KAPÍTULO 17

¿Mbaʼére naiporãi ajeheʼaiterei che kompañerokuérare?

“Avése ahecha umi che avegua oñembyatypa jave oñondive ha apensa: ‘¡Umíva añetehápe oñoamigoite! Che avei arekose peichagua amígo’” (José).

“Chéve ifasileterei vaʼekue añeamiga che kompañerokuérare, péro upéva káusare heta cheprovléma kuri” (María).

ENTEROVE ningo ñaikotevẽ ñane amigorã, umi ikatu vaʼerã oĩ ñanendive iporã ha ivai jave la situasión. Jesús oreko vaʼekue avei amígo ha heta ovyʼa vaʼekue hendivekuéra (Juan 15:15). Ha ojejukátarõ guare chupe pe yvyra pohýire, iñamígo Juan ndohejái vaʼekue chupe haʼeño. La Bíbliape oñehenói voi Juánpe “pe disípulo Jesús ohayhuetéva” (Juan 19:25-27; 21:20). Ha peichagua amígo haʼe hína la enterovéva ñaikotevẽva, álgien oĩ vaʼerã ñande ykére iporã ha ivai jave la pórte.

Ikatu oime repensa retopáma hague peichagua ne amigorã koléhiope, pórke rejogueraha porãiterei peteĩ térã mokõi ne kompañérondi reikuaa ypy guive chupekuéra. Ha pendegustáramo la mísma kósa ha igústo ndéve reñeʼẽ hendivekuéra, nerepensamoʼãi voi haʼeha hikuái ‘júnta vai’ (1 Corintios 15:33). Peteĩ mitãkuña hérava Ana heʼi: “Rejotopa voi hendivekuéra haimete káda día, ha upévare pyaʼe rejepokuaa hesekuéra. Idiferentete reime jave ermanokuérandi kongregasiónpe, pórke upépe reñatende vaʼerã opa mbaʼe rejapóva, péro koléhiope katu rejapokuaa ndegustáva”. Ikatu avei oime repensa Luisa opensa haguéicha, haʼe heʼi: “Ahechaukase vaʼekue che kompañerokuérape ñande testígo de Jehová ndahaʼeiha la ñanediferentetereíva haʼekuéra opensaháicha”. ¿Mbaʼépa nde repensa la heʼívare Ana ha Luisa? ¿Iporãpa oiko ndehegui ne kompañerokuéra amigoite?

¿Mbaʼérepa tekotevẽ reñatende?

María, pe mitãkuña ñañeʼẽ hague oñepyrũvo ko kapítulo, naiprovlemaiete kuri ojeheʼa hag̃ua oimeraẽvare, upévare heta iñamígo. Péro upéi ou iprovléma ndoelehiporãi rupi la iñamigorã. Haʼe heʼi: “Chéngo ndapytavaiséi vaʼekue avavéndi, tahaʼe umi mitãkuña térã mitãrusúndi, ha mbeguekatúpe ajapóma avei haʼekuéra ojapóva”. Luisa omombeʼu oiko hague avei hese upéva: “Ovapaite cherehe che kompañerokuéra lája, ha añepyrũma añekomporta haʼekuéraicha”.

Añetehápe nañanesorprendéi la oiko vaʼekue hesekuéra. Ikatu hag̃uáicha odura peteĩ amista, umi oñoamígova ojogueraha porã vaʼerã omombaʼégui la mísma kósa ha orekógui el mísmo gústo. Upévare, reiporavóramo ne amigorã umi nomombaʼéiva la Biblia, katuete ováta avei nderehe ilajakuéra (Proverbios 13:20). Upévare apóstol Pablo oakonseha vaʼekue umi kristiánope: “Ani peñemoĩ peteĩ júgo guýpe peteĩ ndoservíriva ndive Ñandejárape” (2 Corintios 6:14).

Mbaʼépa ikatu rejapo

Upéicharõ, ¿nderejeheʼái vaʼerã piko ni michĩmi ne kompañerokuérare? ¿Tekotevẽ piko ndearhél ha reñemomombyryete voi chuguikuéra? Nahániri. Kristianokuéra ningo ñaipytyvõ vaʼerã umi hénte ‘entéro paisguápe oiko hag̃ua chuguikuéra disípulo’, ha upearã jajogueraha porã vaʼerã opaichagua persónandi, por ehémplo umi oguerekóva diferénte pire kolór, kostúmbre térã rrelihión (Mateo 28:19).

Apóstol Pablo ningo oheja peteĩ ehémplo iporãitereíva. Haʼe oñemongetakuaa vaʼekue opaichagua persónandi, ijapytepekuéra oĩramo jepe ndogueroviáiva la haʼe ogueroviáva (1 Corintios 9:22, 23). ¡Nde ikatu avei resegi iñehémplo! Neamávle vaʼerã ne kompañerokuérandi, eñehaʼã rentende chupekuéra ha eñemongetakuaa hendivekuéra. Péro reñatende vaʼerã ani hag̃ua ova nderehe oñeʼẽ ha oñekomporta lája hikuái. Ha ensegidamínte reexplika porã vaʼerã chupekuéra mbaʼérepa nde redesidi reiko la Biblia heʼiháicha (2 Timoteo 2:25).

Reservi rupi Ñandejárape, heta vése nediferénteta ne kompañerokuéragui, ha upéva sapyʼánte ikatu ijetuʼu ndéve (Juan 15:19). Péro epensamína ko ehémplore: ñamoĩ chupe reĩha peteĩ kanóape ha rehecha peteĩ ojahoga potaitéva hína. ¿Mbaʼépa iporãvéta rejapo? ¿Reñemombo nde avei pe ýpe, térãpa reipytyvõ chupe ojupi hag̃ua pe kanóape?

Upéicha avei oiko ne kompañerokuéra kásope. Jehová ningo ñandeprotehe ñande haʼe rupi iñamígo, péro haʼekuéra katu ndorekói upe proteksión (Salmo 121:2-8). Ha nde remboykéramo Jehová heʼíva reiko hag̃ua ne kompañerokuéra amígoramo, añetehápe reapeligra hína ne amista Jehovándi voi, ha upéicha rupi ikatu avei reju nderevyʼavéi (Efesios 4:14, 15; Santiago 4:4). Upévare, ikuentave reipytyvõ ne kompañerokuérape oikuaa hag̃ua Jehovápe, ha upéicha haʼetéta reipytyvõva chupekuéra ojupi hag̃ua avei nendive pe kanóape. Rejapóramo upéicha rehechaukáta nde añetehápe haʼeha peteĩ amígo teete.

TÉXTO OĨVA LA BÍBLIAPE

“Ajapo entéro mbaʼe umi notísia porã rehehápe, ikatu hag̃uáicha apredika che rapichakuérape” (1 Corintios 9:23).

PETEĨ KONSÉHO

Ikatu oĩ ne kompañéro oikuaaséva mbaʼépa reguerovia. Upévare, ejapysaka vaʼerã hese omombeʼu jave ndéve la opensáva. Ha reexplikáta jave mbaʼépa reguerovia, ehechauka vaʼerã errespetaha chupe (1 Pedro 3:15).

¿REIKUAÁPA RAʼE?

Heta persóna oservíva Ñandejárape oaprende vaʼekue la Biblia omboʼéva peteĩ ikompañéro ipyʼaguasúva opredika rupi chupe.

UMI MBAʼE AJAPÓTAVA

¿Mbaʼépa ajapóta ahechakuaáramo ajeheʼaitereimaha peteĩ che kompañérore? ․․․․․

¿Mbaʼépa ajapóta oĩramo peteĩ che kompañéro oñembohorýva cherehe umi mbaʼe agueroviávare? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa haʼete vaicha ifasilvéva rekonsegi hag̃ua ne amigorã eskuéla térã koléhiope kongregasiónpe rangue?

● ¿Mbaʼéichapa ikatu ndeperhudika rehasáramo tiémpo ne kompañerokuérandi ndahaʼéi jave eskuéla térã koléhio óra?

● ¿Mbaʼéichapa nepytyvõta remombeʼúramo ne kompañerokuérape nde haʼeha testígo de Jehová?

[Komentário oĩva páhina 143-pe]

“Ajapo rupi che kompañerokuéra ojapóva, ifásil vaʼekue chéve akonsegi hag̃ua che amigorã koléhiope. Péro upéva káusare heta cheprovléma kuri. Upévare aaprende iporãveha jaheka ñane amigorã ermanokuéra apytépente, pórke hesekuéra si ikatu jajerovia” (Daniel).

[Taʼanga oĩva páhina 146-pe]

Mbaʼéichapa reipytyvõ porãvéta peteĩ ojahoga potaitévape, ¿reñemombo pe ýpe, térãpa rembohasáramo chupe peteĩ salvavída?