Lívro número 64 3 Juan
Ohai: Apóstol Juan
Moõpa ojehai: Éfeso térã ijypýpe
Arakaʼépa ojehaipa: áño 98 rupi Jesús ou rire.
KO KUATIAÑEʼẼ oñemondo Gáyope, peteĩ kristiáno ijerovia mbaretéva ha Juan ohayhuetereíva. Upe tiémpope oĩvaʼekue heta hérava Gayo ha Griégo Kuatiañeʼẽme ko téra ojeporu cuatro hendápe. Oiméne oĩraʼe mbohapy térã cuatro kuimbaʼe hérava péicha (Hech. 19:29; 20:4; Rom. 16:23; 1 Cor. 1:14). Ndaikatúi jaikuaa mavaitévape Juan ohai oimérõ oĩ koʼãva apytépe. Ndajaikuaaguasúiramo jepe mbaʼeve Gáyogui, jaikuaa oĩhague peteĩ kongregasiónpe ha Juan amigoiteha. Jaikuaa avei ko kárta oñemondohague chupe, upévare heʼi “ndéve” heʼirangue peẽme.
2 Ko kárta oñepyrũnguévo ha opakuévo oporomomaitei 2 Juan ojapoháicha. Avei ijapohare heʼi jey ijehe “che, karaietémava” ha upévare jaikuaa apóstol Juan ojapohague (2 Juan 1, BNP). Ko kárta ojehai lája ojogua umi mokõi kárta Juan ohaivaʼekuépe ha upévare oiméne ojehaíraʼe Éfesope térã ijypýpe, amo áño 98 rupi. Mbykyeterei rupi, umi karai ymaguare ohaíva lívro naimanduʼaguasúi hese, péro oĩ 2 Juan ndive umi dokuménto oĩháme Ñandejára Ñeʼẽ.
3 Juan oguerohory Gáyope omog̃uahẽhaguére hógape umi ermáno mombyryguápe. Avei heʼi oĩha provléma Diótrefes oñemombaʼeguasuse rupi. Ko kuatiañeʼẽme imanduʼa avei Demetrio rehe, oiméne haʼe voi ogueraha ko kárta Gáyope. Upévare oikotevẽta opyta hag̃ua ha Gayo katuete omog̃uahẽne chupe hógape pe kárta heʼiháicha. Koʼápente oñeñeʼẽ Diótrefes ha Demétriore ha upévare ndajaikuaaguasúi chuguikuéra. Péro ko kárta ohechauka mbaʼéichapa upérõ umi ermáno oparupigua ojoayhu. Haʼekuéra omog̃uahẽva jepi hógape umi ‘osẽvaʼekuépe Jesucristo réra omoherakuã hag̃ua’, jepe ndoikuaái chupekuéra (v. 7).
MBAʼÉICHAPA ÑANEPYTYVÕ
5 Apóstol Juan ningo peteĩ ansiáno ojepyʼapyetereíva ermanokuérare ha ikyreʼỹva oñangareko hag̃ua hesekuéra ndoipotáigui mbaʼeve ombyai chupekuéra. Haʼe oguerohory chupekuéra ojoayhu ha imbaʼeporã rupi hapichakuérandi. Ojapo rupi upéva oipytyvõta umi ermáno upepegua ha umi “mombyryguápe” (haʼekuéra oikuaaʼỹvaʼekue) oúva hendapekuéra “omoherakuã hag̃ua umi mbaʼe añeteguáva” (v. 5, 8). Péro Diótrefes oñemombaʼeguasu ha Jehovápe ombopochy upéva. Haʼe avei nomombaʼéi umi omoakãvape kongregasión ha okopi apóstol Juan rehe (Pro. 6:16, 17). Oñehaʼã ani ojeguerohory umi ermáno og̃uahẽva kongregasiónpe. Upévare Juan heʼi ivaiha ojapóva ha tekotevẽha ermanokuéra ojoayhu. Ñande avei aníkena jajejapose, jaiko guei Ñandejára rapére, japorohayhu ha ñanembaʼeporã ñande rapichándi. Upéicharõ jajapoñaína Juan heʼihaguéicha: ‘Iporãva ojapóva niko Ñandejára mbaʼe hína, ivaíva ojapóva katu ndoikuaái Ñandejárape’ (3 Juan 11).