KAPÍTULO 27

¿Mbaʼére cheexihenteterei opa mbaʼépe?

¿Ndepochyetereípa nereguenohẽiramo pe nóta iporãvéva umi exámenpe?

□ Si

□ No

Oĩrõ ndekorrehíva ha heʼíva ndéve peteĩ mbaʼe remehora vaʼerã, ¿repensápa nderevaleiha voi mbaʼeverã?

□ Si

□ No

¿Repensápa avave ndojapomoʼãiha umi mbaʼe ndegustaháicha ha upévare ikuentaveha ndereguerekói amígo?

□ Si

□ No

REMBOHOVÁIRÕ “Si” peteĩ térã hetave umi pregúnta oĩvape yvate, ikatu oime neexihentetereíma ha reipota ojejapo perfékto opa mbaʼe. Ndaivaíri jajapo porãse ñane rembiapo, ha la Bíbliape voi ojeguerohory umi “ivaléva itraváhope” (Proverbios 22:29). Péro umi iñexihentetereíva ohasáma la rrája, pórke ndogustaiete chupekuéra oĩramo michĩmi jepe ojavýva.

Por ehémplo, Jason orekóva 19 áño heʼi: “Aimérõ guare último áño che koléhiope, anohẽse katuete umi nóta iporãvéva, ha nakonsegíriramo upéva apensáma voi ndavaleiha la koléhiope. Avei astudia vaʼekue piáno, ha upeichaite avei ojehu chéve upévape, pórke chemolestaiterei nosẽirõ chéve peteĩ músika osẽháicha umi profesionálpe”.

Neexihentetereíramo opa mbaʼépe, upéva ikatu voi oafekta nde servísio Ñandejárape. Eñeimahinamína por ehémplo peteĩ mitãrusu oñehaʼãmbaiteha ojapo porã hembiapo kongregasiónpe, ha enterovévante heʼi hese iguapoitereiha. Upévare mbeguekatúpe haʼe oñandu enterovéva ojesarekoha hese ohecha hag̃ua mbaʼépa ojapo térã ndojapói. Añetehápe ideprovechoiterei umi iguápova kongregasiónpe, ha péicha ehémplo porã enterovépe. Péro ko mitãrusu oñekonsentraitereíramo upévare ha ojapo porãseterei opa mbaʼe oñekontroláguinte chupe, amo ipahápe ndovyʼamoʼãvéima iservísiope. Oimérõ upéicha ojerure vaʼerã toñepytyvõ chupe, péro ikatu noñanimái ojapo upéva openságui oĩtaha oñedesepsionáva chugui ojerure haguére ajúda. ¿Mbaʼépa ikatu ojehu chupe osegíramo upéicha? Amo ipahápe ikatu ndaipuʼakavéi pe situasiónre ha oñentrega openságui ndaikatumoʼãiha ojapo opa mbaʼe oñehaʼarõva chugui.

Mbaʼépa rejapokuaa ani hag̃ua neexihenteterei

Peteĩ oipotáva ojejapo perfékto opa mbaʼe, opensa avave ndojavýi vaʼerãha ni michĩmi mbaʼevetépe. ¿Oĩ porãpa opensa lája? Nahániri, upévare la Biblia heʼi: “Enterove opeka ha ni peteĩva ndaikatúi ohechauka umi kualida porã Ñandejára ojapoháicha” (Romanos 3:23). Jahechakuaa upéicharõ ndaiporiha ni peteĩ yvypóra haʼéva perfékto. Upévare, oĩramo opensáva ikatuha ojapo entéro mbaʼe ojavyʼỹre ni una ves, haʼetéta opensáva orekoha la kapasida oveve hag̃ua. Péro jaikuaaháicha ndaipóri avave ojapokuaáva upéva. Peteĩ persóna ogueroviáramo jepe ipyʼaite guive ikatuha oveve, núnka ndoikomoʼãi upéva.

Upévare, ¿mbaʼépa ikatu rejapo ani hag̃ua neexihenteterei voi opa mbaʼépe? Jahechamína.

Ani epensa nde haʼe vaʼerãha pe ivalevéva. Oimérõ siémpre rejapo porãseve ótrogui opa mbaʼe, amo ipahápe upéva nemokaneʼõta. La Biblia heʼi voi jajapóramo upéva haʼetetaha “jaikóva yvytu rapykuéri” (Eclesiastés 4:4). Añetehápe, naentéroi ikatu haʼe pe ivalevéva. Ha oĩrõ jepe ojapo porãitereíva peteĩ mbaʼe, tiémpo rire oĩta katuete ótro ojapo porãvéva. Upévare iporãvéta repensárõ rejapo vaʼerãha nde ikatumívante, ha ndahaʼéi resupera vaʼerãha ótrope (Gálatas 6:4).

Emoĩ umi méta ikatútava rehupyty. Ereko vaʼerã enkuénta umi mbaʼe rejapokuaáva, péro avei nemanduʼa vaʼerã oĩha heta mbaʼe ndaikatumoʼãiva rejapo. Neumílde vaʼerã, upéva nepytyvõta pono remoĩ peteĩ méta ndeforsaitereítava rehechaukaséguinte ndevaletereiha. Apóstol Pablo omeʼẽ vaʼekue ko konsého iporãitéva: “Anive [...] pepensa peneimportantetereiha” (Romanos 12:3). Upévare, ereko enkuénta ne limitasión ha ehecha mbaʼetekópa oĩ umi méta reguerekóva. Eñehaʼãkena ejapo porã ikatúva entéro, péro ani rejapo reipotáguinte opaite mbaʼe opyta perfékto voi.

Eaprende iporãha repukánte rejavy jave. Etantea ejapo umi mbaʼe ndahaʼéivape la ndevaletereíva, por ehémplo rembopu peteĩ instruménto musikál. Katuete repraktikávo rejavýta heta vése, péro ani repensa upéva ivaiha. Upéva rangue, esegi ko konsého bíblico: “Oĩ tiémpo japuka hag̃ua” (Eclesiastés 3:4). Upéicharõ, edisfrutákena umi mbaʼe rejapóva ha ani nde voi rejopyeterei nendive. Upéva nepytyvõta rehecha hag̃ua ñaaprende jave peteĩ mbaʼe pyahu, jajavynteha voi jepi heta vése. Añetehápe, ikatu hína ijetuʼu ndéve reasepta upéva, péro eñehaʼãmbaite vaʼerã ha ani repensa núnka voi nosẽporãiha ndéve la rejapóva.

Aníkena nderesarái, Jehová nohaʼarõi voi ñandeperfékto, haʼe oipotánte ñandefiél (1 Corintios 4:2). Reñehaʼãmbaitérõ ndefiél hag̃ua, katuete revyʼáta opa mbaʼe rehupytývare ndahaʼéirõ jepe perfékto.

TÉXTO OĨVA LA BÍBLIAPE

“Ndaipóri ningo ni peteĩ kuimbaʼe ihústova siémpre ojapóva iporãva ha núnka ndopekáiva” (Eclesiastés 7:20).

PETEĨ KONSÉHO

Epensa oĩpa peteĩ mbaʼe nderejapóiva hína rekyhyjégui osẽ vaitaha ndéve. Upéi emoĩ peteĩ fécha rejapo ha rekompleta hag̃ua upe mbaʼe.

¿REIKUAÁPA RAʼE?

Jehová ningo perfékto, péro siémpre oreko enkuénta ñande yvypóra haʼeha imperfékto. Upévare haʼe núnka ndojeruréi ñandéve umi mbaʼe ndaikatumoʼãiva jajapo.

UMI MBAʼE AJAPÓTAVA

¿Mbaʼépa ajapóta ahechakuaáramo ahasamaha hína la rrája ajaposégui perfékto opa mbaʼe? ․․․․․

¿Mbaʼépa ajapóta ahechakuaáramo cheexihentetereimaha hína che rapichakuérandi? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Remoĩpa ndejupe umi méta ndeforsaitereítava rehupyty hag̃ua?

● ¿Mbaʼe téxto bíblicopa nepytyvõ rehecha porã hag̃ua Jehová nohaʼarõiha ñandehegui ñandeperfékto?

● ¿Mbaʼérepa oñemomombyrýta ndehegui nde rapichakuéra neexihentetereíramo?

● Restudia rire ko párte, ¿mbaʼéichapa rerreaksionáta rejavýramo peteĩ mbaʼépe?

[Komentário oĩva páhina 226-pe]

“Iporã ningo ñañehaʼã jajapo porã ñane rembiapo, péro ñandeekilivrádoramo nañahaʼarõmoʼãi opyta voi perfékto” (Megan).

[Rrekuádro oĩva páhina 228-pe]

Neexihentetereírõ ijetuʼúta ne amígo hag̃ua

Oĩ heta persóna iñexihentetereíva omboykéva voi hapichápe, pórke opensa umi ótro núnka ndojapomoʼãiha opa mbaʼe haʼekuéra oipotaháicha. Avei, normálmente la majoría oñemomombyry voi umi iñexihentetereívagui. ¿Oikómapa nderehe koʼã mbaʼe? La Biblia omeʼẽ ñandéve ko konsého: “Iporã ningo ndehústo, péro ndovaléi rehasa la rrája, ha ani reiko reñembovaleterei. Péicha rejapóramo nde voi rejeperhudika hína” (Eclesiastés 7:16). Añetehápe, umi persóna iñexihentetereíva omomombyry la héntepe ijehegui, pórke ndaigústoi jajeheʼa hesekuéra. Peteĩ mitãkuña hérava Amber heʼi: “Ndaigústoi ñaime umi persóna ñanemoñeñandu vaívandi. Che ahecháma voi mbaʼéichapa heta hénte iñexihentetereíva, vyroreietére operde heta amígo ikalidáva”.

[Taʼanga oĩva páhina 229-pe]

Pe opensáva ikatutaha ojapo perfékto opa mbaʼe ivyroiterei ha ojogua peteĩ opensávape ikatuha oveve