Ojekuaa jajeroviaha
1. Mbaʼépa heʼivaʼekue Jesús oikotaha?
1 Umi apóstol ojapysaka porã vaʼekue Jesús rehe omombeʼúrõ guare mbaʼéichatapa haʼe ogovernaha tiémpope ha opátama vove ko múndo. Omombeʼu yvyporakuéra ohasavaʼerãha heta mbaʼe vai: ñorairõ, ñembyahýi, yvyryrýi, ha hetave mbaʼe ijetuʼúva. Heʼi avei oĩtaha heta ndaijaʼéiva hemimboʼekuérare ha ojahéiva hesekuéra; hetápe katu ojukáta voi hikuái. Avei, oĩtaha umi proféta japu ombotavýva hetápe, ha hetaitereitaha umi ndoporohayhúiva.
2. Mbaʼérepa ñamombaʼete oñemombeʼuhaguére opárupi pe marandu porã?
2 Upérõ, oiméne Jesús remimboʼekuéra noimoʼãirakaʼe oñeñeʼẽvaʼerãha Ñandejára Rréino rehe opárupi ko Yvy ape ári (Mat. 24:3-14). Péro koʼág̃a rupi jahechakuaa mbaʼeichaitépa oñekumplihína Jesús heʼivaʼekue. Koʼág̃a rupi ivaipáramo jepe opa mbaʼe, ñande testigos de Jehová kyreʼỹme ñamombeʼu pe marandu porã. Ko múndope ningo heta hetave oĩ ndojoayhúiva, ñande katu jajoayhuverei jaikóvo. Ha oĩramo jepe ndaijaʼéiva ñanderehe opa tetãme, ñande japredikañaína opa tetã rupi.
3. Mbaʼe mbaʼépa jatopa pe infórme mundiálpe ñanemokyreʼỹva?
3 Páhina 3 guive 6 peve oñemoĩ mbaʼéichapa ñambaʼapóraʼe ñande testigos de Jehová pe áño de servísio ohasavaʼekuépe. Ñahesaʼỹijóramo ñanemokyreʼỹta katuete. Upépe jahechakuaa umi mil millones de óra jaiporúva japredika ha ñamboʼe hag̃ua ñande rapichakuérape jahasamaha dieciséis vése. Mbaʼeichaitépa ojekuaa jajeroviaha! Ha ñambojojáramo pe áño de servísio ohasavaʼekuére, hetave 5,8% umi prekursór, 3,1% umi puvlikadór ha 4,4% umi estúdio. Umi ojevautisavaʼekue hetave 20,1%. Javyʼaiténingo jahechávo oĩmaha siete millones rupi oservíva Jehovápe! Hetaiteve yma guarégui! Péro, mbaʼe mbaʼépa nde rehecharamove pe infórmere?
4. Mbaʼe provlémapa ombohováiraʼe peteĩ kuimbaʼe ojevautisa hag̃ua?
4 Ha oñeñeʼẽramo jepe heta número rehe, nañanderesarairivaʼerã ojekuaaha upévare ñande rapichakuéra jerovia. Ñañeʼẽmína peteĩre. Guillermo ningo Boliviaygua. Onasevaʼekue 1935-pe ha oreko guive nueve áño ombaʼapo dróga oñeñotỹhápe. Imitã guive oisuʼu dróga rogue ogueropuʼaka hag̃ua pe traváho pohýi ojapóva. Upe rire, oñepyrũ opita ha omokõiterei. Péro Guillermo oikuaárõ guare Jehová ojeruréva chugui, opoiete sigárro ha vevídagui. Upéicharõ jepe, hasyeterei vaʼekue chupe oheja hag̃ua pe dróga. Hasýpe ningo opoivaʼekue chugui, heta oñemboʼe rire. Opoipa rire umi vísiogui, ojevautisa. Guillermo heʼi: “Koʼág̃a añandu chepotĩha ha avyʼaiterei”.
5. Mbaʼépa ñande jaipota oiko?
5 Jehová ningo ojepyʼapy opavave rehe. Haʼéngo oipota enterove ojevy hembiapo vaikuégui (2 Ped. 3:9). Ha upéva ningo ñande avei jaipota oiko. Upévare, ñande pyʼaite guive jajapovaʼerã opa ikatúva ñaipytyvõ hag̃ua ñande rapichakuérape oñemoag̃ui hag̃ua Jehováre, ha ñandéicha avei ohayhu hag̃ua chupe.