Babel tomarata piapiaboj̈aneto

Jehová pebubutsiaej̈anaekujinae ira, Noé akueyabi papej̈ijiwibeje, pijawajiwi yajawa pej̈i ayaibitsaütoj̈aina. Nej̈ata Noé pemomoj̈i daj̈itanakuanüjawa yawünüka, Jehová pitorobikueniatsi.

Itsiata itsamonae apojumekowünütsi Jehová, nej̈ata bajarapamonae jumaitsi: “Jota jinawanapaenatsi wajanakuenebinej̈a wajatomarayo, wajanakuenebanutsinej̈anua piapiaboj̈aneto pepatsinej̈a itaboj̈ojawabetsia. Bajarapakuenia nakawünüliwaisitaena jiwi”.

Jehová itsiata apotsitaj̈anepanaetsi j̈ua itsi tsawanapae bajarapamonae, bajaraj̈uata kueneitawetatsi. ¿Yapütaneme j̈ua itsi Jehová? Jematsia Jehová pejumeaitotjiana jamatejema penajumeyapütaeyaniwa. Jiwi bajarapatomara wünüruba Babel, tsipaji bajarajota Jehová kaejume pekuaikuaijaiwimi jumeaitotjiana. Bajarapamonae namataenetsia apopenajumetaej̈ae, nej̈ata kopaba baja penakuenebijawa bajarapapiapiaboj̈aneto. Kaejumewi kanakujitsia nawekuanatsana, kayajatsiaya daj̈itanakuajawa. Itsiata tsitekaeya pibisiakuenejawanü itsi tsawanapae. ¿Bajarapamonaejawata meta abaj̈ü itsiata itsajiwiyo Jehová asiwa? Yapütaenatsi itsaliwaisijawata.