39 ESTER
“Oiméramo amanóta, tove tamano upéicharõ”
PETEĨ kuñataĩ oguata ohóvo pe palásio gotyo, ha oikuaa porã ikatuha ojejuka oñepresentáramo pe rréi renondépe oñehenoikaʼỹre chupe. Haʼe okyhyjeterei, péro lomímonte oho. ¿Mávapa raʼe ko kuñataĩ ha maʼerã oho pe rréi rendápe?
Ko kuñataĩ héra Ester. Ituakuéra ningo omano vaʼekue haʼe imitãkuñaʼípe, upémarõ iprímo Mardoqueo “oadopta chupe itajyrarã” ha okuida hese. Haʼekuéra oiko vaʼekue Súsape, peteĩ siuda iñimportánteva oĩva Persia poguýpe. Upe siudápe oiko vaʼekue avei pe rréi, ha Mardoqueo ombaʼapo vaʼekue chupe g̃uarã. Ester okakuaapa rire “imólde porãiterei vaʼekue ha iporãiterei voi”.
Peteĩ día rréi Asuero, posívlemente oñehenóiva avei Jerjes Primero, odesidi omenda jeytaha. Haʼe ojerure isiervokuérape oho hag̃ua ogueru chupe umi kuñataĩ iporãvéva oĩva Persia territóriope. Koʼã kuimbaʼe osẽ oho oheka hag̃ua umi kuñataĩ. Upépe otopa hikuái Ester rehe ha ohechakuaa haʼe iporãitereiha. Ojegueraha mboyve Estérpe, Mardoqueo heʼi chupe ‘ani hag̃ua omombeʼu avavépe’ haʼe judiaha.
Pe palásiope, “entéro ohechávante Estérpe oguerohory chupe”. Doce mésere Ester osegi kuri umi tratamiénto oñemoporãve hag̃ua, ha upéi ojegueraha chupe pe rréi renondépe. Haʼe “oguerohoryeterei Estérpe ha omombaʼetereive chupe oimeraẽ ótro kuñataĩ vírhengui”. Péicha Asuero, pe rréi ipoderosovéva oĩ vaʼekue upe tiémpope, oelehi chupe irreinarã. Upéicharõ jepe, Ester osegi iñeʼẽrendu Mardoquéope ha nomombeʼúi avavépe haʼe judiaha.
Upe tiémpope avei, rréi Asuero omeʼẽ Hamánpe peteĩ puésto iñimportantetereíva, ha pe rréi añoite omandave vaʼekue chugui. Hamán ndochaʼéi vaʼekue Mardoquéore pórke haʼe noñakãityséi henondépe. Mardoqueo ndojaposéi vaʼekue upéva pórke haʼe ifiél Jehovápe. Ha Hamán katu posívlemente ou vaʼekue voi peteĩ puévlo haʼévagui Jehová enemígo. Tahaʼe haʼeháicha, upéva omorrenegaiterei kuri Hamánpe. Upévare okalkula voi mbaʼéichapa ikatu ojuka entéro judío oĩvape Persia territóriope. Mardoqueo oikuaárõ guare upéva opyta ojepyʼapyeterei, ha omondo voi peteĩ mensahéro Ester rendápe. Haʼe ojerure Estérpe oñeʼẽ hag̃ua pe rréipe ikatu hag̃uáicha ojoko la Hamán ojaposéva. Péro upe ojeruréva Mardoqueo ijetuʼuetereíta kuri chupe ojapo hag̃ua.
Ester heʼi Mardoquéope ikatuha ojejuka chupe oñepresentáramo pe rréi renondépe oñehenoikaʼỹre chupe. Hiʼarive pe rréi ijarheleterei vaʼekue. Péro Mardoqueo heʼi chupe ikatuha voi oime oiko raʼe chugui rréina oprotehe hag̃ua Jehová puévlope ko situasiónpe. Upéva ombopyʼaguasu Estérpe ha osẽ heʼi: “Oiméramo amanóta, tove tamano upéicharõ”. Péro oho mboyve, Ester ojerure entéro umi judíope oajuna hag̃ua 3 díare. Katuete upérõ guare heta oñemboʼéne raʼe hese hikuái, ha Ester voínte avei heta oñemboʼéne raʼe. Upe rire Ester oho pe rréi rendápe.
Rréi Asuero ohechárõ guare Estérpe pe palásio korapýpe, ndaipochýi ha ohenói chupe oike hag̃ua hendápe. ¡Ojesalvami Ester! Péro ndahaʼéi upévante, pe rréi heʼi voi Estérpe ikatuha ojerure oipotáva guive. Upépe Ester heʼi chupe ojaposeha peteĩ karu guasu chupe ha Hamánpe g̃uarã. Upe karu guasuhápe Ester ikatúma kuri omombeʼu la oikóva, péro ohechakuaa iporãvetaha ohaʼarõmievénte. Upéi Ester oinvita jeýnte pe rréipe ha Hamánpe ou hag̃ua ótro karu guasuhápe al día sigiénte. Upe aja Hamán osegi kuri okalkula mbaʼéichapa ojukáta Mardoquéope. Ojapoka voi peteĩ yvyra puku omosaingo hag̃ua chupe, péro haʼe ndoikuaaiete kuri upéva chupe voi operhudikataha.
Ester oñeʼẽ vaʼerã peteĩ rréi ipoderosoitereívape ani hag̃ua Jehová siervokuéra ojejukapa
Al día sigiénte pe karu guasuhápe, Asuero oporandu jey Estérpe mbaʼépa oipota. Upépe Ester oaprovecha ha omombeʼupaite chupe la oikóva hína. Haʼe omombeʼu pe rréipe oĩha peteĩ kuimbaʼe oplaneáva ohundipa hag̃ua ipuévlope ha chupe avei. Haʼe heʼi ikatúnte hague okirirĩ, péro upe oikótava operhudikáta hague pe rréipe avei. Pe rréi oñesorprendeterei ohendúvo upéva ha oporandu chupe mávapa la mbaʼe vai apoha. Ester osẽ heʼi chupe: “Ore enemígo haʼe hína Hamán”. Upépe pe rréi ipochyeterei ha omanda ojejuka hag̃ua Hamánpe. ¡Aváiko oimoʼãta! Pe yvyra Hamán ojapoka vaʼekue oñemosaingo hag̃ua Mardoquéope, ipahápe ojepurúta oñemosaingo hag̃ua chupe voi.
Hamán ojukase kuri Mardoquéope ha enterove Jehová siérvo oĩvape Persia territóriope. Péro amo ipahápe Hamán la oñehundíva, ha hetave ótro Jehová enemigokuéra. Péicha Jehová ojevale peteĩ kuñataĩ ipyʼaguasu ha ojeroviávare osalva hag̃ua ipuévlope ojapoháicha jepi voi.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Ester ipyʼaguasu hague?
Einvestigamína
1. ¿Mbaʼe pruévapa jareko ohechaukáva umi mbaʼe oñemombeʼúva ko rrelátope siertoha? (ia 160, rrekuádro). A
Ungnad, Arthur. “Neubabylonische Privaturkunden aus der Sammlung Amherst.” Archiv für Orientforschung, vol. 19, 1959, pp. 74–82
Taʼanga A: Koʼápe umi persa oñeʼẽ vaʼekue Marduka rehe (Mardoqueo)
2. ¿Mbaʼérepa oiméne Mardoqueo noñesũi ni noñakãitýi raʼe Hamán renondépe? (ia 151 párr. 18).
3. ¿Mbaʼérepa jaʼekuaa Satanás ha idemoniokuéra voi ohundipase hague umi judiokuérape upérõ guare? (g02 9/8 7, 8-wcgr). B
Cube. Lot of Yahali, puru. Neo-Assyrian Clay. (YPM BC 021122). Courtesy of the Peabody Museum, Division of Anthropology, Babylonian Collection, Yale University; peabody.yale.edu
Taʼanga B: Peteĩ dádo yma guare ojepurúva ojeity hag̃ua suérte
4. ¿Mbaʼe profesíapa oñekumpli raʼe Ester ha Mardoquéore? (ia 164, rrekuádro).
Ejepyʼamongetamína ndejehe
Ester osegi vaʼekue iñarandu ha iñeʼẽrendu noĩriramo jepe Jehová siervokuérandi, ¿mbaʼépa umi imitãva ikatu oaprende chugui?
Asuero ohendu vaʼekue hembirekópe pórke haʼe ohechauka orrespetaha chupe, ipasiénsia ha isinséra. ¿Mbaʼéichapa ermanakuéra ikatu osegi Ester ehémplo? C
Taʼanga C
¿Mbaʼéicha javépa ikatu avei rehechauka ndepyʼaguasuha Ester ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Estérpe Jehová omoingove jey vove chupe?
Reikuaave hag̃ua
¿Mbaʼépa mitãnguéra oaprendekuaa Estérgui? Ehechamína upéva ko vidéo musikálpe.
¿Mbaʼéichapa ermanokuéra osegi Ester ehémplo oĩ jave opersegíva chupekuéra?
Ñahaʼangákena umi orresivi vaʼekuépe umi promésa ipasiénsia rupi: Mardoqueo ha Ester (3:05).