Najamatabünapire Lot pijawami peliwaisi

Lot ponapona Canaán nakuajawata, paj̈uanü Abrahánjawata. Apokuenekaüjüpaetsibeje kaejawata penajuaponaponaenej̈abeje, tsipaji bajaraponübeje baja j̈ainaponabeje ayaibitsaüto dajubi. Bajaraj̈uata, Abrahán jumaitsi Lotjawabelia: “Aponakakuenekaüjüpaebeje baja wajaponaponaenej̈abeje bajarapataj̈unaeta. Nej̈ata, itapere panakuayabelia ponaejitsiamü neponaponaenej̈a, j̈anü pijinia ponaenajü itsajawabelia”. Abrahán pepo pej̈aniakuenenü, ¿baja tsikaena jane?

Lot itapeta pejinawanapaenej̈a, pijamonae yajawa pej̈anianakua Sodoma tomara imoj̈oyojawata, tsipaji bajarapanakua j̈aina pej̈aniameranü, pej̈aniaponaraünaejawa ata.

Gomorra tomara yajawa Sodoma tomara imoj̈oyo ekabeje, bajarapatomarabejepijiwimi pepo piakuenebejewi. Bajaraj̈uata nej̈ata Jehová jitsipa pewerebiabijawa bajarapatomarabeje. Itsiata Dioso jitsipa pekapanepaejawa Lot, pijamonae yajawa, nej̈ata Jehová itoroba pijaángelnübeje pejumaitsinej̈a pakueniaje: “¡Naj̈atsiayo! ¡Paponare baja bepijia patomarajewekua! ¡Jehová kajena werebiabijitsia!”.

Itsiata Lot pikani abaj̈ü najamatabüjematapona. Bajaraj̈uata ángelnübeje komakapitatsi Lot, pijawa, pej̈unatoyobeje yajawa pekapitsapaenej̈atsi bajarapatomarawekua. Bajarapaángelnübeje jumaitsitsi: “¡Pabitsojinare bajarabelia panewekuapanepaenej̈a, pütsa panekowüyabelia panapijiwinaükotame! Tsipaji itsa bajarapakuenia paitsimü, patüpaejitsipame”.

Pakujinae bajarapamonae pata Zóar tomarajawabelia, nej̈ata Jehová beemakuenia otjopaiej̈anaeka pitarutsiibotonü azufrejawanü, Sodoma, Gomorra tomarabejejawatsika. Nej̈ata bajarapatomarabeje werewerekabeje. Lot pijawami apojumekowünütsi Jehová, bajaraj̈uata napijiwitaejopa pekowüyabelia, nej̈ata naej̈anajopa yajoiboto. Biji rajane, Lot pej̈unatoyobeje yajawa kapanepatsi pejumekowünütsij̈ae Dioso, bajaraj̈uata bajarapamonae jamatejema jinawanapa. Itsiata baitsi jane, bitso siwanajamatabüj̈aina bajarapowami apopejumekowünütsij̈ae Dioso.