Pepua perujujiwibeje ata, itsiata pej̈ünato j̈aina

Abrahán, Sarabeje penacasabikujinaebeje ayaiwaimonae ponaponabeje. Bajarapajiwibeje pej̈aniabo wekuaponabeje Ur tomarawekua peponaponaenej̈abeje carpabojawabelia. Itsiata Sara aponajamatabüj̈ainae tsipaji najamatabükuenekopata Jehovájawabelia.

Sara jitsipa pej̈ainaejawa penakuetonüyo, bajaraj̈uata jumaitsi Abrahánjawabelia: “Itsa tanetonakuenebiwa Agar katoj̈ainaena pej̈ijiwiyo, nej̈ata bajarapanakuetojiwiyo betaj̈ijiwiyokuenia tataenej̈a”. Itsamatakabi, Agar pej̈ünatonüyo j̈aina, wünüruba Ismael.

Bajayajebitakujinae, pakujinae Abrahán j̈aina 99 pawaibeje, Sara j̈aina 89 pawaibeje, akueyabi pajiwibeje siwaj̈ainatsi. Abrahán nej̈ata junata penakueraewetsinej̈a naejawa pebüj̈üpanata, penabanenej̈a ata. ¿Yapütaneme meta pamonaekuene? Bajarapamonae raja ángelewi. Nej̈ata bajarapamonae jumaitsi Abrahánjawabelia: “Aekonoj̈ae pawai, j̈amü, nijawa yajawa nej̈ijiwiyo paj̈ainaenamebeje”, jaitsi ángelewi. Sara itsiata jumetaeyeka carpabojawata, pejumetaekujinae bajarapaliwaisi, bajarapowa büpünüa jamatabükuenejüajüajai. Jamatabüjumaitsi: “¿J̈ania jai meta j̈ainaenajü pejewaj̈ijiwiyo perujuwa atanü?”.

Itsawaijawatalia, Sara penakuetonüyo j̈aina, pakuenia Jehová pijaángelnü najumekapanepaeya jumaitsi. Abrahán wünüruba penakuetonüyo Isaac, bajarapapewünü “pejüajüajaijawa” pejailiwaisi.

Pakujinae Isaac j̈aina cinco pawaibeje, Sara tane Ismael pekapokaponaejawa Isaac. Bajarapowa jitsipa peewetsijawa pej̈unato, bajaraj̈uata jumaitsi Abrahánjawabelia: “Ponae baja Agar, Ismael yajawa”. Kopiaya Abrahán pikani apotsitaj̈anepanaetsi. Itsiata baitsi jane, Jehová ata jitsipa peewetsijawa Isaac, bajaraj̈uata jumaitsi Abrahánjawabelia: “Itsimüre pakuenia Sara kajumaitsi. J̈anü raja ewetsianajü Ismael. Najumekapanepaeya jumaitsinü Isaacnüyojawawelia pepitsapaponaenej̈a nemomoj̈i”.