‘Jajapóvare ojekuaa ñanearandúpa térã nahániri’

1. Mbaʼérepa heta hénte nohenduséi jepi ñane predikasión?

¹ Heta hénte nohenduséi jepi ñane predikasión. Upéva ningo oiko ndoikuaaporãi rupi mbaʼérepa jajapo ko tembiapo térã oñeñeʼẽ vaígui ñanderehe rrádio, téle, diáriope térã ambue hendáicha. Sapyʼánte ñahendu voi ojeʼe: “Nderejedeskuidaivaʼerã koʼã testigokuéragui”. Mbaʼépa jajapovaʼerã umícha jave?

2. Mbaʼe rehépa ñapensavaʼerã ani hag̃ua ñanekangy oĩ jave oñeʼẽ vaíva ñane predikasiónre?

² Ani ñamboguapy ñandejehe. Jesús ha umi oservivaʼekue Jehovápe síglo primérope, pyʼỹinte ohasa asy oĩ rupi nontendéiva mbaʼérepa opredika hikuái ha oĩgui ohovaʼapíva chupekuéra (Hech. 28:22). Upéicharamo jepe haʼekuéra nomboguapýi ijehe koʼã mbaʼe. Jesús kyreʼỹme ojapovaʼekue Itúva rembipota oĩramo jepe oñeʼẽ vaíva hese, oikuaágui umi ipyʼaporãva ohendutaha Ñandejára marandu ha ohupytytaha hikuái heta mbaʼe porã. Upévare heʼivaʼekue: ‘Jajapóvare ojekuaa ñanearandúpa térã nahániri’ (Mat. 11:18, 19, NM). Ñapensávo mbaʼéichapa Ñandejára Raʼy ohasa asy vaʼekue opredika haguére, ñanekyreʼỹve ñaaguanta hag̃ua.

3. Mbaʼérepa ndajahecharamoivaʼerã oĩramo oñeʼẽ vaíva ñane predikasiónre ha oñemoĩva ñanderehe?

³ Jesús heʼivaʼekue umi hénte ndaijaʼemoʼãiha hemimboʼekuérare, hese oiko haguéicha (Juan 15:18-20). Koʼág̃a rupi heta oĩ oñeʼẽ vaíva ñane predikasiónre ha avei oñemoĩva ñanderehe. Péro ndajahecharamoivaʼerã umíva. Koʼã ára paha ningo og̃uahẽpotaitéma huʼãme, ha Satanás koʼýte ojopyve ñanendive (Rev. 12:12). Upévare javyʼa jahechakuaávo ko múndo aña oñehundipotaitemaha.

4. Mbaʼépa jajapovaʼerã oĩramo nañanerenduséiva?

⁴ Japorotrata porãkena. Oĩramo jepe nohenduséiva ñane predikasión, ñaneñeʼẽ juky ha japorotrata porãnte vaʼerã (Pro. 15:1; Col. 4:5, 6). Ha ijáramo ñandéve ikatu ñaporandu chupe mbaʼéicha rupípa opensa upéicha ha jahechauka mbaʼérepa oĩ heta ñanemoĩ vaiséva. Pyʼaguapýpe porãnte ñañeʼẽramo ikatu omopensa chupe ha ág̃a ótrope oñeñeʼẽ jeývo hendive ohendusevétama. Péro jahechakuaárõ ipochyetereiha, jajedespedi porãnte vaʼerã ha jaha upégui. Ñanemanduʼákena Jehová omombaʼetereiha jajapóva hesehápe, ha ñandéve g̃uarã iñimportanteve hína haʼe heʼíva, ndahaʼéi umi hénte opensáva (Isa. 52:7).