Rreferénsia ojepurútava rreunionhápe Mbaʼéichapa Jaiko ha Japredika vaʼerã
2-8 DE DICIEMBRE
TESÓRO OĨVA ÑANDEJÁRA ÑEʼẼME | APOCALIPSIS 7-9
“Jehová ovendesi peteĩ aty guasu avave ndaikatúivape okonta”
(Apocalipsis 7:9) Upe rire ahecha hetaiterei hénte, peteĩ aty guasu avave ndaikatúiva okonta, oúva entéro tetã, trívu ha puévlogui, ha oñeʼẽva diferénte idióma. Haʼekuéra oñemboʼy pe tróno ha pe Ovecha Raʼy renondépe, omonde ao puku morotĩ asýva ha oreko palméra rakã ipopekuéra.
it-1-S 1035 párr. 4
Aty guasu
Ikatu ñañeporandu: Pe ‘aty guasúpe’ oĩramo persóna ojesalvátava ha opytátava ko yvy ape ári, ¿mbaʼérepa ojeʼe hesekuéra oñemboʼyha “pe tróno ha pe Ovecha Raʼy renondépe”? (Apc 7:9). La Bíbliape ojepuru jave pe palávra “oñemboʼy”, sapyʼánte heʼise jepi peteĩ persóna térã grúpo de persóna oĩ porãha ótro renondépe (Sl 1:5; 5:5; Pr 22:29, CJ, comentario; Lu 1:19). Apocalipsis kapítulo 6-pe heʼi voi “umi rréi ko yvy arigua, umi ofisiál omanda guasúva, umi komandánte militár, umi irríkova, umi orekóva podér, entéro esklávo ha entéro umi orekóva liverta” okañyseha ‘Ñandejára oguapývagui itrónope ha pe Ovecha Raʼy ipochyetereívagui’. “Pórke og̃uahẽma pe día haʼekuéra ohechaukataha ipochyha, ¿ha mávapa ikatúta ojesalva upévagui?” (Apc 6:15-17; ekompara Lucas 21:36 heʼívare). Upéicharõ jaʼekuaa pe ‘aty guasúpe’ oĩha umi persóna ojesalváva upe pochy guasúgui ha ikatúva “oñemboʼy” Ñandejára ha pe Ovecha Raʼy renondépe. Haʼekuéra oñemboʼy henondepekuéra pórke ojeguerohory chupekuéra.
(Apocalipsis 7:14) Upémarõ, upepete haʼe chupe: “Che ruvicha, nde ningo la reikuaáva”. Ha haʼe heʼi chéve: “Koʼãva hína umi osẽva pe jehasa asy guasúgui, haʼekuéra ojohéi ijao pe Ovecha Raʼy ruguýpe ha ijaokuéra opyta morotĩ asy.
it-2-S 1155 párr. 6
Jehasa asy
Treinta áñorupi Jerusalén oñehundi rire oñeñeʼẽ apóstol Juánpe peteĩ aty guasúre oúva diferénte tetã, trívu ha puévlogui. Ojeʼe chupe koʼãva haʼeha umi “osẽva pe jehasa asy guasúgui” (Apc 7:13, 14). Pe aty guasúre ojeʼe ‘osẽha pe jehasa asy guasúgui’, ha upéva heʼise ojesalvataha hikuái. Hechos 7:9, 10-pe ojepuru avei peteĩ fráse ojoguáva la oĩva Apocalípsispe. Upépe oñeʼẽ Josére ha heʼi: “Ñandejára oĩ vaʼekue hendive, ha osalva chupe entéro jehasa asýgui”. Koʼápe heʼi ojesalva hague Josépe entéro ijehasa asýgui. Upéva ndeʼiséi oñepytyvõnte hague chupe oaguanta hag̃ua isituasión, síno ojesalva hague ohasa asýramo jepe.
(Apocalipsis 7:15-17) Upévare oĩ hikuái Ñandejára tróno renondépe, ha oservi chupe ára ha pyhare itémplope. Ha Ñandejára, pe oguapýva pe trónope, oñangarekóta hesekuéra. 16 Haʼekuéra ndoikomoʼãvéima iñembyahýi ni ijuhéi, ni ndohapymoʼãvéima chupekuéra kuarahy ni arahaku. 17 Pórke pe Ovecha Raʼy oĩva pe tróno mbytépe oñangarekóta hesekuéra ojapoháicha peteĩ pastór, ha ogueraháta chupekuéra oĩháme yvu orekóva y oporomoingovéva. Ha Ñandejára omokãmbaitéta hesaykuéra”.
it-1-S 1035 párr. 3
Aty guasu
Mávapa umi oĩva pe aty guasúpe. Ikatu hag̃uáicha jaikuaa mávapa umi oĩva pe aty guasúpe, jahecha vaʼerã la oĩva Apocalipsis kapítulo 7-pe ha avei umi ótro téxto oñeʼẽva hesekuéra. Apocalipsis 7:15-17 heʼi Ñandejára ‘oñangarekotaha hesekuéra’, térã ‘oipysotaha hiʼarikuéra hóga kárpa’, ojeguerahataha chupekuéra “oĩháme yvu orekóva y oporomoingovéva” ha ‘Ñandejára omokãmbaitetaha umi hénte resay’. Apocalipsis 21:2-4-pe jatopa avei umi fráse ojoguáva koʼãvape. Por ehémplo upépe heʼi ‘Ñandejára róga oĩha umi hénte apytépe’, haʼe ‘omokãmbaitetaha umi hénte resay, ha ndaiporimoʼãveimaha omanóva’. Pe visión oñemensionáva Apocalipsis kapítulo 21-pe noñeʼẽi umi persóna oĩvare yvágape, pe lugár oguejyhágui pe Jerusalén Pyahu, síno oñeʼẽ umi persóna oikóvare ko yvy ape ári.
Mbaʼépa ñaaprende Ñandejára Ñeʼẽgui
(Apocalipsis 7:1) Upe rire ahecha 4 ánhel oñemboʼýva umi 4 eskínape oĩva ko yvy ári. Haʼekuéra ojoko hatã hína umi yvytu oúva umi 4 ládo ko yvýgui. Péicha ojapo ani hag̃ua oipeju umi yvytu pe yvy ári, ni pe mar ári, ni umi yvyramáta ári.
re-S 113, 115 párr. 3, 4
Ojesella Israel Ñandejára mbaʼéva
3 Og̃uahẽ mboyve pe día Jehová ipochyetereitaha, heta ánhel okumplíta peteĩ asignasión espesiál. Juan ohecha upéva peteĩ visión rupive. Haʼe heʼi: “Upe rire ahecha 4 ánhel oñemboʼýva umi 4 eskínape oĩva ko yvy ári. Haʼekuéra ojoko hatã hína umi yvytu oúva umi 4 ládo ko yvýgui. Péicha ojapo ani hag̃ua oipeju umi yvytu pe yvy ári, ni pe mar ári, ni umi yvyramáta ári” (Apocalipsis 7:1). ¿Mbaʼépa heʼise koʼã mbaʼe ñandéve g̃uarã? Pe yvytu oipejúva 4 ládoguio orrepresenta pe destruksión oútava ko múndo aña ári. Pe yvytu ningo oipejúta pe “mar” ári, heʼiséva hína oñehunditaha umi hénte hembiapo vaívape ha umi governánte oñembotuichávape, ojoguáva umi yvyramátape, oĩ mbaretéva umi hénte oipytyvõgui chupekuéra (Isaías 57:20; Salmo 37:35, 36).
4 Umi 4 ánhel orrepresenta 4 grúpo de ánhelpe. Chupekuéra Jehová oipuru ojoko hag̃ua pe destruksión oñekumpli peve pe tiémpo oñemoĩ vaʼekue upearã. Umi ánhel opoívo oñondivepa umi yvytu ojokóva hikuái nórte, sur, éste ha oésteguio, oikóta peteĩ ñehundi ndetuichapa jepéva. Haʼetéta avei Jehová oipurúrõ guare pe yvytu oipejúva opáguio ládo omosarambipa hag̃ua umi elamita yma guarépe ha ohundipa hag̃ua chupekuéra, péro tuichave jeýta upévagui (Jeremías 49:36-38). Haʼetéta peteĩ yvytu hatãitereíva, hatãvéva pe “torménta” Jehová oipuru vaʼekuégui ohundi hag̃ua pe tetã hérava Ammón (Amós 1:13-15). Ág̃a og̃uahẽ vove pe día Jehová ohechaukatahápe ipochyetereiha ha haʼe añoite ogoverna vaʼerãha opa ára g̃uarã, oñehundietéta pe organisasión Satanás orekóva ko yvy ape ári (Salmo 83:15, 18; Isaías 29:5, 6).
(Apocalipsis 9:11) Haʼekuéra oreko peteĩ rréi, upéva hína pe ánhel orekóva ikárgope pe yvykua pypuku. Hebréope héra Abadón ha griégope katu héra Apolión.
it-1-S 12
Abadón
Abadón, pe ánhel orekóva ikárgope pe yvykua pypuku
Apocalipsis 9:11-pe pe palávra “Abadón” haʼe hína peteĩ téra, ha péicha oñehenói ‘pe ánhel orekóvape ikárgope pe yvykua pypuku’. Idióma griégope ko téra ojetradusi “Apolión” ha upéva heʼise “Oporohundíva”. Áño 1800 rupi, ojeʼe kuri ko téxto haʼeha peteĩ profesía oñeʼẽva unos kuánto kuimbaʼére, por ehémplo emperadór Vespasiano, Mahoma ha inklúso Napoleón. Ha hetave oĩ opensáva ko ánhel ouha Satanásgui. Jaʼekuaa Apocalipsis 20:1-3 heʼívare Abadón haʼeha Ñandejára ánhel orekóva “pe yvykua pypuku lláve” ha ouha yvágagui. Ko ánhel nombaʼapói Satanáspe g̃uarã, upéva rangue oñapytĩ Satanáspe ha opoi pe yvykua pypukúpe. The Interpreterʼs Bible heʼi Apocalipsis 9:11 rehe: “Abadón ndahaʼéi Satanás ánhel, síno Ñandejára ánhel, oporohundíva Ñandejára omandaháicha”.
Umi téxto ñamensiona vaʼekue oĩva Escrituras Hebréaspe, pe palávra “Abadón” ojepuru avei oñeñeʼẽ jave pe Sepultúra ha ñemanóre. Apocalipsis 1:18-pe, Jesucristo heʼi: “Koʼág̃a aikove ha aikovéta opa ára g̃uarã. Che aguereko pe lláve aavri hag̃ua pe ñemano ha Sepultúra”. Lucas 8:31-pe ohechauka haʼe orekoha autorida pe yvykua pypukúre. Ha Hebreos 2:14-pe ohechauka Jesús orekoha podér ohundi hag̃ua Satanáspe jepe. Upépe heʼi oiko hague chugui yvypóra, “péicha haʼe omanóvo, ohundi pe orekóvape podér oporojuka hag̃ua, upéva hína pe Diablo”. Apocalipsis 19:11-16 ohechauka porã Jesucristo haʼeha pe oporohundíva ha oporohusgáva Ñandejára voi oiporavo vaʼekue (ehecha APOLIÓN).
9-15 DE DICIEMBRE
TESÓRO OĨVA ÑANDEJÁRA ÑEʼẼME | APOCALIPSIS 10-12
“Mokõi testígo ojejuka ha upéi oikove jey”
(Apocalipsis 11:3) Che katu amondóta mokõi che testígope oprofetisa hag̃ua 1.260 díare, ha omondéta hikuái ao ohechaukáva oñembyasyha”.
Oñeporandúva jepi
¿Mávapa umi mokõi testígo oñeñeʼẽha Apocalipsis kapítulo 11-pe?
Apocalipsis 11:3 heʼi mokõi testígo oprofetisataha 1.260 díare. Pe rreláto heʼi avei pe mymba ñarõ ‘ipuʼakataha hesekuéra ha ojukataha chupekuéra’. Péro “tres día imédio rire”, umi mokõi testígo oikove jeýta, ha opavavénte ohecharamóta upéva (Apoc. 11:7, 11).
¿Mávapa koʼã mokõi testígo? Umi detálle oĩva pe rrelátope ñanepytyvõ jaikuaa hag̃ua mávapa hikuái. Primero, pe rreláto heʼi “umi mokõi olívo máta ha umi mokõi lámpara renda” orrepresentaha koʼã testígope (Apoc. 11:4). Upéva ñanemomanduʼa lívro de Zacaríaspe oñeñeʼẽha avei pe lámpara rendáre ha mokõi olívo mátare. Umi olívo mátare ojeʼe haʼeha “umi mokõi ojeporavóva”, térã pe governadór Zorobabel ha pe saserdóte prinsipál Josué. Hesekuéra avei ojeʼe ‘oñemboʼyha hína ko yvy tuichakue Jára renondépe’ (Zac. 4:1-3, 14, ÑÑB). Segundo, umi mokõi testígore ojeʼe avei ojapoha milágro ojoguáva Moisés ha Elías ojapo vaʼekuépe (embojoja Apocalipsis 11:5, 6 heʼíva Números 16:1-7, 28-35 ha 1 Reyes 17:1; 18:41-45 heʼívare).
¿Mbaʼépepa ojojogua umi profesía oĩva Apocalipsis ha Zacaríaspe? Mokõivéva oñeʼẽ umi kuimbaʼe Ñandejára oiporavo vaʼekuére, odirihíva ipuévlo peteĩ tiémpo ijetuʼuetereívape. Apocalipsis kapítulo 11 oñekumpli umi unhído odirihíva Jehová puévlo opredikárõ guare tres áño imédio “ao chalái” reheve, Ñandejára Rréino oñepyrũrõ guare ogoverna yvágape 1914-pe.
Ohasa rire umi tres áño imédio, koʼã unhídope oñemoinge kárselpe peteĩ tiémpo mbykývare, orrepresentáva tres día imédio. Upérõ haʼete ojejukáva chupekuéra. Ñandejára puévlo enemigokuéra ovyʼa joa openságui ojokoitemaha umi unhído rembiapo (Apoc. 11:8-10).
Péro heʼi haguéicha pe profesía, opávo umi tres día imédio, umi mokõi testígo oikove jey. Upéva oñekumpli umi unhído osẽrõ guare kárselgui. Umi osegíva iñeʼẽrendu orresivi Jesucristo rupive peteĩ nombramiénto iñimportantetereíva Ñandejáragui. Áño 1919-pe oñenombra chupekuéra “tembiguái jeroviaha ha iñarandúva”, ikatu hag̃uáicha omombarete Ñandejára puévlo jerovia umi ára pahápe (Mat. 24:45-47; Apoc. 11:11, 12).
Koʼã mbaʼe oikoha tiémpope oñekumpli avei Apocalipsis 11:1, 2, heʼihápe pe témplo espirituál oñemedi térã ojerrevisataha. Malaquías kapítulo 3 oñeʼẽ avei peichagua inspeksión rehe, ha heʼi upe rire ojejapoha peteĩ limpiésa pe témplo espirituálpe (Mal. 3:1-4). ¿Mboy tiémpopa odura pe inspeksión ha limpiésa? Oñepyrũ 1914-pe ha oho hese prinsípio de 1919 peve. Ha ko tiémpo aja oñekumpli umi 1.260 día (42 mése), ha umi tres día imédio oñeñeʼẽha Apocalipsis kapítulo 11-pe.
Ajépa javyʼaite Jehová ojapo haguére pe limpiésa espirituál ipuévlope, ikatu hag̃uáicha ojapo umi tembiapo iporãva (Tito 2:14). Ñamombaʼeterei avei pe ehémplo omoĩ vaʼekue pe tembiguái jeroviaha. Haʼekuéra odirihi kuri Jehová puévlo pe tiémpo ijetuʼuetévape ha péicha orrepresenta umi mokõi testígope.
(Apocalipsis 11:7) Haʼekuéra oprofetisapa vove, pe animál salváhe ojupíva pe yvykua pypukúgui oñorairõta umi testígo kóntrape. Ha haʼe ipuʼakáta hesekuéra ha ojukáta chupekuéra.
(Apocalipsis 11:11) Ha umi 3 día imédio rire, Ñandejára espíritu oporomoingovéva oike ipypekuéra ha haʼekuéra opuʼã. Ha umi hénte ohecha vaʼekue chupekuéra opyta okyhyjeterei.
Mbaʼépa ñaaprende Ñandejára Ñeʼẽgui
(Apocalipsis 10:9, 10) Upéi aha pe ánhel rendápe ha ajerure chupe pe kuatiañeʼẽ. Ha haʼe heʼi chéve: “Ejagarra ha heʼu, nde jurúpe eiretéicha heʼẽta, péro nde pyʼápe iróta”. 10 Ajagarra pe kuatiañeʼẽ pe ánhel pógui ha haʼu, ha che jurúpe eiretéicha heʼẽ, péro amokõ rire iro che pyʼápe.
it-2-S 865 párr. 1
Kuatiañeʼẽ, rróllo
Mbaʼépa orrepresenta. Heta vése la Bíbliape ojepuru pe palávra “kuatiañeʼẽ” oñeñeʼẽ hag̃ua ótra kósare. Ezequiel ha Zacarías ohecha peteĩ kuatiañeʼẽ ojeskrivíva hese mokõive ládo. Hetave vése ojeskrivi pe kuatiañeʼẽ térã rróllore un ládonte, péro koʼág̃a ojeskrivi hese mokõive ládo. Upéva ikatu hína heʼise la oĩva pype iñimportantetereiha, oafektataha hetápe ha ivaietereitaha hetápe g̃uarã pe huísio oĩva pype (Eze 2:9–3:3; Zac 5:1-4). Pe visión oĩva Apocalípsispe heʼi pe oguapýva pe trónope ojokoha ipo deréchape peteĩ kuatiañeʼẽ térã rróllo orekóva 7 séllo, ha ndaikatúi ojeavri ojehecha hag̃ua la heʼíva pype Ñandejára Ovecha Raʼy oavri peve (Apc 5:1, 12; 6:1, 12-14). Upéi Juan ohecha pe visiónpe peteĩ kuatiañeʼẽ térã rróllo, ha oñemanda chupe hoʼu hag̃ua. Oreko aja ijurúpe heʼẽ asy kuri, péro upéi iro chupe ipyʼápe. Ko kuatiañeʼẽ ndojesellái rupi, la heʼíva pype ikatu kuri oñentende. Juánpe g̃uarã pe mensáhe oĩva pype heʼẽ asy, péro amalisia oĩ pype mensáhe ipohýiva térã iróva haʼe tekotevẽtava omombeʼu umi héntepe (Apc 10:1-11). Péicha lénto avei oiko kuri Ezequiel rehe ojeguerúrõ guare chupe pe kuatiañeʼẽ oĩháme “músika jaheʼo ha ñembyasy” (Eze 2:10).
(Apocalipsis 12:1-5) Upéi ahecha yvágape peteĩ señál tuicháva, peteĩ kuña omoĩ ijehe pe kuarahy peteĩ aóicha, pe jasy oĩ ipy guýpe ha iñakãre oreko peteĩ koróna ojejapóva 12 estréllagui. 2 Ha pe kuña hyeguasuetéma, ha osapukái pórke hasýma imemby hag̃uáicha. 3 Ha ahecha yvágape ótra señál. Peteĩ dragón guasu pytãitéva, 7 iñakã ha 10 hatĩva, ha oreko 7 koróna. 4 Ha huguáipe ombotyryry 1 de káda 3 estrélla oĩva yvágape, ha omombo ko yvy ári. Ha pe dragón osegi oñemboʼy pe kuña imemby potaitéva renondépe, ikatu hag̃uáicha omokõ pe mitãme onase vove. 5 Pe kuña imemby peteĩ mitãkuimbaʼe, haʼe okastigáta entéro tetãnguéra peteĩ vastón de iérro reheve. Ha onasemírente pe mitã, ojegueraha chupe pe tróno gotyo, oĩháme Ñandejára.
it-1-S 717, 718
Hasýma imemby hag̃uáicha
Pe visión apóstol Juan ohecha vaʼekuépe oĩva lívro de Apocalípsispe, oĩ peteĩ kuña yvagapegua osapukáiva “pórke hasýma imemby hag̃uáicha”. Pe mitã onaséva haʼe “peteĩ mitãkuimbaʼe, haʼe okastigáta entéro tetãnguéra peteĩ vastón de iérro reheve”. Pe dragón oñehaʼãramo jepe omokõ pe mitãme, ojegueraha pe mitãme “pe tróno gotyo, oĩháme Ñandejára” (Apc 12:1, 2, 4-6). Ñandejára oguerahávo pe mitãme itróno gotyo ohechauka haʼeha imbaʼe. Ymave péicha ojejapómi vaʼekue, ojegueraha pe mitãme itúa rendápe ikatu hag̃uáicha haʼe ohechauka oaseptaha chupe (ehecha NACIMIENTO). Upéicharõ, jaʼekuaa pe “kuña” orrepresentaha Ñandejára rembireko, haʼéva “Jerusalén yvagapegua” Cristo ha iñermanokuéra “sy” (Gál 4:26; Heb 2:11, 12, 17).
Pe kuña ningo perfékta, upévare haʼe ndahasýi kuri imembýtarõ guare. ¿Mbaʼépa upéicharõ heʼise “hasýma hague imemby hag̃uáicha”? Upéva heʼise pe kuña oñemeʼẽ hague enkuénta imemby potaitemaha ha ojepreparamaha upearã (Apc 12:2).
¿Mávatapa kuri pe “mitãkuimbaʼe”? Haʼe “okastigáta entéro tetãnguéra peteĩ vastón de iérro reheve”. Upéva ojapóta pe rréi Ñandejára oiporavo vaʼekue, ojeprofetisaháicha Salmo 2:6-9-pe. Péro ko visión Juan ohecha kuri heta tiémpo Cristo onase, omano ha orresusita rire. Upévare jaʼekuaa ko visión noñeʼẽiha pe Mesías nasimiéntore, síno Ñandejára Rréino nasimiéntore, oĩva Jesucristo pópe. Chupe oñemoingove jey kuri ha “oguapy Ñandejára deréchape. Upe tiémpo guive ohaʼarõ Ñandejára omoĩmba meve ipy guýpe iñenemigokuérape” (Heb 10:12, 13; Sl 110:1; Apc 12:10).
16-22 DE DICIEMBRE
TESÓRO OĨVA ÑANDEJÁRA ÑEʼẼME | APOCALIPSIS 13-16
“Ani jakyhyje umi animál salváhe oporomongyhyjévagui”
(Apocalipsis 13:1, 2) Ha pe dragón opyta oñemboʼy pe yvykuʼi marpegua ári. Upéi ahecha peteĩ animál salváhe osẽva pe márgui, 10 hatĩ ha 7 iñakã. Káda hatĩ ári oreko peteĩ koróna, péro umi iñakãre oguereko umi téra oofendéva Ñandejárape. 2 Pe animál salváhe ahecháva ojogua peteĩ jaguaretépe, ipy haʼete óso py ha ijuru katu ojogua león jurúpe. Ha pe dragón omeʼẽ pe animál salváhepe podér, tróno ha tuicha autorida.
Jehová “oikuaauka umi mbaʼe ojekuaaʼỹva”
6 Áño 96 rupi, Jesús ohechauka apóstol Juánpe heta visión oporomongyhyjéva (Rev. 1:1). Peteĩvape Juan ohecha peteĩ dragón oĩva y rembeʼýpe, orrepresentáva Satanáspe (elee Revelación 13:1, 2). Upéi pe márgui osẽ peteĩ mymba ndevaíva siete iñakãva, ha Satanás omeʼẽ chupe tuicha autorida. Upe rireve, Juan ohecha peteĩ ‘taʼanga’ ojoguáva pe mymba ñarõ oĩvape Revelación 13:1-pe, ha avei siete iñakã péro ikolór pytã. Peteĩ ánhel omyesakã chupe umi siete akã orrepresentaha “siete mburuvicha guasu”, térã siete goviérno omanda guasuvéva ko yvy ape ári (Rev. 13:14, 15; 17:3, 9, 10). Revelación ojehaírõ guare, cinco goviérno hoʼáma, pe seiha oisãmbyhy hína, ha pe sieteha katu “neʼĩra gueteri ou”. ¿Máva mávapa koʼã goviérno? Ñahesaʼỹijomína mbaʼépa orrepresenta peteĩteĩ umi akã ha mbaʼépa Daniel heʼi vaʼekue koʼã goviérnore, oĩramo jepe umi neʼĩrava gueteri ogoverna.
(Apocalipsis 13:11) Upéi ahecha ótro animál salváhe ojupíva pe yvýgui, haʼe mokõi hatĩ peteĩ ovecha raʼýicha, péro oñepyrũvo oñeʼẽ, ojogua peteĩ dragónpe.
(Apocalipsis 13:15) Pe segundo animál salváhepe oñemeʼẽ permíso omeʼẽ hag̃ua vída pe primer animál salváhe raʼangápe. Péicha pe animál salváhe raʼanga ikatúta oñeʼẽ, ha omandáta ojejuka hag̃ua entéro umi ndoadoráivape chupe.
re-S 194 párr. 26
Oñeñorairõ mokõi animál salváhe kóntrape
26 ¿Mávapa hína umíva? Pe Poténsia Mundiál Angloamericana, haʼéva Estados Unidos ha Gran Bretaña. Chupekuéra avei orrepresenta pe animál salváhe akã sieteha, péro ko vuéltape ojapohápe álgo diferénte. Pe visiónpe ojehechauka ko animál salváhepe apartete umi ótrogui, upéva ohechauka porã ojapoha haʼeño heta mbaʼe ko múndope. Ko animál salváhe mokõi hatĩva orrepresenta mokõi poténsia polítika oexistívape al mísmo tiémpo, oĩva apárte ojuehegui péro ombaʼapóva oñondive. Ko animál ningo mokõi hatĩ “peteĩ ovecha raʼýicha” pórke haʼetévaicha la imánsova ha ndoperhudikamoʼãiva avavépe, oipota ojeguerovia igoviérno nomokañyiha mbaʼeve avavégui ha upévare enterovéva ko múndope oñemoĩ vaʼerãha ipoguýpe. Péro oñeʼẽvo “ojogua peteĩ dragónpe”, pórke ojopy, oamenasa ha iviolénto umi ndoaseptaséivandi la ogoverna lája. Ko animál salváhe noipytyvõi umi héntepe oñemoĩ hag̃ua Ñandejára Rréino poguýpe oĩva Ñandejára Ovecha Raʼy kárgope. Upéva rangue ojapo umi mbaʼe okonveníva Satanáspe, haʼéva pe “dragón” guasu. Avei ojapo ikatúva guive umi hénte ndochaʼéi hag̃ua umi ótro tetãyguáre, péicha haʼete oadoráva hikuái pe primer animál salváhepe.
re-S 195 párr. 30, 31
Oñeñorairõ mokõi animál salváhe kóntrape
30 Pe istória ohechauka pe animál salváhe raʼanga ñepyrũrã orrepresenta hague pe Sociedad de Naciones. Estados Unidos ha Gran Bretaña omoñepyrũ ha oapoja kuri ko organisasión. Upéi Apocalipsis kapítulo 17-pe oñeñeʼẽ jey hese péro idiferentevéma. Upépe omombeʼu haʼeha peteĩ animál salváhe pytãva, haʼe oikove, orrespira ha nodependéi ótrore. Ko grúpo de nasiónre ojeʼe ‘oñeʼẽha’ pórke heʼi voi haʼe añoite ikatuha oipytyvõ ojeiko hag̃ua segúro porã ha pyʼaguapýpe ko múndope. Péro añetehápe ndahaʼeiete upéicha, umi país oĩva ko grúpope oñeʼẽreity ha otaky ojuehe. Haʼekuéra oamenasa omosẽtaha ha ndoapojamoʼãiha umi tetã ha puévlo noñemoĩrivape ipoguýpe. Ha upeichaite ojapo hikuái. Pe Sociedad de Naciones omosẽ igrúpogui umi país nopensáivape haʼekuéraicha. Ág̃a oñepyrũ vove pe jehasa asy guasu, ko animál salváhe raʼanga oipurúta “hatĩ” térã ijehérsito oporohundi hag̃ua (Apocalipsis 7:14; 17:8, 16).
31 Segunda gérra mundiál guive ko animál salváhe raʼanga, koʼág̃a orrepresentáva pe Organización de las Naciones Unidas, ojukáma hetaitereípe. Por ehémplo, 1950-pe peteĩ ehérsito de la ONU opartisipa kuri pe gérra oñorairõ haguépe Corea del Norte ha Corea del Sur. Ko ehérsito ha umi Corea del Surgua ojuka hetaitereípe, asegún ojekalkula ojuka hikuái amo 1.420.000 Corea del Norteguápe ha chínope. Avei, áño 1960 guive 1964 peve, oĩ vaʼekue ehérsito de la ONU oñorairõva el Cóngope (koʼág̃a hérava República Democrática del Congo). Algúno líder mundiál, umíva apytépe el pápa Paulo VI ha Juan Pablo II heʼi jey jey kuri ko animál salváhe raʼanga, térã pe ONU añoite ikatutaha ogueru pyʼaguapy ko yvy ape ári ha ndaiporiha ótra esperánsa. Avei oovligase umi héntepe oservi hag̃ua pe organisasiónpe, pórke ndojapóiramo upéva oñohundipáta haʼekuéra voi. Péicha haʼete ojopýva hikuái umi héntepe oadora hag̃ua pe animál salváhe raʼangápe ha ojukapáva umi ndoapojaséivape chupekuéra (Deuteronomio 5:8, 9).
(Apocalipsis 13:16, 17) Ha haʼe oovliga entéro umi héntepe omoĩ hag̃ua peteĩ márka ipo deréchare térã isyváre, tahaʼe umi iñimportánteva térã umi ndorekoguasúiva autorida, umi iplátava térã umi imboriahúva, umi orekóva liverta térã umi esklávo. 17 Péicha umi ndorekóiva pe márka ndaikatumoʼãi ojogua mbaʼeve ni ovende, síno umi orekóva pe márka añoite, pe animál salváhe réra térã inúmero.
Mbaʼe mbaʼépa ñanemboʼe Revelación (párte 2)
13:16, 17. Ndajahejái vaʼerã pe mymba vai guasu oisãmbyhy ñande rekove, jepe upéicha ijetuʼuvéta jahupyty ñane remikotevẽ káda diagua. Jahejáramo ko mymba omoĩ imárka ñande po térã ñande syváre, heʼise jahejaha chupe oisãmbyhy ñapensáva ha jajapóva.
Mbaʼépa ñaaprende Ñandejára Ñeʼẽgui
(Apocalipsis 16:13, 14) Ha ahecha pe dragón, pe animál salváhe ha pe proféta japúpe, ha ahecha káda uno jurúgui osẽha peteĩ profesía kyʼa ojoguáva juʼípe. 14 Koʼã profesía añetehápe ou umi demóniogui, ha entéro umi rréi ko yvy arigua ohendu umíva. Koʼã profesía ojapo señál ombyaty hag̃ua umi rréipe pe gerrarã oikótava Ñandejára Todopoderóso ára guasúpe.
Mbaʼépa heʼise añetehápe Armagedón
Pe profesía oĩva la Bíbliape ohechauka koʼẽrõitéma Satanás ha idemoniokuéra omomyitaha umi yvypóra goviérnope ombyaty hag̃ua ijehersitokuérape opuʼã hag̃ua Ñandejára puévlore. Ko mbaʼe oiko vove hetaiterei tapicha omanóta, Ñandejára ohundíta rupi iñenemigokuérape (Revelación 19:11-18).
Armagedón ningo ndahaʼéi peteĩ gérra Jehová ojukapa rei hag̃ua umi héntepe. Haʼe odefendéta guei umi ipyʼaporãvape umi ohundisévagui chupekuéra. Ko ñorairõme, umi ‘mburuvicha guasu yvy arigua’ hína umi opuʼãtava Jehová puévlore. ¿Mbaʼérepa? Satanás omomýita umi mburuvicha ha militarkuérape ohundise hag̃ua umi oservívape Jehovápe (Revelación 16:13, 14; 19:17, 18).
(Apocalipsis 16:21) Ha hoʼa yvágagui amandáu guasu, káda uno oreko 20 kílorupi. Umi amandáu hoʼa umi hénte ári, ha umi hénte oñeʼẽ vai Ñandejárare pe amandáu káusare, pórke ohundi entéro mbaʼe.
“Ñandejára pendesalva potaitéma”
9 Pe gran trivulasión aja ndajapredikamoʼãvéima umi “marandu porã oñeʼẽva Ñandejára Rréinore”, pórke pe fin og̃uahẽtama (Mat. 24:14). Péro japredikáta pyʼaguasúpe peteĩ mensáhe de kondéna ndogustamoʼãiva umi héntepe. Posívlemente jaʼéta hína chupekuéra Satanás múndo oñehunditamaha. La Biblia heʼi umi persóna ipochytaha pe mensáhere, ha heʼitaha hikuái: “Hoʼa yvágagui amandáu guasu, káda uno orekóva veinte kílorupi; koʼãva hoʼa umi kuimbaʼe ári, ha umi kuimbaʼe otaky Ñandejárare pe amandáu káusare, pe amandáu oguerúgui tuicha ñehundi” (Apoc. 16:21).
23-29 DE DICIEMBRE
TESÓRO OĨVA ÑANDEJÁRA ÑEʼẼME | APOCALIPSIS 17-19
“Ñandejára ñorairõ guasu oipeʼaitétava opaichagua ñorairõ”
(Apocalipsis 19:11) Ha ahecha pe yvága ojeavriha ha ahecha peteĩ kavaju morotĩ. Ha pe oguapýva hiʼári héra Fiél ha Sinséro, ha haʼe ojapo hustísia oporohusga jave ha oñorairõ jave.
(Apocalipsis 19:14-16) Avei umi ehérsito yvagapegua oho hapykuéri kavaju morotĩ ári, ha haʼekuéra oreko ao de líno iporãva, ipotĩva ha morotĩva. 15 Ijurúgui osẽ peteĩ espáda ipukúva ha hakuáva, upéva haʼe oipuru ohundi hag̃ua umi tetãnguérape. Ha haʼe okastigáta chupekuéra peteĩ vastón de iérro reheve. Avei haʼe opyrũ umi parrál rehe pe lugár oñeñamiháme parrál, upéva orrepresenta Ñandejára Todopoderóso pochykue. 16 Ha ijaóre, si, pe ikuárto altúrape, ojeskrivi peteĩ téra, upéva hína: Rréi omandavéva entéro umi ótro rréigui, ha Governánte omandavéva entéro umi ótro governántegui.
Armagedón—Ñandejára ñorairõ guasu oipeʼaitétava opaichagua ñorairõ
Oĩ aja umi mburuvicha ojapo meméva ivaíva, umi hekojojáva ndaipyʼaguapymoʼãi ha okyhyjeháre oikóta (Proverbios 29:2; Eclesiastés 8:9). Ñapensa porãramo, hasy opa hag̃ua umi mbaʼe vai oĩramo yvypóra hembiapo vaíva. Upévare ikatu hag̃uáicha oĩ pyʼaguapy ha tekojoja opaveʼỹva, oñehundi vaʼerã umi heko añávape. Salomón heʼi ojepeʼataha umi heko añáva ha umi hekopotĩva opytataha hendaguépe (Proverbios 21:18).
Ñandejára ningo peteĩ Hués, upévare jaikuaa porã umi mbaʼe ojapótava umi heko añáva rehe, oĩ porãtaha katuete. Upévare Abrahán oporandu vaʼekue: “¿Ko Yvy tuichakue Hués piko ndojapomoʼãi hekoitepegua?”. Ha haʼete voi ohechakuaa Jehová akóinte ojapoha iporãva (Génesis 18:25, ÑÑM). La Biblia heʼi avei Jehovápe nombovyʼaiha peteĩ tapicha heko añáva omanóvo. Ha naipohãvéiramo añoite ohundi umichaguápe (Ezequiel 18:32; 2 Pedro 3:9).
it-1-S 380 párr. 3
Kavaju
Juan ohecha peteĩ visiónpe Jesucrístope tuicha podér reheve. Haʼe oho peteĩ kavaju morotĩ ári ha omoirũ chupe peteĩ ehérsito oĩva avei kavaju morotĩ ári. Upéva orrepresenta haʼe oñorairõtaha iñenemigokuéra kóntrape peteĩ gérra hústa Idiós Jehová rehehápe, haʼéva Itúa (Apc 19:11, 14). Pe kapítulo anteriórpe oñeñeʼẽ unos kuánto kavaju ha kavaju ariguáre, ha koʼã mbaʼe orrepresenta umi mbaʼe Jesucristo oñepyrũva ojapo kómo rréi ha umi mbaʼe vaieta oikótava upe rire (Apc 6:2-8).
(Apocalipsis 19:19, 20) Ha ahecha pe animál salváhe, ha umi rréi yvy arigua ha ijehersitokuéra oñembyatyha oñorairõ hag̃ua pe kavaju arigua kóntrape, ha ijehérsito kóntrape. 20 Ha pe ohóva pe kavaju ári ojagarra pe animál salváhepe ha pe proféta japúpe, upe ojapóva umi señál pe animál salváhe renondépe, ombotavy hag̃ua entéro umi orresivi vaʼekuépe pe animál salváhe márka, ha oadoráva haʼangápe. Ha oikove aja gueteri pe animál salváhe ha pe proféta japu, haʼe opoi chupekuéra pe lágo oĩháme tatarendy ha asúfre.
re-S 286 párr. 24
Pe rréi gerréro ogana Armagedónpe
24 Pe animál salváhe 7 iñakãva ha 10 hatĩva osẽva pe márgui, orrepresentáva Satanás organisasión polítika, opyta tesaráipe, ha avei pe proféta japu orrepresentáva pe poténsia mundiál sieteha (Apocalipsis 13:1, 11-13; 16:13). Koʼãva oikove aja gueteri, térã ombaʼapo aja oñondive oñemoĩ hag̃ua Ñandejára puévlore ko yvy ape ári, ojepoi chupekuéra pe “lágo oĩháme tatarendy”. Upéva ndahaʼéi peteĩ lágo de verda, ndahaʼeiháicha avei rreál pe animál salváhe ha pe proféta japu. Pe lágo oĩháme tatarendy orrepresenta ñemano opa ára g̃uarã, ha ndaikatuvéima ojeju jey upégui. Upe rire oñemombo upe lágope pe ñemano ha Sepultúrape, ha avei pe Diáblope (Apocalipsis 20:10, 14). Jahechaháicha, ndahaʼéi peteĩ infiérno oñembohasa asyhápe umi iñañávape opa árare. Ko kreénsia ningo ndogustaieterei Jehovápe (Jeremías 19:5; 32:35; 1 Juan 4:8, 16).
(Apocalipsis 19:21) Péro umi rréi ha ijehersitokuérape ojejuka pe espáda pukúpe, pe osẽva pe kavaju arigua jurúgui. Ha entéro umi guyra hoʼu umi teʼongue hyg̃uatãha meve.
re-S 286 párr. 25
Pe rréi gerréro ogana Armagedónpe
25 Pe ohóva kavaju ári ojuka ijespáda pukúpe umi hénte hembiapo vai ha nokambiaséivape, noĩriramo jepe hikuái umi goviérnope. Jesús okondenáta chupekuéra omano hag̃ua. Koʼã persónare ndojeʼéi ohotaha pe lágo oĩháme tatarendy. ¿Heʼisépa upéva oikove jeytaha hikuái? La Biblia ndeʼíri orresusitataha umi hénte omanóva okondena rupi chupekuéra pe Hués Jehová omoĩ vaʼekue. Jesús voi heʼi vaʼekue entéro ndahaʼéiva “ovecha” ohotaha pe “tatarendy núnka ndoguéivape, pe kastígo orresivítava pe Diablo ha idemoniokuéra”, upéva heʼise oñehunditaha “opa ára g̃uarã” (Mateo 25:33, 41, 46). Péicha og̃uahẽta huʼãme pe día ojehusgataha “umi hénte añáme ha oñehundietetahápe chupekuéra” (2 Pedro 3:7; Nahúm 1:2, 7-9; Malaquías 4:1).
Mbaʼépa ñaaprende Ñandejára Ñeʼẽgui
(Apocalipsis 17:8) pe animál salváhe rehecha vaʼekue oĩ kuri primerorã, upéi ndaiporivéi, péro koʼẽrõite ojupíta pe yvykua pypukúgui ha upe rire oñehundíta. Umi hénte oikóva yvy ape ári (ko múndo oñepyrũ guive koʼã hénte réra ndojeskrivíri pe lívro de la vídape) oñesorprendéta ohechávo mbaʼéichapa pe animál salváhe oĩ kuri primerorã, upéi ndaiporivéi, péro upe rire oĩ jeýta.
re-S 247, 248 párr. 5, 6
Ojekuaa sapyʼa mbaʼépa heʼise
5 “Pe animál salváhe oĩ kuri primerorã”. El 10 de enero de 1920 guive pe organisasión orrepresentáva ko animál salváhepe haʼe kuri pe Liga térã Sociedad de Naciones, ha oĩ pype 63 país tahaʼe peteĩ tiémpore jepe. Péro mbeguekatúpe algúno osẽ ohóvo chugui, por ehémplo Japón, Alemania ha Italia, ha pe ex Unión Soviéticape oñeguenohẽ ko sosiedágui. Septiembre de 1939-pe, pe diktadór nazi omoñepyrũ pe segunda gérra mundiál. Péicha ojekuaa porã pe Sociedad de Naciones ndaikatuiha ogueru pyʼaguapy ko múndope, ha mbeguekatúpe opa ohóvo ko Sosiedad. Áño 1942-pe g̃uarã ja ndaiporivéima. Upérõ Jehová omombeʼupaite ipuévlope mbaʼépa heʼise ko visión. Pe Asamblea Teocratica del Nuevo Múndope, N. H. Knorr ikatúma kuri heʼi ‘pe animál salváhe ndaiporiveiha’. Upéi oporandu: “¿Opytátapa pe Sociedad de Naciones pe yvykua pypukúpe?”. Omensiona rire Apocalipsis 17:8 osẽ heʼi: “Ko asosiasión oaparese jeýta”. Ha upeichaite oiko kuri, péicha oñekumpli pe profesía Jehová heʼi vaʼekue.
Ojupi pe yvykua pypukúgui
6 Jaʼekuaa pe animál salváhe pytã osẽ hague pe yvykua pypukúgui. El 26 de junio de 1945, San Francíscope, Estados Unidos, 50 tetã oapoja ikatu hag̃uáicha ojeasepta pe Carta constitucional de las Naciones Unidas. ¿Mbaʼépa ohupytyse ko grúpo pyahu? Haʼekuéra oipota “ojeiko pyʼaguapýpe ha segúro porã ko múndope”. Heta mbaʼépe ningo ojojogua ko organisasión (ONU) ha pe Sociedad oĩ vaʼekue haʼe mboyve. The World Book Encyclopedia heʼi: “Algúna kósape ojojogua pe ONU ha pe Sociedad de Naciones oñeforma vaʼekue primera gérra mundiál rire. [...] Heta país omoñepyrũva pe ONU omoñepyrũ vaʼekue avei pe Sociedad de Naciones. Ko organisasión pyahu oñeforma avei ikatu hag̃uáicha umi país oĩ pyʼaguapýpe, ha heta mbaʼe oñeorganisa lája ojogua avei pe Sociedad de Naciónespe”. Jahechaháicha, pe ONU orrepresenta pe animál salváhe pytã oikove jeývape. Pe Sociedad de Naciónespe oĩ vaʼekue 63 país, péro pe ÓNUpe oĩ mas de 190 nasión ha oñenkarga hetave mbaʼére.
(Apocalipsis 17:16, 17) Pe animál salváhe 10 hatĩva nde rehecha vaʼekue ndochaʼemoʼãi pe kuña rekovaíre, oipeʼapaitéta chugui ikosakuéra ha ohejáta chupe opío, hoʼúta hoʼo ha ohapýta chupe kompletoite tatápe. 17 Upéva oikóta pórke Ñandejára omoĩta iñakãmekuéra peteĩ plan ojapo hag̃ua haʼe oipotáva, upéva heʼise opensataha hikuái la mísma kósa ha omeʼẽta ijautorida pe animál salváhepe, oñekumplipa peve umi mbaʼe Ñandejára heʼi vaʼekue.
Jehová oikuaauka “umi mbaʼe oikótava koʼẽrõite”
17 Umi rrelihión japu ndahaʼéi mbeguekatúpe opátava ohóvo. Pe kuña rekovai osegíta imbarete ha oñehaʼãta omaneha umi mburuvichápe, péro upéi Ñandejára omoĩta hembipota umi mburuvicha pyʼapýpe (elee Revelación 17:16, 17). Koʼẽrõitéma Jehová oipurúta umi polítikope, pe Naciones Unidas rupive, opuʼã hag̃ua umi rrelihión japúre. Upéicha, umi rrelihión nomandamoʼãvéima ha opytáta mbaʼeveʼỹre. Ndaʼareguasúi koʼã mbaʼe ni noñeimoʼãi ikatuneha oiko, péro koʼág̃a ojekuaa porã pe kuña rekovai hoʼa potaiteha pe mymba ñarõ pytã árigui. Ha ndoguejymoʼãi mbeguekatu asy, síno tuichaháicha hoʼáta (Rev. 18:7, 8, 15-19).
30 DE DICIEMBRE AL 5 DE ENERO
TESÓRO OĨVA ÑANDEJÁRA ÑEʼẼME | APOCALIPSIS 20-22
“Ambopyahu hína entéro mbaʼe”
(Apocalipsis 21:1) Ahecha peteĩ yvága pyahu ha yvy pyahu, pórke pe yvága ha pe yvy yma guare ohasáma, ha pe mar ndaiporivéima.
re-S 301 párr. 2
Peteĩ yvága pyahu ha yvy pyahu
2 Heta áño Juan onase mboyve, Jehová heʼi vaʼekue Isaíaspe: “Pórke che ajapo hína yvága ha yvy pyahu, ha avave naimanduʼamoʼãi umi mbaʼe oiko vaʼekuére yma, umíva ojeietétama pene korasõgui” (Isaías 65:17; 66:22). Ko profesía ñepyrũrã oñekumpli kuri umi judío iñeʼẽrendúva oho jeýrõ guare Jerusalénpe áño 537-pe a.C., oĩ rire hikuái 70 áño Babilonia poguýpe. Omopuʼã jeýrõ guare hikuái Jerusalén, oñeforma kuri peteĩ grúpo de persóna iñeʼẽrendúva, térã peteĩ “yvy pyahu”. Ha oñeforma peteĩ goviérno ipyahúva, térã ‘yvága pyahu’. Péro apóstol Pedro heʼi ko profesía oñekumplitaha avei ótro hendáicha. Haʼe heʼi: “Péro haʼe opromete haguéicha, ñande ñahaʼarõ hína umi yvága pyahu ha peteĩ yvy pyahu, ha umívape siémpre oĩta hustísia” (2 Pedro 3:13). Koʼág̃a Juan ohechauka ko promésa oñekumpliha ñande Ruvicha díape. Haʼe heʼi “pe yvága ha pe yvy yma guare” opataha. Upéva heʼise Satanás organisasión ha umi goviérno oĩva Satanás ha umi demónio poguýpe oñehunditaha. Pe “mar” pochy, térã umi hénte iñaña ha irrevéldeva oñehundíta avei, ha upéva rangue oĩta “peteĩ yvága pyahu ha yvy pyahu”. Upéva heʼise oĩtaha peteĩ grúpo de persóna oñemoĩva peteĩ goviérno ipyahúva poguýpe, térã Ñandejára Rréino poguýpe (ekompara Apocalipsis 20:11 heʼívare).
(Apocalipsis 21:3, 4) Upéi ahendu peteĩ oñeʼẽva pe trónogui ha heʼi hatãva: “Ñandejára róga oĩ umi hénte apytépe, ha haʼe oikóta hendivekuéra ha haʼekuéra haʼéta ipuévlo. Haʼe oĩta umi héntendi. 4 Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva. Umi mbaʼe oiko vaʼekue yma opáma”.
“¡Péina! Ambopyahu hína opa mbaʼe”
“[Ñandejára] omokãmbaitéta hesaykuéra” (Revelación 21:4). ¿Mbaʼépa heʼise upéva? Heʼise Ñandejára oipeʼapaitetaha opa mbaʼe ñanembohasa asy ha ñanemyasẽva. Haʼe ndoipotavéima jasufri ni ñanerasẽ ñandejopy asýgui umi mbaʼe jahasáva.
“Ndaiporimoʼãvéima omanóva” (Revelación 21:4). Enterovénte ñambyasy ha heta ñanerasẽ omanóramo ñandehegui peteĩ jahayhúva. Upévare Jehová opromete oguenohẽtaha ñemano poguýgui umi yvypóra iñeʼẽrendúvape. ¿Mbaʼéichapa ojapóta upéva? Ñande ningo ñamano pe pekádo káusare, ha Ñandejára ñandepeʼáta pe pekádo poguýgui (Romanos 5:12). Jesús sakrifísio rupive Jehová omeʼẽ jeýta perfeksión enterove iñeʼẽrendúvape. Ñane enemígo tuichavéva ningo hína pe ñemano, ha upéva ‘oñehundíta’ (1 Corintios 15:26). Ñandejára okumpli vove ipromésa, umi ojeroviáva hese hesãita ha oikóta opa árare.
“Ndaiporimoʼãvéima [...] hasýva” (Revelación 21:4). ¿Mbaʼeichagua mbaʼasýpa opáta? Heta ningo oĩ opyta vaíva térã oñedeprimíva oiko rire hese peteĩ mbaʼe vai, oĩ avei noĩporãiva iñakãme térã oikóva hasyháre. Opaite umi mbaʼe ningo jahasa ñaneimperfékto ha japeka rupi.
(Apocalipsis 21:5) Ha Ñandejára oguapýva pe trónope heʼi: “Ambopyahu hína entéro mbaʼe”. Ha heʼi avei: “Eskrivíkena koʼã mbaʼe, pórke koʼã ñeʼẽ ningo siertoite ha umi hénte ikatu ojerovia hese”.
w03-S 1/8 12 párr. 14
Jehová núnka ndaijapúi
14 Jajagarra vaʼerã ensério umi mbaʼe Jehová ñanemboʼéva iñeʼẽ rupive. Jehová omombeʼu ñandéve mbaʼeichagua persónapa haʼe ha haʼe upeichaite añete, avei ojapo opa mbaʼe haʼe heʼiháicha ojapotaha. Ñande jareko hetaiterei rrasón ñakonfia hag̃ua hese ha upévare ikatu ñaĩ segúro oñekumplitaha pe ipromésa heʼíva haʼe okastigataha “umi ndoikuaáivape Ñandejárape ha umi naiñeʼẽrendúivape umi notísia porãme, oñeʼẽva ñande Ruvicha Jesús rehe” (2 Tesalonicenses 1:8). Ñande ikatu avei jajerovia hese oasegura jave ñandéve ohayhuha umi persóna “oñehaʼãvape ihústo”, omeʼẽtaha vída etérna umi ojeroviávape hese, oipeʼapataha umi mbaʼe ñanembosufríva ha avei oipeʼataha pe ñemano. Jehová ohechauka porã hag̃ua ikatuha jajerovia ko promésare heʼi apóstol Juánpe: “Eskrivíkena koʼã mbaʼe, pórke koʼã ñeʼẽ ningo siertoite ha umi hénte ikatu ojerovia hese” (Apocalipsis 21:4, 5; Proverbios 15:9; Juan 3:36).
Mbaʼépa ñaaprende Ñandejára Ñeʼẽgui
(Apocalipsis 20:5) Koʼãva hína umi primeroite oikove jeýva. Umi ótro omanóva oikove jey opa rire umi 1.000 áño.
it-2-S 1202 párr. 2
Vída
Pe mandáto Jehová omeʼẽ vaʼekuére Adánpe jahechakuaa Adán nomanomoʼãiha kuri iñeʼẽrendúrire (Gé 2:17). Upeichaite avei oikóta umi persóna iñeʼẽrendúva kásope. Ág̃a pe ñemano térã pe enemígo ultimoite oñehundi vove, umi persóna iñeʼẽrendúva ojeítama pe pekádo poguýgui ha ikatútama oikove pára siémpre (1Co 15:26). Pe ñemano oñehundietéta Jesús ogovernapa rire 1.000 áñore, heʼiháicha Apocalípsispe. Ko lívro omombeʼu umi oservítava Jesús ndive kómo rréi ha saserdóte oikove jeytaha ha ogovernáta Cristo ndive mil áñore. Péro ‘umi ótro omanóva oikove jeýta opa rire umi 1.000 áño’. Koʼãva haʼéta umi persóna osegíva gueteri oikove pe goviérno de mil áño aja, Satanás osẽ mboyve pe yvykua pypukúgui oataka hag̃ua ipahaite yvyporakuérape. Opa rire umi 1.000 áño umi persóna oikóva ko yvy ape ári ha haʼémava perfékto, orekótama pe perfeksión oreko vaʼekue Adán ha Eva opeka mboyve. Upépe ikatútama heʼi hikuái orekoha vída perfékta. Upéi umi persóna ohasáva pe última pruéva Satanás omoĩtava ojepoi rire chugui peteĩ tiémpo mbykymíre, ikatútama oreko pe vída perfékta pára siémpre (Apc 20:4-10).
(Apocalipsis 20:14, 15) Pe ñemano ha pe Sepultúra oñemombo pe lágo oĩháme tatarendy. Pe lágo oĩháme tatarendy orrepresenta pe muérte segunda. 15 Avei entéro umi noĩriva pe lívro de la vídape ojepoi pe lágo oĩháme tatarendy.
it-2-S 180, 181
Lágo oĩháme tatarendy
Ko fráse oĩ lívro de Apocalípsispe añoiténte ha ojekuaa porãiterei orrepresentaha ótra kósa. La Biblia omyesakã mbaʼépa heʼise: “Pe lágo oĩháme tatarendy orrepresenta pe muérte segunda” (Apc 20:14; 21:8).
¿Mbaʼérepa ñaĩ segúro orrepresentanteha ótra kósa? Pórke ótra párte lívro de Apocalípsispe heʼi pe ñemanóme oñemomboha pe lágo oĩháme tatarendy (Apc 19:20; 20:14). Jaikuaaháicha upéva ndahaʼéi rreál pórke ndaikatúi ojehapy pe ñemanóme. Avei la Biblia heʼi oñemomboha upe lágope pe Diáblope, haʼéva peteĩ espíritu ha ndaikatúiva jahecha. Jaikuaaháicha, pe tata ndaikatúi ohapy peteĩ espíritupe (Apc 20:10; ekompara Éx 3:2 ha Jue 13:20 heʼívare).
Pe lágo oĩha tatarendy orrepresenta pe “muérte segunda”, ha Apocalipsis 20:14 heʼi pe ‘ñemano ha pe Sepultúrape’ oñemomboha pype, upévare ojekuaa porãiterei pe lágo norrepresentaiha pe ñemano ohupytýva yvyporakuérape Adán káusare (Ro 5:12). Avei norrepresentái pe Sepultúra (Seol), pórke ojeʼe pe Sepultúra ha pe ñemanóme oñemombotaha avei pe lágo oĩháme tatarendy. Upéicharõ, pe lágo oĩháme tatarendy orrepresenta ótra kláse de muérte pórke upégui ndaikatuvéima oñesẽ. La Bíbliape ndeʼíri ko lágo ontregaha umi omanóva oĩva pype, ojapoháicha pe Sepultúra (Seol) ha pe ñemano (Apc 20:13). “Umi noĩriva pe lívro de la vídape”, térã entéro umi oñemoĩva Ñandejára goviérnore, oñemombo pe lágo oĩháme tatarendy, upéva heʼise pe muérte segunda térã oñehundietemaha (Apc 20:15).