‘Ndojapói hikuái mbaʼeve’
NOÑEHENDÚIRAMO umi mbaʼe ojeʼéva oikotaha ikatu oporogueraha sarambípe.
Pe áño 1974-pe, pe siuda hérava Darwin oĩva Austráliape ojeprepara jave ojapo hag̃ua peteĩ fiésta, ipu sapyʼa umi siréna oanunsiáva og̃uahẽtaha peteĩ yvytu hatãitereíva. Péro, ojapóma treinta áño rupi peteĩ yvytu hatãitereíva ndojapoveihague mbaʼeve ivaíva upe siudápe. Upévare, mbaʼérepa koʼág̃a oikóta upéva? Heta noimoʼãivaʼekue ojeapeligraha og̃uahẽ meve pe yvytu pochy oguerahapáva umi técho ha óga pare. Ha upe koʼẽ rire, sarambímante ojehecha pe siudápe.
Noviembre 1985-pe, okapu peteĩ volkán Arméro ypýpe, peteĩ siuda oĩva Colómbiape. Pe niéve ha iélo ojahoʼipavaʼekue pe volkán hyku ha ombosyry hatãiterei pe tuju ha oñotỹ 20.000 persóna rupi. Oikoparakaʼe upéva ojeavisaʼỹre avavépe? Umi oikóva upépe are guivéma oñandu oryryiha pe montáña. Péro heta oĩ ojepokuaámava ha upévare ndojepyʼapýi. Oñemombeʼúramo jepe umi autoridápe oikopotaitemaha peteĩ sarambi, haʼekuéra ndojapoguasúi mbaʼeve oavisa hag̃ua la héntepe. Upéva rangue, pe rrádio ha tupãopegua parlánte rupive ojeʼe chupekuéra ani hag̃ua ojepyʼapy. Upe pyharépe okapu tuichaiterei dos vése pe volkán. Nde reimérire upépe rehejapánepa umi mbaʼe reguerekóva ha resẽ reho? Upérõ guare mbovyeterei osẽvaʼekue oho tardeterei mboyve.
Umi geólogo oikuaa jepi moõitépa oikóta umi yvyryrýi. Péro ndaikatúi jepi heʼi arakaʼetépa oikóta. Pe áño 1999-pe, umi yvyryrýi oipeʼa 20.000 tapicha rekove ko múndope. Umíva apytépe heta oĩvaʼekue noimoʼãiva oikotaha peteĩ mbaʼe upeichagua.
Mbaʼépa nde rejapo ou jave Ñandejáragui voi pe ojeʼéva oikotaha?
Ymaiterei guive la Biblia omombeʼu ñandéve oikótava pe ára pahápe ha ñanemokyreʼỹ ñapensa hag̃ua ‘umi Noé tiémpore’. ‘Umi ára dilúvio mboyve’, la hénte ojepyʼapýramo jepe umi mbaʼe vai oikóvare oñemeʼẽterei umi hembiapópe. Ha omondóramo jepe Ñandejára isiérvo Noépe heʼi hag̃ua chupekuéra pe ojapótava, ‘ndojapói hikuái mbaʼeve ou peve pe dilúvio ha ohundipaite enterovépe’ (Mateo 24:37-39). Ha ndépa rehenduvaʼerãmoʼã upe ojeʼéva reimérire upépe? Rejapópa koʼág̃a?
Mbaʼépa rejapovaʼerãmoʼã reikórire Sodómape pe már Muerto ypýpe, oikórõ guare upépe Lot, Abrahán sovríno? Upe siuda opuʼã pyaʼéva oĩvaʼekue peteĩ lugár iporãitereívape. Ha Lot oikórõ guare upépe, umi hénte upepegua ndojepyʼapýi mbaʼevére: ‘okaru, omboyʼu, ojogua, ovende, oñemitỹ, ojogapo’. Péro umi hénte heko vaieterei avei. Lot okondenavaʼekue umi mbaʼe vai ojapóva hikuái. Upéicharõ, ndépa remombaʼevaʼerãmoʼã upe heʼivaʼekue Lot reimérire upépe? Ndépa rehenduvaʼerãmoʼã chupe heʼírire ndéve Ñandejára ohunditaha upe siuda? Térãpa repensáta Lot nembojarunteha, oimoʼãhaguéicha umi ijernorã? Ndépa resẽnguévo remañavaʼerãmoʼã nde rapykue gotyo, ojapohaguéicha Lot rembireko? Jepe umi ótro nohendúi pe ojeʼevaʼekue oikotaha, Lot osẽrõ guare Sodómagui ‘oky yvágagui tata ha asúfre ha ohundipa enterovépe’ (Lucas 17:28, 29).
Koʼág̃a rupi heta avei oĩ ndojapóiva mbaʼeve. Péro umi ehémplo jahechavaʼekue oñemoĩ Ñandejára Ñeʼẽme ohechauka hag̃ua ñandéve mbaʼépa ndajajapoivaʼerã ha ñanemokyreʼỹ avei ÑAÑATENDE PORÃ HAG̃UA JAIKÓVO.
[Taʼanga ha rrekuádro oĩva páhina 22-pe]
Oikoparakaʼe peteĩ dilúvio ojahoʼipáva ko Yvy?
Heta umi oñeʼẽ vaíva hese heʼi ndoikoihague. Péro la Biblia heʼi añetehápe oikohague pe Dilúvio.
Jesucristo voi oñeʼẽvaʼekue upe dilúviore. Upérõ haʼe oĩvaʼekue yvágape ha ohechapa pe oikovaʼekue.
[Taʼanga ha rrekuádro oĩva páhina 23-pe]
Oñehundiparakaʼe añetehápe Sodoma ha Gomórrape?
Umi pruéva arquelógica ohechauka upéicha hague.
Ko mbaʼe oñemombeʼu pe istóriape heta hendápe.
Jesucristo heʼivaʼekue oikohague upe ñehundi guasu, ha catorce lívro oĩva la Bíbliape imanduʼa hese.