʼeveháicha ha ojapeligraʼỹre hikuái”.

El 9 de marzo de 2022 ojeikuaáma mbaʼépa la oñemondo vaʼerã. Ojedesidi ojepreparataha unas kuánta káha orekóva por ehémplo soʼo ha pira enlatádo, sereál, arrós, kumanda, havõ ha papél ihiéniko. Ojekalkula koʼã merkadería oñemeʼẽtaramo peteĩ persónape 4 semánare, ohupytytaha 65 dólar rupi. Provávlemente koʼã merkadería oikotevẽta kuri míles de ermáno, upévare pe Komite de Koordinadór oaprova ojepurutaha hetaiterei pláta ñane ermanokuéra oreko hag̃ua koʼã mbaʼe. Péro, ¿mbaʼéichapa oñemog̃uahẽta umi merkadería koʼã ermánope ojeapeligraʼỹre avave?

El 13 de marzo mokõi ermáno Poloniapegua ojapo peteĩ pruéva: ogueraha umi merkadería Polonia sukursál guive Ucrania peve, siuda de Leópolis ypýpe (Lviv). Unos kuánto día upe mboyve, umi ermáno sukursál de Ucrania ha Poloniapegua oipytyvõ chupekuéra oorganisa hag̃ua la viáhe. Ohechapa hikuái mbaʼeichagua kuatiápa oñekotevẽta oñembohasa hag̃ua pe kamión, ha ojasegura hikuái pe kamiónre tojekuaa haʼeha peteĩ veíkulo de ajúda umanitária. Umi ermáno lokál oipytyvõ chupekuéra oiporavo hag̃ua peteĩ rrúta ipyaʼevéva una ves ke oike hikuái Ucrániape. Umi merkadería oñemboguejy Leópolispe, ha 24 óra mboyve pe Komite de Sokórro ontregapaitéma umíva. Ha ñane ermanokuéra ojevy jey Polóniape trankiloite. Entéro koʼã mbaʼe osẽ porãmba Jehová rupive ha oñeplanea porã rupi.

Pe primera pruéva ojejapo vaʼekue oikoite. Péro upérõ guare haimete una toneláda de merkaderíante ikatu kuri ojerreparti, ha ofalta gueteri oñentrega 200 toneládarupi. ¿Mbaʼéichapa ikatúta kuri ojegueraha ha oñentrega pyaʼe umíva?

“Nde puévlo kyreʼỹme oúta ojeofrese”

Osẽ rire jw.org-pe mbaʼéichapa pe gérra oafekta ñane ermanokuérape, hetave persóna oĩva ko múndo tuichakuére oipytyvõse. Umi oikóva mombyry Ucrániagui omeʼẽ ikontrivusión pe óvra mundiálpe g̃uarã, oikuaa porãgui upéva ojepuru porãtaha. Umi oikóva ag̃uive Ucrániagui katu oofrese itiémpo, ipláta ha imbaretekue. Jahechamína algúno ehémplo.

Polóniape peteĩ “ehérsito” de voluntário oprepara hetaiterei káha oñentrega hag̃ua umi ermanokuérape, ha heta mitã mimi odivuha chupekuéra g̃uarã. Bartosz Kościelniak, ombaʼapóva Departaménto de Kómpra sukursál de Polóniape, omombeʼu: “Salmo 110:3 heʼi Jehová ‘puévlo kyreʼỹme ojeofresetaha’. Che heta vésema alee ko sálmo, péro primera ves ahecha che resa teérupi mbaʼéichapa hetaiterei persóna, cientos voi, pyaʼe ou oñepresenta oipytyvõ hag̃ua oimeraẽ mbaʼépe”.

Peteĩ ermáno orekóva peteĩ emprésa internasionál de lohístika oipuruka ikamionkuéra, ha opaga la kombustívle oñekotevẽ vaʼekue, ojegueraha hag̃uáicha umi provísta. Haʼe omombeʼu: “Chéve g̃uarã, kóva haʼe peteĩ oportunida iporãitereíva ahechauka hag̃ua che ermanokuérape ha Jehovápe mbaʼeichaitépa ahayhu chupekuéra. Avyʼa ajeofrese haguére aipytyvõ hag̃ua”. Ikatu hag̃uáicha ojegueraha enterovépe umi merkadería, en totál oñedona kuri mas de 7.700 lítro de kombustívle. Ha umi ermáno omeʼẽ itiémpo ha imbaretekue omaneha hag̃ua haimete 48.000 kilómetro.

Umi voluntário péicha oporohayhu rupi ha ombaʼapo jejopy rupi, 15 día haguépente, el 28 de marzo, ojegueraháma Ucrániape 100 toneláda tembiʼu, pohã ha umi artíkulo de ihiéne. Ha heta ermáno ha proveedór odona rupi hetaiterei merkadería, ojeaorra hetaiterei pláta ojepreparárõ guare umi káha. Koʼag̃aitérõ umi testígo de Jehová omondo Ucrániape mas de 190 toneláda de merkadería. ¿Mbaʼéichapa oñeñandu umi ermáno orresivi vaʼekue koʼã mbaʼe?

“¡Rohechakuaa umi káha henyhẽha mborayhúgui!”

Umi káha og̃uahẽrõ guare Leópolispe, umi Komite de Sokórro oĩva Ucrániape oñepyrũ orrepartipaite umíva umi ermáno oikotevẽvape. Heta koʼã káha ojegueraha umi siuda opytávape mas de 1.300 kilómetro Leópolisgui. Ha ojejapóramo jepe opa mbaʼe pyaʼe ha porãnte avei, lomímonte oraha heta tiémpo ojerrepartipa hag̃ua umíva.a

Markus Reinhardt, oĩva pe Komite de Sukursál Ucraniapeguápe, heʼi: “Koʼã mbaʼe vai paʼũme heta ermáno ohecha mbaʼeichaitépa Jehová ohayhu chupekuéra, ha mbaʼérepa iñimportantete jasegi umi instruksión omeʼẽva iñorganisasión, oñepyrũ mboyve jepe peteĩ mbaʼe vai. Por ehémplo, enterovépe ojeʼe oñongatu hag̃ua hógape tembiʼu ha y unas kuánta semanarãicha. Peteĩ ansiáno kongregasión Kievpegua hérava Anton heʼi: ‘Roagradeseterei Jehová organisasiónpe orepytyvõ haguére rojepreparáma hag̃ua oikórõ g̃uarã peteĩ situasión vai koichagua. Roguereko rupi tembiʼu, y ha peteĩ rrádio noromanói’. Rovyʼaiterei ningo roikuaávo oĩha ermáno osegíva koʼã instruksión oĩhaichaite, upéva omeʼẽ kuri tiémpo pe sukursálpe oorganisa hag̃ua umi lavór de sokórro”.

¿Mbaʼéichapa oñeñandu ñane ermanokuéra og̃uahẽrõ guare la ajúda? Míkola ha Zinaida, oikóva Járkovpe, omombeʼu: “Opokoiterei ningo orerehe rohechakuaávo mbaʼeichaitépa ojepyʼapy orerehe umi ermáno. Grásiamante umi tembiʼu ha pohãre, ojekuaa porãiterei Jehová ojapoha koʼã mbaʼe”. Valentina, oikóva avei upe siudápe, heʼi: “Oñepyrũrõ guare la gérra oĩ vaʼekue peteĩ fíla puku ojejogua hag̃ua umi tembiʼu, ha ndahaʼéi katuete siémpre ikatúva rokonsegi la roikotevẽva. Péro Jehová ohecha hína kuri la rohasáva, upévare haʼe voi oñenkarga umi ermáno ogueru hag̃ua oréve ore rogaitépe voi opa mbaʼe roikotevẽva. Emañávo nde jerére ningo ehechakuaa opa mbaʼénte desastreha ha eimoʼã ndaiporiveimaha solusión. Upépe rehechakuaa mbaʼéichapa Jehová ha iñorganisasión oñangareko porãiterei nderehe. [...] Tuichaiterei ningo nembopyʼaguapy rehechávo mbaʼéichapa nepytyvõ ha ndeapoja umi ermáno pe reikotevẽ javete”.

Evguen ha Irina oho vaʼerã kuri isiuda Mariúpolgui, haʼekuéra heʼi: “Ore pyʼaite guive roagradese peñangareko porã haguére ore famíliare ha peichaite orerayhu haguére. Legálmente itiempoitépe og̃uahẽ la ajúda. Primero ropensa vaʼekue umi káha orekoha merkaderíante, péro roavrírõ guare rohechakuaa umi káha henyhẽha mborayhúgui”.

Oñehendu ningo “oikoha gérra heta hendárupi”, péro ojekuaa porãiterei mbaʼéichapa Jehová ogia ha oipytyvõ ijespíritu rupive oñemeʼẽ hag̃ua ermanokuérape entéro mbaʼe oikotevẽva hikuái. Ha upéicha avei ojekuaa umi kontrivusión pemeʼẽva rupive pe óvra mundiálpe g̃uarã donate.jw.org. ¡Grásiamante péicha pendepojera haguére!

Oñepytyvõ ipyaʼeveháicha ha iseguroveháicha

1. 

   24 de febrero de 2022: Pe Komite de Koordinadór oaprova peteĩ kantida de pláta pe sukursál de Ucrania oipytyvõ hag̃ua umi ermáno oikotevẽvape.

2. 

   24 de febrero al 8 de marzo de 2022: Pe sukursál Ucraniapegua ojogua provísta ha ojevale umi Komite de Sokórrore orreparti hag̃ua umíva. Avei pe sukursál ojeprepara orresivi ha orreparti hag̃ua umi provísta og̃uahẽva Polóniagui.

3. 

   9 de marzo de 2022: Pe Komite de Koordinadór oaprova oñemondo hag̃ua opa mbaʼe ermanokuéra oikotevẽva Ucrániape.

4. 

   10-12 de marzo de 2022: Oñeorganisa peteĩ viáhe de pruéva ojegueraha hag̃ua umi tembiʼu ha provísta, Polonia guive Leópolis peve (Ucrania).

5. 

   13 de marzo de 2022: Ojejapo pe primer viáhe de pruéva oñemondohápe tembiʼu ha provísta, Polonia guive Leópolis peve (Ucrania).

6. 

   14-16 de marzo de 2022: Polóniape, umi ermáno ombaʼapóva Departaménto Lokál de Diséño ha Konstruksiónpe oñeorganisa peteĩ Salón de Asambléape, siuda de Poznan ypýpe, oprepara hag̃ua umi káha orekóva tembiʼu ha artíkulo de ihiéne.

7. 

   17 de marzo de 2022: Cuatro día ojejapo haguépe pe viáhe de pruéva, ojegueraha 13 toneláda de merkadería Ucrania frontérape.

8. 

   21-27 de marzo de 2022: Ojeprepara hetave káha de provísta Polóniape ha oñemondo Ucrániape, 24 óra mboyve ojerrepartipaitéma umíva umi oikotevẽvévape.

9. 

   28 de marzo de 2022: Veinte día ojeaprova haguépe oñepytyvõtaha umi ermanokuérape, ojerrepartíma Ucrániape 100 toneláda tembiʼu, artíkulo de ihiéne ha pohã.

Koʼag̃aitérõ, umi testígo de Jehová omondo Ucrániape mas de 190 toneláda de provísta.