¿Mbaʼérepa iñimportánte jaikuaa oĩpa peteĩ Kreadór?
¿Mbaʼérepa iporã ñarresponde ko pregúnta? Pórke umi pruéva jahecháva nekonvenséramo oexistiha peteĩ Kreadór ipoderosoitereíva, ikatu hína avei eikuaase oimépa la Biblia ou Ñandejáragui. Ha rejeroviáramo la Bíbliare ehupytýta koʼã mbaʼe porã jahechátava.
Ikatúta edisfruta hetave mbaʼégui
LA BIBLIA HEʼI: “Ombou peẽme ama yvágagui ha omeʼẽ peẽme hetaiterei mbaʼe pekosecha vaʼerã itiempoitépe, hetaiterei tembiʼu peʼu hag̃ua peneryg̃uatãha meve ha pevyʼa hag̃ua” (Hechos 14:17).
¿MBAʼÉPA HEʼISE UPÉVA? Entéro umi mbaʼe ijojahaʼỹva oĩva pe naturalésape ningo haʼe peteĩ rregálo omeʼẽva ñandéve ñande Apohare. Ha koʼýte edisfrutáta koʼã rregálogui eaprende vove la Biblia rupive mbaʼeichaitépa haʼe oñeinteresa nderehe.
Etopáta konsého neporãva tuichaiterei nepytyvõtava
LA BIBLIA HEʼI: “Rentendéta mbaʼépa heʼise hustísia, tekojoja ha mbaʼépa iporã. Rehechakuaáta mbaʼépa rejapo vaʼerã reho hag̃ua tape porãre” (Proverbios 2:9).
¿MBAʼÉPA HEʼISE UPÉVA? Ñandejára ningo ndeapo vaʼekue, upévare haʼe oikuaa porãiterei mbaʼépa reikotevẽ revyʼa hag̃ua. Estudiáramo la Biblia etopáta heta konsého ideprovechoitereítava ndéve.
Ikatúta erresponde umi mbaʼe eikuaaséva
LA BIBLIA HEʼI: “Katuete reikuaa porãta Ñandejárape” (Proverbios 2:5).
¿MBAʼÉPA HEʼISE UPÉVA? Eikuaáramo oĩha peteĩ Kreadór ikatúta erresponde heta pregúnta iñimportantetereíva. Por ehémplo: ¿Maʼerãpa jaikove? ¿Mbaʼérepa oĩ hetaite sufrimiénto? ¿Mbaʼépa oiko peteĩ persónagui omano rire? La Biblia orresponde porãiterei koʼã pregúnta.
Erekóta peteĩ esperánsa iporãitereíva
LA BIBLIA HEʼI: “Jehová heʼi: ‘Che aikuaa porã mbaʼépa ajapóta penderehehápe. Ameʼẽta peẽme pyʼaguapy ha ndaguerumoʼãi pende ári mbaʼeve ivaíva, péicha perekóta esperánsa ha peneraʼarõta heta mbaʼe porã’” (Jeremías 29:11).
¿MBAʼÉPA HEʼISE UPÉVA? Ñandejára opromete ndaiporimoʼãveimaha umi hénte iñañáva, osufríva ni omanóva. Ejeroviáramo Ñandejára promésare, nekyreʼỹvéta embohovái porã hag̃ua umi provléma rehasáva káda día.