Avave ndajajesalvái pe ñemanógui

EÑEIMAHINAMÍNA ehechaha peteĩ pelíkula oñeʼẽva peteĩ hugadór de fútvol ifamósovare, ndéve ndegustaiterei voi la ohuga lája. Pe pelíkula oñepyrũre ohechauka umi mbaʼe ohasa vaʼekue imitãme, mbaʼéichapa haʼe oaprende ohuga ha mbaʼeichaitépa opraktika. Upéi ohugáma umi ekípo tuichávape, ha tiémpo rire oiko chugui peteĩ direktór tékniko ivaletereíva. Pe pelíkula opakuévo ohechauka umi mbaʼe tuicháva ohupyty vaʼekue, ha upe rire omano.

Pe istória oñemombeʼúva ko pelíkulape ningo añetehápe oiko jepi. Por ehémplo ikatu oiko peteĩ sientífikore, algún deportístare térã ótra persóna ifamósovare. Koʼãichagua persóna ohupytýramo jepe heta mbaʼe oikove aja, ikatu voi ñañeporandu mbaʼépa ohupytyve vaʼerãmoʼã ndaitujái ha nomanóirire.

Ñambyasýramo jepe enterovéva ikatu ñamano ha ndaikatúi jajoko upéva (Eclesiastés 9:5). Yvyporakuéra ojapóma ikatúva guive ani hag̃ua ituja ha omano, péro ndaipóri káso. Ha ivaiveha katu, derrepénte ikatu jaju ñamano aksidéntepe térã mbaʼasy káusare. La Biblia ningo heʼi voi jajoguaha ‘serrasónpe, oĩva sapyʼami ha upéi opa jeýmava’ (Santiago 4:14).

Heta persóna oimoʼã naisentidoiha la ñande rekove, upévare heʼi hikuái: “Jakaru ha ñamokõ katu, cháke koʼẽrõ ñamanóta” (1 Corintios 15:32). Umi mbaʼe heʼívare hikuái ojekuaa porã orekoitereiha enkuénta pe ñemano. Enterovéva ningo en algún moménto ñañeporandu pearãntepa jaikove, koʼýte jahasa jave peteĩ mbaʼe ijetuʼuetereíva. ¿Mbaʼéichapa ikatu jaikuaa upéva?

Heta oĩ oimoʼãva umi sientífiko osolusionataha ko provléma. Añetehápe umi doktór ha sientifikokuéra ñanepytyvõ jaiko aremie hag̃ua, ha oĩ voi oñehaʼãva hína oikuaa mbaʼéichapa ikatu jaiko areve jey upévagui. Péro lomímonte oĩ unas kuánta kósa jaikuaaséva, por ehémplo: ¿Mbaʼérepa ñandetuja ha ñamano? ¿Opánepa algún día pe ñemano? Umi artíkulo oúva oñeʼẽ koʼã mbaʼére, ha avei orresponde ko porandu: ¿Pearãntepa jaikove?