¿Mbaʼéichapa umi rrelihión japu oheja vai Ñandejárape?

Oiméramo Ñandejára ñanderayhu, ¿mbaʼérepa upéicharõ heta rrelihión heʼíva oadoraha chupe ojapo hetaite mbaʼe vai? Jaʼe porãsérõ g̃uarã, umíva haʼe rrelihión japu ha oheja vai Ñandejárape. ¿Mbaʼéichapa ojapo hikuái upéva? ¿Mbaʼéichapa Ñandejára oñeñandu upe haguére? ¿Ha mbaʼépa ojapóta anivéma hag̃ua ojeheja vai chupe?

1. ¿Mbaʼéichapa oheja vai Ñandejárape umi mbaʼe omboʼéva hikuái?

Umi rrelihión fálsa “oelehi oguerovia umi japu, oguerovia rangue pe añetegua oúva Ñandejáragui” (Romanos 1:25). Por ehémplo heta rrelihión nomboʼéi la héntepe Ñandejára réra, péro la Biblia heʼi porã jaipuru vaʼerãha upéva (Romanos 10:13, 14). Oiko jave peteĩ desgrásia katu umi líder rrelihióso heʼi haʼe hague Ñandejára volunta, péro upévango ndahaʼéi siérto. La Biblia heʼi porã Ñandejára ndoprovaiha avavépe mbaʼe vaípe (elee Santiago 1:13). Lastimósamente umi rrelihión péicha ijapu rupi amás día la hénte oñemomombyryve Ñandejáragui.

2. ¿Mbaʼéichapa oheja vai Ñandejárape umi mbaʼe ojapóva hikuái?

Umi rrelihión japu ndotratái la héntepe Jehová oipotaháicha. Apocalipsis 18:5 heʼi voi hesekuéra: “Ipekadokuéra hetaiterei ha ohupytýma voi yvága”. Hetaiterei áñorema umi rrelihión oñentremete polítikape ha oapoja umi gérra. Avei ikausarekuéra hetaiterei héntema omano, térã haʼekuéra voi oporojuka. Oĩ avei líder rrelihióso irrikoséva, upévare oexihi oñemeʼẽ hag̃ua chupekuéra pláta. Opa koʼã mbaʼe ohechauka haʼekuéra ndoadoraiha Ñandejárape ha ndorekoiha derécho orrepresentávo chupe (elee 1 Juan 4:8).

3. ¿Mbaʼéichapa Ñandejára oñeñandu ohechávo umi rrelihión japu?

Oiméramo ndéve nemorrenega umi mbaʼe ojapóva umi rrelihión fálsa, eñeimahinamína mbaʼeichaitépa oiméne oñeñandu Jehová. Haʼe ningo ohayhueterei la héntepe ha orrenegaiterei ohecha jave mbaʼéichapa umi líder rrelihióso oheja vai chupe ha omaltrata la héntepe. Upévare opromete oñehunditaha pe rrelihión japu ha heʼi ‘núnka ndojetopamoʼãveimaha’ (Apocalipsis 18:21). Koʼẽrõite Ñandejára voi ohundietéta umi rrelihión fálsape (Apocalipsis 18:8).

EJEPYʼAMONGETAMÍNA

4. Ñandejára ndoguerohorýi opaichagua rrelihión

Heta hénte oguerovia tahaʼe haʼéva rrelihión ñanemoag̃uiha Ñandejárare, péro ¿siértopa upéva? Elee Mateo 7:13, 14, ha upéi erresponde ko porandu:

• ¿Mbaʼépa heʼi la Biblia ‘pe tape oporoguerahávare jeikove opaveʼỹvape’?

Ehecha pe VIDÉO, ha upéi erresponde ko porandu:

VIDÉO: ¿Oguerohorýpa Ñandejára entéro rrelihión? (Vidéo mbykyvéva) (3:22)

• ¿Heʼípa la Biblia Ñandejára oguerohoryha opaichagua rrelihión?

5. Ñandejára ñanderayhu, péro pe rrelihión fálsa ndohechaukái upéva

Umi rrelihión japu oheja vai Ñandejárape heta hendáicha. Por ehémplo, peteĩ mbaʼe ivaietereíva ojapóva hikuái haʼe oapoja umi gérra, upéva ojehechauka porã ko vidéope. Ehecha pe vidéo, ha upéi erresponde koʼã porandu:

VIDÉO: Umi rrelihión oapojáva pe segunda gérra mundiál (2:22)

• ¿Mbaʼéichapa heta rrelihión oapoja pe segunda gérra mundiál?

• ¿Mbaʼéichapa nde reñeñandu rehechávo upéva?

Elee Juan 13:34, 35 ha 17:16, upéi erresponde koʼã porandu:

• ¿Mbaʼéichapa nde ere oñeñanduha Jehová ohechávo umi rrelihión oapojaha umi gérra?

• Umi rrelihión fálsa ojapo hetaiterei mbaʼe vai ha ohechauka ndoporohayhuiha, ¿mbaʼe mbaʼépa nde rehechakuaa ojapo vaiha hikuái?

6. Ñandejára oipota umi hénte oheja pe rrelihión japu

Elee Apocalipsis 18:4,a ha upéi erresponde ko porandu:

• Umi rrelihión japu ombotavýma hetaiterei héntepe péro Ñandejára oipytyvõseterei chupekuéra, ¿mbaʼéichapa nde reñeñandu reikuaávo upéva?

7. Esegi eaprendeve pe Dios verdadérogui

Umi mbaʼe heʼi ha ojapóva pe rrelihión japu omomombyry jepi la héntepe Ñandejáragui, péro ¿iporãtapa nde rehejáramo upéva ndeafekta avei? Eñeimahinamína peteĩ mitãrusu ndojaposeiha itúa heʼíva, upévare oheja hóga ha oho oiko iñakãre. Péro pe karaípe ndogustaiete itaʼýra ojapóva, ¿mbaʼérepa ikatu jaʼe pe túa ndorekoiha la kúlpa umi mbaʼe vai itaʼýra ojapóvare?

• ¿Iporãtapa upéicharõ jakulpáramo Ñandejárape umi mbaʼe vai ojapóvare pe rrelihión fálsa ha upéva káusare ndajaservisevéi chupe?

RRESÚMEN

Umi rrelihión japu oheja vai Ñandejárape umi mbaʼe heʼíva ha ojapóva rupive, péro Ñandejára koʼẽrõitéma ohundietéta umi rrelihión japúpe.

Rrepáso

• ¿Mbaʼéichapa reñeñandu reikuaávo umi mbaʼe omboʼe ha ojapóva umi rrelihión fálsa?

• ¿Mbaʼépa Jehová opensa umi rrelihión japúre?

• ¿Mbaʼépa Ñandejára ojapóta umi rrelihión fálsare?

EINVESTIGA HAG̃UA

Ehecha mokõi mbaʼe umi rrelihión ojapóva jepi ha ndogustaietéva Ñandejárape.

“¿Oguerohorýpa Ñandejára entéro rrelihión?” (Artíkulo oĩva jw-pe)

¿Mbaʼérepa Jehová oipota ñañembyaty jaadora hag̃ua chupe?

“¿Tekotevẽ piko katuete ñaime peteĩ rrelihiónpe?” (Artíkulo oĩva jw-pe)

Peteĩ paʼípe nokonvenséi umi mbaʼe oñemboʼéva irrelihiónpe, péro upéva ndojokói chupe oaprendeve hag̃ua Ñandejáragui.

“Peteĩ paʼi okambia irrelihión” (¡Despertad! Febrero de 2015)

Ymaiterei guivéma heta rrelihión ontendeka Ñandejára ipyʼahatãha ha nañanderayhuiha, péro ehechamína mbaʼépa omboʼe la Biblia.

“¿Ikatúnepa ñañemoag̃ui Ñandejárare?” (Ñemañaha 1 de noviembre de 2013)