Peteĩ maranduhára tekotevẽ oñemboʼe
1. Mbaʼépa ñaikotevẽ jajapo hag̃ua hekopete ñane rembiapo?
1 Ni mbaʼeveichavérõ ndaikatumoʼãi japredika ñandejehegui reínte, Jehovámante ikatu ñanemombarete jajapo hag̃ua hekopete ko tembiapo (Fili. 4:13). Haʼe ñanepytyvõ hiʼanhelkuéra rupive jatopa hag̃ua umi hénte ipyʼaporãvape (Rev. 14:6, 7). Ha ndaipóri avave ikatúva omongakuaa pe semílla ñande ñañotỹ ha jarregavaʼekue, haʼe añoite ikatu ojapo upéva (1 Cor. 3:6, 9). Opa koʼã mbaʼére jahechakuaa tekotevẽtereiha ñañemboʼe ñande Ru yvagapeguápe.
2. Mbaʼe mbaʼe rehépa ikatu ñañemboʼe?
2 Jajerure Ñandejárape tañanepytyvõ. Japredika hag̃ua tekotevẽ ñañemboʼe Ñandejárape (Efe. 6:18). Mbaʼe mbaʼe rehépa ikatu ñañemboʼe? Ikatu jajerure chupe tañanemoarandu ñamotenonde hag̃ua predikasión (Sant. 1:5). Avei ñanemokyreʼỹ ha ñanembopyʼaguasu hag̃ua japredikáta jave (Hech. 4:29). Iporãta avei jajeruréramo Ñandejárape tañanepytyvõ jatopa hag̃ua umi ipyʼaporãvape ostudiaséva la Biblia. Oiméramo peteĩ ogajára oporandu ñandéve peteĩ mbaʼe ha ndajaikuaái mbaʼéichapa ñambohováita, kirirĩháme jajerurekuaa Jehovápe ñanepytyvõ hag̃ua (Neh. 2:4). Jaagradesevaʼerã avei chupe oheja rupi jajapo ko tembiapo ijojahaʼỹva; haʼe ningo oguerohoryetereíta upéva (Col. 3:15).
3. Mbaʼérepa iporã jajerure Ñandejárape toipytyvõ ñane ermanokuérape?
3 Jajerurékena ñane ermanokuérare. Iporã avei ‘ñañemboʼe ojuehe’, ha ikatu voi jaʼe ñane ermáno réra jajerurévo hesekuéra (Sant. 5:16; Hech. 12:5). Oiméramo ñanderasykatu ha ndaikatúi ñasẽ pyʼỹi japredika, jajerurekuaa Ñandejárape toipytyvõ ambue ermáno hesãivape akóinte ojapo hag̃ua ko tembiapo. Ani ñaimoʼã ñañemboʼe reiha, upéva ningo tuicha mbaʼe hína! Upéicha avei iporã ñañemboʼe ponóike umi autorida ojoko pe predikasión ha ñane ermanokuéra oiko hag̃ua “pyʼaguapýpe” (1 Tim. 2:1, 2).
4. Mbaʼérepa ñañemboʼe tapiavaʼerã?
4 Ñandejára marandu porã iñasãivaʼerã oparupiete ko yvy ape ári, upéva ningo peteĩ tembiapo tuichaitereíva. Upéicha rupi ‘ñañemboʼe tapiavaʼerã’ Jehovápe. Haʼe katuete ñanepytyvõta jajapo hag̃ua ko tembiapo (Rom. 12:12, BNP).