1, 2. ¿Heʼiháicha Ezequiel 47:1-12, mbaʼe ijojahaʼỹvapa ohecha Ezequiel, ha mbaʼépa ohechakuaa? (Ehecha pe taʼanga oĩva iñepyrũme).

PE VISIÓN oñeʼẽvape pe témplore Ezequiel ohecha ótra kósa ijojahaʼỹva: ¡Y osẽva pe témplogui ha osyrýva éste gotyo! Ñañeimahinamína Ezequiel osegiha pe ysyry hesakã asýva (elee Ezequiel 47:1-12). Haʼe ohecha pe y osẽha pe témplo entrádagui ha osyryha ohóvo oĩha gotyo pe okẽ oĩva éste gotyo. Peteĩ ánhel ogia hína Ezequiélpe oka gotyo pe témplogui, ha ko ánhel omedi ohóvo pe distánsia oguatáva hikuái. Pe ánhel heʼi Ezequiélpe okrusa hag̃ua pe y unas kuánta vése, upéi pe proféta ohechakuaa pe y pyaʼeterei ipypukuveha ohóvo, ha ipahápe oytámante vaʼerã okrusa hag̃ua.

² Ezequiel ohechakuaa pe rrío osyryha pe Mar Muerto peve, ko mar ningo heʼẽ juky ha mbaʼeve ndaikatúi oiko pype. Péro oikévo ohóvo pe y rriopegua, pe mar naheʼẽjukyvéima ha henyhẽte pirágui. Mokõive ládo pe rrío oríllare ohecha opaichagua yvyramáta. Koʼã yvyramáta káda mes hiʼa pyahu jey ha umi hogue ikatu oporomonguera. Entéro koʼã mbaʼe ohecha vaʼekue oiméne tuicha ombopyʼaguapy Ezequiélpe ha omeʼẽ chupe esperánsa. ¿Péro mbaʼépa heʼise upéva Ezequiélpe g̃uarã ha umi judío oĩvape g̃uarã prisionéro? ¿Ha mbaʼépa upéva heʼise ñandéve g̃uarã koʼág̃arupi?

¿Mbaʼépa heʼise vaʼekue pe rrío ohecha vaʼekue Ezequiel umi judío oĩvape g̃uarã prisionéro?

3. ¿Mbaʼérepa umi judío yma guare ohechakuaa raʼe pe visión oñeʼẽva pe rríore noñekumplimoʼãiha literálmente?

³ Umi judío yma guare oiméne ohechakuaa raʼe pe visión oñeʼẽva pe rríore noñekumplimoʼãiha literálmente. Upéva rangue, ikatu oime haʼekuéra imanduʼa rakaʼe proféta Joel oskrivi vaʼekuére mas de 200 áño upe mboyve (elee Joel 3:18). Umi judío oĩva prisionéro oleérõ guare umi mbaʼe oskrivi vaʼekue proféta Joel, oiméne nohaʼarõi raʼe ‘otyky umi montáñagui víno heʼẽ asýva’, ni ‘osyry kamby umi sérrogui’ ha nohaʼarõi avei hikuái osẽ peteĩ ‘ykua yvu Jehová rógagui’. Péicha avei haʼekuéra nopensáine rakaʼe Ezequiel visión oñeʼẽva pe rrío rehe oñekumplitaha literálmente.a Upéicharõ, ¿mbaʼépa heʼise vaʼekue upe visión? La Biblia ñanepytyvõ ñantende hag̃ua algúna párte oĩva pe visiónpe. Péro ko kapítulope jahecháta mbohapy garantía orekóva ko profesía ohechaukáva Jehová ñanderayhuetereiha.

4. a) ¿Mbaʼépa oiméne ontendeka raʼe Ñandejára puévlope pe rrío ojehecháva Ezequiel visiónpe? b) La Biblia oipuru umi palávra “y” ha “rrío” orrepresenta hag̃ua umi vendisión, ¿mbaʼe garantíapa omeʼẽ ñandéve upéva? (Ehecha pe rrekuádro “Umi rrío henyhẽva Jehová vendisióngui”).

⁴ Peteĩ rrío henyhẽva vendisióngui. La Bíbliape heta vése ojepuru pe y ha umi rrío ehémploramo oñeñeʼẽ hag̃ua umi vendisión Jehová omeʼẽvare. Ezequiel ohecha vaʼekue peichagua rrío osẽva pe témplogui, ¿mbaʼépa oiméne ontendeka raʼe Ñandejára puévlope upe visión? Haʼekuéra oiméne ontende raʼe osegíramo oadora Jehovápe añoiténte, orresivitaha umi vendisión oipytyvõtava chupekuéra oĩ porã hag̃ua Ñandejára renondépe. ¿Péro mbaʼeichagua vendisiónpa orresivíta hikuái? Umi saserdóte oñepyrũ jeýta omboʼe chupekuéra. Ha ojejapo jeýta rupi sakrifísio pe témplope, haʼekuéra oĩta trankílo oikuaágui oñeperdonataha chupekuéra ipekádo (Ezeq. 44:15, 23; 45:17). Péicha haʼekuéra ipotĩ jeýta, ku ojepururamoguáicha pe y osẽva pe témplogui oñemopotĩ hag̃ua chupekuéra.

5. ¿Mbaʼéichapa pe visión ohechauka umi vendisión ohupytytaha enterovépe?

⁵ ¿Ohupytýta piko umi vendisión enterovépe? Natekotevẽi kuri avave ojepyʼapy upévare, pórke pe visión ohechauka pe rrío oñepyrũramo jepe michĩmínte, ohupytývo 2 kilómetrorupi oikomaha chugui peteĩ rrío ipypukuetereíva (Ezeq. 47:3-5). Umi israelita oñembohetavéramo jepe, umi vendisión oúva Jehovágui oñembohetavéta avei ha ndofaltamoʼãi mbaʼeve. ¡Pe rrío ohechauka porã pe nasión orresivi jeytaha Jehovágui hetaiterei vendisión!

6. a) ¿Mbaʼe garantíapa omeʼẽ pe visión? b) ¿Mbaʼe avísopa omeʼẽ avei? (Ehecha avei nóta).

⁶ Y oporomoingovéva. Ezequiel visiónpe ojehecha pe rrío og̃uahẽha pe Mar Muértope, ha pe mar henyhẽte pirágui. Hetaiterei rupi umi pira, upe mar oñembojoja voi pe Mar Grande rehe, térã Mar Mediterráneo rehe. Oĩ voi hetaiterei peskadería tuichaicháva pe Mar Muerto orílla pukukuére, peteĩ siuda guive ótro siuda peve, ha hiʼarive amalisia koʼã siuda oĩ vaʼekue mombyry ojuehegui. Pe ánhel heʼi: “Tosyry osyryha gotyo pe y [...] entéro mbaʼe oikovéta”. ¿Péro heʼisépa upéva pe y osẽva Jehová rógagui omopotĩmbaitetaha pe Mar Muerto kompletoite? Nahániri. Pe ánhel heʼi oĩtaha umi estéro osegítava ikyʼa. “Umíva opyta reíta ha henyhẽtéta jukýgui”b (Ezeq. 47:8-11). Péicha pe visión omeʼẽ peteĩ garantía pe adorasión verdadéra omoingove jeytaha umi héntepe, ha oñevendesitaha chupekuéra. Péro pe visión omeʼẽ avei peteĩ avíso: Naentéroi oaseptáta umi vendisión oúva Jehovágui ni noñemongueramoʼãi enterovépe.

7. ¿Mbaʼe garantíapa omeʼẽ umi judío oĩvape prisionéro umi yvyramáta oĩva pe rrío oríllape?

⁷ Yvyramáta hiʼáva ha hogue ojepuru pohãrã. ¿Ha mbaʼépa ikatu jaʼe umi yvyramáta rehe, oĩva pe rrío oríllape? ¡Ajépa umíva omoporãiterei voi pe visión! Péro umíva oreko avei peteĩ signifikádo. Ezequiel ha iñirũnguéra oiméne ovyʼa rakaʼe oñeimahinávo mbaʼeichaitépa héta umi frúta oprodusíva umichagua yvyramáta, káda mes hiʼa pyahúvo. Upe mbaʼe porãite ojehecháva pe visiónpe oasegura pe puévlope Jehová omeʼẽtaha chupekuéra aliménto omombarete hag̃ua ijerovia. ¿Mbaʼépa ohaʼarõve chupekuéra? Pe profesía heʼi avei umi yvyramáta roguekue ‘ojepurutaha pohãrã’ (Ezeq. 47:12). Jehová oikuaa porã umi prisionéro oho jeýtava ivállepe, opa mbaʼe ári oikotevẽtaha oñemonguera chupekuéra espirituálmente oadora jey hag̃ua chupe, ha upéva voi Ñandejára opromete ojapotaha. Oĩ umi profesía omombeʼúva haʼe ojapo hague oñekotevẽva ojeadora jey hag̃ua chupe, jahecha haguéicha ko lívrope kapítulo 9-pe.

8. ¿Mbaʼépa ohechauka Ezequiel visión orekotaha peteĩ kumplimiénto tuichavéva?

⁸ Péro jahecha haguéicha avei kapítulo 9-pe, umi judío oho jey vaʼekue hetãme ohecha vaʼekue oñekumpliha umi profesía, péro peteĩ pártente. Ha upéva oiko ikulparekuérante, pórke amo ipahápe, ¿mbaʼéicha piko Jehová ovendesíta ipuévlope, si haʼekuéra ojapo jey jey la ivaíva, naiñeʼẽrendúi ha ndoadoravéi chupe haʼe oipotaháicha? Umi ifiélva ningo ikangypaite ha ombyasyeterei vaʼekue ohechávo umi mbaʼe vai ojapóva umi judío. Upéicharõ jepe, koʼã judío ifiélva oikuaa porã Jehová promesakuéra ndofallamoʼãiha, umíva siémpre oñekumpli (elee Josué 23:14). Upéicharõ, ikatu jaʼe Ezequiel visión algún día orekómante vaʼerãha peteĩ kumplimiénto tuichavéva. ¿Péro arakaʼépa oikóne upéva?

¡Pe rrío osyry avei koʼág̃arupi!

9. ¿Arakaʼépa oreko peteĩ kumplimiénto tuichavéva pe visión oñeʼẽva pe témplore?

⁹ Jahecha haguéicha ko lívrope, kapítulo 14-pe, pe visión oñeʼẽva pe témplore oreko peteĩ kumplimiénto tuichavéva “umi ára pahápe”. Upe tiémpope pe adorasión oñemeʼẽva Jehovápe oñembotuicha ha oñemombaʼevéta kuri arakaʼeve ojejapoʼỹ haguéicha (Is. 2:2). ¿Mbaʼéichapa oñekumpli ñane tiémpope Ezequiel visión oñeʼẽva pe rríore?

10, 11. a) ¿Mbaʼeichagua vendisiónpa jarresivi koʼág̃arupi ojoguáva peteĩ rríope? b) ¿Mbaʼéichapa okakuaa avei pe y ipotĩva, amedída ke okakuaa ohóvo Ñandejára puévlo koʼã ára pahápe?

¹⁰ Peteĩ rrío henyhẽva vendisióngui. ¿Mbaʼe vendisión rehepa ñanemomanduʼa pe rrío osyrýva Jehová rógagui? Katuete oiméne ñanemomanduʼa entéro mbaʼe Jehová omeʼẽvare ha ideprovéchova ñandéve. Pe vendisión tuichavéva hína pe sakrifísio Jesucristo ojapo vaʼekue ñanderreskata hag̃ua. Upéva rupive Ñandejára operdona ñande pekadokuéra ha haʼete ñanepotĩva umívagui. Avei umi enseñánsa ipotĩva oĩva Ñandejára Ñeʼẽme haʼete y oporomoingovéva, upe y ikatu ñanemopotĩ entéro mbaʼégui (Efes. 5:25-27). ¿Jahechápa pe rrío osyryha hína koʼág̃arupi?

¹¹ Áño 1919-pe oĩ vaʼekue sólamente 5.793 persóna oservíva Jehovápe, ha haʼekuéra ovyʼaiterei oñemyesakã haguére chupekuéra heta enseñánsa oĩva la Bíbliape. Upe áño guive Ñandejára puévlo okakuaave ohóvo ha koʼág̃a ñaiméma mas de 8 millón testígo de Jehová. ¿Oime piko pe y ipotĩva osyry ha okakuaa avei okakuaaháicha Ñandejára puévlo? Si, pórke oñemyesakãma ñandéve hetaiterei enseñánsa oĩva la Bíbliape ha ndaikatúi voi ni ñamombeʼupa. Umi 100 áño ohasa vaʼekuépe ñande jarresivi hetaiterei Biblia, lívro, rrevísta, folléto ha tratádo. Okakuaaháicha pe rrío Ezequiel ohecha vaʼekue, umi enseñánsa oĩva la Bíbliape pyaʼeterei osyry ha okakuaave ohóvo oipytyvõ hag̃ua ko múndo tuichakuére umi oikuaasévape la Biblia heʼíva. Aretereíma jareko hague umi puvlikasión oñeimprimíva, ¡ha koʼág̃a ñande sítio oĩva Internétpe oreko avei koʼã informasión mas de 900 idiómape! ¿Mbaʼéichapa koʼã y oipytyvõ umi hénte ipyʼaporãvape?

12. a) ¿Mbaʼéichapa umi enseñánsa oĩva la Bíbliape oipytyvõma heta héntepe? b) ¿Mbaʼe avísopa omeʼẽ pe visión? (Ehecha avei pe nóta).

¹² Y oporomoingovéva. Ezequiélpe ojeʼe kuri: “Tosyry osyryha gotyo pe y [...] entéro mbaʼe oikovéta”. Epensamína mbaʼéichapa umi enseñánsa oĩva la Bíbliape oipytyvõma enterove umi oĩvape pe paraíso espirituálpe. Umi enseñánsa ningo opoko umi hénte korasõre ha oipytyvõ chupekuéra ojerovia hag̃ua Jehováre. Péro pe visión omeʼẽ avei peteĩ avíso: Naentéroi osegi ohayhu umi enseñánsa verdadéra. Ezequiel visiónpe ojekuaa kuri pe Mar Muértope oĩ hague umi estéro ha karugua, péicha avei oĩ umi hénte nomombaʼevéiva umi enseñánsa oĩva la Bíbliape ha oheja Jehovápe.c ¡Aníkena arakaʼeve oiko ñanderehe upéva! (Elee Deuteronomio 10:16-18).

13. ¿Mbaʼépa ñaaprende umi yvyramáta oĩvagui Ezequiel visiónpe?

¹³ Yvyramáta hiʼáva ha hogue ojepuru pohãrã. Umi yvyramáta okakuaáva pe rrío oríllare ñanemboʼe heta mbaʼe ñanemokyreʼỹetereíva. Ñanemanduʼa ningo koʼã yvyramáta káda mes oprodusiha umi frúta hetereíva, ha umi hogue katu ojepuruha pohãrã (Ezeq. 47:12). Koʼã mbaʼe ñanemomanduʼa jaserviha Ñandejára ipojeraitereívape, ha haʼe ñanemongaru ha ñanemonguera jaadora hag̃ua chupe haʼe oipotaháicha. Umi hénte oikóva ko múndope ningo haʼete hasy ha iñembyahýiva nontendéi rupi la Biblia omboʼéva. Jehová puévlo katu ndaupeichaiete. Epensamíntena entéro mbaʼe Jehová omeʼẽvare ñandéve, por ehémplo, ¿mbaʼéichapa nde reñeñandu relee rire peteĩ artíkulo osẽva ñande rrevístape, rehecha rire peteĩ vidéo oĩva ñande sítiope, térã repurahéi rire pe último kántiko ñane asambleahápe? ¡Ajépa javyʼaite ha jaagradesete upévare! Añetehápe Jehová ñanealimenta porãiterei (Is. 65:13, 14). Entéro umi mbaʼe ñantendéva la Bíbliagui ñanepytyvõ ikatu hag̃uáicha Jehová ñandeguerohory ha jaiko porã hendive. Umi konsého oñemeʼẽva ñandéve oñemopyendáva la Bíbliape ñanepytyvõ ani hag̃ua japeka ha ñanderekovai, ñandeplatapota ha ñandejerovia kangy. Ha oĩramo hasykatúva hoʼa rupi peteĩ pekádo ivaívape, Jehová mborayhúpe oipytyvõ upe persónape pe kongregasión rupive (elee Santiago 5:14). ¡Añetehápe ñande jarresivi hetaiterei vendisión, ohechaukaháicha umi yvyramáta ojehecháva Ezequiel visiónpe!

14, 15. a) ¿Mbaʼépa ñaaprende umi estéro ha karugua noñemopotĩri vaʼekuégui? b) ¿Mbaʼe vendisiónpa jahupyty koʼág̃a ñanemomanduʼáva pe rrío Ezequiel ohecha vaʼekuére?

¹⁴ Ñaaprende avei peteĩ mbaʼe umi estéro ha karugua noñemopotĩri vaʼekuégui. Ñande ndajajoguaséi umi hénte hasykatúva oĩvape ko múndope, haʼekuéra ningo ndoipotái Jehová omonguera chupekuéra ni ndorresiviséi umi vendisión oúva chugui (Mat. 13:15). Upéva rangue ñande jaipotaiterei osyry ñande rekovépe pe rrío henyhẽva vendisióngui. ¿Mbaʼe mbaʼépa hína umi vendisión jahupytýva koʼág̃a ñanemomanduʼáva pe rrío Ezequiel ohecha vaʼekuére? Jastudia ha ñantende umi enseñánsa oĩva la Bíbliape, ha ñamombeʼu ótrope koʼã enseñánsa predikasión rupive. Avei jareko umi ansiáno ombokatupyry vaʼekue pe esklávo de konfiánsa, koʼã kuimbaʼe mborayhúpe ñanepytyvõ, ñandegia ha ñanekonsola. Ikatu jaʼe pe rrío añetehápe oporomoingove ha oporomongueraha ohasahárupi.

¹⁵ Péro upe visión orekóta peteĩ kumplimiénto tuichavéva amo gotyove. Jahecháta hína mbaʼéichapa upe rrío tuichaitevéntema ovenefisiáta yvyporakuérape pe paraíso oútavape.

¿Mbaʼéichapa pe visión oñekumplíta pe paraísope?

16, 17. ¿Mbaʼéichapa ñañevenefisiáta paraísope pe rrío henyhẽvagui vendisióngui? Emoĩ algúno ehémplo.

¹⁶ ¿Ikatúpa reñeimahina reikoha pe paraísope ne família ha ne amigokuérandi? Ikatúta reñeimahina porãve upéva jastudia rire mbaʼéichapa Ezequiel visión oñekumplíta pe paraísope. Upearã jahecha jeýta umi mbohapy detálle oĩva pe visiónpe ohechaukáva Jehová mborayhu.

¹⁷ Peteĩ rrío henyhẽva vendisióngui. Umi vendisión jahecha vaʼekue koʼág̃a peve oñeʼẽva pe rrío rehe añetehápe iporãitereíma, péro vyrorei hína upéva ñambojojátarõ umi mbaʼe oguerútavare amo gotyove. Jesús Goviérno de Mil áño aja umi ifiélva tuichaitereive oñevenefisiáta pe rreskátegui, pórke ñanepytyvõta ndahaʼéi ñaime porã hag̃uánte Jehová renondépe, síno ñanepytyvõta avei físikamente. ¡Mbeguekatúpe jahupytýtama perfeksión! Ndaiporimoʼãvéima mbaʼasy, doktór, enferméro, ospitál ni segúro médiko. Pe y oporomoingovéva ovenefisiáta umi ojesalvátavape Armagedónpe. Haʼekuéra hína pe “aty guasu” “osẽva pe jehasa asy guasúgui” (Apoc. 7:9, 14). Upéicharõ jepe, iporãvéramo jepe koʼã vendisión osyry ñepyrũva peteĩ rríoicha, michĩetereíta oñekomparávo umi mbaʼe oikótavare upe rire. Pe rrío ojekuaáva Ezequiel visiónpe oguerúta hetave vendisión.

18. ¿Mbaʼéichapa tuichaitereivétantema pe rrío oporomoingovéva umi mil áño aja?

¹⁸ Y oporomoingovéva. Umi mil áño aja, pe “rrío orekóva y oporomoingovéva” tuichaitereivétantema (Apoc. 22:1). Miles de millones voi umi hénte omano vaʼekue oikove jeýta, ¡ha orekóta oportunida oikove hag̃ua pára siémpre pe paraísope! Péicha Jehová oliveráta umi ‘oĩvape pe yvýpe’, umíva hína ‘umi omano vaʼekue’ (Is. 26:19). Upéva hína peteĩva umi vendisión Jehová oguerútava pe Rréino rupive. ¿Péro oikovétapa pára siémpre enterove umi oñemoingove jeýva?

19. a) ¿Mbaʼépa jasegíta jarresivi pe paraísope? b) ¿Mbaʼépa heʼise oĩtaha umi lugár ‘henyhẽva jukýgui’?

¹⁹ Upéva odependétama káda únore. Pe paraísope jasegíta jarresivi pe y oúva Jehovágui oikuaaukáva pe añetegua. Pe y hína umi mbaʼe pyahu ñaaprendétava Jehovágui ha umi rróllo pyahu ojeavrítava, orekótava umi enseñánsa ha instruksión ipyahúva. ¡Ajépa javyʼaite ñapensávo umi mbaʼére! Upéicharõ jepe, oĩta umi orrechasátava umi vendisión odesidi rupi naiñeʼẽrendumoʼãiha Jehovápe. Ikatu voi oĩ umi oñemborrevéldeva umi mil áño aja, péro chupekuéra noñepermitimoʼãi ombyai pe pyʼaguapy oĩtava pe paraísope (Is. 65:20). Upéva oiko vove, ikatu hína ñanemanduʼa umi estéro ojekuaávare Ezequiel visiónpe, ndoprodusíriva mbaʼeve, ‘opyta rei vaʼekue ha henyhẽva jukýgui’. ¡Ajépa oñembotavyetéta umi ikaprichósogui ndoʼuséiva pe y porãite oporomoingovéva! Umi mil áño rire, peteĩ grúpo oĩháme umi rrevélde omoirũta Satanáspe. Enterove umi orrechasávape Jehová goviérno ihústova ohaʼarõ la mísma kósa: Omanóta opa ára g̃uarã (Apoc. 20:7-12).

20. ¿Mbaʼe vendisiónpa jahupytýta pe paraísope ñanemomanduʼáva umi yvyramáta Ezequiel ohecha vaʼekuére?

²⁰ Yvyramáta hiʼáva ha hogue ojepuru pohãrã. Jehová ningo ndoipotái umi oikóva pe paraísope operde pe oportunida oikovévo pára siémpre. ¿Mbaʼéichapa haʼe ñanepytyvõta ani hag̃ua japerde ko oportunida? Pe paraísope haʼe omeʼẽ jeýta ñandéve peteĩ mbaʼe ojoguátava umi yvyramáta Ezequiel ohecha vaʼekuépe. Ezequiel visiónpe umi yvyramáta okakuaáva pe rrío oríllape hiʼa porã vaʼekue ha umi hogue ojepuru pohãrã. Upéicharõ pe paraísope oĩta umi mbaʼe ñanevenefisiáva físikamente ha ñaime porã hag̃ua Jehovándi. Haʼe rupi rréi ha saserdóte, Jesucristo ha umi 144.000 oipytyvõta umi ifiélvape oñevenefisiapaite hag̃ua pe rreskátegui umi mil áño aja, ha oipytyvõta chupekuéra ohupyty hag̃ua perfeksión (Apoc. 20:6). Upe visión Ezequiel ohecha vaʼekue ningo ojoguaiterei ótra visión iporãitereívape, upe visión oskrivi vaʼekue apóstol Juan (elee Apocalipsis 22:1, 2). Umi yvyramáta rogue Juan ohecha vaʼekue ojepuru ‘oñemonguera hag̃ua umi tetãnguérape’. Jesús ha umi 144.000 oservítava de saserdóte oipytyvõta hetaiterei yvypóra ifiélvape osẽ hag̃ua pekádo ha ñemano poguýgui.

21. a) ¿Mbaʼéichapa reñeñandu rejepyʼamongetávo umi vendisión oguerútavare pe rrío Ezequiel ohecha vaʼekue visiónpe? (Ehecha pe rrekuádro “¡Peteĩ ysyry michĩgui oiko peteĩ rrío!”). b) ¿Mbaʼépa jahecháta pe kapítulo oúvape?

²¹ Jajepyʼamongetáramo pe rrío Ezequiel ohecha vaʼekuére ñane korasõ henyhẽ pyʼaguapy ha esperánsagui. ¡Ajépa ndaijojahái umi mbaʼe porãite ñaneraʼarõva! Epensamína ko mbaʼére: Ojapóma miles de áño Jehová omeʼẽ hague heta profesía ñanepytyvõva ñañeimahina hag̃ua mbaʼéichatapa pe paraíso. Upe aja entéro, haʼe ñaneinvita ñaime hag̃ua upépe ha jahecha mbaʼéichapa oñekumpli umi profesía. Péro nde ikatu reñeporandu hína: “¿Aimétapa che upépe?”. Pe kapítulo oúvape jahecháta mbaʼéichapa umi mbaʼe oĩva oñemohuʼãvo Ezequiel profesiakuéra ñanepytyvõ jajerovia hag̃ua ikatuha jahupyty upéva.

1, 2. a) ¿Mbaʼépa Jehová heʼi Ezequiélpe? b) ¿Mbaʼe porandúpa ñambohováita?

PE VISIÓN Ezequiel angeténte ohecha vaʼekue oiméne omomanduʼa chupe upe oiko vaʼekuére Moisés ha Josué tiémpope, amo 900 áñorupi upe mboyve. Upe tiémpope Jehová omombeʼu Moiséspe moõ pevépa og̃uahẽta pe Tiérra Prometída. Upéi Jehová heʼi Josuépe mbaʼéichapa ojedividi vaʼerã pe yvy umi trívu de Israélpe g̃uarã (Núm. 34:1-15; Jos. 13:7; 22:4, 9). Péro koʼág̃a áño 593-pe a.C., Jehová heʼi Ezequiel ha iñirũnguéra oĩvape prisionéro orreparti hag̃ua pe Tiérra Prometída umi trívu de Israélpe (Ezeq. 45:1; 47:14; 48:29).

² ¿Mbaʼe mensáhepa oreko ko visión Ezequiel ha iñirũnguéra oĩvape g̃uarã prisionéro? ¿Mbaʼérepa upe visión omokyreʼỹ Ñandejára puévlope koʼág̃arupi? ¿Orekótapa upe visión peteĩ kumplimiénto tuichavéva amo gotyove?

Peteĩ visión orekóva 4 garantía

3, 4. a) ¿Mbaʼépa hína umi 4 garantía oĩva pe última visión Ezequiel ohecha vaʼekuépe? b) ¿Mbaʼe garantíapa jahecháta ko kapítulope?

³ Pe última visión Ezequiel ohecha vaʼekue ojagarra 9 kapítulo ilívrogui (Ezeq. 40:1–48:35). Upéva omeʼẽ kuri umi oĩvape prisionéro 4 garantía omokyreʼỹtava chupekuéra ohechaukáva oñemopuʼã jeytaha pe nasión de Israel. ¿Mbaʼépa hína umi garantía? Primero, ojeadora jeytaha Jehovápe itémplope haʼe oipotaháicha. Segundo, umi saserdóte ha pastór ihústova omoakãtaha pe puévlope. Tercero, enterove umi oútava orresivi jeytaha erénsiaramo peteĩ párte pe yvy. Ha cuarto, Jehová oiko jeytaha ijapytepekuéra.

⁴ Ko lívro kapítulo 13 ha 14-pe ñande jastudiáma kuri mokõi garantía: Ojeadora jeytaha Jehovápe haʼe oipotaháicha, ha umi pastór ihústova omoakãtaha Ñandejára puévlope. Ko kapítulope jahecháta pe tercera garantía: Oñepromete oñemeʼẽtaha erénsiaramo pe yvy umi prisionéro ou jeývape hetãme. Ha pe kapítulo oúvape jahecháta pe promésa Jehová oĩ jeytaha ijapytepekuéra (Ezeq. 47:13-21; 48:1-7, 23-29).

“Ko yvy [...] oñemeʼẽ peẽme pene erensiarã”

5, 6. a) ¿Mbaʼépa hína pe yvy ojerreparti vaʼerã según Ezequiel visión? (Ehecha pe taʼanga oĩva iñepyrũme). b) ¿Mbaʼépa ojehupytyse vaʼekue upe visión rupive?

⁵ (Elee Ezequiel 47:14). Pe visiónpe, Jehová heʼi Ezequiélpe peteĩ párte pe yvy ojoguataha “pe hardín de Edénpe” (Ezeq. 36:35). Upéi Jehová heʼi: “Kóva hína pe yvy peẽ pemeʼẽtava iñerensiarã umi 12 trívu de Israélpe” (Ezeq. 47:13). “Pe yvy” oñemeʼẽ jeýtava chupekuéra haʼe vaʼekue Israel território, pe lugár umi prisionerokuéra oho jeytahápe. Upéi, ojeskrivi haguéicha Ezequiel 47:15-21-pe, Jehová omombeʼu en detálle umi frontéra orekótava Israel território kompletoite.

⁶ ¿Mbaʼépa ojehupytyse vaʼekue upe visión rupive? Oñemyesakã rupi en detálle mbaʼéichapa ojerrepartíta pe yvy, oñegarantisa Ezequiel ha iñirũnguérape katuete ojeiko jeytaha pe ijyvy ohayhuetévape hikuái. ¡Epensamíntena mbaʼeichaitépa oiméne omokyreʼỹ umi prisionérope ko garantía oúva Jehovágui ha hesakã porãitereíva! Péro, ¿oñemeʼẽ piko raʼe Ñandejára puévlope pe yvy oñepromete vaʼekue chupekuéra erénsiaramo? Si oñemeʼẽ.

7. a) ¿Mbaʼépa oiko rakaʼe áño 537-pe a.C., ha mbaʼe rehepa ñanemomanduʼa upéva? b) ¿Mbaʼe porandúpa ñambohovái raẽta?

⁷ Áño 537-pe a.C., amo 56 áñorupi Ezequiel orresivi rire upe visión, hetaiterei prisionéro oñepyrũ oho jey iválle Israélpe. Upe oiko vaʼekue yma ñanemomanduʼa upeichaite avei oiko hague Ñandejára puévlore ñane tiémpope. Ikatu jaʼe haʼekuéra orresivi hague avei peteĩ yvy erénsiaramo. ¿Mbaʼéichapa oiko raʼe upéva? Jehová opermiti ipuévlope oike peteĩ yvy espirituálpe ha opyta oiko upépe. Upéicha rupi ikatu ñaaprende heta mbaʼe ojeiko jey haguére yma pe Tiérra Prometídape, upéva ñanemboʼe mbaʼéichapa oñembopyahu jey vaʼekue ñane tiémpope pe yvy espirituál orekóva Ñandejára puévlo. Péro jahecha mboyve koʼã mbaʼe, ñambohovái raẽ ko porandu: “¿Mbaʼérepa ikatu jaʼe pe yvy espirituál añetehápe oexistiha ko tiémpope?”.

8. a) ¿Mbaʼe nasiónpa Jehová omoĩ pe nasión de Israel rekovia? b) ¿Mbaʼépa hína pe yvy térã paraíso espirituál? c) ¿Máva mávapa oĩ pe yvy espirituálpe?

⁸ Ótra visión Ezequiel ohecha vaʼekuépe, Jehová omyesakã umi profesía heʼíva Israel oñemopuʼã jeytaha orekotaha peteĩ kumplimiénto tuichavéva ág̃a ‘isiérvo David’, haʼéva Jesucristo, oñepyrũ vove ogoverna (Ezeq. 37:24). Upéva oiko vaʼekue 1914-pe, upérõ ohasáma heta tiémpo pe nasión de Israel ndahaʼevéima hague Ñandejára puévlo, hekovia ningo oñemoĩ pe Israel espirituál, oĩháme umi unhído (elee Mateo 21:43; 1 Pedro 2:9). Péro Jehová ndahaʼéi omoĩnteva pe nasión de Israel rekovia peteĩ nasión espirituál, síno haʼe omoĩ avei Israel yvy rekovia peteĩ yvy espirituál térã paraíso espirituál (Is. 66:8). Jahecháma haguéicha ko lívrope kapítulo 17-pe, upe yvy térã paraíso espirituál haʼe hína peteĩ situasión térã lugár espirituál oñevendesíva ojeadora hag̃ua Ñandejára teetépe. Upe yvýpe ningo umi unhído oĩva gueteri ko yvy ape ári oadora hína Jehovápe áño 1919 guive. (Ehecha pe rrekuádro 9B, “¿Mbaʼérepa áño 1919?”, oĩva kapítulo 9-pe). Upéi, tiémpo rire, umi ohaʼarõva oiko ko yvy ape ári térã umi “ótro ovechakuéra” oike avei pe yvy espirituálpe (Juan 10:16). Koʼág̃a ñaiméramo jepe pe paraíso espirituálpe oñembotuichavéva ohóvo amás día, Armagedón rire añoitémante jahupytýta kompletoite umi vendisión ikatúva omeʼẽ ñandéve upe paraíso.

Pe yvy ojerreparti la mísma medída

9. Heʼívo mbaʼéichapa ojerreparti vaʼerã pe yvy, ¿mbaʼe mbaʼépa Jehová omombeʼu en detálle?

⁹ (Elee Ezequiel 48:1, 28). Jehová heʼi rire moõitépa oĩta umi frontéra, omombeʼu en detálle mbaʼéichapa ojerreparti vaʼerã pe yvy. Por ehémplo, heʼi oñemeʼẽ vaʼerãha la mísma medída pe yvy umi 12 trívupe. Ojerreparti vaʼerã chupekuéra nórteguio sur gotyo, oñepyrũ vaʼerã Dan trívugui, oĩva nórte gotyo pe puntaitépe, ha opa vaʼerã Gad trívupe, oĩva sur gotyo pe território fronteraitépe. Káda uno umi 12 trívu orresivíta erénsiaramo peteĩ párte pe território, ojepysótava éste guive oéste peve. Oñepyrũta pe frontéra oĩvagui orillaitépe éste gotyo ha ohóta hese oéste gotyo pe Mar Grande, térã pe Mar Mediterráneo peve (Ezeq. 47:20, ehecha pe mápa oĩva pe rrekuádro héravape “Ojerreparti pe yvy”).

10. ¿Mbaʼe garantíapa oiméne omeʼẽ raʼe umi oĩvape prisionéroramo ko párte oĩva pe visiónpe?

¹⁰ ¿Mbaʼe garantíapa oiméne omeʼẽ raʼe umi oĩvape prisionéroramo ko párte oĩva pe visiónpe? Ezequiel omombeʼu rupi en detálle mbaʼéichapa ojerreparti vaʼerã pe yvy, oiméne ogarantisa raʼe umi oĩvape prisionéroramo pe yvy ojerrepartitaha hendaitépe. Avei pe yvy ojerrepartíta rupi la mísma medída umi 12 trívupe, ojeasegura enterove umi oĩvape prisionéroramo káda uno orresivitaha peteĩ erénsia pe yvy oñembopyahu jeýtavape. Enterove orekóta peteĩ yvy térã lugár oiko hag̃ua ha avave ndopytamoʼãi erensiaʼỹre.

11. ¿Mbaʼe mbaʼépa ikatu ñaaprende koʼág̃arupi pe visión omombeʼúvagui mbaʼéichapa ojerreparti vaʼerã pe yvy? (Ehecha pe rrekuádro “Ojerreparti pe yvy”).

¹¹ ¿Mbaʼe mbaʼépa ikatu ñaaprende koʼág̃arupi upe visióngui? Pe Tiérra Prometída ndahaʼéi umi saserdóte, umi levita ha umi kuimbaʼe omoakãvape g̃uarãnte. Enterove umi ótro oĩva umi 12 trívupe orekóta avei peteĩ lugár upépe (Ezeq. 45:4, 5, 7, 8). Upeichaite avei oiko ko tiémpope. Ndahaʼéi umi unhído oĩva gueteri ko yvy ape ári ha umi oporomoakãva oĩva pe ‘aty guasúpe’ añónte la oĩva pe paraíso espirituálpea (Apoc. 7:9). Haʼetéramo jepe michĩetereíva upe jajapóva Jehová organisasiónpe, enterove jareko peteĩ lugár isegúrova ha peteĩ asignasión oñemombaʼetereíva pe yvy espirituálpe. ¡Ajépa iporãite ko garantía oñemeʼẽva ñandéve!

Mokõi diferénsia iñimportánteva, ¿mbaʼépa heʼise ñandéve g̃uarã?

12, 13. ¿Mbaʼe instruksiónpa Jehová omeʼẽ ojerreparti hag̃ua pe yvy?

¹² Oiméne Ezequiel oñesorprendeterei vaʼekue ohechakuaávo idiferenteha umi instruksión Jehová omeʼẽva chupe ojerreparti hag̃ua pe yvy umi omeʼẽ vaʼekuégui Moiséspe. Jahechami umi mokõi diferénsia orekóva. Peteĩva oñeʼẽ vaʼekue pe yvýre ha pe ótro umi hénte oikóvare upépe.

¹³ Pe yvy. Jehová heʼi vaʼekue Moiséspe omeʼẽ hag̃ua hetave yvy umi trívu tuichavévape ha saʼive umi trívu michĩvévape (Núm. 26:52-54). Péro Ezequiel visiónpe, Jehová heʼi oñemeʼẽ hag̃ua enterove trívupe “la mísma kantida” yvy, oñemeʼẽ vaʼerã ‘káda únope oñemeʼẽháicha iñermanokuérape’ (Ezeq. 47:14, nóta). Upéicharõ umi 12 trívu orresivi vove ijyvyrã, káda uno oreko vaʼerã la mísma medída, nórte guive sur peve. Péicha enterove israelita, tahaʼe haʼéva trivugua, orekóta la mísma oportunida ohupyty hag̃ua umi mbaʼe porã oprodusíva pe yvy porãite, pórke pe Tiérra Prometída kompletoite ojerrega porã vaʼekue.

14. ¿Mbaʼépepa idiferénte Jehová heʼíva umi extranhérore upe heʼívagui Moisés léipe?

¹⁴ Umi hénte oikóva upépe. Moisés léi oprotehe vaʼekue umi extranhérope ha opermiti chupekuéra oadora Jehovápe, péro ndaikatúi vaʼekue orresivi imbaʼerã ni peteĩ párte pe yvy (Lev. 19:33, 34). Péro pe Jehová heʼíva koʼág̃a Ezequiélpe umi extranhérore noĩri vaʼekue Moisés léipe. Jehová heʼi chupe: “Pe extranhéro oikóvape pende apytépe peẽ pemeʼẽ vaʼerã iñerensiarã pe trívu território opytahápe oiko”. Péicha Jehová oipeʼa vaʼekue pe diferénsia tuichaite oĩ vaʼekue éntre umi “israelita teete” ha umi extranhéro oikóva ijapytepekuéra (Ezeq. 47:22, 23). Pe visión Ezequiel ohecha vaʼekuépe, umi hénte oikóva pe yvy oñembopyahu jey vaʼekuépe nomboykéi avavépe ha oadora hikuái Jehovápe en unida (Lev. 25:23).

15. ¿Mbaʼépa ñanemboʼe Jehovágui koʼã instruksión heʼíva mbaʼéichapa ojerreparti vaʼerã pe yvy?

¹⁵ Umi mokõi instruksión oñemeʼẽ vaʼekue Ezequiélpe oñeʼẽva pe yvýre ha umi héntere, oiméne omokyreʼỹeterei raʼe umi oĩvape prisionéroramo. Haʼekuéra oikuaa Jehová omeʼẽtaha enterovépe ijyvyrã la mísma medída, tahaʼe umi israelita teetépe térã umi extranhéro oadorávape Jehovápe (Esd. 8:20; Neh. 3:26; 7:6, 25; Is. 56:3, 8). Koʼã instruksión ohechauka avei peteĩ mbaʼe iporãitereíva ha ñanemokyreʼỹva Jehovágui: Haʼe siémpre ovalora enterove isiervokuérape ha omombaʼe chupekuéra peteĩchaite (elee Ageo 2:7). Koʼág̃arupi entéronte ñamombaʼe ñande pyʼaite guive ko mbaʼe, tahaʼe jaikótarõ yvágape térã ko yvy ape ári.

16, 17. a) ¿Mbaʼéichapa ñañevenefisia jastudia haguére en detálle koʼã mbaʼe oñeʼẽva pe yvýre ha umi héntere? b) ¿Mbaʼépa jahecháta pe kapítulo oúvape?

¹⁶ ¿Mbaʼéichapa ñañevenefisia jastudia haguére en detálle koʼã mbaʼe oñeʼẽva pe yvýre ha umi héntere? Ñanemomanduʼa ojekuaa vaʼerãha ñanderehe nañamboykeiha avavépe ha oĩha unida Jehová puévlope ko múndo tuichakuére. Jehová ningo otrata enterovépe peteĩchante. Upévare iporã ñañeporandu: “¿Ahechaukápa atrataha enterovépe peteĩcha Jehová ojapoháicha? ¿Arrespetápa enterove che ermanokuérape oiméramo jepe idiferénte chehegui isituasión, ikultúra térã ipire kolór?” (Rom. 12:10). Ñande javyʼaiterei Jehová omeʼẽ haguére enterovépe la mísma oportunida oĩ hag̃ua pe paraíso espirituálpe, upépe ningo ikatu jaadora ñande pyʼaite guive ñande Ru yvagapeguápe ha jahupyty umi vendisión oúva chugui (Gál. 3:26-29; Apoc. 7:9).

¹⁷ Pe kapítulo oúvape jahecháta pe cuarta garantía oĩva pe visión Ezequiel ohecha vaʼekuépe, oñeʼẽva pe promésa Jehová oĩtaha umi prisionéro ndive. ¿Mbaʼépa ikatu ñaaprende upe promésagui? Upéva jaikuaáta pe ótro kapítulope.

1, 2. a) ¿Maʼerãpa ojeaparta vaʼerã peteĩ párte pe Tiérra Prometídagui? (Ehecha pe divúho oĩva ko lívro tápare). b) ¿Mbaʼe garantíapa omeʼẽ upéva umi oĩvape prisionéro?

PE ÚLTIMA visión Ezequiel ohecha vaʼekuépe ohechakuaa peteĩ párte pe Tiérra Prometídagui ojeapartaha ojejapo hag̃ua peteĩ mbaʼe iñimportánteva. Upe párte noñemeʼẽmoʼãi umi trívupe iñerénsiaramo, síno ojeofrese Jehovápe kontrivusiónramo. Ezequiel ohechakuaa avei oĩha peteĩ siuda ijojahaʼỹva orekóva peteĩ téra iñinteresantetereíva. Ko pártepe pe visión omeʼẽ peteĩ garantía iñimportantetereíva umi oĩvape prisionéro: Jehová oĩtaha hendivekuéra oho jey vove hikuái ijyvy ohayhuetévape.

² Ezequiel omombeʼu ñandéve hetaiterei mbaʼe pe kontrivusióngui. Jahechami ko párte orekóva heta signifikádo ñande jaadorávape g̃uarã Jehovápe.

Pe “kontrivusión sagráda” ha pe “siuda”

3. ¿Mbaʼe mbaʼépa hína umi 5 párte orekóva pe yvy Jehová oaparta vaʼekue, ha maʼerãpa oservi vaʼekue umi párte? (Ehecha pe rrekuádro “Peaparta vaʼerã peteĩ párte pe yvy kontrivusiónramo”).

³ Pe yvy ojeapartávape oĩ peteĩ párte omedíva ipekuévo 12 kilómetro 950 métro, ha ipukukuévo 12 kilómetro 950 métro. Upéicharõ ko yvy pedáso kuadrádo vaʼekue, ha oñehenói “pe yvy sagrádo”. Upe yvy ojedividi 3 hendápe. Pe párte oĩva yvate gotyove haʼe umi levita mbaʼerã, pe oĩva mbytépe katu pe témplo ha umi saserdótepe g̃uarã. Koʼã mokõi párte haʼe vaʼekue pe “kontrivusión sagráda”. Pe párte michĩvéva oĩva iguýpe haʼe vaʼekue pe “párte hembýva”, ha pe yvy “ndahaʼéi sagrádo”. Upéva haʼéta kuri pe siudápe g̃uarã (Ezeq. 48:15, 20).

4. ¿Mbaʼépa ikatu ñaaprende ko párte oñeʼẽvagui pe kontrivusión oñemeʼẽvare Jehovápe?

⁴ ¿Mbaʼépa ikatu ñaaprende ko párte oñeʼẽvagui pe kontrivusión oñemeʼẽvare Jehovápe? Emañamína mbaʼéichapa ojedividi vaʼerã pe yvy: Primero ojeaparta vaʼerã pe yvy ojejapo hag̃ua pe kontrivusión sagráda, ha upéi pe yvy umi trivukuérape g̃uarã. Péicha Jehová ohechauka pe kontrivusión sagráda iñimportanteveha entéro umi ótro yvýgui (Ezeq. 45:1). Upéva katuete omboʼéne raʼe umi oĩvape prisionéro pe adorasión omeʼẽva Jehovápe iñimportanteve vaʼerãha opa mbaʼe ári. Ñane tiémpope upéva nokambiái, umi mbaʼe iñimportantevéva ñamotenondéva ñande rekovépe haʼe hína umi jajapóva Jehová servísiope, umíva hína jastudia la Biblia, jaha rreunionhápe ha jaha japredika. Jasegi jave Jehová ehémplo ñamohenda porãvo ñande rekovépe umi mbaʼe iñimportantevéva, jahechauka káda día pe adorasión ñameʼẽva Jehovápe iñimportanteveha ñandéve g̃uarã entéro mbaʼégui.

“Pe siuda” oĩta pe mbytépe

5, 6. a) ¿Mávapepa opytáta pe siuda? b) ¿Mbaʼe mbaʼépa ndahaʼéi vaʼekue pe siuda, ha mbaʼérepa?

⁵ (Elee Ezequiel 48:15). ¿Mbaʼépa heʼise “pe siuda” ha pe pastoty oĩva ijerére? (Ezeq. 48:16-18). Pe visiónpe Jehová heʼi Ezequiélpe: “Pe siuda [...] opytáta kompletoite Israel rogayguápe” (Ezeq. 45:6, 7). Upéicharõ, pe siuda ha pe pastoty oĩva ijerére noĩri pe “kontrivusión sagráda” ryepýpe ojeapartáva “Jehovápe g̃uarã” (Ezeq. 48:9, 10). Jahechakuaa upéicharõ idiferenteha pe siuda pe kontrivusión sagrádagui, upévare jahechami koʼág̃a mbaʼépa ikatu ñaaprende pe siudágui.

⁶ Jahecha hag̃ua mbaʼépa ikatu ñaaprende upe siudágui, tekotevẽ jaikuaa raẽ mbaʼépa ndahaʼéi vaʼekue pe siuda. Upéva ningo ndahaʼéi pe siuda de Jerusalén oñemopuʼã jey vaʼekue itémplo reheve, ¿mbaʼérepa? Pórke pe siuda Ezequiel ohecháva ndorekói vaʼekue peteĩ témplo. Avei ndahaʼéi ótra siuda oñemopuʼã jey vaʼekue Israélpe, ¿mbaʼérepa? Pórke ndaipóri vaʼekue ni peteĩ siuda upeichagua omopuʼãva umi prisionéro oho jey vaʼekue hetãme térã umi ifamiliare. Ha ndahaʼéi avei peteĩ siuda yvagapegua, ¿mbaʼérepa? Pórke ko siuda oñemopuʼã vaʼekue ‘pe lugár ndahaʼéivape sagrádo’, térã peteĩ lugár ndojepurumoʼãivape ojeadora hag̃ua Ñandejárape (Ezeq. 42:20).

7. ¿Mbaʼépa hína pe siuda Ezequiel ohecha vaʼekue, ha mbaʼépa amalisia orrepresenta upéva? (Ehecha pe taʼanga oĩva iñepyrũme).

⁷ ¿Mbaʼépa upéicharõ pe siuda Ezequiel ohecha vaʼekue? Ñanemanduʼa vaʼerã haʼe ohecha hague ko siuda pe visión ohecha haguépe avei pe yvy (Ezeq. 40:2; 45:1, 6). La Biblia oñeʼẽvo pe yvy rehe oñeʼẽ hína peteĩ yvy espirituál rehe, upéicharõ oñeñeʼẽvo pe siuda rehe oñeñeʼẽ hína peteĩ siuda espirituál rehe. ¿Mbaʼépa ontendeka ñandéve oipurúvo pe palávra “siuda”? Upe palávra heʼise oĩha peteĩ hénte aty oikóva oñondive peteĩ lugárpe ha oĩva organisádo. Upéicharõ pe siuda oñeorganisa porãva ha kuadradoitéva ohecha vaʼekue Ezequiel, amalisia orrepresenta peteĩ goviérno oñeorganisa porãva.

8. ¿Moõpa ogoverna térã ogia hína ko siuda, ha mbaʼérepa jaʼekuaa upéva?

⁸ ¿Moõpa ogoverna térã ogia hína ko siuda? Pe visión ohecha vaʼekue Ezequiel ohechauka pe siuda oĩha pe yvy espirituál ryepýpe. Upéicharõ, ñane tiémpope ko goviérno térã siuda oĩ pe paraíso espirituál ryepýpe ha ogia hína umi mbaʼe ojapóva Ñandejára puévlo. ¿Ha mbaʼépa heʼise upe siuda oĩha peteĩ lugár ndahaʼéivape sagrádo? Upéva ñanemomanduʼa pe siuda haʼeha peteĩ goviérno yvy ape arigua, ndahaʼeiha yvagapegua. Upe goviérno ombaʼapo hína oikóvo ovenefisia hag̃ua enterove umi oikóvape pe paraíso espirituálpe.

9. a) ¿Máva mávapa oĩ ñane tiémpope pe goviérno oĩvape ko yvy ape ári? b) ¿Mbaʼépa ojapóta Jesús umi mil áño aja?

⁹ ¿Máva mávapa oĩ pe goviérno oĩvape ko yvy ape ári? Ezequiel visiónpe pe oñenkargáva pe siuda goviérnore oñehenói ‘pe kuimbaʼe oporomoakãva’ (Ezeq. 45:7). Haʼe ningo omoakã vaʼekue pe puévlope, péro ndahaʼéi saserdóte ni levita. Ko kuimbaʼe oporomoakãva ñanemomanduʼa umi ansianokuérare ndahaʼéiva unhído ha oĩva umi kongregasiónpe. Koʼã pastór iñumíldeva ningo mborayhúpe oñangareko pe kongregasiónre. Haʼekuéra oĩ hína umi “ótro ovechakuéra” apytépe ha oĩ Cristo goviérno yvagapegua poguýpe (Juan 10:16). Umi mil áño aja Jesús oiporavóta ha onombráta “ko yvy ape ári” umi “prínsipe”, térã umi ansiáno ikatupyrývape (Sal. 45:16). Haʼekuéra osegíta pe gía omeʼẽtava chupekuéra pe Rréino yvagapegua, ha oñangarekóta Ñandejára puévlore umi mil áño aja.

“Jehová voi oĩ upépe”

10. ¿Mbaʼéichapa héra pe siuda, ha mbaʼe garantíapa omeʼẽ upéva?

¹⁰ (Elee Ezequiel 48:35). Pe siuda héra “Jehová voi oĩ upépe”. Upe téra haʼe peteĩ garantía upe siudápe oñeñandutaha Jehová presénsia. Ohechaukávo Ezequiélpe upe siuda oĩha pe yvy mbytépe, Jehová haʼete ku heʼíva umi oĩvape prisionéroramo: “¡Che aime jeýta penendive!”. ¡Ajépa iporãite upe garantía!

11. ¿Mbaʼe mbaʼépa ikatu ñaaprende pe siuda réragui?

¹¹ ¿Mbaʼépa ikatu ñaaprende ko párte oĩvagui Ezequiel profesíape? Pe siuda réra ogarantisa ñandéve Jehová oĩha isiervokuéra ifiélva apytépe, ha siémpre oĩtaha hendivekuéra. Upe téra ñanemboʼe avei peteĩ mbaʼe iñimportantetereíva: Pe siuda oexisti, ndahaʼéi omeʼẽ hag̃ua podér peteĩ yvypórape, síno oñekumpli hag̃ua umi instruksión ihústova Jehová omeʼẽva mborayhúpe. Por ehémplo, Jehová nomeʼẽi upe goviérnope autorida odividi hag̃ua pe yvy chupekuéra ogustaháichante, síno ojejapo vaʼerã Jehová oipotaháicha. Haʼe oipota umi oñenkargáva pe goviérnore orrespeta mbaʼéichapa haʼe odividi pe yvy, térã umi priviléhio haʼe voi omeʼẽva isiervokuérape, umíva apytépe umi persóna haʼetévape naiñimportanteguasúiva (Ezeq. 46:18; 48:29).

12. a) ¿Mbaʼépa hína ótra kósa ijojahaʼỹva orekóva pe siuda, ha mbaʼépa ohechauka upéva? b) ¿Mbaʼépa omomanduʼa upéva umi ansianokuérape?

¹² ¿Mbaʼépa hína ótra kósa ijojahaʼỹva orekóva pe siuda hérava “Jehová voi oĩ upépe”? Umi siuda yma guare oreko vaʼekue murálla ojeprotehe hag̃ua umi héntepe, ha mbovymínte hokẽ ojeike hag̃ua pe siudápe. ¡Péro ko siuda oreko voi 12 okẽ! (Ezeq. 48:30-34). Ko siuda kuadrádova ningo oreko heta okẽ (oreko voi 3 káda ládo), ha upéva ohechauka ndahasyieteha Ñandejára siervokuérape oñemboja hag̃ua umi oñenkargávare ko siudáre, ha ifasiletereiha oñeñeʼẽ hendivekuéra. Avei ko siuda oreko rupi 12 okẽ, ojekuaa porã oĩha aviérto “kompletoite Israel rogayguápe” g̃uarã (Ezeq. 45:6). Upéva omomanduʼa peteĩ mbaʼe iñimportantetereíva umi ansianokuérape: Jehová oipota enterove ansiáno oĩ disponívle enterove oĩvape g̃uarã pe paraíso espirituálpe, ha ifásil vaʼerã oñeñeʼẽ hendivekuéra.

Ñandejára puévlo ou “oadora hag̃ua” ha ‘ombaʼapo pe siudápe’

13. Jehová omombeʼu umi hénte ombaʼapoha diferénte mbaʼépe, ¿mbaʼe mbaʼépa hína umi tembiapo ojapóva hikuái?

¹³ Jahami jeýna Ezequiel tiémpope ha jahechavemi pe visión ipukuetéva ohechaukáva mbaʼéichapa ojerreparti pe yvy. Jehová omombeʼu oĩha umi hénte ombaʼapóva diferénte mbaʼépe. Umi saserdóte “ombaʼapóva pe témplope” oofrese umi sakrifísio ha oñemoag̃ui Jehová renondépe oservi hag̃ua chupe. Umi levita “ombaʼapóva pe témplope” oñenkarga “umi traváho upepeguáre ha entéro mbaʼe ojejapo vaʼerãre upépe” (Ezeq. 44:14-16; 45:4, 5). Avei oĩ heta ombaʼapóva pe siuda ypýpe. ¿Mávapa hína umi ombaʼapóva?

14. ¿Mbaʼe rehepa ñanemomanduʼa umi ombaʼapóva pe siuda ypýpe?

¹⁴ Umi ombaʼapóva pe siuda ypýpe ou kompletoite “umi trívu de Israélgui”. Haʼekuéra ou oporopytyvõ hag̃ua. Itravahokuéra ningo oñemitỹ “umi mbaʼe oprodusíva pe yvy” ha umíva oservíta aliméntoramo ‘umi hénte ombaʼapóvape pe siudápe’ (Ezeq. 48:18, 19). ¿Mbaʼe rehepa ñanemomanduʼa upéva? Ñane tiémpope, kompletoite umi oĩva pe paraíso espirituálpe oreko oportunida oipytyvõ hag̃ua koʼã mokõi grúpope: Cristo ermanokuéra unhídope, ha umi Jehová onombra vaʼekuépe oporomoakã hag̃ua oĩva pe ‘aty guasúpe’ (Apoc. 7:9, 10). Prinsipálmente ñaipytyvõ chupekuéra jaapojávo kyreʼỹme umi instruksión oúva pe esklávo de konfiánsagui.

15, 16. a) ¿Mbaʼépa ñanemboʼe pe ótro detálle orekóva Ezequiel visión? b) ¿Mbaʼeichagua tembiapópa jareko oportunida jajapo hag̃ua?

¹⁵ Ezequiel visión oreko avei ótro detálle iñinteresánteva ñanemboʼéva peteĩ mbaʼe pe servísio ñameʼẽvagui Jehovápe. ¿Mbaʼépa hína upéva? Jehová heʼi umi 12 trívu ndahaʼéiva levita ombaʼapotaha mokõi lugárpe: Pe témplo korapýpe ha umi pastoty oĩvape pe siuda jerére. ¿Mbaʼépa hína pe tembiapo ojapóva hikuái káda lugárpe? Pe témplo korapýpe enterove umi trívu oike “oadora hag̃ua” Jehovápe ha oofrese hag̃ua umi sakrifísio (Ezeq. 46:9, 24). Pe pastoty oĩvape pe siuda jerére oĩ umi hénte entéro trivugua oapojáva pe siuda oñemitỹvo pe yvýpe. ¿Mbaʼépa ikatu ñaaprende pe ehémplo omoĩvagui umi ombaʼapóva upépe?

¹⁶ Koʼág̃arupi umi oĩva pe aty guasúpe oreko oportunida ojapo hag̃ua umi tembiapo ojoguáva umi ojekuaa vaʼekuépe Ezequiel visiónpe. Haʼekuéra ningo oadora Jehovápe “itémplope”, oofresévo umi sakrifísio ombotuicháva chupe (Heb. 13:15; Apoc. 7:9-15). Ojapo hikuái upéva opredikávo ha ohechaukávo ijerovia okomenta ha opurahéivo rreunionhápe. Haʼekuéra omombaʼeterei péicha oadora haguére Jehovápe, ha chupekuéra g̃uarã upéva haʼe pe rresponsavilida iñimportantevéva orekóva hikuái (1 Crón. 16:29). Avei Ñandejára puévlope oĩ heta ikatúva oapoja heta hendáicha Jehová organisasión. Por ehémplo, haʼekuéra oipytyvõ oñemopuʼã ha oñemantene hag̃ua umi Salón del Reino ha umi sukursál, ha oipytyvõ avei hikuái hetave aktivida omoñepyrũvape Jehová organisasión. Oĩ avei umi oapojáva koʼã traváho omeʼẽvo ikontrivusión. Ojapóvo péicha haʼekuéra haʼete ku oñemitỹva pe yvýpe ‘oñembotuicha hag̃ua Ñandejárape’ (1 Cor. 10:31). Haʼekuéra ojapo entéro koʼã mbaʼe kyreʼỹme ha vyʼápe, pórke oikuaa ‘koʼã mbaʼe haʼeha peteĩ ofrénda Ñandejárape g̃uarã ha ombovyʼaitereiha chupe’ (Heb. 13:16). ¿Ndépa reñehaʼãmbaite avei repartisipa koʼãichagua tembiapópe?

“Ñande ñahaʼarõ hína umi yvága pyahu ha peteĩ yvy pyahu”

17. a) ¿Mbaʼe kumplimiénto tuichavévapa orekóta amo gotyove Ezequiel visión? b) Umi mil áño aja, ¿máva mávapa oñevenefisiáta umi mbaʼe ojapótavagui pe goviérno ko yvýpe?

¹⁷ ¿Oime piko amo gotyove jahecháta orekoha peteĩ kumplimiénto tuichavéva Ezequiel visión oñeʼẽva pe kontrivusión rehe? ¡Katuete jahecháta! Ñapensamíntena ko mbaʼére: Ezequiel ningo ohecha vaʼekue pe yvy oñehenóiva “pe kontrivusión sagráda”, oĩháme “Jehová témplo”, oĩha pe território mbytépe (Ezeq. 48:10). Upéva oasegura ñandéve ág̃a Armagedón rire, tajaiko jaikohápe ko yvy ape ári, Jehová oĩtaha ñanendive (Apoc. 21:3). Umi mil áño aja, pe siuda haʼéva pe goviérno, térã umi oñenombrátava ko yvy ape ári oñangareko hag̃ua Ñandejára puévlore, oñangarekótama ko yvy kompletoitére. Haʼekuéra ojapóta upéva ogiávo ha odirihívo pe “yvy pyahu”, umíva hína umi hénte Ñandejára oguerohorýva oikótava ko yvy ape ári (2 Ped. 3:13).

18. a) ¿Mbaʼérepa ikatu jaʼe pe siuda, haʼéva pe goviérno oĩtava ko yvýpe, ombaʼapotaha en unida Ñandejára goviérno ndive? b) ¿Mbaʼe garantíapa omeʼẽ ñandéve pe siuda réra?

¹⁸ ¿Mbaʼérepa ikatu jaʼe pe siuda, haʼéva pe goviérno oĩtava ko yvýpe, osegitaha ombaʼapo en unida Ñandejára goviérno ndive? La Biblia ohechauka pe siuda Ezequiel ohecha vaʼekue visiónpe orekoha 12 okẽ. Upéicha avei oreko 12 okẽ pe Jerusalén Pyahu, pe siuda oĩva yvágape oĩháme Cristo ha umi 144.000 ogovernátava hendive (Apoc. 21:2, 12, 21-27). Upéva ohechauka pe goviérno oĩtava ko yvýpe ojapotaha entéro mbaʼe odesidíva ojapo Ñandejára Rréino yvagapegua, ha okumplipaitetaha umíva. Pe siuda réra ningo “Jehová voi oĩ upépe”, ha upéva haʼe peteĩ garantía ñandéve g̃uarã ojeadorataha Jehovápe haʼe oipotaháicha pára siémpre pe paraísope. ¡Ajépa iporãite umi mbaʼe ñaneraʼarõva amo gotyove!