50 SAULO DE TARSO
Ótra personaite oiko chugui
PRIMERORÃ Saulo de Tarso ni michĩmi nombyasýi Estébanpe. Haʼe ni ndahesapirĩri voi oapoja hag̃ua umi ojuka vaʼekuépe chupe. Tiémpo rire katu iñañavéntema voi ohóvo.a Haʼe ifanatikoiterei la irrelihiónre, upéicha rupi ipochyeterei Jesús disipulokuérandi ha “oamenasa ojukapataha voi chupekuéra” Jerusalénpe. Amo ipahápe, tyryryhápe ogueraha umi kuimbaʼe ha kuña inoséntepe kárselpe. Ha ojegueraha jave chupekuéra umi trivunálpe, haʼe katuete osẽ ikontrapekuéra ojejuka hag̃ua chupekuéra. Péicha oñepyrũ opersegi entéro umi kristiáno oĩvape Jerusalénpe, ha amo ipahápe oĩ hetaiterei tekotevẽ vaʼekue ohómante upe siudágui. Upéicharõ jepe, Saulo noñekontentái kuri. Upévare ojerure pe súmo saserdótepe tomeʼẽ chupe permíso oho hag̃ua Damáscope avei opersegi umi kristiánope.
Oreko rire la permíso, Saulo ha isosiokuéra osẽ oho nórte gotyo, Damáscope. Haʼe ni noñeimahinái kuri Jesús oñemoingove jeymaha ha oĩmaha Itúandi yvágape. Péro Jehová ha Jesús oikuaa porãiterei kuri Sáulope. Ñanesorprendéramo jepe, haʼekuéra ohechakuaa kuri Saulo ikatutaha ojapo heta mbaʼe iporãva. Upévare Saulo ha isosiokuéra og̃uahẽ mbotaitérõ guare Damáscope, ohesape hesekuéra peteĩ lus “omimbivéva kuarahýgui”. Upépe Saulo hoʼaite voi yvýpe ha opyta siégo.
Upépe Saulo ohendu peteĩ oñeʼẽva chupe ha heʼíva: “Saulo, Saulo, ¿mbaʼére piko chepersegi hína?”. Upe oñeʼẽva Sáulope heʼi chupe haʼénte oñelastimaha hína pórke ojogua peteĩ guéi opyvoívape pikánare. Saulo oporandu chupe: “¿Máva piko nde che Ruvicha?”. Ha haʼe heʼi Sáulope: “Che hína Jesús, upe nde repersegíva hína reikóvo”. ¡Mbaʼeichaitépa oiméne oñemondýi raʼe Saulo ohendúvo upéva! Péro Jesús omanda chupe opuʼã hag̃ua ha oexplika chupe mbaʼépa oipota ojapo. Chugui oiko vaʼerã peteĩ disípulo, ha oexplika vaʼerã la héntepe Jesús haʼeha pe Mesías. Upe guive Saulo oñeʼẽ vaʼerã kuri la héntepe Jesúsre ha Ñandejára Rréinore.
Opersegihágui hína umi kristiánope, oñepyrũ oipytyvõ la héntepe oiko hag̃ua chuguikuéra kristiáno. ¿Mbaʼére la peichaite okambia?
Saulo ohendu rire Jesúspe, ohechakuaa tuichaiterei ojavy hague. Upépe haʼe orrekonose iñaña ha ijorgullóso hague, ha ojedesidi okambiaitetaha. Haʼe isiégoiti kuri, upévare ojeguerahaka Damáscope ha ohaʼarõ upépe ou peve hendápe peteĩ kristiáno. Saulo ombyasyeterei la ojapo vaʼekue oikóvo ha oñarrepenti ipyʼaite guive, upéicha rupi 3 día voi oajuna. Ikatu ñaime segúro hetaiterei ojeruréne hague Jehovápe operdonamínte hag̃ua chupe opersegi haguére Itaʼýrape. Upéi Jesús omondo hendápe peteĩ kristiáno hérava Ananías. Primerorã Ananías okyhyje kuri oho hag̃ua, péro upéi oho ha omoĩ ipo Saulo akã ári. Upépe hoʼa heságui álgo ojoguáva “pira platakuépe” ha ikatu jeýma ohecha. Entéro koʼã mbaʼe oikóva oipytyvõ Sáulope iñumildeve ha iñaranduve hag̃ua, upéi “opuʼã ojevautisa”.
Péicha oiko Sáulogui kristiáno ha oñepyrũma voi opredika. Péro haʼe ndohói Jerusalénpe, upéva rangue ojapo álgo ijetuʼuvéva. Haʼe opytánte Damáscope ha oho umi sinagóga oĩvape upépe. Posívlemente umi hénte oĩva Damáscope oikuaa porã kuri chupe, upévare Saulo oiméne heta oñemboʼe raʼe Jehovápe ipyʼaguasu hag̃ua. Umi ohendúva guive Páblope opytáne raʼe ijurujaipa. ¡Eñeimahinamíntena la hovakuéra! Koʼág̃a haʼe orrekonose enterovéva rovake ojavy hague, ha heʼi oikomaha avei chugui Jesús disípulo. Ha ndahaʼéi voi upévante, la Biblia heʼi Saulo osegi hague “ipoderosove ha ikatupyryve opredika hag̃ua, ha ohechauka porã umi judío oikóvape Damáscope Jesús haʼeha pe Cristo, ha péicha ojurumboty chupekuéra”.
Saulo oiko aja Damáscope oviaha Arábiape, posívlemente pe desiérto de Síriape. La Biblia ndeʼíri ñandéve mbaʼérepa haʼe oho upépe, péro ikatu ñañeimahina oho hague upépe oĩ hag̃ua haʼeño, ojepyʼamongeta ha oñemboʼe hag̃ua. Ha isentído upéva, pórke hetaiterei mbaʼe ohaʼarõ kuri chupe iservísiope. Saulo ojepokuaa vaʼekue ostudia porã ha ojepyʼamongeta Ñandejára Ñeʼẽre, ha upéicha rupi okambiaite opensa lája ha ótra personaite oiko chugui. Ha tiémpo rire, omokyreʼỹ vaʼekue umi kristiáno oikóvape Rómape ojapo hag̃ua avei upéva (Rom. 12:2).
Saulo núnka ndahesaráiri umi mbaʼe vai ojapo vaʼekuégui. Heta áño upe rire heʼi vaʼekue voi: “Yma che añeʼẽ vai vaʼekue Ñandejárare, apersegi ipuévlope ha cheorgullóso vaʼekue” (1 Tim. 1:13). Ojekuaa avei ombyasyeterei hague oipytyvõ haguére umi ojuka vaʼekuépe Estébanpe (Hech. 22:19-21). Upéicharõ jepe, Saulo oĩ kuri segúro Jehová ha Jesús operdonáma hague chupe ha osegitaha ovendesi chupe.
Saulo opyta kuri Damáscope 3 áñorupi, péro upéi okañýmante vaʼerã upégui pórke oĩ ojukaséva chupe. Upémarõ haʼe osẽ oho Jerusalénpe. Upearã umi ermáno omoĩ chupe peteĩ kanástope ha omboguejy chupe peteĩ ventánarupi. Koʼa peve jahecháma hetaiterei mbaʼe ohasa hague Saulo, péro hetaiterei mbaʼéiti ohaʼarõ hína kuri chupe.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Saulo de Tarso ipyʼaguasu hague?
Einvestigamína
1. ¿Mbaʼérepa Saulo heʼi vaʼekue Tarso haʼeha “peteĩ siuda iñimportánteva”? (Hech. 21:39; w99 15/5 30 párr. 1-wcgr). A
Todd Bolen/BiblePlaces.com
Taʼanga A: Koʼág̃a peve oexisti umi mbaʼe yma oĩ vaʼekue Társope, por ehémplo ko empedrádo
2. ¿Mbaʼérepa jaʼekuaa Saulo oikuaa hague heta mbaʼe umi judío, griego ha rrománogui? (bt 70, rrekuádro, párr. 1-3).
3. ¿Mbaʼérepa Saulo heʼi vaʼekue umi mbaʼe jatopáva 1 Corintios 15:8-pe? (w22.09 27).
4. ¿Mbaʼérepa jaikuaa siertoha la heʼíva Hechos 9:11, 24, 25? (g03 8/2 24-26-wcgr). B
Photo by ROLOC Color Slides
Taʼanga B: Kóva haʼe pe okẽ guasu hérava Bab-Sharqi oĩva Damáscope. Upe peve og̃uahẽ pe kálle “Recta”
Ejepyʼamongetamína ndejehe
Saulo iñumílde vaʼekue ha oheja oipytyvõ chupe Ananías ha hetave ermáno (Hech. 9:17, 18; Col. 4:10, 11). ¿Mbaʼéicha javépa oikoitéta jahejáramo ermanokuéra ñanepytyvõ?
Saulo ikatu kuri oñemombaʼeguasu ijestúdio porã haguére, térã oñembyasyeterei umi mbaʼe vai ojapo vaʼekuére. Péro haʼe ndohejái koʼã mbaʼe ojoko chupe oservi hag̃ua Jehovápe (Flp. 3:4-8; 1 Tim. 1:12-16). ¿Mbaʼéichapa ikatu jasegi iñehémplo? C
Taʼanga C
¿Mbaʼéicha javépa ikatu avei rehechauka ndepyʼaguasuha Saulo ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼérepa reagradese Jehovápe oiporavo haguére Sáulope ogoverna hag̃ua Jesúsndi yvágape?
Reikuaave hag̃ua
Ehechamína mbaʼérepa okambiaite vaʼekue peteĩ karai ojoguaitereíva Sáulope.
¿Mbaʼépa okonvense vaʼekue “Saulo de Sádope” okambia hag̃ua? (5:50).
Saulo ostudia porã vaʼekue Ñandejára Ñeʼẽ, ohayhu ermanokuérape ha iñumílde. ¿Mbaʼéichapa ikatu jasegi iñehémplo?
Ñañehaʼãkena ñambaʼapove Jehovápe g̃uarã apóstol Pablo ojapo haguéicha (w08 1/5 25-28).
a Tiémpo rire, Sáulope oñehenói vaʼekue Pablo. Péro ifasilve hag̃ua, ko kapítulope jaʼétante chupe Saulo.