“Pendepyʼaguapýkena enterove pende rapichándi”
1. ¿Mbaʼe téxtorepa ñanemanduʼavaʼerã oĩramo ipochýva jaha jave japredika chupekuéra hógape?
1 Jehová siervokuéra oiko pyʼaguapýpe ha omombeʼu opavavépe koʼẽrõitéma oĩtaha pyʼaguapy ko yvy ape ári (Is. 52:7). Upéicharõ jepe, oĩ ipochýva jaha jave japredika chupekuéra hógape. Jahechamína mbaʼépa ikatu ñanepytyvõ ñandepyʼaguapy hag̃ua ha pono ñandepochy péicha jave (Rom. 12:18).
2. ¿Mbaʼérepa iñimportánte ñanembaʼerechakuaa?
2 Ñanembaʼerechakuaákena. Heta oĩ ipochýva ndoikuaaséi rupi mbaʼeve la Bíbliagui, péro oĩ avei ipochýva ndahaʼéi katuete nohenduséigui pe mensáhe jagueraháva, síno ñag̃uahẽ rupi ndaikatúi javete oñatende ñanderehe, térã ipirevaíma voi iprovléma rupi. Ha oĩramo jepe ipochýva pe mensáhe jaguerahávare, ikatu oñeñeʼẽ vaínte raʼe chupe umi Testígore (2 Cor. 4:4). Ñañehaʼãrõ ñanembaʼerechakuaa ha ñantende isituasión jahechakuaáta ndorekoiha mbaʼeve ñane kóntrape ha ñanepytyvõta pono ñandepochy rei (Prov. 19:11).
3. ¿Mbaʼéichapa jahechauka japororrespetaha?
3 Japororrespetákena. Heta hénte opensa haʼekuéra ogueroviávante oĩ porãha (2 Cor. 10:4). Ha jaikuaaháicha, káda uno oreko derécho odesidívo ohendútapa térã nohendumoʼãi pe mensáhe jagueraháva. Arakaʼeve ndajaapoʼirivaʼerã umi mbaʼe ogueroviáva umi hénte ni nañantendekaivaʼerã chupekuéra ndoikuaaiha mbaʼeve. Ha ñanemosẽramo, jahánte vaʼerã trankílo porã.
4. ¿Mbaʼépa heʼise hína ñambohovái “porãnte”?
4 Ñañeʼẽkena pyʼaguapýpe porãnte. Oĩrõ iñeʼẽ arhélva ñandéve, ñambohovái “porãnte” vaʼerã chupe, upéva heʼise ñañeʼẽvaʼerãha torýpe ha trankílo porã (Col. 4:6; 1 Ped. 2:23). Jajodiskuti rangue, iporãvéta ñañeʼẽramo umi mbaʼe mokõivéva jagueroviávare. Ha ñantende hag̃ua mbaʼérepa ndogueroviái peteĩ mbaʼe, jaikekuaavaʼerã chupe. Péro sapyʼánte ikuentavéta jahánte upégui ani hag̃ua ñambyaive pe káva raity (Prov. 9:7; 17:14).
5. ¿Mbaʼe iporãvapa ikatu jahupyty ñandepyʼaguapýramo predikasiónpe?
5 Ñandepyʼaguapýramo, umi hénte ikatu ndahesaraivéi upévagui ha ág̃a ótro opredika vove chupe oñatende porãta hese (Rom. 12:20, 21). Ha moõ piko jaikuaapáta, umi oñemoĩ mbaretéva jepe ñanderehe, amo gotyove ikatu hína oiko chuguikuéra ñane ermáno (Gál. 1:13, 14). Upévare, jajejokokuaárõ ha akóinte ñandepyʼaguapy nokambiáiramo jepe umi hénte, ñamombaʼeguasu Jehovápe ha ñamoporãverei pe ñamboʼéva (2 Cor. 6:3).