Og̃uahẽma ‘pe huísio óra’

REVELACIÓN, pe último lívro oĩva la Bíbliape, heʼi peteĩ ánhel oveveha yvága mbytére ha oguerekoha ‘omombeʼu hag̃ua umi marandu porã opa ára g̃uarãva, haʼéva notísia porã’ ha hatã heʼi: ‘Pekyhyjéke Ñandejáragui ha pemeʼẽ chupe glória, pórke og̃uahẽma pe óra haʼe oporohusga hag̃ua’ (Revelación 14:​6, 7). Og̃uahẽ vove ‘pe huísio óra’ Ñandejára heʼíta ha ojapóta pe huísio. Pe ‘óra’ haʼe peteĩ tiémpo ndaipukumoʼãiva. Pe huísio ojejapo vove og̃uahẽta huʼãme pe ‘ára paha’. Ha ñande jaikóma koʼág̃a upe tiémpope (2 Timoteo 3:1).

Pe ‘huísio óra’, haʼéta peteĩ notísia iporãva umi hustísia ohayhúvape g̃uarã. Upépe Ñandejára ohundíta ko sistéma aña ndaiporihápe mborayhu, ha hetaitéma ombohasa asýva isiervokuérape.

Upévare koʼág̃a, oñehundi mboyve ko sistéma aña ha upéicha og̃uahẽ huʼãme ‘pe huísio óra’, ojeʼe ñandéve jajapo hag̃ua ko mbaʼe: ‘Pekyhyjéke Ñandejáragui ha pemeʼẽ chupe glória’. Ndépa rejaporeína upéva? Ndahaʼéi erentevaʼerã: “Che ajerovia Ñandejárare” (Mateo 7:​21-23; Santiago 2:​19, 20). Jakyhyje rupi Ñandejáragui ñamombaʼeguasúta chupe ha ndajajapomoʼãi pe ivaíva (Proverbios 8:13). Upéva ñanemokyreʼỹvaʼerã jahayhu hag̃ua pe iporãva ha nañandejaʼéi hag̃ua pe ivaívare (Amós 5:​14, 15). Jaglorifikáramo Ñandejárape, ñahendúta chupe tuicha rrespéto reheve. Ha ñane rembiapo hetavéramo jepe, jaguerekóta tiémpo jalee pyʼỹi hag̃ua la Biblia, Ñandejára Ñeʼẽ. Opa árape jajeroviáta hese ñande pyʼaite guive (Salmo 62:8; Proverbios 3:​5, 6). Umi omombaʼeguasúva chupe oguerovia haʼe ojapohague yvága ha Yvy. Upévare mborayhúpe oñemoĩ hikuái isoveranía universál poguýpe. Jahechakuaáramo ñaikotevẽha jajapo koʼã mbaʼe, jajapovaʼerã pyaʼe porã.

Oñehenói avei ‘Jehová ára’ pe tiémpo ojejapotahápe pe huísio heʼivaʼekue pe ánhel. Yma Jerusalén ohasamavaʼekue peichagua ‘ára’ 607 a.E.C.-pe, pórke umi oikóva upépe nohenduivaʼekue umi profétape, oñeʼẽva Jehová rérape. Haʼekuéra oimoʼã upe ára nog̃uahẽmoʼãiha gueteri ha upévare oapeligra vai hekove. Péro Jehová heʼi chupekuéra: ‘Hiʼag̃uimahína, ha pyaʼeterei ou’ (Sofonías 1:14). Babilóniape og̃uahẽvaʼekue avei peteĩ ‘Jehová ára’ 539 a.E.C.-pe (Isaías 13:​1, 6). Umi Babilóniape oĩva ojeroviágui umi murálla ha umi diós oguerekóvare, nohenduivaʼekue umi Ñandejára profétape. Péro pe táva guasu Babilonia peteĩ pyharépente hoʼa umi médo ha persakuéra poguýpe.

Mbaʼépa ñande ñahaʼarõ koʼág̃a? Ñahaʼarõ peteĩ ‘Jehová ára’ tuichaitevéva (2 Pedro 3:11-14). Ñandejára heʼíma mbaʼépa ojapóta ‘Babilonia la Grande’ kóntrape. Revelación 14:​8-pe, peteĩ ánhel heʼi: ‘Babilonia la Grande hoʼáma[!]’. Ha upéva oikóma, pórke koʼág̃a rupi ndaikatuvéima ojoko Ñandejára siervokuérape. Umi mbaʼe vai ojapóva Babilonia ha mbaʼéichapa oñentremete umi gérra oikóvape ojekuaa porãma opárupi, ha hiʼag̃uíma koʼág̃a oñehundi hag̃ua. Upévare la Biblia heʼi enterovépe: ‘Pesẽke chugui [Babilonia la Grande] [...] ndapejeheʼaséirõ hendive ipekádope, ha ndapeipotáirõ penderupyty umi plága oútava chupe. Pórke ipekádo onoʼõma og̃uahẽ meve yvágape, ha Ñandejára imanduʼa umi hembiapo vaíre’ (Revelación 18:​4, 5).

Mbaʼépa pe Babilonia la Grande? Haʼe umi rrelihionkuéra oĩva ko múndope ogueraháva pe márka oguerekovaʼekue pe Babilonia ymaguare (Revelación, kapítulo 17, 18). Jahechami koʼág̃a mbaʼépepa ojojogua hikuái:

• Pe Babilonia ymaguarépe umi saserdóte ombaʼapo mbarete vaʼekue polítikape. Ha upeichaite avei ojapo heta rrelihión koʼág̃a rupi.

• Umi saserdóte oĩvaʼekue Babilóniape pyʼỹinte omokyreʼỹ oñeñorairõ hag̃ua. Koʼág̃a rupi, pyʼỹi umi líder rrelihióso raẽve oho ovendesi umi oñorairõtavape gerrahápe.

• Pe Babilonia ymaguarégui oikovaʼekue peteĩ tetã henyhẽva inmoralidágui, omboʼe ha ojapógui heta mbaʼe vai. Koʼág̃a rupi umi líder rrelihióso ndojapói la Biblia heʼíva. Upévare, ojehecha hetaiterei pe inmoralida umi líder rrelihióso ha umi isegidorkuéra apytépe. Avei, ñanemanduʼavaʼerã Revelaciónpe Babilonia la Grándepe oñembojojaha peteĩ kuña reko vaíre, pórke oñevende ha ojapo ko múndo ha umi polítiko oipotáva.

• La Biblia heʼi avei Babilonia la Grande oikoha ‘otĩʼỹre umi rrikésa paʼũme’. Yma Babilóniape, umi témplo ijyvy heta vaʼekue, ha umi saserdóte katu tuicha ombaʼapo komérsiope. Koʼág̃a rupi, ndahaʼéi umi lugár oñemeʼẽha adorasión añónte oguerekóva Babilonia la Grande, oguereko avei komérsio tuichaitereíva ko múndope. Pe omboʼéva ha umi festého ojapóva omogana hetaiterei viru chupekuéra ha umi komersiántepe.

• Babilóniape yma henyhẽvaʼekue taʼanga, máhia ha paje; koʼág̃a rupi upeichaite avei. Haʼekuéra oimoʼãvaʼekue ñamanóramo jahaha jaikove ótro hendápe. Umi vavilónio omopuʼãvaʼekue hetaiterei témplo ha kapílla omombaʼeguasu hag̃ua idioskuérape. Haʼekuéra ndaijaʼeivaʼekue Jehová siervokuérare. Koʼág̃a rupi Babilonia la Grande ojapo avei upéicha.

Yma, Jehová oiporuvaʼekue umi poténsia polítika ha militár okastiga hag̃ua umi oñemombaretévape ndojaposéigui ivolunta. Upévare, umi asírio ohundivaʼekue Samaria 740 a.E.C.-pe; umi vavilónio ohundi Jerusalén 607 a.E.C.-pe ha upéicha avei ojapo umi rrománo 70 E.C.-pe; Babilonia katu hoʼa umi médo ha persakuéra poguýpe 539 a.E.C.-pe. La Biblia heʼi umi goviérno koʼag̃agua oikotaha umi mymba ñarõicha: opuʼãtaha hikuái ‘pe kuña reko vaíre’, omboíta ​—térã ohechauka porãta mbaʼeichaguápa haʼe​—, ha ohundietéta chupe (Revelación 17:16).

Ikatúnepa ojapo upéva umi goviérno oĩva ko múndope? La Biblia heʼi Ñandejára omoĩtaha umi governantekuéra ‘korasõme’ ojapo hag̃ua upe mbaʼe (Revelación 17:17). Upéva ndahaʼemoʼãi peteĩ mbaʼe oikótava mbeguekatúpe, síno peteĩ tesapirĩme, oñeimoʼãʼỹve jave.

Mbaʼépa nde rejapovaʼerã? Eñeporandumi: “Aimépa gueterei peteĩ organisasión rrelihiósape ojehecháva ikyʼaha umi enseñánsa ha práktika Babilonia la Grande oguerekóvare?”. Ha ndahaʼéirõ jepe upéicha, epensami ko mbaʼére: “Ahejápa ipuʼaka cherehe pe espíritu oguerekóva?”. Mbaʼépa heʼise pe espíritu? Heʼise ojehechaha iporãvaramo umi teko ivaíva, ojehayhuveha umi mbaʼe ojeguerekóva ha umi vyʼarã Ñandejárape rangue, térã ndojekuaaseiha mbaʼeve la Biblia heʼívagui (haʼetéramo jepe peteĩ mbaʼe michĩetereíva). Ejepyʼamongeta rekontesta mboyve koʼã porandu.

Ñaime porã hag̃ua Jehová ndive, tekotevẽ jahechauka umi jaipotáva ha jajapóvare ñande ndahaʼeiha Babilonia la Grande rehegua. Ñandepyaʼevaʼerã upevarã, pórke la Biblia heʼi ñandéve mbaʼéichapa oñehundíta sapyʼaitépe: ‘Hatãiterei ojeitýta yvy gotyo Babilóniape, pe táva guasu, ha arakaʼeve ndojejuhumoʼãvéi’ (Revelación 18:21).

Péro oikóta gueteri heta mbaʼe. Pe ‘huísio órape’, Ñandejára Jehová okovráta ko múndo sistéma polítikope ha imburuvichakuérape hembiapokuére ha avei entéro umi omboykévape pe Rréino oĩva yvágape, oisãmbyhýva Jesucristo (Revelación 13:​1, 2; 19:​19-​21). Pe profesía oĩva Daniel 2:​20-45-pe ohechauka peteĩ taʼanga guasu rupive pe governasión polítika oĩvaʼekue Babilonia tiémpo guive koʼág̃a peve. Pe taʼanga guasu ojejapovaʼekue óro, pláta, kóvre, iérro ha tujúgui. Ha imanduʼávo ñane tiémpore, pe profesía heʼi: ‘Ñandejára yvagapegua omoĩta peteĩ rréino arakaʼeve noñehundimoʼãiva’. La Biblia omombeʼu avei mbaʼépa ojapovéta ko Rréino Jehová ‘huísio óra’ jave: ‘Omonguʼipáta ha ohundipáta koʼã rreinokuéra, ha haʼete voi opytáta opa ára g̃uarã’ (Daniel 2:​44).

La Biblia heʼi umi oadoráva Ñandejárape ndohayhuivaʼerãha ‘umi mbaʼe oĩva ko múndope’. Upéva heʼise ndoikoivaʼerãha ko sistémape ojeikoháicha, oĩva mombyry Ñandejáragui (1 Juan 2:​15-​17). Rehechaukápa umi desisión rejapóvare reapojaha nde pyʼaite guive Ñandejára Rréino? Remotenondépa pe Rréino nde rekovépe? (Mateo 6:​33; Juan 17:​16, 17.)

[Rrekuádro oĩva páhina 14-pe]

Arakaʼépa og̃uahẽta pe fín?

‘Peteĩ óra peẽ peimoʼãʼỹve jave, oúta pe yvypóra Raʼy.’ (Mateo 24:44.)

‘Peñatende porãke peikóvo, [...] ndapeikuaáigui pe día ni pe óra.’ (Mateo 25:13.)

‘Ndotardamoʼãi.’ (Habacuc 2:3.)

[Rrekuádro oĩva páhina 14-pe]

Rekambiánepa nde rekove reikuaáramo arakaʼépa og̃uahẽta pe fín?

Reikuaa porãramo heta áño gueteri ohasataha og̃uahẽ hag̃ua pe ára Ñandejára oporohusgataha, rekambiánepa nde rekove? Nderejapovéimapa yma guaréicha Jehová servísiope reimoʼãgui ko sistéma tuja hiʼaretereíma? (Hebreos 10:​36-​38.)

Ndajaikuaáigui arakaʼetépa og̃uahẽta pe fín omeʼẽ ñandéve pe oportunida jahechauka hag̃ua mbaʼérepa jaservi Ñandejárape. Umi oikuaáva Jehovápe ohechakuaa ojeadoráramo chupe última órapentema haʼe nomombaʼemoʼãiha upéva, oikuaágui mbaʼépa jaguereko ñande pyʼapýpe (Jeremías 17:10; Hebreos 4:​13).

Umi ohayhu porãva Ñandejárape katuete omotenonde chupe. Umi kristianokuéra ombaʼapóramo jepe la hénte ojapoháicha, ndahaʼéi ombaʼapóva ipláta heta hag̃ua, síno ohupyty hag̃ua hembiʼurã ha oipytyvõ hag̃ua hapichakuérape oikotevẽ jave (Efesios 4:​28; 1 Timoteo 6:​7-​12). Haʼekuéra avei sapyʼánte oñembopiroʼyse ha ovyʼase oñondive, péro ojapo upéva opytuʼu ha ikyreʼỹ jey hag̃ua, ndahaʼéi ko múndope ojejapoháicha (Marcos 6:​31; Romanos 12:2). Jesucrísto ojapohaguéicha, haʼekuéra avei ovyʼa ojapohaguére Ñandejára oipotáva (Salmo 37:4; 40:8).

Umi kristiáno añeteguáva oikose ha oservise Jehovápe opa ára g̃uarã. Pe esperánsa naikangýi nog̃uahẽigui umi vendisión oñehaʼarõ jave.

[Taʼanga ha rrekuádro oĩva páhina 15-pe]

Mávapa oguereko derécho ñanesãmbyhy hag̃ua?

Jaikuaa hag̃ua mbaʼérepa Ñandejára oheja hetaitéma ojehasa asy, ñantende porã vaʼerã mávapa oguereko derécho ñanesãmbyhy hag̃ua.

Jehová haʼe opa mbaʼe Apohare. Upévare haʼe oguereko derécho ogovernávo ko Yvy ha umi oikóva guive ipype. Péro la Biblia heʼi Ñandejára ojapo rire yvyporakuérape oĩhague heʼíva ndoguerekoiha derécho ñanesãmbyhy hag̃ua. Satanás el Diablo heʼivaʼekue Jehová léi ipohyietereiha. Avei heʼi Jehová ijapuhague ñande tuvakuéra ypykuépe umi konsekuénsia ohupytýtavare ndojapóiramo iléi heʼiháicha ha oikóramo iñakãre. Heʼi avei oiko porãvetaha hikuái ojeíramo Ñandejára poguýgui (Génesis, kapítulo 2, 3).

Jehová ikatuvaʼekue upepete voi ohundi umi opuʼãvape hese, ha upéicha ohechauka ipodér, péro pe ojeʼevaʼekue opyta reíta. Upéva ojapo rangue, oheja chupekuéra oikove. Upéicha Ñandejára ohechauka opa hembiapokue iñarandúvape pe konsekuénsia ojehupytýva oñepuʼãhaguére hese. Ha oguerúramo jepe upéva heta jehasa asy, omeʼẽ avei tiémpo ñande ñanase hag̃ua.

Avei, opaga hepýtaramo jepe, Jehová ojapo pe oñekotevẽva ikatu hag̃uáicha yvyporakuéra ojei pe pekádo ha umi mbaʼe vai oguerúvagui, ha oiko hag̃ua peteĩ Paraísope. Upevarã haʼekuéra iñeʼẽrenduvaʼerã chupe ha ojeroviavaʼerã pe sakrifísio Itaʼýra ojapovaʼekuére oporosalva hag̃ua. Ha tekotevẽramo, Jehová ikatu omoingove jey chupekuéra umi omanovaʼekue apytégui jepe.

Ñandejára ohaʼarõgui ohechauka hag̃ua mávapa oguereko derécho ñanesãmbyhy hag̃ua ikatu jahechauka ñamombaʼeha imborayhu ha jahechauka lealta oimehaichagua situasiónpe. Tekotevẽ oñemyesakã mávapa oguereko derécho ñanesãmbyhy ha avei pe fidelida ohechaukáva yvyporakuéra ikatu hag̃uáicha ojerrespeta Ñandejára léi ko univérsope. Pórke upevaʼỹre ndaiporimoʼãi pyʼaguapy.a

[Nóta]

[Taʼanga]

Pe sistéma polítiko oĩva ko múndope oñehundíta