Rréi Josías oreko vaʼekue 16 áño oñepyrũrõ guare oservi Jehovápe. Haʼe oikuaa porãseve vaʼekue Jehovápe ha ojapose ivolunta, péro ndahaʼéi vaʼekue la ifasilpáva. Upe tiémpope hetaiterei hénte oadora vaʼekue umi dios guaʼúpe. Upévare Josías ojokoséramo chupekuéra ipyʼaguasúmante vaʼerã, ha haʼe ohechauka ndaipyʼajuiha. Omboty mboyve 20 áño, Josías oñepyrũ oipeʼa pe rrelihión fálsa pe puévlogui (2 Crón. 34:​1, 2). Nde avei nemitãramo jepe ikatu edesidi esegi Josías ehémplo. Upearã eikuaave vaʼerã Jehovápe ha umi kualida porãite orekóva. Upéva nemomýita eñemeʼẽ hag̃ua chupe. ¿Mbaʼéichapa nepytyvõta reñemeʼẽramo Jehovápe? Lucas ojevautisa vaʼekue orekórõ guare 14 áño, ha heʼi: “Koʼág̃a guive amotenondéta che rekovépe Jehová servísio ha añehaʼãta ambovyʼa chupe” (Mar. 12:30). Nde avei ikatu rehupyty heta vendisión rejaposéramo upéva. w23.09 11 párr. 12, 13

Apóstol Pablo oskrivírõ guare 1 Tesalonicenses ndojapói gueteri ni un áño oñepyrũ hague upe kongregasión. Upévare oiméne umi ansiáno upepegua saʼi iñexperiénsia ha ikatu ojavy raʼe, péro ojerrespeta vaʼerã kuri chupekuéra. Oñemoag̃uívo ohóvo pe jehasa asy guasu koʼýte ñaikotevẽta ñandegia umi ansiáno ñane kongregasionpegua, pórke ndajaikuaái upe tiémpope ikatútapa ñañekomunika sukursál ndive térã pe sentrál mundiál ndive. Upévare koʼág̃ama ñañehaʼã vaʼerã jahayhu ha jarrespeta ansianokuérape. Tahaʼe haʼéva la oikóva, jasegi vaʼerã ñapensa hendaitépe ha ani jaiko ñamaña idefektokuérarente. Upéva rangue ñanemanduʼa vaʼerã Jehová ojevaleha Jesucristo rehe ogia hag̃ua koʼã ermánope. Pe kásko oproteheháicha peteĩ soldádo akã, péicha pe esperánsa oprotehe la ñapensáva ha jahechakuaa umi mbaʼe oofreséva ko múndo vyroreiha (Filip. 3:8). Pe esperánsa ñanepytyvõ ñaĩ hag̃ua trankílo ha ñapensa porã hag̃ua. w23.06 11, 12 párr. 11, 12

Umi ohendúva pe ‘kuña naiñarandúivape’ odesidi vaʼerã oaseptátapa térã nahániri la iñinvitasión. Ndahaʼéi vyroreíre la ñamboykete vaʼerã pe tekovai. Proverbios omombeʼu pe “kuña naiñarandúiva” heʼiha: “Pe y ahéno ningo heve ha heʼẽ asy voi” (Prov. 9:17). ¿Mbaʼépa “pe y ahéno”? Ótra pártepe la Biblia okompara “pe y porãite” pe rrelasión sexuál orekóvare ména ha tembireko oñondive (Prov. 5:​15-18). Peteĩ kuimbaʼe ha kuña omendáva añoite ikatu oreko oñondive rrelasión sexuál. Péro la Biblia heʼi jave “pe y ahéno” idiferentete hína. Ápe provávlemente oñeñeʼẽ tekovaíre, térã umi rrelasión sexuál Ñandejára léi oproivívare. Umi hekovaíva oñehaʼã jepi omokañy la ojapóva. Haʼete voi peteĩ mondaha ogueraháva mbaʼe ahéno. Pe “y ahéno” haʼete heʼẽ asýva umi opensávape g̃uarã ndojepillamoʼãiha chupekuéra, péro oñembotavy ijupe voi pórke Jehová ohecha opa mbaʼe. Ivaieterei hína japyta vai Jehovándi, ndaipóri ótra kósa ikatúva ñaneamargave upévagui. Ha ndahaʼeiete hína he ni heʼẽ asýva la jahasátava (1 Cor. 6:​9, 10). w23.06 22 párr. 7-9