Ñandejára omeʼẽ yvyporakuérape peteĩ hardín

LA Biblia heʼi: ‘Iñepyrũmbýpe Ñandejára ojapo yvága ha yvy’ (Génesis 1:1). Péicha ko lívro oñepyrũre voi oñeʼẽma ñandéve Ñandejára ipuʼakapávare hérava Jehová. Upéi omombeʼu mbaʼéichapa Ñandejára oprepara ko yvy ha omoĩmbaite ñaikotevẽva guive jaiko hag̃ua pype.

Upéi ojapo pe kuimbaʼe ypykuépe yvýgui, ombohéra Adán ha omoĩ chupe peteĩ hardín iporãitereívape hérava Edén. Ñandejára voi oprepara upe hardín ha upépe oĩvaʼekue heta yvyramáta hiʼa porã ha hetereíva. Pe kuimbaʼe ningo ojeapo Ñandejára joguaháramo upéva heʼise ikatuha oporohayhu, iñarandu ha imbaʼeporã. Upévare jaʼekuaa yvyporakuéra haʼeha Jehová rembiapokue iñimportantevéva ko yvy ape ári.

Peteĩ jey Ñandejára ohecha Adán oikotevẽha iñirũrã. Upévare oipeʼa chugui peteĩ ikostílla ojapo hag̃ua Évape ha upéi omomenda chupekuéra. Adán ovyʼaiterei ha ojapo chupe peteĩ ñeʼẽyvoty: ‘Kóva haʼe che pehẽngue che kangue ha che roʼógui osẽvaʼekue’. Ha la Biblia heʼi voi: ‘Upévare pe kuimbaʼe oheja itúva ha isýpe, ojoaju hembirekóndi, ha oiko mokõivégui peteĩnte’ (Génesis 2:​22-24; 3:20).

Ñandejára heʼi Adán ha Évape oñangareko hag̃ua ko yvýre ha ifamília reta hag̃ua. Avei heʼi chupekuéra ndovaleiha hoʼu pe “yva oikuaaukáva iporãva ha ivaíva” (Génesis 2:17). Mbaʼépa oikóta naiñeʼẽrendúiramo hikuái? Omanóta. Iñeʼẽrendúramo katu ohechaukáta ohayhuha Ñandejárape, oñemoĩseha ipoguýpe ha oagradeseha chupe opa mbaʼére. Adán ha Eva ningo iperfékto upéicha rupi mbaʼevete ndofaltái chupekuéra ojapo hag̃ua Ñandejára heʼíva. La Biblia heʼi voi: ‘Ñandejára omaʼẽ opa mbaʼe ojapovaʼekuére ha ojuhu iporãitereiha’ (Génesis 1:31).

(Oñeguenohẽ Génesis kapítulo 1 ha 2-gui.)