LIWAISI 8
Abrahán, Sarabeje jumekowünütabeje Dioso
Babel tomarajawata imoj̈oyo eka itsatomara pewünü Ur. Bajarapatomarajawata jiwi apoyaiyatae Jehová, biji rajane yaiyataeyabiaba bitso itsadiosowi. Itsiata Ur tomarajawata itsanü Jehová yaiyataeyabiaba, pewünü Abrahán.
Jehová jumaitsi Abrahánjawabelia: “Wekuaponare nijabo, nijamonae ata neponaenej̈a pairajawabelia katsitajütsijitsiatsi”. Bajaraj̈uakujinae, Dioso najumekapanepaeya jumaitsi: “Bajarajotalia ayaibitsaüto nemomoj̈i naej̈anaponaena, ayainakua kapitsapaenajünua. Ayaikuenia pej̈aniakuenia kayawenonaenatsi, katokopatsianatsinua pej̈aniakuene daj̈itanakuapijiwinej̈a”.
Abrahán raja apoyapütae panakuayabelia Jehová itorobijitsiatsi, itsiata najamatabükuenekopata Jehovájawabelia. Abrahán, pijawa Sara, paj̈a Taré, pejianü Lot ata bajarapamonae jumekowünüta Dioso. J̈aniawaeta pekobekowüjawanü pewarapaenej̈a itsanakuajawabelia.
Abrahán j̈aina 75 pawaibeje, pakujinae pijamonae yajawa pata paira Jehová tsitajüta pejinawanapaenej̈a. Bajarapanakua pewünü Canaán. Bajarajota Jehová najumekapanepaeya jumaitsi: “J̈ua daj̈ita taneme panijaira tsane, karajutsianatsi daj̈itanej̈inej̈a”. Itsiata baitsi jane Abrahán, Sarabeje baja perujujiwibeje, apoj̈ainaebeje pej̈i ata. Nej̈ata ¿depakuenia najumekapanepaejitsipa Dioso bajarapaliwaisi?
“Abrahampijinëmi ata najamatabëcuenecopata Diosojavabelia. Nexata Dioso itsa itorobatsi Abrahampijinë pevecuapitsapaenexa pijanacuami, jumecovënëta. [...] Panacua Dioso rajutsiapaebatsi, bajarapanacuayabelia pona. Abrahampijinë abaxë apo natsivajënaeyapëtae ata panacuayabelia patsijitsia” (Hebreos 11:8).