Proverbios

7 Taenukajü j̈ua liwaisi apopeyapütaewi baitsi, taniji nej̈ata pewüjüato liwaisi apopenatsiwajünaekanaüjütsinü. 8 Bajaraponü nukapona itsajota nuka petiriwa, bajaraponü pona bajarapowa pijaboyabelia. 9 J̈ua baja tabüjopaya juameto, itsa merawitsia baja, j̈ua aitakirijitsia baja. 10 Nej̈ata taniji petiriwa peponaejawa bajaraponüjawabelia. Bajarapowa naj̈atata bepenaperabükanaj̈etsiwakuenia, najamatabütsipaebiaya pibisialiwaisi. 11 Bajarapowa jitsipa petaejawatsi, apoyaiyatae itsajiwiyo. Bajarapowa kaeto ata pijabota apoekae. 12 Aejonoj̈aeta baja namutota nuka, j̈uakujinae ponaejitsia itsajota jiwi siwaj̈aina; nej̈ata wajünaewetanuka pebijiwi. 13 Nej̈ata bajarapowa waetabalia bajaraponü, upitsutsubalia nej̈ata. Aurajibia nej̈ata bajarapowa jumaitsi: 14 “Ajena ofrendajawa rajutajü Diosojawabelia, rajutajü baja j̈ua Dioso rajutsiapaebajü. 15 Bajaraj̈uata kanakopiajaitatsi, ¡kakaj̈itajarabatsi baja! 16 Jumaj̈aniawaetabuatajü tajacama pej̈aniapanata Egipto nakuajawawerena pepatsijawa. 17 Petuj̈ujuwiranüta mirrara, áloera, canelara yajawa, bajaraporanü jumatopibabuatajü tajacama. 18 Naj̈atsia, nabarümajitsianatsibeje asiwaya daj̈itamerawi; barüyaya nakenetsiataenatsibeje. 19 Tsipaji tamona bojawata apoekae; tajü siwaj̈aina. 20 Tamona kapona palatadoro, patsiana pakujinae tabüjopaenaya juameto”, jai bajarapowa. 21 Nej̈ata bajarapowa jamatabükuenebijiana, pej̈anialiwaisita yamaj̈üitojoroba. 22 Nej̈ata bajaraponü pünapona bajarapowa pakuenia toro bakaponatsi pebeyaj̈uabibojawabeliatsi, pakuenia ata jemajamatabükuenenü bakaponatsi cepojawabelia pekonitsinej̈atsi, 23 pakuenia bakajapa kapitsatajarabatsi j̈uatabota, pakuenia baratsuito puna trampajawabelia, bajarapijinia pakuenia apopenatsiwajünaekanaüjüitsij̈ae papewüjüato tüpaena. 24 Panejumetaema taj̈ijiwij̈i, j̈aniawaetsiakuenia panenamüj̈unaewere. 25 Pütsa najamatabükuenebijianame bajarapowanej̈a. Pütsa nayamaj̈üitojorobiayaej̈aname bajarapowata. 26 Tsipaji bajarapowa jamatabükuenebijiana pebijiwimonae; bajarapowa kajena beyejeba ayaijiwibitsaütomonae. 27 Pejonebiabij̈ae bajarapowa pijabota jiwi tüpabiaba, bajarapamonae piaitakirimutjüjawabereka bobena.