Oiméne rehecháma umi testígo de Jehovápe opredika jave kállere térã ogaháre, orreparti jave lívro ha rrevísta térã oinvita jave la héntepe ostudia hag̃ua la Biblia hendivekuéra. Ikatu voi peteĩ Testígo la ontrega vaʼekue ndéve ko rrevísta. Rehecha haguéicha iñepyrũme, heta hénte oikuaase mávapa añetehápe hikuái ha ikatu oime nde avei reikuaaseve chuguikuéra.

Ikatu oime reikuaase mbaʼépa oguerovia umi testígo de Jehová, térã mbaʼéichapa opaga umi gásto orekóva, por ehémplo, oñemopuʼã hag̃ua umi lugár oñerreuniha, oñeimprimi hag̃ua umi lívro ha rrevísta ha umícha. Ha katuete reikuaaséne avei mbaʼérepa og̃uahẽ hikuái nde rógape térã oñemboja oñemongeta hag̃ua nendive kállere.

Cecilie, oñemensionáva iñepyrũme, heʼive: “Aike Internétpe ha alee heta informasión oñeʼẽva umi testígo de Jehováre. Ahendu avei mbaʼépa heʼi la hénte, ha hetaiterei oĩ oñeʼẽ vaíva hesekuéra oikuaa porãʼỹre. Che aguerovia la ojeʼéva ha upévare apensáma avei naiporãieteha upe rrelihión”. ¿Mbaʼépa ojapo Cecilie upémarõ? Oñeʼẽ personálmente umi Testígondi ha péicha oikuaa porã mávapa añetehápe hikuái.

Upéicharõ, ¿mávapa ikatu oexplika porã ndéve umi mbaʼe reikuaaséva umi testígo de Jehovágui? ¿Mbaʼépa ere rehejáramo haʼekueraite voi oexplika ndéve? Ko rrevísta ningo ojapo umi testígo de Jehová, ha umi artíkulo sigiéntepe rehecháta mávapa añetehápe hikuái, mbaʼépa oguerovia ha mbaʼéichapa ombaʼapo. Hiʼãite koʼã artíkulo nepytyvõ reikuaa porãve hag̃ua umi Testígope (Proverbios 14:15).

Ore organisasión ndojeheʼái ótro rrelihiónre ha ombaʼapo opárupi ko yvy ape ári. Ore ofisína sentrál oĩ Estados Unídospe, péro la majoría roiko diferénte paíspe. Roime amo 8 millónrupi, ha ropredika mas de 230 país ha territóriope. Péicha rokumpli Jesús heʼi vaʼekue: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi” (Mateo 24:14).

Tahaʼe haʼéva pe lugár roikoha, roñehaʼã rorrespeta ha rokumpli umi léi upe paispegua, péro noroñentremetéi polítikape. ¿Mbaʼérepa? Jesús ningo heʼi vaʼekue idisipulokuérape: “Peẽ ndapejeheʼái ko múndore”. Upévare ore ndoropartisipái umi téma polítikope ni ndoroapojái umi gérra (Juan 15:19; 17:16). Ha rojapo upéva sapyʼánte rojapeligráramo jepe. Por ehémplo, oikórõ guare pe segunda gérra mundiál, hetápe oñenkarsela, ojetortura ha algúnope katu ojejuka voi ndopartisipái haguére pe gérrape. Peteĩ karai Alemaniagua haʼe vaʼekue paʼi oskrivi: “Oreko hikuái derécho heʼívo haʼeha pe úniko grúpo tuichamíva ndoapojáiva pe gérra [umi nazi ogovernaha tiémpope Alemania]”.

Péro upéva ndeʼiséi roñemomombyryha ore rapichakuéragui. Peteĩ vuéltape, Jesús oñemboʼérõ guare Ñandejárape heʼi: “Ndajeruréi ndéve renohẽ hag̃ua chupekuéra ko múndogui” (Juan 17:15). Upévare, ore rombaʼapo, rombaʼejogua ha roho eskuélape, ojapoháicha umi ótro hénte.

Ore testígo de Jehová roguerovia opa mbaʼe oĩva la Bíbliape ouha Ñandejáragui ha ideprovechoha (2 Timoteo 3:16). Rostudia la Biblia roaprendeve hag̃ua ñande Apoharégui, ha rohechakuaa mbaʼeichaitépa orepytyvõ ore rekovépe.

Ñandejára Ñeʼẽ heʼi: “Umi hénte toikuaa, nde nderérava Jehová, nde añoite haʼeha pe Ipoderosovéva ko yvy ape ári” (Salmo 83:18, NM). Upévare ore roadora Ñandejára Jehovápe añoite, ha roñehenói voi testígo de Jehová pórke roñehaʼãmbaite roikuaauka héra oparupiete (Isaías 43:10-12).

Ore rojerovia avei Jesúsre, haʼe ningo “Ñandejára Raʼy” ou vaʼekue ko yvy ape ári ha oiko chugui pe Mesías (Juan 1:34, 41; 4:25, 26).a Omano rire, Jesús oikove jey vaʼekue ha oho yvágape (1 Corintios 15:3, 4). Ha tiémpo rire oiko chugui Rréi Ñandejára Rréinope (Apocalipsis 11:15). Ko Rréino ogovernáma yvágape ha koʼẽrõitéma ojapóta ko yvýgui peteĩ paraíso (Daniel 2:44). La Biblia opromete: “Umi hénte ivuénova opytáta ko yvy ape ári, haʼekuéra oikóta pyʼaguapýpe ha upévare ovyʼaitereíta” (Salmo 37:11, 29, NM).

Ore roguerovia avei umi konsého oĩva la Bíbliape ideprovechoha koʼag̃aite peve (Isaías 48:17, 18). Upévare roñehaʼãmbaite rokumpli umi mbaʼe oĩva pype. Por ehémplo, la Biblia heʼi ndovaleiha ñamongyʼa ñande rete ha ñane korasõ, upévare ndoropitái ha ndoroipurúi dróga (2 Corintios 7:1). Ndorojapói avei umi mbaʼe la Biblia oproivíva, por ehémplo, ndorokaʼúi, ndaorerekovaíri ha noromondái (1 Corintios 6:9-11).

Káda áño roimprimi ha rorreparti hetaiterei Biblia, lívro ha rrevísta, mas de 100 millones voi. Roguereko avei heta sukursál ha imprénta ko múndo tuichakuére. Roime mas de 100 mil kongregasiónpe, ha la majoría oñerreuni peteĩ Salón del Réinope. ¿Mbaʼéichapa ropagapa koʼã gástore?

Opa mbaʼe rojapóva oñemantene donasión rupive (2 Corintios 9:7). Áño 1879-pema, pe segunda rrevísta Ñemañaha osẽ vaʼekue (upérõ hérava Zionʼs Watch Tower) heʼi: “Ore roguerovia JEHOVÁ oñangarekoha ko rrevístare ha haʼe ojapo aja upéva núnka ndorojeruremoʼãi pláta yvypórape”. Ha koʼag̃aite peve ropensa upéicha.

Umi donasión ikatu ojeguerahauka umi sukursálpe térã oñemoĩ umi káha de kontrivusión oĩvape umi Salón del Réinope. Núnka ndorojeruréi diésmo ni ndorojapói kolékta, ndorokovrái avei roipytyvõ hag̃ua la héntepe ni umi rrevísta ha lívrore. Ndojepagái oréve ropredika haguére, romboʼe haguére kongregasiónpe ni roipytyvõ haguére oñemopuʼã hag̃ua umi lugár roñerreuniha. Péicha rokumpli Jesús heʼi vaʼekue: “Reínte oñemeʼẽ kuri peẽme, ha reínte pemeʼẽ vaʼerã avei” (Mateo 10:8). Umi ombaʼapóva pe ofisína sentrálpe ha umi sukursálpe ndorekói suéldo, ni umi oĩva pe húnta direktívape (oñehenóiva Kuérpo Governánte de los testigos de Jehová).

Umi donasión ojepuru avei oñepytyvõ hag̃ua oiko jave torménta vai, terremóto ha umícha. Umi kristiáno yma guare vyʼápe oipytyvõ vaʼekue umi oikotevẽvape (Romanos 15:26). Ore rosegi upe ehémplo ha roipytyvõ umi ohasa asývape oiko jave umi desástre, por ehémplo, romopuʼã jey chupekuéra hóga, romeʼẽ chupekuéra aliménto, ao, pohã ha rohecha doktór oñatende vaʼerã hesekuéra. Romyatyrõ avei umi Salón del Reino oĩva umi lugár oikohápe koʼã sarambi.

Ore ningo rojekuaa ropredika meme rupi umi héntepe. Ropredika ogahárupi, kállere ha oĩháme guive hénte. ¿Mbaʼérepa rojapo upéva?

Ore testígo de Jehová ropredika romombaʼeguasu hag̃ua Ñandejárape ha roikuaauka hag̃ua héra (Hebreos 13:15). Avei rojapo upéva rokumpli hag̃ua Jesús omanda vaʼekue: “Tapeho pemboʼe umi hénte opa tetãyguápe oiko hag̃ua chuguikuéra che disípulo [...]. Ha pemboʼe chupekuéra ojapo hag̃ua opa mbaʼe amanda vaʼekue peẽme” (Mateo 28:19, 20).

Avei ropredika rohayhúgui umi héntepe (Mateo 22:39). Roikuaa la majoría orekomaha irrelihión ha naentéroi ohenduseha ore predikasión. Péro roikuaa porã avei umi enseñánsa oĩva la Bíbliape ikatuha osalva umi héntepe. Upévare rosegi ‘romboʼe ha roikuaauka meme pe marandu porã oñeʼẽva Cristo Jesús rehe’, ojapo haguéicha umi kristiáno yma guare (Hechos 5:41, 42).

La majoría umi oleéva ore puvlikasionkuéra ndahaʼéi testígo de Jehová. Ha hetaiterei hénte orekóva ótra rrelihión ostudia orendive la Biblia ha ovyʼa rovisita haguére chupekuéra.

¿Oĩpa algúna kósa reikuaasevéva umi testígo de Jehovágui? Oiméramo upéicha ikatu rejapo koʼã mbaʼe:

• Eporandu peteĩ testígo de Jehovápe voi.

• Eike ore páhina ofisiál de Internétpe, www.jw.org/gug.

• Eho ore rreuniónpe. Upépe entéronte ikatu oho ha ndojekovrái entráda.