PORTADA LIWAISIJAWA | ¿DEJ̈UAJITSIA BIASAÜMÜ?
2 Kajitajarabianame pekayawenonaekuenejawanünej̈a
“Dioso papecaasivaxae, pacaevetaponapona. Bajaraxuata daxita panejamatabëcuenebëjaijava, pacopare. Pavajëre Diosojavabelia papecayavenonaenexa” (1 PEDRO 5:7).
J̈amü meta najamatabüj̈ainaejitsipame itsa tüpame daj̈italiwaisi katokopiarukaejitsipa. Biji rajane kajitajarabijitsipame pekayawenonaeliwaisijawanü.
Penawajükaejawa. Apobenawajükaetsi saya wajajamatejemanej̈a. Biji rajane nawajükatsi wajabarükuaikuaijainej̈a Diosojawabelia. Bajaraponü kasiwajamatabüenatsi. Bajaraponü jitsipa netsipaebijawa dejamatabükuene itsimü. Dioso pejumeliwaisibaj̈utota kajamatabükueneitoroba nenawajükaenej̈a bajaraponüjawabelia pekayawenonaenej̈a (Salmo 55:22).
Nej̈ata nawajüre aekonoj̈aekujinae Diosojawabelia, wünüakuaikuaijaimüre pewünüta Jehová. Nawajüre nejamatabüüthütojawawerenakujinae (Salmo 62:8). Bajaraponü jitsipa netaejawa bekaeamigonükuenia (Isaías 55:6; Santiago 2:23). Nawajükabiabare kaematakabi kanakujitsia, pakujiane jitsipame, jota ata jitsipame.
Fundación Americana Prevención del Suicidio jumaitsi pina, “pamonae penabeyaj̈uabiwi bejamatabü 90% depresióndomae j̈aina, bajarapamonae yajuwünüwi apoyapütae itsa domaebatsi, bajaraj̈uata nej̈ata apojaitsi médicomonae peyawenonaenej̈atsi”.
Pamonae kaasiwa. Nijamonae, nijaamigowi ata kaasiwa bitso, bajarapamonae ata katsitajüba pekaasiwajawa. Yajawa itsamonae aponeyapütaewi ata, kasiwajamatabüenatsi j̈amünej̈a. Pakuenia itsi Jehová petotsipaebaponaewi. Pakujinae bajarapamonae tsipaebanajetarubena Dioso peliwaisi bokanakujitsia, itsajawata kaj̈itajaraba jiwi bitso penajamatabükuenenabejiobitsiwi. Itsamonae bitso jamatabükuenetüpa, itsiata Jehová petotsipaebaponaewi yawenonatsi. Pakuenia Jesús bajarapamonae siwajamatabüenatsi jiwi, siwajamatabüenatsi yajawa j̈amünej̈a (Juan 13:35).
Médicomonae kayawenonaejitsipa. Pamonae najamatabüj̈ainabiaba penabeyaj̈uabinej̈a tsabiabi tsipaji j̈aina pedomaekuene, depresión pejaijume. Itsa j̈amü bajarapadomae j̈ainame, pütsa aüramü tsipaji bajaraj̈ua bewajaj̈ainaekuene itsa kujiruwitanekuene wajaperabütota. Jiwimonae j̈aina depresióndomae. Itsiata baitsi jane bajaraj̈uajawawekua jumeyabatsi j̈uakujinae.a
NAJAMATABÜNAPIRE: Depresióndomae bemüthüj̈aneto ayapübeje wajawekuapitsapaejawa. Itsa itsajiwiyo nakayawenona nej̈ata bajarajota wekuapitsapaejitsipatsi.
J̈UA BEITSIMÜ: Jaire médicowi pekayawenonaenej̈a. Bajarapamonae yapütane depakuenia ajibiaej̈anaejitsipa depresióndomae.
a Itsa jamatabünabeyaj̈uabame nej̈ata jaire pekayawenonaenej̈a. Junare pamonae nakueneba prevención del suicidio jawata, itsa jume ponare hospitaljawabelia médicomonae pekayawenonaenej̈a.