KAPÍTULO 15

¿Mbaʼépa ajapokuaa ojejapokasérõ chéve ivaíva?

“Che koléhiope oĩ opitáva, ojedrogáva ha orekóva séxo. Aikuaa chevyraitereitaha ajapóramo haʼekuéra ojapóva, péro sapyʼánte ndaikuaavéima mbaʼéichapa haʼéta chupekuéra che ndajapomoʼãiha umi mbaʼe” (Eva).

ENTÉRO jaipota umi ótro ñandeguerohory, ha upévare oĩ jave ñandejopýva jajapo hag̃ua peteĩ mbaʼe noĩporãiva ifásil jajapo haʼekuéra oipotáva. Por ehémplo, oimérõ rekakuaa peteĩ família haʼévape Testígo, reikuaa ivaiha ojeʼu rasa vevída ha ojereko rrelasión sexuál oñemendaʼỹre (Gálatas 5:19-21). Upéicharõ jepe, heta ne kompañerokuéra ojapo upéva, ha oipota nde avei rejapo. Péro, ¿repensáma mbaʼérepa ojapo hikuái upéicha? ¿Ndépa ere haʼekuéra voi odesidiha upéva? No, normálmente haʼekuéra ojapo upéicha ndopytavaiséigui ótro renondépe, upévare oheja umi ótro odesidi hese mbaʼépa ojapóta. ¿Oikópa avei nderehe upéicha, térãpa ndepyʼaguasu redefende hag̃ua umi mbaʼe regueroviáva?

La Biblia omombeʼu Moisés ermáno, haʼéva Aarón, ojejopy hague avei ojapo hag̃ua ivaíva. Peteĩ jey umi israelita omboliga ha ojopy vaipaite chupe ojapo hag̃ua peteĩ dios raʼanga, ha haʼe opena hesekuéra (Éxodo 32:1-4). Epensamíntena, haʼe ningo ipyʼaguasu vaʼekue oraha hag̃ua Ñandejára mensáhe pe rréi de Egíptope (Éxodo 7:1, 2, 16). Haʼe oñanima kuri oho oñeʼẽ pe faraón renondépe, péro upéi okyhyje rupi umi israelítagui ojapo peteĩ mbaʼe noĩporãiva.

Ha nde, oĩ jave ndejopýva rejapo hag̃ua ivaíva, ¿ijetuʼúpa ndéve redefende hag̃ua la regueroviáva? ¿Mbaʼépa rejapokuaa pono rehechauka nenervióso térã rekyhyjeha? ¡Ani rejepyʼapy! Nde ikatu rembohovái porã koʼãichagua situasión. Upearã epensa vaʼerã mbaʼe provlémapa ikatu oñepresenta, upéicha ifasilvéta redesidi mbaʼépa rejapóta. Koʼã 4 konsého katuete nepytyvõta.

1. Eñatende oikóvare nde jerére (Proverbios 22:3). Heta vése ifásil japilla oñepresentáta jave peteĩ provléma. Por ehémplo, rehechárõ ouha unos kuánto ne kompañéro opitáva hína, katuete oipotáta repita hendivekuéra, ¿ajépa? Upévare, reikuaa hag̃ua mbaʼépa rejapóta oĩ jave provléma, reñatende vaʼerã la oikóvare nde jerére.

2. Epensa mbaʼéichapa reñeñandúta upéi (Hebreos 5:14). Eñeporandumína: “¿Mbaʼéicha añeñandúta ajapóramo ivaíva umi ótro ojapóguinte?”. Ikatu peteĩ tiémpore haʼekuéra ndeguerohory, péro ¿mbaʼéicha reñeñandúta reime jave nde tuakuéra térã umi ermánondi? ¿Resakrifikátapa pe priviléhio reguerekóva reime porãvo Ñandejára renondépe, remeʼẽségui gústo ne kompañerokuérape?

3. Edesidi mbaʼépa rejapóta (Deuteronomio 30:19). Káda kristiáno odesidi vaʼerã ifiéltapa térãpa nahániri. Péro avei oikuaa vaʼerã odesidi vaíramo osẽ vaitaha. José, Job ha Jesús odesidi porã vaʼekue. Péro oĩ avei odesidi vai vaʼekue, umíva apytépe Caín, Esaú ha Judas. Koʼág̃a nde redesidi vaʼerã mbaʼépa rejapóta.

4. Ejapo pe redesidi vaʼekue. Ani repensa upéva haʼeha pe párte ijetuʼuvéva, pórke oimérõ redesidíma mbaʼépa rejapóta ha repensáma mbaʼe konsekuénsiapa orekóta, ifasilvéta ndéve rejapo hag̃ua pe redesidi vaʼekue (Proverbios 15:23). Por ehémplo, peteĩ ne kompañéro oipotárõ rejapo ivaíva, natekotevẽi reñemoñeʼẽ chupe, síno erénte nderejapomoʼãiha la heʼíva ha nokonsegimoʼãiha mbaʼeve nendive. Upearã, ikatu ere chupe peteĩva koʼã mbaʼe:

“Chéve nacheinteresái umíva”.

“Che ndajapomoʼãi upéva”.

“¿Mbaʼe ojehu ndéve? ¿Ndachekuaaiete mbaʼe piko?”.

Ani hag̃ua ne kompañerokuéra osegi nemolesta pyaʼe voi rembohovái vaʼerã chupekuéra ha ojekuaa vaʼerã reimeha segúro. ¿Ha heʼírõ ndéve ndepyʼajuha ha upévarente nderejapoiha haʼekuéra heʼíva? Péicha jave, ikatu reelehi koʼã 3 konséhogui mbaʼéichapa rembohováita:

● Easepta. Ikatu ere: “Siérto la pejéva, nañanimái”. Upéi eexplika mbykymi mbaʼérepa nderejapomoʼãi haʼekuéra oipotáva.

● Ani embopuku. Ere porãnte vaʼerã mbaʼépa nderejapomoʼãi, péro ani ejodiskuti hendivekuéra.

● Emopensa chupekuéra. Ere porã chupekuéra mbaʼérepa nderejapomoʼãi haʼekuéra ojapóva, ha upéi emopensa chupekuéra péicha: “Pepensa porãrõ ningo ni peẽ ndapepitamoʼãi, pórke péva ñandeperhudika”.

Osegírõ nemolesta hikuái, eho upégui pórke repytavéramo, katuete osegíta ndejopy hikuái. Rehóramo upégui ndeʼiséi ndepyʼajuha ni haʼekuéra ogana hague, síno nde voi redesidiha mbaʼépa rejapóta ha nderehejamoʼãiha avave ojapoka ndéve ivaíva.

Ikatu ne kompañerokuéra oñembohory nderehe ha heʼi rehejaha ótro odesidi nderehe. Péro ndahaʼéi upéicha. Jehová oipota ndete rehechakuaa iporãveha rejapo haʼe oipotáva (Romanos 12:2). ¿Ajépa naisentidomoʼãi reheja ne kompañerokuéra odesidi nderehe ha nemaneha haʼekuéra oipotaháicha? (Romanos 6:16). Upévare, edefendékena umi mbaʼe regueroviáva.

Oĩtante voi nemboligáva rejapo hag̃ua ivaíva, upéva ndaikatumoʼãi rejoko. Péro nde ikatu redesidi mbaʼépa rejapóta ha rehechauka reĩha segúro upe redesidívare (Josué 24:15).

RETOPAVÉTA INFORMASIÓN VOLÚMEN 1, KAPÍTULO 9-PE

TÉXTO OĨVA LA BÍBLIAPE

“Pe oiko meméva umi iñarandúvandi iñarandúta avei, péro pe oiko meméva umi itavývandi osẽ vaíta” (Proverbios 13:20).

PETEĨ KONSÉHO

Ikatu hag̃uáicha ndepyʼaguasuve, elee umi experiénsia omombeʼúva Jehová siervokuéra ñane tiempopegua odefende vaʼekue umi mbaʼe oikuaáva oĩ porãha.

¿REIKUAÁPA RAʼE?

Ohasa rire un áño retermina hague nde koléhio, saʼieterei oĩta ne kompañerokuéra apytépe imanduʼátava nderehe. Oĩta voi naimanduʼamoʼãiva ni nde rérare. Péro ne família ha Jehová katu siémpre oĩta nde ykére (Salmo 37:23-25).

UMI MBAʼE AJAPÓTAVA

¿Mbaʼépa ikatu ajapo aime hag̃ua preparádo oĩramo g̃uarã chemboligáva ajapo hag̃ua ivaíva? ․․․․․

¿Mbaʼépa ajapóta che kompañerokuéra chejopýramo ajapo hag̃ua ivaíva? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼéicha javépa ideprovéchota ndéve umi 4 konsého jahecha vaʼekue ko kapítulope?

● ¿Mbaʼépa ikatu oiko rejapóramo peteĩ mbaʼe ivaíva ne kompañerokuéra heʼígui ndéve?

● ¿Mbaʼépa ikatu rejapo reñedefende hag̃ua ne kompañerokuéra ndejopy jave rejapo hag̃ua peteĩ mbaʼe naiporãiva?

[Komentário oĩva páhina 131-pe]

“Oĩ heta oikuaáva che haʼeha Testígo, ha cherrespeta upévare. Peichahágui oñeʼẽtarõ hikuái álgo itieʼỹvare, haʼekuéra heʼi voi chéve: ‘Mike, roñeʼẽta hína umi mbaʼe ndéve nandegustáivare, upévare rehoséramo, rehokuaántema’” (Mike).

[Informasión oĩva páhina 132 ha 133-pe]

Rekompleta hag̃ua

Ne kompañerokuéra ndejopýramo

Ehémplo

1 Eñatende

¿Mbaʼépa oipota rejapo hikuái? Repita.

¿Moõpa ikatu nemboliga hikuái? Váñope.

2 Epensa

¿Mbaʼépa oikóta ajapóramo haʼekuéra heʼíva?

Amoñeñandu vaíta Jehovápe ha che tuakuérape. Che konsiénsia chemolestáta, ha ótrope ijetuʼuvéta chéve arrechasa hag̃ua.

¿Mbaʼépa oikóta chepuʼakáramo pe situasiónre?

Ikatu oñembohory cherehe hikuái térã chemboyke. Péro Jehová ovyʼáta, ha ahechaukáta chedesididoha.

3 Edesidi

¿Mbaʼépa ahechaukáta ajapóramo haʼekuéra heʼíva?

Ndajepreparái hague oñepresenta mboyve chéve ko situasión. Ha ameʼẽseha gústo che kompañerokuérape, aime porã rangue Ñandejárandi.

¿Mbaʼérepa adesidi ndajapomoʼãiha heʼíva hikuái?

Aikuaa Jehovápe ndogustaiha, ha apitáramo ikatuha cheperhudika ha chembohasy.

4 Ejapótava

¿Mbaʼépa ajapóta?

Haʼéta chupekuéra ndajapomoʼãiha haʼekuéra oipotáva ha aháta upégui.

Tentasión

Che kompañéro heʼíramo chéve: “¡Epita katuna!, ¿o nereñanimái?”.

Ikatu ambohovái chupe péicha:

Easepta

“Siérto, nañanimái. Ndaipotái chejagarra kánser de pulmón”.

Ani embopuku

“No grásia. Emeʼẽ reíta chéve nde sigarríllo”.

Emopensa chupe

“Epensa porãrõ, nde voi nderepitamoʼãi, pórke upéva ñandeperhudika”.

NÓTA: Ne kompañerokuéra osegíramo nemolesta, eho upégui. Repytavéramo, katuete ndejopyvéta hikuái rejapo hag̃ua haʼekuéra oipotáva. Koʼág̃a ikatu rekompleta pe ótra páhina.

Ne kompañerokuéra ndejopýramo

Efotokopia ko páhina

1 Eñatende

¿Mbaʼépa oipota rejapo hikuái? ․․․․․

¿Moõpa ikatu nemboliga hikuái? ․․․․․

2 Epensa

¿Mbaʼépa oikóta ajapóramo haʼekuéra heʼíva?

․․․․․

¿Mbaʼépa oikóta chepuʼakáramo pe situasiónre?

․․․․․

3 Edesidi

¿Mbaʼépa ahechaukáta ajapóramo haʼekuéra heʼíva?

․․․․․

¿Mbaʼérepa adesidi ndajapomoʼãiha heʼíva hikuái?

․․․․․

4 Ejapótava

․․․․․

¿Mbaʼépa ajapóta?

․․․․․

Tentasión

Che kompañéro heʼíramo chéve: ․․․․․

Ikatu ambohovái chupe péicha:

Easepta

․․․․․

Ani embopuku

․․․․․

Emopensa chupe

․․․․․

Epraktika umi mbaʼe erétava ha ejapótava nde tuakuérandi térã peteĩ ne amígo de konfiánsandi.

[Taʼanga oĩva páhina 135-pe]

Remeʼẽramo gústo ne kompañerokuérape reheja hína haʼekuéra nemaneha oipotaháicha