Rreferénsia ojepurútava rreunionhápe Mbaʼéichapa Jaiko ha Japredika vaʼerã
6-12 DE JULIO
TESÓRO OĨVA ÑANDEJÁRA ÑEʼẼME | ÉXODO 6, 7
“Koʼág̃a rehecháta la ajapótava faraón rehe”
(Éxodo 6:1) Upémarõ Jehová heʼi Moiséspe: “Koʼág̃a rehecháta la ajapótava faraón rehe. Che podér rupive aovligáta chupe opoi hag̃ua pendehegui, ha ohecha rire che podér, haʼe voi ojeruréta peẽme pesẽ hag̃ua hetãgui”.
(Éxodo 6:6, 7) Upévare ere umi israelítape: ‘Che hína Jehová, ha poguenohẽta umi egipcio poguýgui ha ndapeikomoʼãvéima ijesklávoramo. Che aipurúta che podér posalva hag̃ua ha tuichaiterei akastigáta umi egípciope. 7 Ha peẽ haʼéta che puévlo ha che haʼéta pende Jára. Peẽ peikuaáta che, Jehová, poguenohẽha umi egipcio poguýgui, ha péicha aipeʼapaitéta umi kárga pohýi haʼekuéra omoĩva pende ári.
it-2-S 415 párr. 1
Moisés
Umi israelita ningo okambia kuri la opensáva. Ñepyrũrã haʼekuéra okonfia vaʼekue Moisés rehe, péro upéi faraón omombaʼapo jejopyve chupekuéra ha upémarõ umi israelita okulpa Moiséspe. Upévare haʼe oñeñandu vaieterei ha ojerure Jehovápe toipytyvõ chupe (Éx 4:29-31; 5:19-23). Ñandejára Ndaijojaháiva omombarete Moiséspe ha heʼi chupe og̃uahẽmaha la tiémpo ojapóvo peteĩ mbaʼe ohaʼarõ vaʼekue Abrahán, Isaac ha Jacob. Upéva heʼise Ñandejára ohechaukataha mbaʼépa heʼise héra omeʼẽvo liverta Israélpe ha ojapóvo chuguikuéra peteĩ puévlo oikóva pe yvy oñepromete vaʼekuépe chupekuéra (Éx 6:1-8). Ni upeichavérõ umi hénte Israelpegua nopenái Moisés rehe. Péro pe kastígo nueveha ou rire, umi israelita oñemoĩmbaite Moisés ládo ha oapoja chupe. Upéicha rupi ou rire pe kastígo diezha, Moisés ikatu oorganisa chupekuéra osẽ hag̃ua Egíptogui. Haʼekuéra osẽ vaʼekue Egíptogui “peteĩ ehérsitoicha, grúpo por grúpo” (Éx 13:18).
(Éxodo 7:4, 5) Faraón katu ndoikuaasemoʼãi mbaʼeve pendehegui, upévare che aipurúta che podér ambohasa asy hag̃ua umi egípciope. Ha aguenohẽta Egíptogui che puévlope, umi israelítape, ha upearã tuichaiterei akastigáta umi egípciope. 5 Ág̃a aipuru vove che podér umi egipcio kóntrape, haʼekuéra oikuaa porãta hína mávapa Jehová, ha aguenohẽta umi israelítape upégui”.
it-2-S 414 párr. 5, 6
Moisés
Faraón renondépe, Egíptope. Ikatu jaʼe umi dios oñepyrũ hague oñorairõ, ha Moisés ha Aarón ojapóva iñimportanteterei upe gérrape. Umi saserdóte Egiptopegua ojapóva máhia provávlemente oservi vaʼekue Janes ha Jámbrespe (2Ti 3:8), ha faraón ojevale koʼã saserdótere ojerure hag̃ua entéro umi dios Egiptopegua oñemoĩ hag̃ua Jehováre. Aarón ojapo pe primer milágro faraón renondépe Moisés heʼi rupi chupe, ha upe milágro ohechauka Jehová ipoderosoveha entéro umi dios Egiptopeguágui. Péro faraón oñembopyʼahãtave upe rire (Éx 7:8-13). Oiko rire pe tercer kastígo umi saserdóte jepe heʼi: “¡Ñandejára podér rupive la ojejapo ko mbaʼe!”. Ha osẽmbárõ guare hesekuéra umi kuru ipeupáva ndaikatúi ni oĩ hikuái faraón renondépe oñemoĩ hag̃ua Moisés kóntrape upe kastígo aja (Éx 8:16-19; 9:10-12).
Umi kastígo ombopyʼahatãve algúnope ha ótrope oipytyvõ ohayhuve hag̃ua Jehovápe. Moisés ha Aarón oavisa vaʼekue oñepyrũta jave umi diferénte kastígo. Umíva oiko ojeʼe hagueichaite ha upéva ohechauka Moisés añetehápe haʼeha Jehová rrepresentánte. Jehová réra ojekuaa Egipto tuichakuére ha upéva ombopyʼahatãve algúnope ha ótrope tuicha oipytyvõ. Por ehémplo, umi israelita ha unos kuánto egipcio ohayhuve Jehovápe, ha faraón ha umi oipytyvõva chupe katu oñembopyʼahatãve (Éx 9:16; 11:10; 12:29-39). Umi egipcio nopensái ndojerrespetái hague idioskuérape, síno haʼekuéra oikuaa Jehová ohusgaha idioskuérape. Oikórõ guare pe kastígo nueveha, Moiséspe ‘ojeapresiáma vaʼekue Egíptope, oguerohory chupe faraón siervokuéra ha enterove umi egipcio’ (Éx 11:3).
Jaheka óro kuʼi la Bíbliape
(Éxodo 6:3) Che añeʼẽmi vaʼekue Abrahán, Isaac ha Jacóbpe. Haʼekuéra oikuaa vaʼekue che haʼeha Ñandejára Todopoderóso, péro che ndaikuaaukái vaʼekue chupekuéra mbaʼépa heʼise che réra Jehová.
it-2-S 1140 párr. 4, 5
Ñandejára Todopoderóso
Jehová oipuru vaʼekue pe título “Ñandejára Todopoderóso” oprometérõ guare Abrahánpe onasetaha itaʼýra Isaac. Haʼe okonfia hag̃ua upe promésa oñekumplitaha tekotevẽ vaʼekue ojerovia mbarete Jehová ipoderosoha okumpli hag̃ua. Upe guive upe título ojepuru ojeʼe hag̃ua Ñandejára ovendesitaha Isaácpe, Jacóbpe ha entéro umi oñevenefisiátava pe kompromíso ojejapo vaʼekuégui Abrahán ndive (Gé 17:1; 28:3; 35:11; 48:3).
Upéicha rupi, tiémpo rire Ñandejára heʼi vaʼekue Moiséspe: “Che añeʼẽmi vaʼekue Abrahán, Isaac ha Jacóbpe. Haʼekuéra oikuaa vaʼekue che haʼeha Ñandejára Todopoderóso, péro che ndaikuaaukái vaʼekue chupekuéra mbaʼépa heʼise che réra Jehová” (Éx 6:3). Upéva ndeʼiséi vaʼekue ndoikuaaiha hikuái Ñandejára réra, pórke haʼekuéra ha umi ótro Ñandejára siérvo yma guare oipuru meme vaʼekue upe téra (Gé 4:1, 26; 14:22; 27:27; 28:16). Por ehémplo Génesispe oñeñeʼẽ Ñandejára siervokuéra yma guarére, ha upépe pe palávra “Todopoderóso” oĩ 6 vésente, péro pe téxto hebreo ojeskrivi ypy vaʼekuépe Ñandejára réra oĩ 172 vése. Koʼã Jehová siérvo yma guare ohechakuaa vaʼekue Ñandejára omereseha oñehenói pe “Todopoderóso”, upéicharõ jepe ndaikatúi vaʼekue ohechapaite mbaʼépa heʼise héra tee Jehová. Peteĩ diksionário (The Illustrated Bible Dictionary, edición de J. D. Douglas, 1980, vol. 1, páh. 572) heʼi upe témare: “Umi mbaʼe ojekuaauka vaʼekue Ñandejára siérvo yma guarépe ohechauka mbaʼe promésapa oñekumplíta amo gotyove, umíva ohechauka chupekuéra Yahweh haʼeha peteĩ Dios ikatúva okumpli la oprometéva. La oiko vaʼekue pe yvyramataʼi hendývape idiferénte ha tuichavéma kuri pórke Ñandejára réra Yahweh ohechauka ipodér ha haʼe oĩha hendivekuéra siémpre”.
(Éxodo 7:1) Jehová heʼi Moiséspe: “Ameʼẽ ndéve autorida oiko hag̃ua ndehegui peteĩ Dios faraónpe, ha Aarón ne ermáno oñeʼẽta nde rérape peteĩ profétaicha.
it-2-S 414 párr. 2
Moisés
Moisés ndojeroviái vaʼekue ijehe, péro upéva ndohechaukái ndaikatuiha okumpli pe traváho. Moisés ndojeroviái vaʼekue ijehe ha heʼi voi ndaikatuiha oñeʼẽ syryrýpe. Tuicha okambia kuri Moisés upérõ g̃uarã. Haʼe ningo 40 áño ánte ijeheguiete ojeofrese vaʼekue olivera hag̃ua Israélpe. Péro koʼág̃a heʼi Jehovápe ijetuʼutaha chupe ojapo hag̃ua upéva ha upéi ojeruréma katu Jehovápe ani hag̃ua omeʼẽ chupe upe traváho. Jehová ningo ipochy kuri Moisés heʼi haguére péicha, péro ndorrechasái chupe síno omondo hendive iñermáno Aarónpe oñeʼẽ hag̃ua ivése. Moisés ningo Jehová rrepresentánte vaʼekue upévare “oiko chugui peteĩ Dios” Aarónpe g̃uarã, ha haʼe oñeʼẽ vaʼerã iñermáno rérape. Oñembyatýrõ guare hikuái umi kuimbaʼe omoakãvandi Israel ha oñeʼẽrõ guare faraón renondépe, amalisia Ñandejára omeʼẽ instruksión Moiséspe, ha haʼe omombeʼu jey Aarónpe heʼi hag̃ua faraónpe (Pe faraón oĩ vaʼekue 40 áño ánte Moisés okañýrõ guare omanóma, kóva peteĩ ifamiliaréma) (Éx 2:23; 4:10-17). Tiémpo rire Jehová heʼi Aarón oñeʼẽtaha Moisés rérape peteĩ profétaicha. ¿Mbaʼérepa? Moisés ningo haʼe vaʼekue Jehová proféta haʼe ogia rupi chupe, ha upéicha avei Moisés ogiáta kuri Aarónpe. Jehová heʼi avei Moiséspe ‘oikoha chugui peteĩ Dios faraónpe g̃uarã’, upéva heʼise Ñandejára omeʼẽha chupe podér ha autorida ha natekotevẽiha okyhyje pe rréi oĩvagui Egíptope (Éx 7:1, 2).
13-19 DE JULIO
TESÓRO OĨVA ÑANDEJÁRA ÑEʼẼME | ÉXODO 8, 9
“Faraón oikuaaʼỹre oipytyvõ oñekumpli hag̃ua Ñandejára volunta”
(Éxodo 8:15) Faraón katu ohechávo ndaiporiveimaha umi juʼi, oñembopyʼahatã ojapoháicha jepi voi ha nopenavéi jeýma hesekuéra, Jehová heʼi hagueichaite.
it-2-S 1105
Oñembopyʼahãta
Heta vése Jehová ohechauka ipasiensiaha ha nohundíri ensegída umi hénte térã puévlo omeresévape omano (Gé 15:16; 2Pe 3:9). Oĩ oaprovecha porãva pe oportunida ha ojapo iporãva ojeporiahuvereko hag̃ua chupe (Jos 2:8-14; 6:22, 23; 9:3-15). Péro oĩ avei umi oñembopyʼahatãvéva Jehová ha ipuévlo kóntrape (Dt 2:30-33; Jos 11:19, 20). Jehová ningo ndojokói chupekuéra ani hag̃ua ipyʼahatãve upévare ojeʼe haʼe ‘ohejaha oñemohatã’ térã ‘ohejaha oñembopyʼahãta’. Ha upéi odesidi vove okastigataha chupekuéra, Jehová ohechauka mbaʼeichaitépa ipoderóso ha oikuaauka héra opárupi (Ekompara Éx 4:21; Jn 12:40; Ro 9:14-18 heʼívare).
(Éxodo 8:18, 19) Ha umi saserdóte ojapóva máhia oñehaʼã ojapo avei mbarigui imáhia sekréta rupive, péro nosẽi chupekuéra. Ha umi mbarigui oisuʼupa umi héntepe ha umi animalkuérape. 19 Upévare umi saserdóte ojapóva máhia heʼi faraónpe: “¡Ñandejára podér rupive la ojejapo ko mbaʼe!”. Péro Jehová heʼi hagueichaite, faraón osegi oñembopyʼahatã ha oñembotavy chuguikuéra.
(Éxodo 9:15-17) Che ikatúma kuri aipuru che podér ambou hag̃ua pende ári peteĩ mbaʼasy vai, ha péicha pohundipaite ko yvy ape árigui, ndéve ha avei nde puévlope. 16 Péro che aheja gueteri reikove ahechauka hag̃ua ndéve che podér, ha che réra ojekuaa hag̃ua opárupi ko yvy ape ári. 17 Péro nde reikónte reñemombaʼeguasu ha nderepoíri che puévlogui.
it-1-S 1227
Umi mbaʼe vai
Jehová ojevale oimeraẽ situasiónre ikatu hag̃uáicha umi mbaʼe vai apoha opillaʼỹre oipytyvõ ojejapo hag̃ua Jehová volunta. Umi iñañáva oñemoĩramo jepe Jehová kóntrape, Jehová ikatu ojoko chupekuéra tekotevẽha peve oprotehe hag̃ua isiervokuérape. Ha ikatu voi umi mbaʼe ojapóva umi iñañáva, amo ipahápe ohechauka porãvéntema Jehová ihustoha (Ro 3:3-5, 23-26; 8:35-39; Sl 76:10). Upévare Proverbios 16:4 heʼi voi: “Jehová ojapo tekotevẽva guive oñekumpli hag̃ua ivolunta, haʼe ojasegura avei oñehundi hag̃ua umi iñañávape pe día oikotahápe sarambi”.
Por ehémplo faraón káso. Jehová ojevale vaʼekue Moisés ha Aarón rehe heʼi hag̃ua faraónpe opoi hag̃ua umi israelita oĩvagui esklávoramo Egíptope. Ndahaʼéi ku Ñandejára káusare faraón haʼéva peteĩ rréi iñañáva, péro Ñandejára oheja oikove ha omaneha pe situasión ikatu hag̃uáicha ojehecha faraón iñañaha ha omereseha omano. Éxodo 9:16 omombeʼu mbaʼépa Jehová ohupytyse vaʼekue: “Péro che aheja gueteri reikove ahechauka hag̃ua ndéve che podér, ha che réra ojekuaa hag̃ua opárupi ko yvy ape ári”.
Oúrõ guare umi 10 kastígo Egipto ári ha oñehundírõ guare faraón ha ijehérsitope Mar Rójope, ojekuaa porãiterei mbaʼeichaitépa Jehová ipoderóso (Éx 7:14–12:30; Sl 78:43-51; 136:15). Heta áño rire jepe umi puévlo oĩva upérupi osegi vaʼekue imanduʼa upe oiko vaʼekuére, péicha Jehová réra ojekuaa opárupi ko yvy ape ári (Jos 2:10, 11; 1Sa 4:8). Jehová ohundírire ensegidamínte faraónpe ndaikatumoʼãi kuri oñembotuicha ni ohechauka ipoderosoha osalva hag̃ua ipuévlope.
Jaheka óro kuʼi la Bíbliape
(Éxodo 8:21) Péro nderepoíriramo che puévlogui, amboúta ndéve hetaiterei mbutu, avei nde siervokuérape, umi hénte oĩvape ne retãme ha umi nde rogakuérape. Ha umi mbutu ojagarrapaitéta umi óga oĩva guive Egíptope, ha umi lugár peẽ peikohápe.
it-2-S 1077
Mbutu
Ndojekuaaporãi mbaʼe vichoʼírepa oñeʼẽ pe palávra hebrea ojepurúva la Bíbliape, oñeʼẽvo pe kastígo cuatroha oñembou vaʼekuére Egíptope. Upéva hína pe primer kastígo ndohupytýi vaʼekue umi israelita oĩvape Gosénpe (Éx 8:21, 22, 24, 29, 31; Sl 78:45; 105:31). Pe palávra ʽAróv ndojetradusiri peteĩchapa, por ehémplo ojetradusi jepi: “mbutu” (EMN, 1988; FS; NC; Mod; NM; VP), “mberu” (ATI; Val, 1989), “vícho” (BAS) “mberu orekóva umi jagua” (LXX), “ñatiʼũ” (Val, 1989, nóta [Éx 8:21]), “mberu de diferénte kláse” (Scío; ekompara BR, TA heʼívare), ha “diferénte animál iperhudisiálva” (HM; ekompara DK heʼívare).
Pe palávra “mbutu” oñeʼẽ diferénte klásere. Pe mbutu kuña ombokua umi animál ha hénte pire, oipyte huguykuéra ha ojopi rasy chupekuéra. Oĩ párte Áfricape oĩháme hetaiterei mbutu ha upéicha rupi la hénte ndaikatúi opyta upépe ni ohasa upérupi. Upévare ikatu jaʼe ojagarrapárõ guare umi mbutu Egíptope, oiméne heta osufri umi hénte ha umi animál, ikatu voi oĩ omanóva rakaʼe.
(Éxodo 8:25-27) Upéi hasypeve faraón ohenoika Moisés ha Aarónpe ha heʼi chupekuéra: “Tapeho katu pejapo sakrifísio pende Járape Egipto territóriope”. 26 Péro Moisés heʼi chupe: “Ndaikatúi rojapo upéicha, pórke umi mbaʼe rosakrifikátava ore Jára Jehovápe ningo ndogustamoʼãi umi egípciope. Ha rojapóramo upéva henondepekuéra, katuete rombopochýta umi egípciope ha orejapíta itápe orejuka peve. 27 Ore rohóta 3 día pe desiértope ha upépe rojapóta sakrifísio ore Jára Jehovápe, haʼe heʼi hagueichaite oréve”.
w04-S 15/3 25 párr. 9
Mbaʼe mbaʼépa ñanemboʼe Éxodo
8:26, 27. ¿Mbaʼérepa Moisés heʼi umi sakrifísio ojapótava umi israelita ‘ndogustamoʼãiha umi egípciope’? Egíptope oñemombaʼeguasu vaʼekue heta animál. Upévare Moisés oñeʼẽ faraónpe umi sakrifísio ojapótavare hikuái, ikatu hag̃uáicha okonvenseve chupe opoi hag̃ua umi israelítagui ojapo hag̃ua sakrifísio Jehovápe.
20-26 DE JULIO
TESÓRO OĨVA ÑANDEJÁRA ÑEʼẼME | ÉXODO 10, 11
“Moisés ha Aarón ipyʼaguasu vaʼekue”
(Éxodo 10:3-6) Upémarõ Moisés ha Aarón oho faraón rendápe, ha heʼi chupe: “Ñandejára Jehová, umi hebreokuéra Jára heʼika ndéve: ‘¿Arakaʼe peve piko reñemombaretéta chéve ha nderejapomoʼãi la haʼéva ndéve? Haʼéma ndéve: epoi che puévlogui oho hag̃ua cheadora. 4 Péro péichante resegíramo nderepoiséi che puévlogui, eikuaa porãke koʼẽrõ amboutaha ne retãme hetaiterei tuku. 5 Ha umi tuku ojagarrapaitéta ko tetã ha ni pe yvy ndaikatumoʼãi ojehecha. Hoʼupaitéta hikuái umi plantasión opyta vaʼekue pe amandáu rapykuerépe, ha umi kóga hemby vaʼekue peẽme. Umi yvyramáta hoky jeýva entéro hoʼupáta hikuái. 6 Umi tuku ojagarrapáta nde rogakuéra, nde siervokuéra róga ha umi óga oĩva guive Egíptope. Ko mbaʼe oikótava avave ndohecháiva gueteri, ni nde túa ni nde avuélo umíva ndohecháiva’”. Upéi heʼipa rire koʼã mbaʼe, osẽ oho hikuái faraón oĩhágui.
Jasegíkena Jesús ehémplo ha japredika pyʼaguasúpe
6 Jahechamína mbaʼeichaitépa Moisés ipyʼaguasu vaʼekue oñeʼẽ hag̃ua pe faraón ndive. Haʼe ningo pe mburuvicha guasu Egiptopegua ha ojeguereko voi chupe peteĩ ñandejáraramo, pe kuarahy jára hérava Ra raʼýramo. Ha oiméneko umi ambue faraón ojapo haguéicha, ko rréi avei omombaʼeguasu rakaʼe haʼanga. Haʼe heʼíva la oikóva ha ndaipóri omanda vaʼerã chupe. Pe faraón ningo oñemombaʼeguasueterei ha ipyʼahatã. Ko mburuvicha rendápe la Moisés oho vaʼekue heta vése ohenoikaʼỹre chupe. ¿Ha mbaʼépa heʼi chupe Moisés, ko haʼe iñumílde ha ivuenoitéva? Heʼi chupe oheja hag̃ua oho umi hembiguaikuéra israelítape, ha nomondóiramo katu Ñandejára okastigataha Egíptope omboúvo heta plága. ¡Ajeve ningo Moisés tekotevẽte rakaʼe ipyʼaguasu! (Núm. 12:3; Heb. 11:27).
(Éxodo 10:24-26) Upémarõ faraón ohenoika Moiséspe ha heʼi chupe: “Tapeho katu peadora Jehovápe. Ha umi mitã mimi entéro ikatu pegueraha penendive. Péro pende ovecha ha vakakuéra añoite ndapeguerahamoʼãi”. 25 Upépe Moisés heʼi chupe: “Nde reheja vaʼerã avei rogueraha umi animalkuéra ikatu hag̃uáicha rosakrifika ha roofrese ore Jára Jehovápe. 26 Ore roguerahapaitéta ore rymbakuéra, ni peteĩ ndorohejamoʼãi koʼápe. Umíva apytégui roiporavo vaʼerã umi rosakrifikátava ore Jára Jehovápe roadora hag̃ua chupe. Ndoroikuaái gueteri ningo mbaʼépa rosakrifika vaʼerã Jehovápe, rog̃uahẽ rire amoitémante roikuaáta”.
(Éxodo 10:28) Upévare faraón heʼi Moiséspe: “¡Tereho chéve koʼágui, ndorohechasevéima! Anivetéke reju jey che rendápe, cháke reju jeýramo, remanóta”.
(Éxodo 11:4-8) Upéi Moisés heʼi: “Péicha heʼi Jehová: ‘Ko pyharepytépe ahasáta hína Egíptorupi, 5 ha ajukáta enterove pende raʼy ypykue oĩva Egíptope. Ajukáta faraón raʼy ypykuépe, ha ajukáta avei pe eskláva memby ypykuépe, ha entéro umi animál raʼy ypykuépe jepe ajukáta. 6 Egipto tuichakue javeve oĩta ojaheʼóva. Péicha núnka ndoikóiva gueteri Egíptope ha ndoikomoʼãvéima avei. 7 Péro umi israelita ni hymbakuérape ndojehumoʼãi mbaʼeve, ni jagua noñarõmoʼãi hesekuéra. Péicha peẽ peikuaáta Jehová oseparaha umi israelítape umi egípciogui, ha ikatuha oñangareko isiervokuérare’”. 8 Ha Moisés heʼi avei: “Oiko rire koʼã mbaʼe, nde siervokuéra oúta oñesũ che renondépe heʼívo: ‘Tereho katu koʼágui, ha tohopaite avei nendive umi israelita’. Ha upépe ae che asẽta aha”. Upe rire Moisés ha Aarón ojerretira faraón oĩhágui, ha ipochyeterei ohóvo hikuái.
it-2-S 415 párr. 2
Moisés
Tekotevẽ kuri ipyʼaguasu ha ijerovia mbarete oñepresenta hag̃ua faraón renondépe. Moisés ha Aarón ikatu kuri okumpli porã iñasignasión Jehová omombarete rupi chupekuéra ijespíritu sánto rupive. Ñañeimahinamína, haʼekuéra oho vaʼerã faraón rendápe, haʼe ningo ogoverna pe país omandavévape pe tiémpope ko yvy ape ári. Faraón oñemombaʼeguasu vaʼekue, ojeʼe voi haʼeha peteĩ dios ha ijerére oĩ vaʼekue umi ikonsehéro, umi komandánte militár, guárdia, ha umi esklávo. Avei umi omoakãva irrelihionkuéra ha saserdóte ojapóva máhia, koʼãva hína umi oñemoĩ mbaretevéva Moisés kóntrape. Faraón ha koʼa kuimbaʼekuéra iñimportanteterei vaʼekue Egíptope. Entéro oĩva faraón jerére oĩ vaʼekue oipytyvõ hag̃ua chupe odefendévo idioskuérape. Moisés ha Aarón oñepresenta vaʼekue faraón rendápe heta vése voi, ha faraón oñembopyʼahatãve káda día pórke ndoperdeséi vaʼekue umi ijesklávo hebreo. Upévare ojeavisa rire chupekuéra outaha pe kastígo ochoha, faraón omosẽ Moisés ha Aarónpe. Ha pe kastígo nueveha rire heʼi voi chupekuéra anivéma hag̃ua oho hendápe, pórke oho jeýramo omanóta hikuái (Éx 10:11, 28).
Jaheka óro kuʼi la Bíbliape
(Éxodo 10:1, 2) Upéi Jehová heʼi Moiséspe: “Tereho faraón rendápe. Che ningo aheja haʼe ha isiervokuéra oñembopyʼahatã ahechauka hag̃ua faraónpe che podér umi milágro ajapóva rupive. 2 Ha ajapo avei ko mbaʼe ikatu hag̃uáicha peẽ pemombeʼu pende raʼykuéra ha pene nietokuérape, mbaʼeichaitépa akastiga mbarete Egíptope ha ajapo heta milágro henondepekuéra. Ha peẽ peikuaa porãta che haʼeha Jehová”.
w95-S 1/9 11 párr. 11
Umi oñeʼẽva umi dios japu kóntrape
11 Umi israelita oĩ aja gueteri Egíptope, Jehová omondo Moiséspe faraón rendápe ha heʼi: “Tereho faraón rendápe. Che ningo aheja haʼe ha isiervokuéra oñembopyʼahatã ahechauka hag̃ua faraónpe che podér umi milágro ajapóva rupive. Ha ajapo avei ko mbaʼe ikatu hag̃uáicha peẽ pemombeʼu pende raʼykuéra ha pene nietokuérape, mbaʼeichaitépa akastiga mbarete Egíptope ha ajapo heta milágro henondepekuéra. Ha peẽ peikuaa porãta che haʼeha Jehová” (Éxodo 10:1, 2). Umi israelita iñeʼẽrendúva omombeʼu vaʼekue ifamiliakuérape umi mbaʼe porãita Jehová ojapo vaʼekue, ha koʼã mitã okakuaa rire omombeʼu jey umi mbaʼe porãite ifamiliakuérape. Péicha enterove oikuaáta umi milágro Jehová ojapo vaʼekue. Koʼág̃a avei umi tuakuéra oreko pe rresponsavilida oñeʼẽvo ifamiliakuérandi Jehováre (Deuteronomio 6:4-7; Proverbios 22:6).
(Éxodo 11:7) Péro umi israelita ni hymbakuérape ndojehumoʼãi mbaʼeve, ni jagua noñarõmoʼãi hesekuéra. Péicha peẽ peikuaáta Jehová oseparaha umi israelítape umi egípciogui, ha ikatuha oñangareko isiervokuérare’”.
it-1-S 895 párr. 7
Umi israelita osẽ Egíptogui
Jehová ohechauka mbaʼeichaitépa ipoderóso ha péicha ombotuicha héra ha olivera Israélpe. Oĩvo pe oriénte gotyo, ohasapa riréma pe mar Rojo Moisés odirihi umi israelítape opurahéi hag̃ua Jehovápe. Iñermána Míriam, pe profetísa ombopu peteĩ panderéta ha osẽ avei umi ótro kuñanguéra ombopu ipanderéta ha ojeroky, ha peteĩ purahéipe ombohovái umi kuimbaʼépe (Éx 15:1, 20, 21). Umi israelita mombyrýma opyta umi iñenemígogui. Osẽ rire Egíptogui noñepermitíri ni peteĩ persóna ni animál ojapo hesekuéra mbaʼeve, ni peteĩ jagua noñarõi hesekuéra (Éx 11:7). Éxodope ndeʼíri faraón voi oike hague pe márpe ijehérsito ndive ha oñehundi hague upépe, péro Salmo 136:15 omombeʼu espesífikamente mbaʼépa Jehová ojapo vaʼekue upérõ. Upépe heʼi: “Faraón ha isoldadokuérape katu ohundi pe Mar Rójope”.
27 DE JULIO AL 2 DE AGOSTO
TESÓRO OĨVA ÑANDEJÁRA ÑEʼẼME | ÉXODO 12
“¿Mbaʼépa orrepresenta pe Páskua kristianokuérape g̃uarã?”
(Éxodo 12:5-7) Peiporavo vaʼerã peteĩ ovecha térã kavara mácho raʼyrusu de un áño, hesãiva. 6 Pekuida vaʼerã hese ko méspe, el 14 peve. Og̃uahẽvo upe día, kaʼaruete pytũ mboyve, káda família israelita ojuka vaʼerã pe ovecha. 7 Upe rire peaparta vaʼerã michĩmi huguykue pehypýi hag̃ua pende róga rokẽ márko. Pejapo vaʼerã upéva pe óga peʼutahápe pe ovecha.
‘Añetehápe peiméta torypápe’
4 Jesús omano 14 de Nisán áño 33-pe. Upe árape Israélpe vyʼápe ojefesteha pe Páskua. Hoʼu hikuái peteĩ ovecha raʼy hesãiva, kóva omomanduʼa chupekuéra oiko vaʼekue Egíptope 14 de Nisán 1.513-pe Jesús ou mboyve. Upérõ pe ovecha raʼy ruguy osalva umi Israelgua raʼy ypykuépe, peteĩ ánhel ojukáramo guare umi Egiptoygua raʼy ypykuépe (Éxodo 12:1-14). Pe ovecha raʼy orrepresenta Jesúspe. Apóstol Pablo heʼi hese: “Cristo niko pe Ovecha Raʼy ñande Paskuapegua, omano vaʼekue ñanderehehápe” (1 Corintios 5:7). Upe ovecha raʼy ruguy osalva hetápe, Jesús ruguy ojapoháicha (Juan 3:16, 36).
(Éxodo 12:12, 13) Che, Jehová, ko pyharépe ahasáta hína Egíptorupi ha ajukáta entéro umi taʼýra ypykuépe, tahaʼe kuimbaʼe térã animál raʼy ypykue. Che ahusgáta umi egipcio dioskuérape ha akastigáta chupekuéra. 13 Ha aju vove ajuka hag̃ua umi taʼýra ypykue oĩva Egíptope, pe tuguy pehypýiva pende róga rokẽ márkore oservíta de señál. Ha che ahecha vove upéva, ndaikemoʼãi pende rógape, síno ahasátante ha ndajukamoʼãi avavépe.
it-2-S 603 párr. 3
Páskua
Heta kósa ojejapo vaʼekue yma pe Páskuape oñekumpli upéi Jesús rehe. Por ehémplo pe tuguy ojehypýi vaʼekue umi óga rokẽre Egíptope osalva vaʼekue umi taʼýra ypykuépe ani hag̃ua pe ánhel ojuka chupekuéra. Péicha avei, Pablo heʼi umi kristiáno ohótava yvágape haʼeha Ñandejára raʼykuéra ypykue kongregasión (Heb 12:23), ha Cristo osalva chupekuéra huguy rupive (1Te 1:10; Ef 1:7). Avei pe ovecha raʼy ojeofreséva pe Páskuape noñemopẽi vaʼerã chugui ni peteĩ ikangue. Jesús kásope ojeprofetisa vaʼekue avei noñemopẽmoʼãiha chugui ni peteĩ ikangue ha upéva oñekumpli vaʼekue haʼe omanórõ guare (Sl 34:20; Jn 19:36). Upéicharõ, pe Páskua ojegueromanduʼa vaʼekue heta áñore ojejapo vaʼekue ikatu hag̃uáicha pe léi ohechauka umi vendisión oútava ha la Jesucristo ojapótava, haʼéva “Ñandejára Ovecha Raʼy” (Heb 10:1; Jn 1:29).
(Éxodo 12:24-27) Pemboarete vaʼerã siémpre ko día, péva hína peteĩ mandáto oñemeʼẽva peẽme ha pende raʼykuérape. 25 Ha ág̃a peike vove pe yvy Jehová opromete vaʼekuépe omeʼẽtaha peẽme, pesegi vaʼerã pemboarete ko día. 26 Pende raʼykuéra oporandúramo peẽme: ‘¿Mbaʼéicha rupi piko ñamboarete ko día?’, 27 peẽ peje vaʼerã: ‘Koestedía ningo ñamboarete pe Páskua Jehovápe g̃uarã. Pórke haʼe yma ohasárõ guare Egíptorupi ojuka hag̃ua umi taʼýra ypykue, ohasa reínte vaʼekue israelitakuéra róga, péro ojuka umi egipcio raʼy ypykuépe’”. Upémarõ umi israelita oñesũ ha oñakãity.
“Ko ára hína manduʼarã”
13 Umi mitã oaprende heta mbaʼe iñimportánteva ikatu hag̃uáicha upe rire ifamília vove hikuái omboʼe avei itaʼyrakuérape. Por ehémplo, oaprende Jehová oñangarekoha hembiguaikuérare. Avei ohechakuaa Ñandejára oexistiha ha noĩriha mombyry isiervokuéragui, akóinte oipytyvõha ipuévlope ha oñeinteresaha hesekuéra. Jehová ohechauka vaʼekue opa koʼã mbaʼe osalvárõ guare umi israelita raʼy ypykuépe oguerúrõ guare pe décima plága umi “Egiptogua rogayguápe”.
14 Tuakuéra, koʼág̃arupi natekotevẽvéima pemombeʼu káda áño pene famíliape pe Páskua istória. Péro iporã pemboʼe chupekuéra umi mbaʼe enterovéva ñaaprendéva pe Páskuagui, por ehémplo Ñandejára oñangarekoha ipuévlore. Peẽ pehechauka vaʼerã chupekuéra peikuaa porãha Jehová osegiha oñangareko isiervokuérare koʼag̃aite peve (Sal. 27:11; Is. 12:2). Pemboʼe jave umi mitãme, aníkena pediskursea chupekuéra, síno peñemongeta porã vaʼerã koʼã mbaʼére. Upéicha peipytyvõta pene famíliape ojeroviave hag̃ua Ñandejárare.
Jaheka óro kuʼi la Bíbliape
(Éxodo 12:12) Che, Jehová, ko pyharépe ahasáta hína Egíptorupi ha ajukáta entéro umi taʼýra ypykuépe, tahaʼe kuimbaʼe térã animál raʼy ypykue. Che ahusgáta umi egipcio dioskuérape ha akastigáta chupekuéra.
it-2-S 601 párr. 5
Páskua
Umi 10 kastígo ou vaʼekue Egíptope oiko ojehusga hag̃ua umi dios Egiptopeguápe. Omanórõ guare umi taʼýra ypykue koʼytevéntema oheja vai umi idioskuérape (Éx 12:12). Pe ovecha mácho ningo sagrádo vaʼekue pe dios Rápe g̃uarã, upévare umi israelita ohypýivo pe ovecha ruguykue hogakuéra rokẽ márkore oiméne tuichaiterei oofende umi egípciope. Pe tóro sagrádo vaʼekue avei, upévare omanórõ guare umi tóro raʼy ypykue, oheja vaieterei pe dios Osírispe. Faraónpe voi oñemombaʼeguasu vaʼekue haʼerõguáicha Ra raʼy, upévare itaʼýra ypykue omanórõ guare ojekuaa pe dios Ra ha faraón ndaikatuiha ojapo mbaʼeve.
(Éxodo 12:14-16) Peẽ penemanduʼa vaʼerã ko día rehe, ha peikove aja entéro pejapo vaʼerã ko fiésta pemombaʼeguasu hag̃ua Jehovápe. Kóva hína peteĩ mandáto ameʼẽva peẽme ha siémpre pekumpli vaʼerã. 15 Siete día aja peʼu vaʼerã pan ilevaduraʼỹva. Upévare pe primer díape peguenohẽmbáma vaʼerã pende rógagui opa mbaʼe orekóva levadúra. Koʼã 7 díape avave ndoʼúi vaʼerã pan orekóva levadúra, pórke oĩramo israelitakuéra apytépe hoʼúva, upéva ojejuka vaʼerã. 16 Pe primer díape ha pe séptimo díape pejapo vaʼerã peteĩ rreunión espesiál peadora hag̃ua Ñandejárape. Koʼã mokõi díape peẽ napembaʼapói vaʼerã, pene rembiʼurã añoite ikatu pejapo.
it-1-S 548
Rreunión
Koʼã “rreunión espesiál” aja noñembaʼapói vaʼerã. Por ehémplo pe Fiésta del Pan Ilevaduraʼỹva haʼe vaʼekue peteĩ “rreunión espesiál” ha noñembaʼapói vaʼerã pe primer díape ha pe séptimo díape. Ko rreuniónre Jehová heʼi vaʼekue voi: “Koʼã mokõi díape peẽ napembaʼapói vaʼerã, pene rembiʼurã añoite ikatu pejapo” (Éx 12:15, 16). Péro koʼã “rreunión sagráda” aja umi saserdóte oofrese vaʼerã sakrifísio Jehovápe (Le 23:37, 38), ha upéva ndeʼiséi naiñeʼẽrenduiha hikuái la Jehová heʼi vaʼekuépe pe traváhore. Koʼã rreunión ndahaʼéi vaʼekue umi hénte ojediverti hag̃ua, síno omombarete hag̃ua ijerovia. Pe sábado ojegueromanduʼáva káda semána ojejapo ojeadora hag̃ua Jehovápe ha oñehekomboʼe hag̃ua chupekuéra. Umichahápe ojelee ha ojeexplika chupekuéra Ñandejára Ñeʼẽ. Tiémpo rire ojejapo avei upéva umi sinagógape (Hch 15:21). Upéicharõ, umi hénte nombaʼapóirõ jepe pe sábado ha umi “rreunión espesiál” aja, umícha jave haʼekuéra oñemboʼe ha ojepyʼamongeta Ñande Apoharére ha ivoluntáre (Ehecha ASAMBLEA).