¿Mbaʼéichapa nde ikatu ehechauka emombaʼeha pe rreskáte?

1, 2. Ñapensávo pe rreskátere, ¿mbaʼépa ñaĩ ovligádo jajapóvo ha mbaʼérepa? (2 Corintios 5:​14, 15). (Ehecha pe taʼanga).

EPENSAMÍNTENA nde haʼeha pe persóna opyta vaʼekue umi eskómbro guýpe pe edifísio hoʼárõ guare, péro peteĩ persóna nepytyvõ esẽ hag̃ua okápe. Katuete reñeñandúta voi en déuda upe persónandi pórke haʼe ndesalva. Upévare ¿mbaʼépa rejaposéta? Katuete ningo ereséta pe persónape reagradesetereiha chupe la ojapo vaʼekuére nderehehápe ha nanderesaraimoʼãiha upévagui.

² Jahecha haguéicha pe artíkulo ohasa vaʼekuépe, ñande ndaikatúi vaʼekue jajei pe pekádo ha ñemano poguýgui ñandejehegui reínte. Pe rreskáte rupive añoite ikatu kuri jahupyty koʼã mbohapy mbaʼe: 1) Oñeperdona ñande pekadokuéra, 2) ikatúta ñandeperfékto amo gotyove, ha 3) jareko jey peteĩ amista Jehová ndive. Avei Jesús sakrifísio rupive jareko la esperánsa jaikóvo pára siémpre Ñandejára múndo pyahúpe. Jesús omeʼẽvo hekove ñande rehehápe ohechauka mbaʼeichaitépa ñanderayhu, haʼe ningo ñanderayhúma vaʼekue voi péicha ou mboyve jepe ko yvy ape ári (Prov. 8:​30, 31). Apóstol Pablo oñeʼẽ vaʼekue ko mbaʼére ha heʼi ‘Cristo mborayhu ñandeovligaha’ (elee 2 Corintios 5:​14, 15). ¿Mbaʼépa heʼise Cristo mborayhu ñandeovligaha? Upéva heʼise la Jesús ojapo vaʼekue ñanemomyiha jahechauka hag̃ua ñamombaʼeha la ojapo vaʼekue ñanderehehápe ha nañanderesaraimoʼãiha upévagui.

3. ¿Mbaʼéichapa ñande jaagradese lája pe rreskáte ikatu idiferénte umi ótrogui?

³ ¿Mbaʼéichapa nde ikatu rehechauka remombaʼeha pe rreskáte? La rembohovái lája ko porandu ikatu hína idiferénte la ótro heʼívagui. ¿Mbaʼérepa? Ñamoĩ chupe mbohapy persóna ohoseha de viáhe el mísmo lugárpe, péro koʼã persóna oiko ojuehegui diferénte siudápe. Upévare mbohapyvéva katuete ojagarráta diferénte tape. Upéicha avei ko artíkulope jahecháta oĩha mbohapy grúpo de persóna, umíva hína umi estudiánte, umi ojevautisámava ha umi oñemomombyry vaʼekue Jehovágui. Koʼã persóna oĩ diferénte situasiónpe, upévare umi mbaʼe ojapóva hikuái oagradese hag̃ua pe rreskáte idiferénteta ojuehegui. Upévare jahechamína mbaʼépa káda uno ikatu ojapo ohechauka hag̃ua omombaʼeha pe rreskáte.

UMI ESTUDIÁNTE DE LA BIBLIA

4. ¿Mbaʼépa Jehová oñandu umi ostudiávare la Biblia?

⁴ ¿Ndépa restudia hína la Biblia? Oimérõ upéicha, ojekuaa nde reaprendeseveha Jehovágui ha umi mbaʼe la Biblia omboʼévagui, avei upéva ohechauka Jehová oipotaha reiko iñamígoramo ha nepytyvõha upearã (Juan 6:44; Hech. 13:48). La Biblia heʼi Jehová “omaña mbaʼépa oĩ káda persóna korasõme”, upéva heʼise haʼe ohechaha reñehaʼãmbaiteha reikuaa porãve hag̃ua chupe, avei haʼe ovyʼaiterei ohechávo rejapoha umi kámbio tekotevẽva haʼe ndeguerohory hag̃ua (Prov. 17:3; 27:11). Pe rreskáte rupive añoite nde ikatu reguereko peteĩ amista iporãva Jehová ndive (Rom. 5:​10, 11). Aníkena arakaʼeve nderesarái upévagui.

5. Oimérõ restudia hína la Biblia, ¿mbaʼéichapa ikatu rejapo la heʼíva Filipenses 3:16?

⁵ Oimérõ restudia hína la Biblia, ¿mbaʼéichapa ikatu rehechauka reagradeseha pe rreskáte? Peteĩva umi mbaʼe ikatúva rejapo haʼe la apóstol Pablo heʼi vaʼekue umi Filipénsepe. Haʼe heʼi vaʼekue chupekuéra: “Oiméramo jahupytýma hína heta mbaʼe, jasegíkena jaiko upéicha ha jaha meme tenonde gotyo” (Filip. 3:16). La apóstol Pablo heʼi vaʼekue ñanemokyreʼỹ ani hag̃ua jaheja mbaʼeve ni avave ñandejoko jasegi hag̃ua jaguata pe tape oporoguerahávare jeikove opaveʼỹvape (Mat. 7:14; Luc. 9:62).

6. ¿Mbaʼépa ikatu ejapo oimérõ ijetuʼu ndéve rentende peteĩ mbaʼe térã ekambia hag̃ua reiko lája? (Deuteronomio 30:​11-14). (Ehecha pe taʼanga).

⁶ Ikatu oime ijetuʼu hína ndéve rentende hag̃ua peteĩ mbaʼe reaprende ramoitéva la Bíbliagui. Oimérõ upéicha ehekákena informasión ha eñemboʼe Jehovápe, haʼe ikatu hína nepytyvõ rentende porãve hag̃ua upe reaprendéva (Sal. 86:11). Péro ani ejepyʼapyeterei lomímonte osegírõ ijetuʼu ndéve rentende hag̃ua peteĩ mbaʼe, ikatúnte emboykeʼimi upe téma ha upe aja esegi estudia la Biblia. Provávlemente kon el tiémpo ifasilvétama ndéve rentende porãve hag̃ua upe mbaʼe. Ikatu oime avei ijetuʼu ndéve remboyke hag̃ua peteĩ mbaʼe Jehovápe ndogustáiva, péro nemanduʼákena Jehová ndojeruremoʼãiha umi umáno imperféktope ojapo hag̃ua peteĩ mbaʼe ndaikatumoʼãiva. Nde ningo ikatu hína reiko Jehová oipotaháicha (elee Deuteronomio 30:​11-14). Jehová voi opromete nepytyvõtaha, upévare aníkena eñentrega (Is. 41:​10, 13; 1 Cor. 10:13). Aníkena epensaiterei umi mbaʼe ijetuʼúvare ndéve, síno ejesarekókena umi mbaʼe porã Jehová ojapóma vaʼekuére nderehehápe. Koʼýte nemanduʼa vaʼerã haʼe omeʼẽ hague Itaʼýra omano hag̃ua nderehehápe. Rehayhuvévo rehóvo Jehovápe rehechakuaáta “imandamientokuéra ndahaʼéi la hasyetereíva ñakumpli hag̃ua” (1 Juan 5:3).a

7. Oimérõ nde tuakuéra haʼe hína Testígo ha restudia hendivekuéra la Biblia, ¿mbaʼe rehepa ikatu ejepyʼamongeta?

⁷ ¿Nde tuakuérapa haʼe Testígo ha restudia hendivekuéra la Biblia? Oimérõ upéicha, nde haʼe hína avei estudiánte de la Biblia. Tuakuérape g̃uarã umi estudiánte iñimportantevéva haʼe hína ifamília. Oimérõ nde restudia hína la Biblia nde tuakuérandi, epensamína ko mbaʼe la Biblia heʼívare: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8; 1 Crón. 28:9). Nde rejapóramo álgo reipotágui Jehová haʼe ne amigoite, ani reduda haʼe avei oñemoag̃uitaha nderehe. Jehová ningo ndojesarekói nderehe nde tuakuéra haʼe rupínte Testígo, síno haʼe oipota kuri ndete voi reñemoag̃ui hese. ¿Ha mbaʼépa la Jehová ojapo vaʼekue ikatu hag̃uáicha pereko oñondive peteĩ amista iporãva? Haʼe omeʼẽ vaʼekue Itaʼýra rekove. Aníkena nderesarái upéva haʼeha peteĩ rregálo ndéve g̃uarãite (Rom. 5:​1, 2). Upévare og̃uahẽvo pe konmemorasión tiémpo ejepyʼamongetákena la Jehová ha Jesús ojapo vaʼekuére nderehehápe. Upéva ikatu hína nemomýi rehupytyse hag̃ua hetave mbaʼe Jehová servísiope, upéicha ikatúta rehechauka remombaʼeha pe rreskáte.b

UMI OJEVAUTISÁMAVA

8. ¿Mbaʼéichapa umi ojevautisáma vaʼekue ohechauka omombaʼeha pe rreskáte?

⁸ Oimérõ nde rejevautisáma, rehechaukáma kuri heta hendáicha remombaʼeha Jesús sakrifísio. Por ehémplo rekambia kuri reiko lája Jehová ndeguerohory hag̃ua ha eiko hag̃ua iñamígoramo. Avei rejapo la Jesús heʼi vaʼekue remombeʼúvo umi notísia porã ha rejapóvo disípulo. Nde reñemeʼẽ kuri avei Jehovápe ha rejevautisa. Ikatu oime oĩ raʼe oñemoĩ mbaretéva nderehe reservi haguére Jehovápe (2 Tim. 3:12). Péro nde reaguanta koʼã mbaʼe ha rehechauka rejeroviaha, péicha ojekuaa nde rehayhuha Jehovápe ha remombaʼeha pe rreskáte (Heb. 12:​2, 3).

9. ¿Mbaʼe rehepa ñañatende vaʼerã entéro umi jajevautisámava?

⁹ Oimérõ ojapóma raʼe un tiémpo jajevautisa hague ñañatende porã vaʼerã peteĩ mbaʼére, ikatu hína jaju nañamombaʼevéi pe rreskáte anteve guaréicha. ¿Mbaʼéicha rupípa upéva ikatu oiko ñanderehe? Ñambohovái hag̃ua upéva jahechamína la oiko vaʼekue umi kristiáno oiko vaʼekuére Éfesope. Jesús oguerohory vaʼekue chupekuéra oaguanta haguére, péro avei heʼi kuri umi kristiánope: “Areko peteĩ mbaʼe haʼe vaʼerã ne kóntrape: nderehayhuvéi Ñandejárape rehayhu haguéicha chupe iñepyrũme” (Apoc. 2:​3, 4). La Jesús heʼíva ohechauka porã jaservívo Jehovápe ikatuha jajapo heta mbaʼe jajapo vaʼerãgui reínte, ha ndahaʼevéima jahayhúgui Jehovápe anteve guaréicha. Por ehémplo peteĩ kristiáno ikatu hína oñemboʼe, oho meme rreunionhápe ha opredika, péro ikatu oime ojapo koʼã mbaʼe ojepokuaágui reíntema ha ndahaʼéi pe mborayhu omomýigui chupe. Upévare, ¿mbaʼépa ikatu jajapo jahechakuaáramo ndajahayhuveimaha Jehovápe anteve guaréicha?

10. ¿Mbaʼéichapa ikatu jajapo la heʼíva 1 Timoteo 4:​13, 15?

¹⁰ Apóstol Pablo heʼi vaʼekue Timotéope ‘ojepyʼamongeta ha opensa meme’ hag̃ua la ikatúvare ojapo Jehová servísiope ha oñemeʼẽmbaite hag̃ua umívape (elee 1 Timoteo 4:​13, 15). Nde avei ikatu ehecha mbaʼépa ikatu ejapo resegi hag̃ua nekyreʼỹ Jehová servísiope (Rom. 12:11). ¿Ha mbaʼe mbaʼépa la ikatúva ejapo? Por ehémplo ifasilvéta ndéve reñatendeve hag̃ua rreunionhápe rejeprepara porãramo rreunión mboyve. Avei restudiáta jave la Biblia rehokuaa peteĩ lugár ikatutahápe reĩ neaño rejepyʼamongeta hag̃ua trankílo porã la reaprendévare. Upéicha pe restudiáva ideprovechovétantema ndéve. Jaikuaaháicha, jasegímante vaʼerã ñamoĩve jepeʼa pe tatápe ani hag̃ua ogue, upéicha avei jasegímante vaʼerã jajapo umi mbaʼe oñemensiona vaʼekue jahechauka hag̃ua kontinuadoite ñamombaʼeha pe rreskáte ha entéro umi mbaʼe Jehová omeʼẽva ñandéve. Avei unas kuánta semána pe konmemorasión mboyve ikatu eaprovecha epensa hag̃ua umi mbaʼe porã Jehová ojapóvare hína ipuévlo rehehápe. Upéva tuicha nepytyvõta evaloravéntema hag̃ua pe rreskáte, pórke upéva rupive añoite la ikatu ñañemoag̃ui Jehováre.

11, 12. Jajúramo un tiémpore nañanekyreʼỹvéi, ¿heʼisépa upéva Jehová nomeʼẽveimaha ñandéve ijespíritu sánto? Emyesakã. (Ehecha pe taʼanga).

¹¹ Ikatu hína un tiémpore jaju nañanekyreʼỹvéi Jehová servísiope, péro aníkena upe haguére ñapensa Jehová nomeʼẽveimaha ñandéve ijespíritu sánto. Ñapensamína apóstol Páblore, haʼe omombeʼu vaʼekue umi Corintoguápe mbaʼéichapa sapyʼánte oñeñandu predikasiónpe. Haʼe heʼi vaʼekue: “Ndajaposéiramo jepe, lomímonte ajapo vaʼerã pórke upéva hína pe traváho oñemeʼẽ vaʼekue chéve” (1 Cor. 9:17). ¿Mbaʼérepa Pablo heʼi vaʼekue upéva?

¹² Apóstol Pablo sapyʼánte ndopredikaséi vaʼekue, péro haʼe lomímonte osegi opredika naikyreʼỹguasúiramo jepe. Nde avei ikatu esegi apóstol Pablo ehémplo ha edesidi ejapotaha la iporãva nderejaposéiramo jepe. Eñemboʼékena Jehovápe ejerure hag̃ua chupe ‘pe deséo ha pe podér rejapo hag̃ua entéro mbaʼe chupe ogustáva’ (Filip. 2:13). Avei ejapo memékena umi mbaʼe nemoag̃uítava Jehováre. Rejapóramo entéro koʼã mbaʼe, ani reduda kon el tiémpo nekyreʼỹ jeytaha anteve guaréicha ha rehayhuvetantemaha Jehovápe.

13. ¿Mbaʼéichapa jahechaukáta jajapoha la heʼíva 2 Corintios 13:5?

¹³ 2 Corintios 13:​5-pe heʼi: “Pesegíkena peñatende pendejehe pehecha hag̃ua pejerovia mbaretépa hína”. Ko téxto ohechaukaháicha sapyʼapyʼánte iñimportánte jahecha mbaʼéichapa jaiko hína. ¿Mbaʼéichapa ikatu jajapo upéva? Por ehémplo ikatu ñañeporandu: “¿Amotenonde memépa hína Ñandejára Rréino?” (Mat. 6:33). “¿Ohechaukápa hína umi vyʼarã aiporavóva ndachaʼeiha umi mbaʼe vaíre?” (Sal. 97:10). “¿Aipytyvõpa hína oĩ hag̃ua pyʼaguapy ha unida kongregasiónpe?” (Efes. 4:​2, 3). Koʼýte konmemorasión tiémpope iñimportánte ñañeporandu koʼã mbaʼe. Jajepyʼamongetávo entéro umi mbaʼe Jehová ha Jesús ojapo vaʼekuére jahechaukasevétantema jaikoseha Cristo oipotaháicha ha ndahaʼéi ñande jaipotaháichante.

UMI OÑEMOMOMBYRY VAʼEKUE JEHOVÁGUI

14. ¿Mbaʼérepa oĩ algúno oñemomombyry vaʼekue kongregasióngui?

¹⁴ Oĩ ningo umi ermáno ha ermána oservíma vaʼekue Jehovápe fiélmente un tiémpore, péro upéi ou oñemomombyry kongregasióngui. ¿Mbaʼérepa? Ikatu oime algúno ‘oñekevrantaiterei raʼe umi mbaʼe oikotevẽvare’ (Luc. 21:34). Algúno katu oñemomombyry oĩ rupi álgien heʼi térã ojapo vaʼekue álgo oofendéva chupekuéra (Sant. 3:2). Avei oĩ umi opeka vaieterei vaʼekue ha otĩ ojerure hag̃ua ajúda. Oimérõ nde reĩ hína koʼãichagua situasiónpe ha reñemomombyry raʼe Jehovágui, ¿mbaʼépa ikatu ejapo? ¿Ikatúpa hína pe rreskáte nemomýi rejapo hag̃ua álgo? Jahechamína.

15. ¿Mbaʼépa Jehová oñandu umi oñemomombyry vaʼekuére kongregasióngui? (Ezequiel 34:​11, 12, 16).

¹⁵ ¿Mbaʼépa Jehová oñandu umi oñemomombyry vaʼekuére kongregasióngui? Haʼe ningo ndaipochýi hesekuéra, ha menovéntema la hesarái hag̃ua mbaʼe chuguikuéra. Upéva rangue Jehová heʼi umi isiervokuéra ojoguaha umi ovecha mimi okañy vaʼekuépe. Haʼe ningo oheka hína umi ijovecha mimíme ikatu hag̃uáicha oñangareko ha omongaru chupekuéra (elee Ezequiel 34:​11, 12, 16). ¿Péro Jehová piko ikatúta ojapo avei upéva nderehe? ¡Kláro ke si! Aníkena eduda mbaʼe upévagui. Nde ningo koʼág̃a relee hína ko artíkulo, ha upéva ohechauka reipotaha gueteri Jehová ndeguerohory. Epensamíntena ko mbaʼére: Jehová ningo ohecha vaʼekue erekoha álgo iporãva, upévare haʼe nemoag̃ui ijehe. ¿Upéicharõ piko haʼe ndaikatumoʼãi nepytyvõ reñemoag̃ui jey hag̃ua kongregasiónre?

16. ¿Mbaʼépa ikatu oipytyvõ umi oñemomombyry vaʼekuépe Jehovágui? (Ehecha pe taʼanga).

¹⁶ Pe folléto hérava Eñemoag̃ui jeýna Jehováre katuete nemokyreʼỹta. Upe follétope heʼi péicha: “Jehová ningo ndegiáta reju jey hag̃ua hendápe. Oiméramo oĩ álgo ndepyʼapýva, ndepochy peteĩ ermánondi térã nemolesta ne konsiénsia, Jehová katuete nepytyvõta resupera hag̃ua umíva ha ikatúta reservi jey chupe ikongregasiónpe”. Aníkena avei nderesarái umi ansiáno nepytyvõsetereiha, la Biblia heʼi haʼekuéra ojoguaha “peteĩ lugár ikatuhápe ñañemoʼã yvytu atãgui. Haʼekuéra haʼetéta peteĩ lugár ikatuhápe ñakañy ama ha torménta vaígui” (Is. 32:2). Katuete ningo nde remombaʼe pe rreskáte ha rehechaukase upéva Jehovápe. Upévare eñeporandumína: “¿Mbaʼépa ikatu ajapo añemoag̃ui jey hag̃ua Jehováre?” (Is. 1:18; 1 Ped. 2:25). Por ehémplo, ¿ikatúpa reho jey rreunionhápe, térã ikatúpa reñeʼẽ peteĩ ansiánondi ha eikuaauka chupe reñemoag̃uise jeyha Jehováre? Haʼe ikatu voi ohecha ndéve peteĩ persóna ikatúvandi restudia la Biblia un tiémpore. Aníkena reduda Jehová ovendesitaha umi mbaʼe rejapóva reñemoag̃ui jey hag̃ua hese, ha avei umi mbaʼe rejapóva rehechauka hag̃ua remombaʼeha pe rreskáte.

¿MBAʼÉPA NDE REJAPÓTA?

17, 18. ¿Mbaʼépa ikatu jajapo og̃uahẽ mboyve pe konmemorasión?

¹⁷ Jesús heʼi vaʼekue pe rreskáte haʼeha entéro umi ohechaukávape g̃uarã ojeroviaha hese, péicha haʼekuéra “noñehundimoʼãi síno ikatúta oikove pára siémpre” (Juan 3:16). Pe rreskáte rupive Jehová ñanepytyvõ ñasẽ hag̃ua pe pekádo ha ñemano poguýgui, upévare ñande siémpre ñamombaʼese upe sakrifísio (Rom. 3:​23, 24; 2 Cor. 6:1). Og̃uahẽvo pe konmemorasión, ñañemotiémpokena jajepyʼamongeta hag̃ua pe mborayhu Jehová ha Jesús ohechauka vaʼekuére ñandéve. Jajapóramo upéva ñañeñandúta voi ovligádo jahechauka hag̃ua chupekuéra agradesimiénto.

¹⁸ Upéicharõ, ¿mbaʼéichapa nde rehechaukáta remombaʼeha pe rreskáte? Jahecháma haguéicha, rembohovái lája ko porandu ikatu hína idiferénte la ótro heʼívagui. Péro aníkena reduda Jehová nevendesitaha ndéve ha entéro umi isiérvo oĩvape ko yvy tuichakuére, pórke peẽ peñehaʼã hína pejapo la Cristo oipotáva ha ndahaʼéi la peẽ peipotávante (2 Cor. 5:15).